¹ Witu e nedo ni’itu si Kaisar Agustus si rimeu’mi e nesa perenta, rimeo matikla em baya se tou wia minapekasa eng kaoatan. ² Nyi’i mouw em pepatikan kasa ketare katoroan si Kirenius minamuali wali em banua waki Siria. ³ Takar mea mouw em baya ne tou minea matikla en tou, siesa o siesa waki kotana nuesa. ⁴ Tuanakan kangkasi si Yusuf si rimou’mi waki kota Nazaret waki Galilea o mea waki Yudea, minea waki kota Daud mekengaran Betlehem, - karengan nisia si asal wia se me’urang wo see’ ni Daud – ⁵ rio i patikla mewali-wali ampit si Maria, tunanganna, si kasuatan megandong. ⁶ Katoroan sea nu witu mina’ayo mouw e nedona i wee si Maria kaa laa metetimea’la, ⁷ wo sia tumimea’la siesa oki’ tuama, sioki’na polon, laa o saputenna ampit e lampin wo i gholeiynala witu e lontang, karengan e reiy’la si tampa i wee nisea witu e wale tete’upan. ⁸ Waki daerah i ti’i wawean se rumerawir-rumerawir maena’ waki padang metayur se kawang ne ternak nea witu e nedo wengi. ⁹ I kasenge’mi si rimedeiy mouw siesa malaikat ni Tuhan witu en tawi nea wo eng kamulia’an ni Tuhan e masena’ simaputla nisea wo nisea se kasa kineide’an. ¹⁰ Laa o pokeiy ni malaikat i ti’i wia nisea: “Te’a meide’, karengan eng kaulitna niaku ku ma’abarla wia nikouw e mekepa’aren wangko’ ni’i wee se minapekasa bangsa: ¹¹ E nendo i yi’i minatou mouw i wee nikoo si Lumelawir, nyi’a iti’i si Kristus, Tuhan, waki kota Daud. ¹² Wo nyi’i mouw eng kowa’na i wee nikoo: Nikouw kouw laa tume’upla siesa dade sinaput ampit e lampin wo neiy i gholeiy witu e lontang.” ¹³ Wo i kasenge’mi loo’onouw se mewali-wali ampit si malaikat i ti’i se ka’asa’an eng kelakerna se suraro sorga se malo’or si Empung, pokeiy nea: ¹⁴ “Eng kamulia’an i wee si Empung waki tampa kasarakek wo en dame sejahtera wia em bumi witu e nelet ne tou mekepa’aren wia-Nisia.” ¹⁵ Se malaikat-malaikat nu timele’u mola nisea wo mareng waki sorga, se rumerawir-rumerawir i ti’i se limila’ siesa wia se walina: “Meiy mouw ta mea waki Betlehem kaa mea meleloo’ sapa e minamuali maname, tanu neiy i pakite’ula ni Tuhan wia nikita.” ¹⁶ Laa o sea mario-rior mea wo tume’upla si Maria wo si Yusuf wo si dade i ti’i, si kasuatan ghimoleiy witu eng gorem e lontang. ¹⁷ Wo eng katoroan nisea nu limoo’- Nisia, sea makite’ula sapa e neiy mouw i lila’la wia nisea en tanume si Oki’ i ti’i. ¹⁸ Wo em baya ne tou se liminga nyi’a se ma’erang tanume en sapa neiy i lila’la ne rumerawir-rumerawir i ti’i wia nisea. ¹⁹ Ta’an si Maria si kimirong e reiy’ sa mina’asa em perkara i ti’i witu eng gorem e natena wo meghena-ghenangla nyi’a. ²⁰ Takar marengouw se rumerawir-rumerawir i ti’i kasuatan mapuji wo malo’orla si Empung karengan e reiy’ sa mina’asa wo’o sapa e lininga nea wo e linoo’ nea, em baya nyi’a minatoroan ampit en sapa neiy mouw i lila’la wia nisea. ²¹ Wo eng katoroan lekepouw uwalu nga endo wo Nisia si lewo’ sa reiy’ sunaten, Nisia si wineean ngaran Yesus, nyi’a i ti’i e ngaran neiy i totorla ni malaikat nu reiy’pe’ Nisia nu ginandong ni ina’na ²² Wo katoroan e lekepouw e nedo palenasan, i ki’it e nukum Taurat ni Musa, nisea se minali Nisia waki Yerusalem kaa laa mesesarakanla-Nisia wia si Tuhan, ²³ tanu wawean neiy i kepatik witu e nukum ni Tuhan: “Em baya ne oki’ tuama polon se lewo’ sa reiy’ kudusela i wee si Empung”, ²⁴ wo kaa laa mesesempe’la en tetule i ki’it en sapa neiy i nuwu’la witu e nukum ni Tuhan, nyi’a i ti’i se esa nge paar wukur ka’apa rua nga ipus oki’ ni Pombo. ²⁵ Wawean waki Yerusalem siesa tou si mekengaran Simeon. Nisia siesa tou ulit wo saleh si ma’ana’la em pangiboran i wee si Israel. Roh Kudus e witu natasna, ²⁶ wo wia nisia neiy mouw i papaloo’ola ni Roh Kudus, kaa nisia si reiy’ laa mate nu reiy’pe’ nisia nu lumoo’ si Mesias, nyi’a i ti’i Nisia si ni’isu’la ni Tuhan. ²⁷ Nisia si mineiy waki Bait ni Empung kaa e Roh Kudus. Katoroan si Yesus, Oki’ i ti’i, si niali ghumorem ne tu’ana kaa laa metetuanala wia Nisia sapa neiy i tantula e nukum Taurat, ²⁸ nisia si simungkul si Oki’ i ti’i wo malar-Nisia kasuatan malo’or si Empung, pokeiyna: ²⁹ “En teakan, Tuhan, i waya mola si hamba-Mu i yi’i mea witu en dame sejahtera, minatoroan ampit e nuwu’-Mu, ³⁰ karengan em berenku limoo’ mouw eng kelawiran waki-Nikoo, ³¹ en sinadia-Mu mola witu en sinaru ne reiy’ sa mina’asa bangsa, ³² nyi’a i ti’i en terang minamuali pakaloo’-loo’on i wee se bangsa-bangsa walina wo mamuali kamulia’an i wee se umat-Mu, Israel.” ³³ Wo si ama’ wo si ina’na se kasa mina’erang witu e reiy’ sa mina’asa sapa neiy i lila’la en tanume Nisia. ³⁴ Laa o berkatela ni Simeon sea wo lumila’ wia si Maria, ina’ ni Oki’ i ti’i: “Eng kaulitna si Oki’ i yi’i si neiy i tantula mekeka’anula ka’apa meteto’orla kelaker tou waki Israel wo kaa laa mamuali esa kowa’ lumentutla em pe’isingan ³⁵ – wo e nesa santi laa lumampat si imukurmu nuesa -, rio mamuali pakaloo’o-loo’ola eng genang e nate ne kelaker tou.” ³⁶ Awes kangkasi witu wawean si Hana, siesa nabi wewene, si urang ni Fanuel wia se suku Asyer. Nisia si kasa mouw limangkoiy e numurna. Nisia nu kimawengola si timou pitu nge te’un mewali-wali si ka’awuna, ³⁷ wo en teakan nisia si balu wo makaumur uwalu nga pulu’ o epat nge te’un. Nisia si reiype’ ma’an mekasa tumele’ula em Bait ni Empung wo noat o wengi si meraghes ampit maposo wo masombayang. ³⁸ Wo witu en toro ni’itu kangkasi meiy mouw sia witu wo tumotor en syukur wia si Empung wo mesesusuiy en tanume si Oki’ i ti’i wia em baya se tou se ma’ena’la eng kaliseiyan i wee e Yerusalem. ³⁹ Wo ni’itu nu simampetouw em baya e lewo’ sa reiy tinuanala i ki’it e nukum ni Tuhan, o marengouw sea waki kota paana’an nea, nyi’a i ti’i eng kota Nazaret waki Galilea. ⁴⁰ Si Oki’ i ti’i si maawes eng kasela wo mina ente’, si wuta eng hikmat, wo e nupus karunia ni Empung em bia-Nisia. ⁴¹ Susur en te’un se tu’a ni Yesus se mea waki Yerusalem witu e nendo wangko’ Paskah. ⁴² Katoroan si Yesus nu maka umurouw mapulu’ o rua nge te’un o mea mouw sea waki Yerusalem tanu eng kenaramen witu e nendo wangko’ i ti’i. ⁴³ Ni’itu nu mina’apu mola e nendo-nendo pewangko’an i ti’i, katoroan nisea nu makelang mewareng, o mena’ mouw si Yesus waki Yerusalem si reiy’ kete’uan ne tu’ana. ⁴⁴ Karengan pokeiy nea i te kaa Nisia si witu e nelet ne tou makelang mewali-wali nisea, kumelangouw sea esa nga endo pakelangen eng kewa’akatna, laa o sumero Nisia witu e nelet ne kawanua nea. ⁴⁵ Karengan nisea se reiy’ minatola Nisia, o marengouw sea waki Yerusalem kasuatan reiy’ maena-ena’ masero Nisia. ⁴⁶ Ni’itu nu telu mouw nga endo sea matola Nisia si witu eng gorem em Bait ni Empung; Nisia si rimuber witu nuner ne alim ulama, kasuatan malingala nisea wo ma’ayola e wewueiyen-wewueiyen wia nisea. ⁴⁷ Wo em baya ne tou se malinga Nisia se kasa ma’erang kaa eng kepandean-Na wo e reiy’ sa mina’asa wewingkot neiy i wee-Nala. ⁴⁸ Wo eng katoroan se tu’a-Na nu limoo’ Nisia, i kenganga mouw sea, laa o pokeiy ni ina’-Na wia-Nisia: “Tole, ka’a ku’a Koo sumiwo en tuana wia nikeiy? Si ama’-Mu wo niaku ampitouw e nide’ masero Nikoo.” ⁴⁹ Wingkot-Na wia nisea: “Ka’a ku’a kouw masero Niaku? Reiy’ ku’a re’en kete’uan niouw, kaa Niaku ku lewo’ sa reiy’ wia eng gorem em bale ni Ama’-Ku?“ ⁵⁰ Ta’an nisea se reiy’ mangarti sapa neiy i lila’-Nala wia nisea. ⁵¹ witu e nurusan nea. Wo si ina’-Na si kimirong em baya em perkara i ti’i witu eng gorem e natena. ⁵² Wo si Yesus si kasa mouw maawes eng kasela wo maawes eng hikmat-Na wo eng kewangko’-Na, wo si kasa mouw i koupusla ni Empung wo ne tou.