¹ Witu en te’un kamapulu’ o lima witu em paperenta’an ni Kaisar Tiberius, katoroan si Pontius Pilatus minamuali wali em banua Yudea, wo si Herodes si raja wilayah Galilea, Filipus, patuarina, si raja wilayah Iturea wo en Trakhoitis, wo si Lisanias si raja wilayah Abilene, ² witu e nedo si Hanas wo si Kayafas se minamuali Imam Wangko’, meiy mouw e nuwu’ ni Empung wia si Yohanes, oki’ ni Zakharia, waki padang gurun. ³ Takar meiy mouw si Yohanes waki minapekasa en daerah Yordan wo maaleiyla: “Makedo’ mola wo i wee mouw en toumu baptisen wo si Empung si laa mampungla en dosamu, ⁴ tanu wawean neiy i kepatik witu em buuk nubuat-nubuat ni Yesaya: Wawean palingan si mengale-ngaleiy waki padang gurun: Tiro’onola e lalan i wee si Tuhan, rondorenola e lalan i wee-Nisia. ⁵ Susur eng kewong e laa tawunan wo susur eng kuntung wo eng kentur e laa merampen, e mine reko-reko’ e laa terenen, e mine ngewo-ngewong e laa pataren, ⁶ wo em baya ne tou se laa lumoo’ eng kelawiran waki si Tuhan.” ⁷ Laa o sia lumila’ wia se tou kelaker se mineiy wia nisia kaa neiy pebebaptisen, pokeiyna: “Heiy kouw see’ ni leloiy biludak! Seiy ku’a re’en si limila’la wia nikouw rio tumingkasla en tou witu e murka laa meiy? ⁸ Jadi i wua’ mola e wu’ana-wu’ana minatoroan ampit em pakedo’an. Wo te’a mouw maghenangla witu e natemu: Kaa si Abraham nisia mouw si ama’ meiy! Karengan niaku ku lumila’me wia nikoo: Si Empung si toro i te sumiwola se watu-watu i yi’i mamuali oki-oki’ i wee si Abraham! ⁹ Pati en sadia mouw witu eng kalat e nakana wo susur e nakana reiy’ mawua’la wu’ana le’os e laa pelen wo i tea’ witu napi.” ¹⁰ Se tou kelaker se minueiy wia nisia: “Sa tuana sapa ku’a re’en e lewo’ sa reiy’ siwon neiy? “ ¹¹ Wingkotna: “Seiy i te si makapunya rua nga ketor labung, satorona nisia si metengla nyi’a ampit se reiy’la, wo seiy i te si makapunya kekaanen, satorona nisia kangkasi si sumiwola en tuana.” ¹² Mineiy kangkasi se mememurut-mememurut cukai kaa neiy pebebaptisen wo nisea se minueiy wia nisia: “Guru, sapa ku’a re’en e lewo’ sa reiy’ siwon neiy?” ¹³ Wingkotna: “ Te’a makiwee lumantouwla eng kelaker witu en sapa neiy mouw i tantula i wee nikoo.” ¹⁴ Wo se perajurit-perajurit kangkasi se minueiy wia nisia: “Wo nikeiy, sapa ku’a re’en e lewo’ sa reiy’ siwon neiy? Wingkot ni Yohanes wia nisea: “Te’a mekaat wo te’a maperas wo pa’awesenola en toumu ampit en tetoromu.” ¹⁵ Ta’an eng karengan se tou kelaker se kasuatan ma’ena’ wo ma’arap, wo em baya nea se mawueiy witu e nate nea en tanume si Yohanes, wo’o wona’ nisia mouw si Mesias, ¹⁶ Yohanes si miningkot wo limila’ wia em baya se tou i ti’i: “Niaku ku mebaptis nikouw ampit en dano, ta’an Nisia si lumantouwla eng kuasa ta’an wia niaku si laa meiy wo mewewuka’la en tali kasut-Na tu’u niaku ku reiy’ waar. Nisia si laa maptis nikouw ampit e Roh Kudus wo ampit e napi. ¹⁷ Niu witu mouw e lawas-Na kaa laa meweweresila en tampa peirikan-Na wo kaa laa ma’erurla eng gandum-Na witu eng gorem e lumbung-Na, ta’an e riawu en daami i ti’i e laa tunun-Na witu e napi reiy’ kawunu’an.” ¹⁸ Ampit eng kelaker teturu’ walina si Yohanes si maabarla e Injil wia se tou kelaker. ¹⁹ Ta’an nisia nu timogorla si Herodes raja wilayah karengan em peristiwa ni Herodias, ka’awu ni patuarina, wo karengan e reiy’ sa mina’asa kalewo’an walina en tinuananala, ²⁰ si raja i ti’i si minawes eng kalewo’anna ampit ghimoremla si Yohanes witu eng gorem em pejara. ²¹ Katoroan em baya ne tou kelaker i ti’i se binaptisola wo katoroan si Yesus kangkasi si binaptisola wo eng kasuatan masombayang, o mawuka’ mouw e langit ²² wo tumumpa mouw e Roh Kudus minasar si Pombo mineiy witu natas-Na. Wo kaling’anouw en suara waki langit: “Nikoo mouw si Oki-Ku neiy-Ku i keupus, wia-Nikoo mouw Niaku mepa’ar.” ²³ Katoroan si Yesus nu mememuleiy em pepa’ayangen-Na, Nisia si makaumur wo’o wona’ telu nga pulu’ nge te’un wo i ki’it em paloo’ala ne tou, Nisia nyi’a mouw si urang ni Yusuf, urang ni Eli, ²⁴ urang ni Matat, urang ni Lewi, urang ni Malkhi, urang ni Yanai, urang ni Yusuf, ²⁵ urang ni Matica, urang ni Amos, urang ni Nahum, urang ni Hesli, urang ni Nagai, ²⁶ urang ni Maat, urang ni Matica, urang ni Simei, urang ni Yosekh, urang ni Yoda, ²⁷ urang ni Yohanan, urang ni Resa, urang ni Zerubabel, urang ni Sealtiel, urang ni Neri, ²⁸ urang ni Malkhi, urang ni Adi, urang ni Kosam, urang ni Elmadam, urang ni Er, ²⁹ urang ni Yosua, urang ni Eliezer, urang ni Yorim, urang ni Matat, urang ni Lewi, ³⁰ urang ni Simeon, urang ni Yehuda, urang ni Yusuf, urang ni Yonam, urang ni Elyakim, ³¹ urang ni Melea, urang ni Mina, urang ni Matata, urang ni Natan, urang ni Daud, ³² urang ni Isai, urang ni Obed, urang ni Boas, urang ni Salmon, urang ni Nahason, ³³ urang ni Aminadab, urang ni Admin, urang ni Arni, urang ni Herson, urang ni Peres, urang ni Yehuda, ³⁴ urang ni Yakub, urang ni Ishak, urang ni Abraham, urang ni Tera, urang ni Nahor, ³⁵ urang ni Serug, urang ni Rehu, urang ni Pelek, urang ni Eber, urang ni Salmon, ³⁶ urang ni Kenan, urang ni Arpakhsad, urang ni Sem, urang ni Nuh, urang ni Lamekh, ³⁷ urang ni Metusalah, urang ni Henokh, urang ni Yared, urang ni Mahalaleel, urang ni Kenan, ³⁸ urang ni Enos, urang ni Set urang ni Adam, urang ni Empung.