¹ Kamurian witu e ni’itu Tuhan si timudu’la se pitu nga pulu’ murid walina, laa o tumoke nisea tumererua rumeriorla-Nisia waki susur eng kota wo en tampa neiy petete’upan-Na. ² Pokeiy-Na wia nisea: “Em peupu’an memang kelaker, ta’an se memema’ayang se toyo’. Kaa ni’itu kumiwee mouw wia si Tuang makapunya em peupu’an, rio Sia mapa’alimi se memema’ayang-memema’ayang i wee em peupu’an i ti’i. ³ Mea mouw, eng kaulitna Niaku ku timoke nikouw tanu sioki’ ni domba witu eng keuneran ne serigala. ⁴ Te’a mouw maali en sompoiy-sompoiy ka’apa walun ka’apa na’alas e ne’a, wo te’a mouw metabea wia si seiy i te tu’u keurean wia em pakela-kelangan. ⁵ Sa koo ghumoremla witu e nesa wale, i lila’ mola rerior: En dame sejahtera i wee em bale i yi’i. ⁶ Wo sa witu wawean tou si waar sumungkul en dame sejahtera, takar en tabeamu i ti’i e laa mena’ wia nisia. Ta’an sa reiy’, en tabeamu i ti’i mareng wia nikoo. ⁷ Mena’ mola witu em bale i ti’i, kumaan wo kumoo’ mouw sapa neiy i weela ne tou wia nikoo, karengan siesa tou memema’ayang si waar maka’ato en tetorona. Te’a mouw menoro-noro’ wale. ⁸ Wo sa kouw ghumorem witu eng gorem e nesa kota wo kouw sinungkulla witu, kumaanouw sapa neiy i akirla wia nikoo, ⁹ wo le’osenola se tou-tou rara’an witu wo i lila’ mola wia nisea: Eng Keraja’an ni Empung en tawi mouw wia nikoo. ¹⁰ Ta’an sa koo ghumorem witu eng gorem e nesa kota wo koo reiy’ sinungkulla witu, mea mouw witu e lalan-lalan wangko’ eng kota i ti’i wo i aleiy mola: ¹¹ O kangkasi e riawu eng kotamu eng kimerut witu e ne’a meiy, ni’i pi’ipik meiyla witu en sinarumu, ta’an kete’uanola e nyi’i: Eng Keraja’an ni Empung en tawi mouw. ¹² Niaku ku lumila’me wia nikoo: witu e nendo ni’itu en Sodom e laa lebe wure’ em pemesa’anenna ta’an eng kota i ti’i.” ¹³ Cilaka mouw koo ee Khorazim! Cilaka mouw koo ee Betsaida! Karengan sa waki Tirus wo waki Sidon minamuali e mujizat-mujizat minamuali mola witu eng keuneran niouw, e nure mouw nisea mina kedo’ wo mengasi’. ¹⁴ Ta’an witu e nendo paakiman, em pemesa’anen ni Tirus wo ni Sidon e laa lebe wure’ ta’an em pemesa’anennu. ¹⁵ Wo koo ee Kapernaum, sapa ku’a re’en koo laa i longkotla i ka’ayo waki langit? Reiy’, nikoo koo laa i tumpala i ka’ayo waki kaoatan ne tou minate! ¹⁶ Seiy i te si limingala nikoo, nisia si limingala Niaku; wo seiy i te si sumede’ nikoo, nisia si sumede’ Niaku; wo seiy i te si sumede’ Niaku, nisia si sumede’ Nisia si timoke Niaku.” ¹⁷ Kamurian se pitu nga pulu’ murid i ti’i nu marengi mepa’a-pa’ar wo lumila’: “Tuhan, o kangkasi se setang-setang se tu’utuk wia nikeiy kaa e ngaran-Nu.” ¹⁸ Laa o pokeiy ni Yesus wia nisea: “Niaku ku limoo’ si Iblis rima’aragh tanu eng kerap waki langit. ¹⁹ Eng keulitna Niaku ku minee mola eng kuasa wia nikouw kaa laa lume’ek si leloiy’ wo si kalajengking wo eng kuasa kaa laa metetaang eng kaente’an ne kesaru, i ka’ayo reiy’la si laa mebebahayala nikouw. ²⁰ Ma’an tuana te’a mouw mepa’a-pa’ar kaa e roh-roh i ti’i se tu’utuk wia nikoo, ta’an mepa’a-pa’arola karengan e ngarannu neiy i kepatik mana en sorga.” ²¹ Witu en toro ni’itu kangkasi melaya-laya’ mouw si Yesus witu e Roh Kudus wo lumila’: “Niaku ku masyukur wia-Nikoo, Ama’, Tuhan e langit wo em bumi, karengan em baya nyi’a i ti’i neiy i kirong-Mula wia se tou sama’ wo se tou sigha’, ta’an neiy i papaloo’o-loo’o - Mula wia se tou rintek. Oh Ama’, ni’itu mouw e mekepa’aren wia-Nikoo. ²² Em baya nyi’a neiy mouw i sarakan ni Ama’-Ku wia Niaku wo reiy’la siesa tou tu’u si mete’u seiy ku’a re’en si Oki’ ta’an i te si Ama’, wo seiy ku’a re’en si Ama’ ta’an i te si Oki’ wo sitou e wia nisia si Oki’ i ti’i mepa’ar minapaloo’o-loo’ola eng kapualitan i ti’i.” ²³ Nu reiy’ mouw i tu o lumenge mouw si Yesus wia se murid-murid-Na neiy i ketampas wo lumila’: “Ma’aruiyola em beren limoo’ sapa e linoo’ miouw. ²⁴ Karengan Niaku ku lumila’me wia nikouw: Laker se nabi wo se raja reghes se limoo’ sapa e linoo’ miouw, ta’an se reiy’ limoo’ nyi’a, wo se pa’ar melelinga sapa e lininga miouw, ta’an se reiy’ liminga nyi’a.” ²⁵ Witu mekasa rumedeiy mouw siesa tou ahli Taurat kaa laa mewewa’awa’ si Yesus, pokeiyna: “Guru, sapa e lewo’ sa reiy’ siwongku rio ku maka’ato em patou-touan kekal?” ²⁶ Wingkot ni Yesus wia nisia: “Sapa neiy i kepatik witu e nukum Taurat? Sapa e winacamu maname?” ²⁷ Wingkot ni tou i ti’i: “I keupusla si Tuhan, Empungmu, ampit em pakasa’an e natemu wo ampit em pakasa’an ni imukurmu wo ampit em pakasa’an eng kaketerannu wo ampit em pakasa’an akal budimu, wo i keupusla si kasuat en tou tanukan en toumu nuesa.” ²⁸ Pokeiy ni Yesus wia nisia: “E wingkotmu i ti’i e nulit; sumiwo mouw en tuana, takar koo laa matou-tou.” ²⁹ Ta’an kaa si mapaulitla en touna sitou i ti’i si limila’ wia si Yesus: “Wo seiy ku’a re’en si kasuatku en tou?” ³⁰ Wingkot ni Yesus: “Wawean siesa tou si timumpami waki Yerusalem mineiy waki Yerikho; si limenta’ witu e lawas ne penyamun-penyamun se reiy’kan i te rimampok nisia uli-ulit, ta’an kangkasi se minewe nisia wo nu reiy’ mouw i tu o mea tumele’ula nisia si esa nga parua minate. ³¹ Lime’osla wawean siesa imam si timumpami timoro e lalan i ti’i; nisia si limoo’ sitou i ti’i, ta’an sia si limangkoiyla nisia waki lewet e lalan. ³² Tuanakan kangkasi sitou Lewi si mineiy witu en tampa i ti’i; katoroan sia nu limoo’ sitou i ti’i; sia si limangkoiyla nisia waki lewet e lalan. ³³ Laa o meiy sitou Samaria, si kasuatan witu em pakela-kelangan, me’a witu en tampa i ti’i; wo eng katoroan nisia nu limoo’ sitou i ti’i, i kaoghe mouw e natena kaa en tongkoupusen. ³⁴ Sia mea wia nisia laa o melot em pali’-pali’na, nu reiy’ mouw sia nu simerewla nisia ampit e lana wo e nanggor. Kamurian i seretnala sitou i ti’i witu natas ni keledai pesake-sakeanna nuesa wo mali nisia waki tampa tete’upan wo murus nisia. ³⁵ Eng kawo’odoanna sia sumarakanla e rua dinar wia si makapunya en tete’upan i ti’i, pokeiyna: Urusenouw sia wo sa ni’i telesmula lumantouwla e nyi’i, niaku ku meiy sumawella nyi’a, e nedo niaku nu marengi. ³⁶ Seiy ku’a reken si witu e nelet ne telu tou i yi’i, sa i ki’it eng genangmu, seiy mouw si kasuat en tou wia sitou limenta’ witu e lawas ne penyamun i ti’i?” ³⁷ Wingkot ni tou i ti’i: “Sitou si minapa’ato mola en tongkoupusen wia nisia.” Pokeiy ni Yesus wia nisia: “Mea mouw, wo sumiwo mouw en tuana!” ³⁸ Katoroan si Yesus wo se murid-murid-Na se witu em pakela-kelangan, i ka’ayo mola Sia witu e nesa wanua. Siesa wewene mekengaran Marta si simungkulla Nisia witu em balena. ³⁹ Si wewene i ti’i si makapatuari esa si mekengaran Maria. Maria i yi’i si rimuber witu en tawi e ne’a ni Tuhan wo si reiy’ mena’ malingala em peila’-Na, ⁴⁰ kasuatan si Marta si kasa maringangar melayanla. O Sia tumawila si Yesus wo lumila’: “Tuhan, reiy’ ku’a reken Koo padung, kaa si patuariku si minayala niaku melayanla maesa-esa? I reo mouw sia sumawang niaku.” ⁴¹ Ta’an si Tuhan si miningkot nisia: “Marta, Marta, nikoo koo lieiy wo mesesusala en tou ampit e laker perkara, ⁴² ta’an e nesa i te em padungen: Maria si minelengouw e weteng kasa le’os, e reiy’ laa edoni wia nisia.”