¹ Takar mila’ mola si Yesus wia se tou kelaker wo wia se murid-murid-Na, pokeiy-Na: ² “Rinuberanouw ne ahli-ahli Taurat wo ne tou-tou Farisi eng kadera ni Musa. ³ Kaa ni’itu mouw ki’itanola wo tuananola e reiy’ sa mina’asa wo’o sapa e neiy i turu’ neala wia nikoo, ta’an te’a mouw ki’itan niouw em pasiwo-siwon nea, karengan nisea se maturu’la nyi’a ta’an se reiy’ matuanala nyi’a. ⁴ Nisea se mewa’akes em pemesa’anen-pemesa’anen wuter, laa o rumeta’la nyi’a witu e natas em paluka ni tou, ta’an nisea nuesa se reiy’ pa’ar lumelerla nyi’a. ⁵ Em baya em pepa’ayangen tinuana neala eng kepa’ar nea i te rio loo’on ne tou; nisea se minake en tali sombayang le’ar wo en jumbai labot; ⁶ nisea se pa’ar maruber witu en tampa paormaten witu em pesakeiyan wo witu en tampa kasa rerior witu e wale ibadat; ⁷ nisea se pa’ar maka’ato e normat witu em pasar wo pa’ar pakereten Rabi. ⁸ Ta’an nikouw, te’a mouw kouw patotoren Rabi; karengan si esa i te si Rabimu wo nikouw nu waya kouw matuari. ⁹ Wo te’a mouw kouw tumotor si seiy i te tu’u ama’ wia em bumi yi’i, karengan si esa i te si Ama’mu, nyi’a i ti’i Nisia si waki sorga. ¹⁰ Te’a mouw kangkasi kouw totoren pa’aka-aka’an, karengan si esa i te si Pa’aka-aka’annu, nyi’a i ti’i si Mesias. ¹¹ Seiy i te si kasa wangko’ witu e nelet miouw, satorona sia si mamuali pelayanmu. ¹² Wo seiy i te si merakekla en tetou sia si laa i kumengla wo seiy i te si kimumengla en tetou, sia si laa i rakekla. ¹³ Cilaka mouw kouw, heiy ahli-ahli Taurat wo tou-tou Farisi, heiy kouw tou-tou munafik, karengan kouw kimusi’ em pepalen-pepalen Keraja’an Sorga witu en sinaru ne tou. Karengan kouw nuesa reiy’ ghimorem wo kouw minape’la nisea se me’inakut megheghorem. [ ¹⁴ Cilaka mouw kouw, heiy ahli-ahli Taurat wo tou-tou Farisi, heiy kouw tou-tou munafik, karengan kouw nime’enep em bale ne balu-balu kasuatan kouw limi’ibusla em beren ne tou ampit en sesombayangen labot-labot. Kaa ni’itu kouw tantu mouw laa maka’ato nukuman lumantouwla eng kawuter.] ¹⁵ Cilaka mouw kouw, heiy ahli-ahli Taurat wo tou-tou Farisi, heiy kouw tou-tou munafik, karengan nikouw kouw sumusu e lawanan wo tumete eng ketana’an, kaa mapa i kedo’la siesa tou i te si mamuali maki’i-ki’it e nagamamu wo sia nu minakedo’ mouw, nikouw kouw simiwola nisia sitou e naraka, si makaruala lebe lewo’ ta’an nikouw nuesa. ¹⁶ Cilaka mouw kouw, heiy pa’aka-aka’an- pa’aka-aka’an rapa, se meiyla’: Matiwa’ demi em Bait Suci, en tiwa’ i ti’i e reiy’ sah; ta’an en tiwa’ demi e mas Bait Suci, en tiwa’ i ti’i mina’akes. ¹⁷ Heiy kouw tou-tou we’engel wo tou-tou rapa, sapa ku’a re’en eng kasa pemandungen, e mas ka’apa em Bait Suci e makudusla e mas i ti’i? ¹⁸ Matiwa’ demi e mezbah, en tiwa’ i ti’i e reiy’ sah; ta’an matiwa’ demi en sesempe witu e natasna, en tiwa’ i ti’i mina’akes. ¹⁹ Heiy kouw tou-tou rapa, sapa ku’a re’en eng kasa pemandungen, en sesempe ka’apa mezbah e makudusla en sesempe i ti’i? ²⁰ Kaa ni’itu seiy i te si matiwa’ demi e mezbah, sia si matiwa’ demi e mezbah wo kangkasi demi e reiy’ sa mina’asa wo’o sapa e rimeta’ witu e natasna. ²¹ Wo seiy i te si matiwa’ demi em Bait Suci, sia si matiwa’ demi em Bait Suci wo kangkasi en demi nisia, si minena’ witu. ²² Wo seiy i te si matiwa’ demi en sorga, sia si matiwa’ demi en takhta ni Empung wo kangkasi en demi nisia, si rimuber witu e natasna. ²³ Cilaka mouw kouw, heiy ahli-ahi Taurat wo tou-tou Farisi, heiy kouw tou-tou munafik, karengan esa nga mapulu witu en selasih, adas emis wo en jintan e winear miouw, ta’an eng kasa pemadungen witu e nukum Taurat reiy’ padungen niouw, nyi’a i ti’i: eng ka’adilan wo en tongkoupusen wo eng kelale’an. Nesa e lewo’ sa reiy’ tinuanala wo em balina te’a i pewayala. ²⁴ Heiy kouw pa’aka-aka’an-pa’aka-aka’an rapa, rongit witu eng gorem kekoo’on niouw en tinapis miouwla, ta’an si unta witu eng goremna nine’enep miouw. ²⁵ Cilaka mouw kouw, heiy ahli-ahli Taurat wo tou-tou Farisi, heiy kouw tou-tou munafik, karengan en cawan wo em pinggan wineresi miouwla esa nga weka luarna, ta’an esa nga weka goremna wuta eng kinaat wo eng kalo’omotan. ²⁶ Heiy tou Farisi rapa, weresine’la ketare esa nga weka gorem en cawan i ti’i, takar esa nga weka luarna kangkasi e laa maweresi. ²⁷ Cilaka mouw kouw, heiy ahli-ahli Taurat wo tou-tou Farisi, heiy kouw tou-tou munafik, karengan nikouw kouw masuat tanu eng kubur linabur em puti’, esa nga weka luarna memang weresi paloo’ola, ta’an esa nga weka goremna e wuta ruiy wo mineghe ghioan e riberek. ²⁸ Tuana mouw kangkasi kouw, witu esa nga weka luar miouw, paloo’ola ulit witu em beren ne tou, ta’an witu esa nga weka eng gorem miouw e wuta kamunafikan wo eng kadurjana’an. ²⁹ Cilaka mouw kouw, heiy ahli-ahli Taurat wo tou-tou Farisi, heiy kouw tou-tou munafik, karengan kouw maredeiy e waruga ne nabi-nabi wo mewangunla en tugu ne tou-tou saleh ³⁰ 30 wo lumila’: Sa ta matou-tou witu en zaman ne nene moyang ta, tantu mouw keiy reiy’ kumi’it ampit nisea witu e winunu’an se nabi-nabi i ti’i. ³¹ 31 Ta’an tuana mouw kouw simairi witu en tetou miouw nuesa, kaa nikouw mouw kouw see’ ne minunu’ se nabi-nabi i ti’i. ³² Jadi, wutanola kangkasi e nukuran ne nene moyang mu! ³³ Heiy kouw leloiy’-leloiy’, heiy kouw see’ ni leloiy biludak! Wo’o kumura wona’ ku’a kouw toro lumempotla en tetou witu e nukuman naraka? ³⁴ Kaa ni’itu, loo’onouw, Niaku ku timoke wia nikoo se nabi-nabi, se tou-tou bijaksana wo se ahli-ahli Taurat: esa nga parua witu e nelet nea se laa wunu’un niouw wo e salib miouwla, se walina se laa wewen niouw witu e wale-wale ibadatmu wo ghioan niouw waki kota wo eng kota, ³⁵ rio kouw mesa’an e minamuali kinatoa’an e raa’ ne tou reiy’ si selok muleiy waki si Habel, tou ulit i ti’i, i ka’ayo wia si Zakharia urang ni Berekhya, si winunu’ miouw witu e nelet en tampa kudus wo e mezbah. ³⁶ Niaku lumila’me wia nikoo: Kaulitena em baya nyi’a yi’i e laa pesa’anen ne angkatan yi’i!” ³⁷ “Yerusalem, Yerusalem, nikoo koo minunu’ se nabi-nabi wo limawala ampit em batu se tou-tou neiy i toke wia nikoo! Makapira Niaku lumelo ma’arurla se oki-oki’mu, masuat tanu si ko’oko’ ma’arurla se oki-okina witu e rarem eng kale’ekewna, ta’an nikouw kouw so’o. ³⁸ Loo’onola em balemu yi’i e laa i tele’ula wo mine kasa penes. ³⁹ Wo Niaku lumila’me wia nikoo: Rengan e yi’i kouw reiy’ mouw laa lumoo’ Niaku kasi, i ka’ayo kouw lumila’: Binerkatola Sia si mineiy witu e ngaran ni Tuhan!”