¹ Witu e mekasa Yesus si kasuatan masombayang witu e nesa tampa. Katoroan Sia nu mena’ masombayang, lumila’ mouw wia Nisia siesa wia se murid-murid-Na: “Tuhan, turu’uni keiy en sesombayangen, masuat tanu neiy i turu’la ni Yohanes wia se murid-muridna.” ² Wingkot ni Yesus wia nisea: “Sakawisa kouw sumombayang, lumila’ mola: Ama’, eng kinudusola e ngaran-Nu; meiy mouw eng Keraja’an-Nu. ³ Weeanola keiy susur nendo eng kekaanen neiy esa nga wuntul ⁴ wo ampunganola keiy witu en dosa meiy, karengan nikeiy kangkasi keiy ma’ampungela susur tou si simelokouw wia nikeiy; wo te’a mouw pa’alin nikeiy witu em pewa’awa’an.” ⁵ Laa o pokeiy-Na wia nisea: “Sa siesa tou witu e nelet miouw witu maparua em bengi si mea witu em bale niesa kalona wo lumila’ wia nisia: Patuari, pinjangane’la niaku telu roti, ⁶ karengan siesa kaloku si kasuatan witu em pakela-kelangan si timuli witu em baleku wo niaku ku reiy’ makapunya sapa-sapa e laa i petete’esla wia nisia; ⁷ torokan si witu eng gorem em bale i ti’i si laa mingkot: Te’a mareung niaku, pepalen eng kinusi’ mouw wo niaku ma’an se oki’ku keiy timekelouw; niaku ku reiy’ mouw i kato’or wo meela nyi’a wia si patuari. ⁸ Niaku ku lumila’me wia nikoo: Ma’anouw tu’u sia so’o tumo’or wo meela nyi’a wia nisia karengan sitou i ti’i si kalona, ta’an karengan e reiy’ tongkoirangenna i ti’i, nisia si laakan tumo’or tu’u wo meela wia nisia sapa em pemandungenna. ⁹ Kaa ni’itu mouw Niaku ku lumila’me wia nikoo: Kumiwee mouw, takar e laa i weela wia nikoo; seronouw, takar kouw laa maka’ato; tumengkorouw, takar em pepalen e laa i wuka’la wia nikoo. ¹⁰ Karengan susur tou si makiwee, si sumungkul wo susur tou si masero, si maka’ato wo susur tou si matengkor, wia nisia em pepalen ni’i wuka’la. ¹¹ Ama’ wisa ku’a re’en si witu e nelet miouw, sa sioki’na makiwee sera’ wia nisia, si laa meela leloiy wia sioki’na i ti’i sawel ni sera’? ¹² Ka’apa, sa sia makiwee wurenga, si laa meela wia nisia kalajengking? ¹³ Jadi sa nikouw nu lewo’ kouw mete’u maweela em paweela le’os wia se oki’mu, sapape’ kasi si Ama’mu waki sorga! Nisia si laa meela e Roh Kudus wia nisea se makiwee wia-Nisia.” ¹⁴ Witu e mekasa Yesus si minure’ waki siesa nga touan siesa setang makawowo’on. Katoroan si setang i ti’i nu rimou’la, sitou wowo’ i ti’i si toro mouw meila-ila’. Takar ma’erangouw se tou kelaker. ¹⁵ Ta’an wawean witu e nelet nea si limila’: “Nisia si meure’ si setang ampit eng kuasa ni Beelzebul, si kokong ne setang.” ¹⁶ Wawean kangkasi si kimiwee wia-Nisia e nesa kowa’ waki sorga, kaa mewewa’awa’la Nisia. ¹⁷ Ta’an si Yesus si mete’u eng genang nea laa o lumila’: “Susur eng keraja’an mina pete-pete’ tantu mouw e mapuneng, wo susur e rumah tangga mina pete-pete’, tantu mouw i karewa. ¹⁸ Sa wona’ si Iblis i ti’i kangkasi si mina wete-weteng wo sumaru en touna nuesa, kumura mouw tare eng keraja’anna o toro tumaang? Karengan kouw limila’, kaa Niaku ku minure’ si setang ampit eng kuasa ni Beelzebul. ¹⁹ Jadi sa Ku meure’ setang ampit eng kuasa ni Beelzebul, ampit eng kuasa sapa ku’a re’en se maki’i-ki’it nikoo meure’ nisia? Kaa ni’itu nisea mouw se laa mamuali akimmu. ²⁰ Ta’an sa Aku meure’ si setang ampit eng kuasa ni Empung, takar eng kaulitna eng Keraja’an ni Empung e mineiy mouw wia nikoo. ²¹ Sakawisa siesa tou ente’ wo si lekep makalelutam si timayur em balena nuesa, takar amanouw e reiy’ sa mina’asa punyana. ²² Ta’an sa siesa tou si lumantouwla eng kaente’an ta’an nisia si sumeke’ wo kumalala nisia, takar sitou i ti’i si laa kumaat eng kalekepan e lelutam, patede-tedeanna, wo sia laa memete-metengla eng kinaatna. ²³ Seiy si reiy’ mewali-wali Niaku, nisia si masu’usuk Niaku wo seiy si reiy’ minerurla mewali-wali Niaku, nisia si metabuke’isla.” ²⁴ “Sakawisa e roh lewo’ rumou’mi wia sitou, sia tu’u lumepu waki tampa-tampa karesean mesesero paena’an, karengan nisia si reiy’ minaka’atola nyi’a, sia lumila’: Niaku ku laa mareng waki wale neiy mouw i tele’ukula i ti’i. ²⁵ Takar mea mouw sia wo matola em bale i ti’i weresi sinapuan wo e wangun kinetetu’utul. ²⁶ Laa o sia rumou’ wo maruiy se pitu roh walina se lumewo’pe’la nisia, wo sea ghumorem wo mena’ witu. Takar eng kesampetanna eng ka’ada’an ni tou i ti’i e minakawurukola ta’an eng ka’ada’anna eng ketare.” ²⁷ Katoroan si Yesus nu masusuiye’, ma’aleiy mouw siesa wewene witu e nelet ne tou kelaker wo lumila’ wia-Nisia: “Ma’aruiyola si ina’ gimandongola Nikoo wo en susu simusu mola Nikoo.” ²⁸ Ta’an Nisia si limila’: “Si mina’aruiy nisia mouw si limingala e nuwu’ ni Empung wo miniarala nyi’a.” ²⁹ Katoroan se tou kelaker se minuyutla Nisia, o lumila’ mouw si Yesus: “Angkatan i yi’i nisea mouw se angkatan lewo’. Nisea se mepepa’arla e nesa kowa’, ta’an wia nisea se reiy’ laa weean kowa’ ta’an i te eng kowa ni nabi Yunus. ³⁰ Karengan en tanu si Yunus minamuali kowa i wee se tou-tou Niniwe, tuana mouw kangkasi si Oki’ ni Tou si laa mamuali kowa’ i wee se angkatan i yi’i. ³¹ Witu e nedo paakiman, si ratu waki timu i ti’i si laa tumo’or mewali se tou wia se angkatan i yi’i wo nisia si laa mukum nisea. Karengan si ratu i yi’i si waki tempok em bumi o meiy kaa meiy melelingala eng hikmat ni Salomo, wo eng kaulitna si wia nyi’i si lumantouwla wia si Salomo! ³² Witu e nedo paakiman, se tou-tou Niniwe se laa tumo’or mewali se angkatan i yi’i wo nisia si laa mukum nisea. Karengan se tou-tou Niniwe i ti’i se mina kedo’ kinelelinga neala neiy i abarla ni Yunus, wo eng kaulitna si wia nyi’i si lumantouwla wia si Yunus!” ³³ Reiy’ siesa tou tu’u si tumutungla en solo laa o rumeta’la nyi’a witu en solong em bale ka’apa witu rarem eng gantang, ta’an i te witu natas e ne’ana en solo, rio em baya ne tou ghumorem, se toro lumoo’ en sena’na. ³⁴ Em berennu nyi’a mouw en solo nouwak. Sa em berennu e le’os, en terangouw e minapekasa nouwakmu, ta’an sa em berennu e lewo’, e reiydemouw nouwakmu. ³⁵ Kaa ni’itu weeanola ghenang rio en terang wia nikoo te’a tu mamuali kareiydeman. ³⁶ Sa e minapekasa nouwakmu en terang wo reiy’la weteng e reiydem, takar e minapekasa nyi’a e laa tumerang, masuat tanu sakawisa en solo tumerangla nikoo ampit en sena’na.” ³⁷ Katoroan si Yesus nu simampetouw mawee teturu’, siesa tou Farisi si minundang Nisia laa kumaan waki walena. Takar ghumoremouw Sia witu em bale i ti’i, laa o rumuber kumaan. ³⁸ Sitou Farisi i ti’i nu limoo’ eng kapualitan i ti’i wo sia mina’erang, karengan si Yesus si reiy’ minoas e lawas-Na nu reiy’pe’ kimaan. ³⁹ Ta’an si Tuhan si limila’ wia nisia: “Nikouw tou-tou Farisi, nikouw kouw mineresila luarna en cawan wo em pinggan, ta’an eng goremna wuta eng kinaat wo eng kalewo’an. ⁴⁰ Heiy tou-tou we’engel, reiy’ ku’a Nisia si simiwola e luarna, Nisia kangkasi si simiwola eng goremna? ⁴¹ Sa’anu, i wee mola em pumpunna tanume esa nga wuntul wo eng kaulitna em baya nyi’a e laa maweresi i wee nikoo. ⁴² Ta’an cilaka mouw kouw, heiy tou-tou Farisi, karengan nikouw kouw mawear esa nga mapulu’an witu en selasih, inggu wo e reiy’ sa mina’asa raaren, ta’an nikouw kouw reiy’ mepadungla eng ka’adilan wo e nupus ni Empung. Nesa e lewo’ sa reiy’ tinuanala wo em balina te’a o reiy’ padungela. ⁴³ Cilaka mouw kouw, heiy tou-tou Farisi, karengan nikouw kouw pa’ar maruber witu en tampa kasa muka witu e wale ibadat wo pa’ar paormaten wia em pasar. ⁴⁴ Cilaka mouw kouw, karengan kouw masuat tanu eng kubur reiy’ minake kowa’; se tou-tou makelang witu natasna, se reiy’ mete’ula nyi’a.” ⁴⁵ Siesa tou witu e nelet ne ahli-ahli Taurat i ti’i si miningkot wo lumila’ wia-Nisia: “Guru, ampit limila’ en tuana, Nikoo koo masero’ mouw wia nikeiy kangkasi.” ⁴⁶ Ta’an Nisia si miningkot: “Cilaka mouw kouw kangkasi, heiy ahli-ahli Taurat, karengan nikouw kouw rimeta’la em pemesa’anen-pemesa’anen reiy’ kapesa’anan wia sitou, ta’an nikouw nuesa kouw reiy’ limelerla em pemesa’anen i ti’i ampit e nesa tetudu’ tu’u. ⁴⁷ Cilaka mouw kouw, karengan nikouw kouw masiwo eng kubur ne nabi-nabi, ta’an se nene moyangmu se minunu’la nisea. ⁴⁸ Ampit en tuana kouw minakaredeiy, kaa nikouw kouw mangiulitla em pasiwo-siwon ne nene moyangmu, karengan nisea se minunu’ mola se nabi-nabi i ti’i wo nikouw kouw masiwo eng kubur nea. ⁴⁹ Kaa ni’itu mouw eng hikmat ni Empung limila’: Niaku ku laa tumoke wia nisea se nabi-nabi wo se rasul-rasul wo se esa nga parua witu e nelet ne nabi-nabi wo ne rasul-rasul i ti’i se laa wunu’un nea wo laa ghioan nea, ⁵⁰ Rio wia se angkatan i yi’i se kiweean e raa’ em baya ne nabi e neiy mouw i katoa’ rengane’ eng kaoatan i yi’i siniwola, ⁵¹ Muleiymi waki raa’ ni Habel i ka’ayomi e raa’ ni Zakharia si winunu’ mola witu e nelet Mezbah wo e Wale ni Empung. Awesla, Niaku ku lumila’me wia nikoo: Em baya nyi’a i ti’i e laa kiween wia se angkatan i yi’i. ⁵² Cilaka mouw kouw, heiy ahli-ahli Taurat, karengan nikouw kouw minedo mouw eng kekusi’ en tine’u; nikouw nuesa kouw reiy’ ghimorem witu eng gorem wo se tou me’inakut megheghorem witu eng gorem se pengape-ngape’an niouw.” ⁵³ Wo si Yesus nu rimou’ momi witu en tampa i ti’i, se ahli-ahli Taurat wo se tou-tou Farisi se reiy’ mena’ mategha’ wo mawuyutla-Nisia ampit e reiy’ sa mina’asa kapualitan. ⁵⁴ Kaa ni’itu nisea se me’inakut ma’opas-Nisia, rio sea toro sumikop-Nisia tumo’otolela witu en sapa neiy i totor-Nala.