¹ Witu e nedo ni’itu o meiy mouw wia si Yesus se pirala tou maali-ali e nabar tanume se tou-tou Galilea, e raa’ nea neiy i sewokla ni Pilatus ampit e raa’ en tetule neiy nea i sempela. ² Yesus si miningkot nisea: “Pokeiymu se tou-tou Galilea i yi’i lebe sela en dosa nea ta’an en dosa em baya ne tou Galilea walina, karengan nisea se mine’anla e nasib i ti’i? ³ Reiy’, em pokeiy-Ku wia nikoo. Ta’an sa wona’ kouw reiy’ makedo’, kouw nu waya kouw laa mapuneng witu eng kenaramen tuana. ⁴ Ka’apa em pokeiymu se mapulu’ o uwalu tou, se minate tinoro e menara waki tawi en Siloam, e lebe sela eng kaselokan nea ta’an eng kaselokan em baya ne tou walina se maena’ waki Yerusalem? ⁵ Reiy’, em pokeiy-Ku wia nikoo. Ta’an sa wona’ kouw reiy’ makedo’, kouw nu waya kouw laa mapuneng witu eng kenaramen tuana.” ⁶ Laa o lumila’la si Yesus em peulurela i yi’i: “Sitou si makapunya e nakana ara timou witu e numa anggorna, wo sia meiy kaa si mesesero em bu’ana witu e nakana i ti’i, ta’an nisia si reiy’ minatola nyi’a. ⁷ Laa o sia lumila’ wia si mengengurus e numa anggor i ti’i: En telu mouw nge te’un niaku mengeiy masero em bu’ana witu nakana ara i yi’i wo niaku ku reiy’ minatola nyi’a. Pelenouw e nakana i yi’i! Edon sapa sia matou-tou wia en tana’ i yi’i sa reiy’ peka’ara’an! ⁸ Wingkot ni tou i ti’i: Tuang, i waya mola sia tumou en te’une’ i yi’i kasi, niaku ku laa mingkung en tana’ kaledongna wo mee pupuk wia nisia, ⁹ wo’o wona’ te’un tumodong sia mee wu’ana; sa reiy’, pelenouw sia!” ¹⁰ Witu mekasa Yesus si kasuatan mawee teturu’ witu meta’asa’an wale ibadat witu nendo Sabat. ¹¹ Witu wawean siesa wewene mapulu’ o uwalu mouw nge te’un sinelaran ni roh i ka’ayo sia minerara’an i ka’ayo minawoko e ru’urna wo si reiy’ mouw kasi mete’u rumedeiy makateren. ¹² Katoroan si Yesus nu limoo’ si wewene i ti’i, Sia kumeret nisia wo lumila’ wia nisia: “Hei ina’, e rumaramu minale’osouw.” ¹³ Laa o Sia rumeta’la e lawas-Na wia si wewene i ti’i’ wo eng katoroan i te ni’itu kangkasi rimedeiy mouw si wewene i ti’i, wo lumo’orla si Empung. ¹⁴ Ta’an si kapala wale ibadat si meupi’ karengan si Yesus si lime’osla tou witu e nendo Sabat, laa o sia lumila’ wia se tou kelaker: “Wawean enem nga endo e laa pepa’ayangan. Kaa ni’itu meiy mouw witu meta’esa’an e nendo i ti’i kaa laa pelele’osela wo te’a witu e nendo Sabat.” ¹⁵ Ta’an si Tuhan si miningkot nisia, pokeiy-Na: “Hei tou-tou munafik, reiy’ ku’a re’en susur tou witu e neletmu si rimeta’la se sapina ka’apa keledaina witu e nendo Sabat witu eng kalerona wo mali nisea waki tampa kekoo’an? ¹⁶ Reiy’ ku’a re’en si wewene i yi’i, si mapulu o uwalu mouw nge te’un wina’akes ni Iblis, si lewo’ sa reiy’ i reta’la witu e wewa’akesna i ti’i, karengan nisia si see’ ni Abraham?” ¹⁷ Wo eng katoroan Nisia nu limila’ en tuana, em baya se kesaru-Na se meirang wo em baya ne tou kelaker se mepa’a-pa’ar karengan e reiy’ sa mina’asa perkara mulia en tinuana-Na mola. ¹⁸ Takar pokeiy ni Yesus: “Nulur en sapa ku’a re’en eng kapualitan Keraja’an ni Empung wo ampit en sapa ku’a re’en Ku laa me’ulurela nyi’a? ¹⁹ Nisia si ulur e watuna en sesawi, niedo wo neiy i wu’uwurla ni tou witu numana; watuna i ti’i en timou wo mamuali akana wo se burung-burung wia natas se simala witu em pangana-pangana.” ²⁰ Wo Sia lumila’ kasi: “Ampit en sapa ku’a re’en Ku laa me’ulurela eng Keraja’an ni Empung? ²¹ Nisia si ulur e ragi niedo ni esa wewene wo i kayo’la witu eng gorem en topong terigu telu sukat i ka’ayo minasewokan em baya nyi’a ²² Kamurian Yesus si makelang waki kota o kota wo waki desa o desa kasuatan mawee teturu’ wo mapawee-weela em pakela-kelangan-Na mengea waki Yerusalem. ²³ Wo wawean siesa tou limila’ wia-Nisia: “Tuhan, toyo’ i te ku’a re’en se tou linawirla?” ²⁴ Wingkot ni Yesus wia se tou-tou witu: “Me’inakutouw lumaa ghumorem tumoro em pepalen peset i ti’i! Karengan Niaku ku lumila’me wia nikoo: Kelaker tou se laa me’inakut megheghorem, ta’an se reiy’ mete’u ghumorem. ²⁵ Sa si mekewale si timo’orouw wo kimusi’ mouw em pepalen, nikouw kouw laa rumedeiy witu luar wo menengko-nengkor em pepalen kasuatan meila’: Tuang, wuka’anola pepalen keiy! Wo Nisia si laa mingkot wo lumila’ wia nikoo: Reiy’ kete’uang-Ku waki wisa kouw meiy. ²⁶ Takar kouw laa lumila’: Nikeiy keiy kimaanouw wo kimoo’ witu en sinaru-Mu wo Nikoo koo minee mola teturu’ witu e lalan-lalan eng kota meiy. ²⁷ Ta’an Nisia si laa lumila’ wia nikoo: Reiy’ kete’uang-Ku waki wisa kouw meiy, rumou’la wia en sinaru-Ku, hei kouw nu waya si timuanala eng kalewo’an! ²⁸ Manamome neiy atoan e narip wo eng kare’eket em ba’ang, sakawisa kouw laa lumoo’ si Abraham wo si Ishak wo si Yakub wo em baya ne nabi waki ghorem eng Keraja’an ni Empung, ta’an nikouw nuesa kouw i pe’epesla witu luar. ²⁹ Wo se tou laa meiy se waki sendangan wo talikuran wo se waki amian wo timu wo nisea se laa rumuber kumaan witu eng gorem eng Keraja’an ni Empung. ³⁰ Wo eng kaulitna wawean sitou kamurian si laa mamuali tou kimetare wo wawean sitou kimetare si laa mamuali tou kamurian.” ³¹ Witu e nedo ni’itu meiy mouw se pirala tou Farisi wo lumila’ wia si Yesus: “Mea mouw, i tele’u mola en tampa i yi’i, karengan si Herodes si mewewunu’ Nikoo.” ³² Wingkot ni Yesus wia nisea: “Mea mouw wo i lila’ mola wia si serigala i ti’i: Niaku ku meure’ si setang wo male’osla tou, wia e nendo i yi’i wo wo’odo, wo witu e nendo katelu Niaku ku laa sumampet. ³³ Ta’an e nendo i yi’i wo e wo’odo wo e ngasusa Niaku ku lewo’ sa reiy’ mapawee-weela em pakela-kelangan-Ku, karengan e reiy’ mouw kewaarna siesa nabi si wunu’un sa reiy’ waki Yerusalem. ³⁴ Yerusalem, Yerusalem, nikoo si minunu’ se nabi-nabi wo limawala ampit em batu se tou-tou neiy i toke wia nikoo! Makapepira mouw Niaku ku lumelo ma’arurla se oki-oki’mu, masuat tanu si inang ne ko’oko’ si simalangkouwla se oki-oki’na witu e wawa’ eng kale’ekewna, ta’an nikouw kouw so’o. ³⁵ Eng kaulitna em balemu i yi’i e laa i tele’ula wo e mina penes. Ta’an Niaku ku lumila’me wia nikoo: Nikouw kouw reiy’ mouw laa lumoo’ Niaku kasi i ka’ayo witu e nedo kouw lumila’: Binerkatola Sia si mineiy witu e ngaran ni Tuhan!”