¹ Yesus, si wuta ampit e Roh Kudus, marengi waki temberan Yordan, laa o alin ni Roh Kudus waki padang gurun. ² Witu Nisia si minena’ epat nga pulu’ nga endo eng keurena wo wina’awa’an ni Iblis. Eng keurean nu witu Nisia si reiy’ kimaan sapa-sapa wo nu reiy’ mouw e nedo ni’itu o Sia maarem. ³ Laa o lumila’ mouw si Iblis wia-Nisia: “Sa Koo urang ni Empung, reo mouw se watu i yi’i mamuali roti.” ⁴ Wingkot ni Yesus wia nisia: “Wawean neiy i kepatik: Sitou si matou-tou reiy’ witu e roti i te.” ⁵ Kamurian sia mali si Yesus waki e nesa tampa rakek wo reiy’ pini’ipitan weren wo sia mapaloo’ola wia-Nisia em baya eng keraja’an sorga. ⁶ Pokeiy ni Iblis wia-Nisia: “E reiy’ sa mina’asa kuasa i ti’i ma’an eng kamulia’anna e laaku i weela wia-Nikoo, karengan em baya nyi’a i ti’i neiy mouw i sarakan wia niaku wo niaku ku meweweela nyi’a wia si seiy i te si neiy ku i kepa’arla. ⁷ Jadi sa Koo sumempe niaku, minapekasa ni’itu e laa mamuali punya-Mu.” ⁸ Ta’an si Yesus si limila’ wia nisia: “Wawean neiy i kepatik: Nikoo koo lewo’ sa reiy sumempe si Tuhan, si Empungmu wo wia i te Nisia koo lumukar!” ⁹ Kamurian sia mali si Yesus waki Yerusalem wo tumampala Nisia witu en songkouw em Bait ni Empung, laa o lumila’ wia-Nisia: “Sa Koo Oki’ ni Empung, mapalenta’ mola en tou-Mu wia nyi’i o mawa’, ¹⁰ karengan wawean neiy i kepatik: En tanume Nikoo, Nisia si laa merentala se malaikat-malaikat-Na kaa laa kumedirla Nikoo, ¹¹ wo nisea se laa malar Nikoo witu natas e lawas nea, rio e ne’a-Mu te’a i kasu’usu’ witu em batu.” ¹² Yesus si miningkot nisia, pokeiy-Na: “Wawean e nuwu’: Te’a koo mewewa’awa’ si Tuhan, Empungmu!” ¹³ Si Iblis nu simampetola em pewa’awa’an i ti’i, sia munduri wia-Nisia wo ma’ena’ e nedo le’os. ¹⁴ Witu eng kuasa Roh o marengouw si Yesus waki Galilea. Wo rumangketouw e nabar tanume Nisia waki minapekasa en daerah i ti’i. ¹⁵ Kasuatan e ni’itu Nisia si mawee teturu’ witu e wale-wale ibadat witu wo em baya ne tou se malo’or Nisia. ¹⁶ Sia meiy waki Nazaret en tampa Nisia nu sinelami, wo i ki’it eng kenaramen-Na witu e nendo sabad Nisia si ghumorem witu e wale ibadat, laa o rumedeiy kaa laa mewewaca waki Kaol ¹⁷ Wia Nisia si wineeanla eng kaol ni nabi Yesaya wo eng kinewewuka’-Nala, Sia matola e nats, witu e wisa wawean neiy i kepatik: ¹⁸ “E Roh ni Tuhan em bia-Niaku’, karengan Nisia si minisu’ mola Niaku, kaa laa mepepa’ayola e nabar le’os wia se tou-tou miskin; wo Nisia si timoke mouw Niaku ¹⁹ kaa laa ma’abarla eng kaliseiyan wia se tou-tou tawanan, wo em pineleloo’ wia se tou-tou rapa, kaa laa mewewayala se tou-tou siniasa, kaa laa ma’abarla en te’un rahmat ni Tuhan mineiy mouw.” ²⁰ Kamurian Sia menetla eng kaol i ti’i, o meela nyi’a sumeup wia si pejabat, laa o rumuber; wo em beren em baya ne tou witu eng gorem wale ibadat i ti’i neiy i kawuyut wia-Nisia. ²¹ Laa o Sia muleiy mee teturu’ wia nisea, pokeiy-Na: “Wia e nendo i yi’i lekepouw e nats i yi’i witu e nedo nikouw nu liminga nyi’a.” ²² Wo em baya ne tou i ti’i se minulitla Nisia wo nisea se ma’erang witu e lelila’an-lelila’an wangun neiy i totor-Nala, laa o pokeiy nea: “Reiy’ ku’a re’en Nisia i yi’i si urang ni Yusuf?” ²³ Takar lumila’ mouw Sia wia nisea: “Tantu nikouw kouw laa lumila’la em pepatah i yi’i wia-Niaku: Heiy mengelot, le’osenola en tou-Mu nuesa. Siwonola wia nyi’i kangkasi, wia en tampa asal-Mu i yi’i, e reiy’ sa mina’asa lininga meiy minamuali mola waki Kapernaum!” ²⁴ Wo pokeiy-Na kasi: “Niaku ku lumila’me wia nikoo, eng kaulitna reiy’la si nabi si paarga’an witu en tampa asalna. ²⁵ Wo Niaku ku lumila’me wia nikoo, wo em peila’-Ku i yi’i e nulit: Witu en zaman ni Elia niatoan kelaker se wewene balu waki Israel eng katoroan e langit mina penet eng keurean telu nge te’un wo enem nga sumedot wo eng katoroan em bahaya kelalenan ee pasil en timoro e minapekasa em banua. ²⁶ Ta’an si Elia si neiy i toke reiy’ wia si meta’asa’an wia nisea, ta’an i te wia siesa wewene balu waki Sarfat, waki tana’ Sidon. ²⁷ Wo witu en zaman ni nabi Elisa kelaker se tou kusta waki Israel wo reiy’la siesa tou tu’u si linenasla, reiy’ siwalina ta’an i te si Naaman, sitou en Siria i ti’i.” ²⁸ Liminga ni’itu kasa mouw meupi’ em baya ne tou se witu e wale ibadat i ti’i. ²⁹ Sea rumedeiy, laa o rumawir si Yesus mea waki luar kota wo mali Nisia waki ri’iping eng kuntung, en tampa eng kota i ti’i rimeta’, kaa laa melelawala Nisia witu e ri’iping i ti’i. ³⁰ Ta’an Nisia si kimelang limangkoiyi eng keuneran nea, laa o mea. ³¹ Kamurian Yesus si minea waki Kapernaum, e nesa kota waki Galilea, laa o mawee teturu’ witu witu e nendo-nendo Sabad. ³² Nisea se ma’erang malinga en teturu’-Na, karengan eng kapaila’-Na wuta eng kuasa. ³³ Witu eng gorem e wale ibadat i ti’i wawean siesa tou sinelaran ni setang wo nisia si marekeiy kaente’: ³⁴ “Hei Koo, Yesus tou Nazaret, sapa e nurusan-Nu ampit nikeiy? Nikoo koo mineiy kaa mepepunengla nikeiy? Niaku ku mete’u seiy Koo: Si Kudus waki si Empung.” ³⁵ Ta’an si Yesus si rimekak nisia pokeiy-Na: “Menes, rumou’ mouw wia nisia!” Wo si setang i ti’i tu’u si mine’epesla sitou i ti’i witu eng keuneran ne tou kelaker, laa o rumou’la wia nisia wo si kasa reiy’ rimarala nisia. ³⁶ Wo em baya ne tou se ma’erang, laa o lumila’ siesa wia se walina, pokeiy nea: “Kumura eng kahebatna en tetotoren i yi’i! Karengan ampit e minawuta wibawa wo eng kuasa Nisia si minee perenta wia se roh-roh lewo’ wo sea tu’u rumou’.” ³⁷ Wo i kasera mouw e nabar tanume Nisia witu e wisa i te waki daerah i ti’i. ³⁸ Kamurian Sia tumele’ula e wale ibadat i ti’i wo mea waki wale ni Simon. Sapa tare si ina’ manuang ni Simon si kasa nanar wo nisea se kimiwee wia si Yesus rio tumulung nisia. ³⁹ Takar Sia rumedeiy witu li’ilik ni wewene i ti’i, laa o rumekak e nanar i ti’i, wo e rumara i ti’i tu’u en timele’ula nisia. Si wewene i ti’i si makarengan timo’or wo melayanla nisea. ⁴⁰ Katoroan si endo nu tumenem, em baya ne tou se minali wia-Nisia se tou-tou rara’an nea, se peme’itan e minegheghioan rumara. Sia tu’u rumeta’la lawas-Na wia nisea siesa o siesa wo lume’osla nisea. ⁴¹ Waki se kelaker tou sea rumou’mi kangkasi se setang-setang kasuatan marekeiy: “Nikoo mouw koo Urang ni Empung.” Laa o ampit eng kasa ente’ Sia mepalouw nisea wo reiy’ meela nisea sumusuiy, karengan nisea se mete’u kaa Nisia si Mesias. ⁴² Katoroan e nendo oat, Yesus si minae wo mea waki e nesa tampa kapenesan. Ta’an se tou kelaker se menero Nisia, laa o matola-Nisia wo me’inakut metaang Nisia rio te’a metetele’ula nisea. ⁴³ Ta’an Nisia si limila’ wia nisea: “Waki kota-kota walina Niaku kangkasi ku lewo’ sa reiy’ maabarla e Injil Keraja’an ni Empung karengan kaa ni’itu mouw Niaku ku neiy i toke.” ⁴⁴ Wo Sia si maabarla e Injil witu e wale-wale ibadat waki Yudea.