¹ Kasuatan e ni’itu se manga riwu-riwu tou kelaker se minaerurouw, i ka’ayo sea mereransakan. Laa o muleiy mouw si Yesus mawee teturu’, ketare-tare wia se murid-murid-Na, pokeiy-Na: “Mategha-teghamola witu e ragi, nyi’a i ti’i eng kamunafikan ne tou Farisi. ² Reiy’la e nesa tu’u eng kinusi’ o reiy’ laa i wuka’ wo reiy’la e nesa tu’u neiy i kakirong o reiy’ laa kakete’uan. ³ Kaa ni’itu sapa e neiymu i lila’la witu reiydem e laa kalinga’an witu en terang, wo sapa neiymu i tena’la witu en talinga witu eng gorem eng kamar e laa i abarla waki atas natep em bale. ⁴ Niaku ku lumila’me wia nikoo, heiy kalo-kaloku, te’a mouw koo meide’ wia nisea se toro munu’ nouwak wo kamurian se reiy’ mouw mete’u sumiwo sapa-sapa kasi. ⁵ Niaku ku laa tumuru’la wia nikouw seiy ku’a re’en si lewo’ sa reiy’ i keide’ miouwla. I keide’ mola Nisia, sa minunu’ mola, si makapunya kuasa laa melelawala sitou witu eng gorem e naraka. Eng kaulitna Niaku ku lumila’me wia nikoo, i keide’ mola Nisia! ⁶ Reiy’ ku’a se burung pipit i wangker lima nga ipus rua loit? Sa ulit tu’u tuana e reiy’ siesa nga ipus tu’u wia nisea si liniurla ni Empung, ⁷ awes tare e wu’uk eng kokongmu tu’u eng kinarekenan em baya nyi’a. Kaa ni’itu te’a meide’, karengan nikoo koo lebe arga ta’an eng kelaker ne burung pipit. ⁸ Niaku ku lumila’me wia nikoo: Susur tou si maakula Niaku witu en sinaru ni tou, si Oki’ ni Tou kangkasi si laa maakula nisia witu en sinaru ne malaikat-malaikat ni Empung. ⁹ Ta’an seiy i te si kumelong Niaku witu en sinaru ne tou, nisia si laa kelongen witu en sinaru ne malaikat-malaikat ni Empung. ¹⁰ Susur tou si limila’la wo’o sapa e masu’usuk si Oki’ ni Tou, nisia si laa ampungala; ta’an seiy i te si maojat e Roh Kudus, nisia si reiy’ laa ampungala. ¹¹ Sakawisa sitou sumarula nikouw wia se majelis-majelis ka’apa wia se pemerentah-pemerentah wo se penguasa-penguasa, te’a mouw koo lieiy eng kumura wo en sapa e lewo’ sa reiy’ i lila’ miouwla kaa laa mesesawang en toumu. ¹² Karengan witukan e nedo ni’itu kangkasi e Roh Kudus e laa mee teturu’ wia nikouw sapa e lewo’ sa reiy’ i lila’ miouwla.” ¹³ Siesa wia se tou kelaker i ti’i si limila’ wia si Yesus: “Guru, i lila’ mola wia si patuariku rio sia mawetengala warisan ampit niaku.” ¹⁴ Ta’an si Yesus si limila’ wia nisia: “Patuari, seiy mouw si minopola Niaku mamuali akim ka’apa meune-uner wia nikouw?” ¹⁵ Pokeiy-Na kasi wia nisea: “Maato-ato mouw wo mateghamla witu e reiy’ sa mina’asa kasoreman, karengan ma’anouw tu’u sitou si linokonan eng hartana, em patou-touanna e reiy’ kimayong witu eng hartana i ti’i.” ¹⁶ Kamurian Sia lumila’la wia nisea e nesa peulurela, pokeiy-Na: “Wawean siesa tou kaya, en tana’na mineloko-lokon e wua’na. ¹⁷ Sia mueiy witu e natena: Sapa ku’a re’en e lewo’ sa reiy’ siwongku, karengan niaku ku reiy’ makapunya tampa wisa niaku toro tumu’utulela e wua’na en tana’ku. ¹⁸ Laa o pokeiyna: nyi’i mouw e laa ku pesesiwon; niaku ku laa rumobe’ e lumbung-lumbungku wo niaku ku laa rumedeiyla en sumelala wo niaku ku laa tumu’utulela witu eng goremna e reiy’ sa mina’asa gandum wo em barang-barangku. ¹⁹ Nu reiy’ mouw i tu niaku ku laa lumila’ wia si imukurku: Imukurku, wawean wia nikoo kelaker em barang, nierur minete’u-te’un eng keurena; masengouw, kumaanouw, kumoo’ mouw wo sumena-senangouw! ²⁰ Ta’an e nuwu’ ni Empung wia nisia: Hei koo tou we’engel, wia i te em bengi i yi’i kangkasi si imukurmu si laa edoni wia nikoo, wo sapa en sinadiamu mola, i wee si seiy ku’a re’en e ni’itu ee sangali? ²¹ Tuana mouw e mamualina ampit sitou minerurla eng harta i wee en touna nuesa, sa wona’ sia reiy’ kaya witu en sinaru ni Empung.” ²² Yesus si limila’ wia se murid-murid-Na: “Kaa ni’itu Niaku ku lumila’me wia nikoo: Te’a mouw koo lieiy witu em patou-touannu, witu en sapa e laa pekekaanennu, wo te’a mouw lieiy kangkasi witu e nouwakmu, witu en sapa e laa labungennu. ²³ Karengan em patou-touan i ti’i e lebe i paketa-ketare ta’an eng kekaanen wo e nouwak i ti’i e lebe i paketa-ketare ta’an e lelabungen. ²⁴ Weeanola ghenang se burung- burung keleak se reiy’ minu’uwur wo reiy’ minupu’ wo se reiy’ makapunya gudang ka’apa lumbung, ma’anouw tu’u tuana se paweean kumaan ni Empung. Tuana mouw nikouw kouw wa’akat lumantouwla se burung-burung i ti’i! ²⁵ Seiy ku’a re’an si witu e nelet miouw karengan eng kalieiyanna en toro mawesla esa nga hasta witu e lalan patou-touanna? ²⁶ Jadi, sa kouw reiy’ makawoo sumiwo em barang kasa rintek, ka’a koo lieiy witu eng kapualitan-kapualitan walina? ²⁷ Weeanola ghenang e wungang bakung, reiy’ kimedong wo reiy’ minayam, ta’an Niaku ku lumila’me wia nikoo: Salomo witu e reiy’ sa mina’asa eng kamega’anna tu’u si reiy’ limabung eng kewangun e meta’asa’an witu se wungang i ti’i. ²⁸ Jadi, sa e rukut waki uma, e nendo i yi’i wia wo wo’odo ni’i terek witu e napi tuana mouw eng kinesesudeiyla ni Empung, e lebe-lebepe’ kasi nikouw, heiy tou reiy’ kasa ma’eman! ²⁹ Jadi, te’a pangimpoongen niouwla sapa e laa kaanen niouw ka’apa sapa e laa koo’on niouw wo te’a mouw lieiy e natemu. ³⁰ Em baya ni’itu em peneron ne bangsa-bangsa wia eng kaoatan se reiy’ makasine’u si Empung. Ta’an si Ama’mu si mete’u, kaa nikouw kouw memang mepadungla em baya nyi’a i ti’i. ³¹ Ta’an seronola eng Keraja’an-Na, takar em baya nyi’a i ti’i e laa i awesla kangkasi wia nikoo. ³² Te’a mouw meide’, hei kouw kawang oki’! Karengan si Ama’mu si minepa’arola meweweela wia nikouw eng Keraja’an i ti’i. ³³ Wangkerouw e reiy’ sa mina’asa kapunya’annu wo mee mola esa nga wuntul! Sumiwo mouw i wee nikoo en sompoiy-sompoiy reiy’ mete’u matu’a, e nesa harta waki sorga e reiy’ laa ma’apu, reiy’ mamuali retenela ni rongkit wo e reiy’ terinla ne tanga’. ³⁴ Karengan wisa eng hartamu witu, witu kangkasi e natemu witu.” ³⁵ “Satorona e rereenannu e minena-ena’ mineret, wo en solomu e minena-ena’ melayas. ³⁶ Wo satorona nikouw kouw masuat tanu se tou mengena-ngena’la si tuangna marengi waki kinawengan, rio sia meiy wo tumengkor em pepalen, o makarengan i wuka’la em pepalen i wee nisia. ³⁷ Ma’aruiyola se hamba-hamba sinempakla ni tuangna se menayu-nayur eng katoroan nisia nu mineiy. Niaku ku lumila’me wia nikoo: Eng kaulitna nisia si laa ma’akes e rereenanna wo tume’es wia nisea rumuber kumaan, wo nisia si laa meiy lumayanla nisea. ³⁸ Wo sakawisa sia meiy witu maparua em bengi ka’apa witu en tawi moat wo sumempakla nisea se masiwo en tuana, takar ma’aruiyola nisea. ³⁹ Ta’an kete’uanola e nyi’i: Sa si mekewale si mete’u en jam pira si rongkit laa meiy, nisia si reiy’ laa mayala em balena ghogharen. ⁴⁰ Satorona nikouw kangkasi kouw matiro-tiro’, karengan si Oki’ ni Tou si meiy witu e nedo reiy’ pa’ara-arapen niouw,” ⁴¹ Pokeiy ni Petrus: “Tuhan, nikeiy ku’a re’en si pemaksud-Mula ampit em peulurela i ti’i ka’apa kangkasi em baya ne tou?” ⁴² Wingkot ni Tuhan: “Jadi, seiy ku’a re’en si mengengurus em bale si lale’ wo sama’ si laa popon ni tuangna mamuali kapala wia em baya ne hambana kaa laa meweweela kekaanen wia nisea witu e nedona? ⁴³ Ma’aruiyola si hamba, sinempakla ni tuangna matuanala e lukarna i ti’i, eng katoroan si tuangna nu mineiy. ⁴⁴ Niaku ku lumila’me wia nikoo: “Eng kaulitna si tuangna i ti’i si laa mopo nisia mamuali tumetegha’ e reiy’ sa mina’asa kapunya’anna. ⁴⁵ Ta’an, sa wona’ si hamba i ti’i si lewo’ wo lumila’ witu eng gorem e natena: Tuangku si reiy’ maeiy-eiy, laa o sia muleiy mewe se hamba-hamba tuama wo se hamba-hamba wewene, wo kumaan kumoo’ wo toeken, ⁴⁶ takar si tuang ni hamba i ti’i si laa meiy witu e nedo reiy’ pa’ara-arapenna, wo witu e nedo reiy’ kinakete’uannala, wo laa mewewunu’ nisia wo sumiwo nisia esa nge nasib ampit se tou-tou reiy’ lale’. ⁴⁷ Sapa tu’u si hamba si mete’u witu eng kepa’aran ni tuangna, ta’an si reiy’ timu’utulela tetiro’an ka’apa si reiy’ timuanala sapa neiy i kepa’arla ni tuangna, nisia si laa maka’ato laker wewewe. ⁴⁸ Ta’an seiy i te si reiy’ mete’u witu eng kepa’aran ni tuangna wo matuanala sapa e lewo’ sa reiy’ mapa eiy em bewewe, nisia si laa maka’ato toyo’ wewewe. Susur tou wia nisia si laker wineean, waki nisia e laa laker neiy kiween, wo wia si seiy si laker niemanala, waki nisia e laa lebepe’ laker kasi e neiy kiween.” ⁴⁹ “Niaku ku mineiy kaa meiy melelawala e napi wia em bumi wo en tuana mouw Niaku nu maarapla, e napi i ti’i melayasouw! ⁵⁰ Niaku ku lewo’ sa reiy’ maka’ato baptisan, wo en tuana mouw eng kasusana nate-Ku, nu reiy’pe’ eng kapualitan i ti’i minapa wee-wee! ⁵¹ Nikouw kouw mengara-ngarapla, kaa Niaku ku mineiy kaa maalimi en dame wia natas em bumi? Reiy’, ni’i lila-Kume wia nikoo, reiy’ en dame, ta’an i te em pesali’isi’an. ⁵² Karengan muleiy i temi en teakan e laa wawean em pesali’isi’an e nelet ne lima tou witu eng gorem e nesa wale, se telu mesaru se rua wo se rua mesaru se telu. ⁵³ Nisea se laa mesesali’isi’an, si ama’ si sumaru sioki’na tuama wo sioki’ tuama si sumaru si ama’na, ina’ si sumaru sioki’na wewene wo sioki’ wewene si sumaru si ina’na, si ina’ manuang si sumaru sioki manuangna wewene wo sioki’ manuang wewene si sumaru si ina’ manuangna.” ⁵⁴ Yesus si limila’ kangkasi wia se tou kelaker: “Sakawisa kouw lumoo’ e linaak maatas waki esa nga weka talikuran, makarengan kouw lumila’: E laa meiy e naro, wo eng kapualitan i ti’i memang mamuali. ⁵⁵ Wo sakawisa kouw lumoo’ e reghes timu mawi’iwis, kouw lumila’: E nendo e laa tume’etel e ra’ar, wo eng kapualitan i ti’i memang mamuali. ⁵⁶ Heiy tou-tou munafik, eng gio em bumi wo e langit kouw mete’u maweela ghenang nyi’a, ka’a ku’a re’en kouw reiy’ mete’u meweweela ghenang en zaman i yi’i? ⁵⁷ Wo ka’a ku’a re’en nikoo kangkasi koo reiy’ timantula sandiri sapa e nulit? ⁵⁸ Karengan, sa nikoo ampit si kesarumu mea sumaru si pemerenta, me’inakutola medamean ampit nisia keurean witu nuner e lalan, rio te’a koo keongenna witu si akim wo si akim si sumarakan nikoo wia si sumesawangna wo si sumesawangna i ti’i si lumobo’la nikoo witu eng gorem em penjara. ⁵⁹ Niaku ku lumila’me wia nikoo: Nikoo koo reiy’ laa rumou’mi maname, nu reiy’ pe’ koo minear e nutangmu i ka’ayo malekep.”