¹ Witu e nendo mekasa e nendo Sabat Yesus si mineiy witu em bale ni meta’asa’an wia se pa’aka-aka’an ne tou-tou Farisi kaa meiy mekekaan witu. Em baya se witu se menegha-negha’ Nisia maka le’o-le’os. ² I ka senge’mi mineiy mouw siesa tou rara’an niunteghan e rano o rumedeiy witu en sinaru-Na. ³ Laa o lumila’ mouw si Yesus wia se ahli-ahli Taurat wo se tou-tou Farisi i ti’i, pokeiy-Na: “I wee i te ku’a re’en lume’osla tou witu e nendo Sabat ka’apa reiy’?” ⁴ Nisea i ti’i se minenes waya. Laa o Sia tumiboiy e lawas ni tou rara’an i ti’i wo lume’osla nisia wo rumeo nisia mea. ⁵ Kamurian Sia lumila’ wia nisea: “Seiy ku’a re’en si witu e nelet miou si reiy’ makarengan kumeong sioki’na ka’apa sapina sa i kawu’uwu’ witu eng gorem em parigi, ma’anouw tu’u witu e nendo Sabat?” ⁶ Nisea se reiy’ makawoo mepepero-Nisia. ⁷ Karengan Yesus si limoo’, kaa se sakeiy – sakeiy se me’inakut mereruberla witu en tampa-tampa kaormatan, Sia lumila’la em peulurla i yi’i wia nisea: ⁸ “Sa sitou mundang nikoo mea witu em pelesir kinawengan, te’a mouw mereruber witu en tampa kaormatan, karengan wo’o wona’ sitou i ti’i si minundangouw sitou lebe paormaten ta’an nikoo, ⁹ rio sitou i ti’i, si minundang nikoo wo nisia, te’a meiy wo lumila’ wia nikoo: I wee mola en tampa i yi’i wia sitou i ti’i, Laa o ampit e nirang koo lewo’ sa reiy’ mea rumuber waki tampa kasa kumeng. ¹⁰ Ta’an, sakawisa koo undangen, mea mouw rumuber witu en tampa kasa kumeng. Wo’o wona’ si mekewale si laa meiy wo lumila’ wia nikoo: Kalo, meiy mouw rumuber waki muka. Ampit en tuana nikoo koo laa maka’ato e normat witu en sinaru em beren em baya ne sakeiy walina. ¹¹ Karengan seiy i te si rumakekla en tou, nisia si laa i kumengla wo seiy i te si kumumengla en tou, nisia si laa i rakekla.” ¹² Wo si Yesus si limila’ kangkasi wia sitou minundang Nisia: “Sakawisa koo sumiwola pesakeiyan oat ka’apa wengi, te’a mouw koo me’undang se kalo-kalomu ka’apa se patuari-patuarimu ka’apa se kaum ne me’urangmu ka’apa se ketana’-ketana’mu kaya, karengan nisea se laa sumuli’la nyi’a ampit mundang nikoo kangkasi wo ampit en tuana nikoo koo minaka’to en sesuli’na. ¹³ Ta’an sakawisa koo sumiwola pesakeiyan, undangenouw se tou-tou miskin, se tou-tou cacat, se tou-tou kepor wo se tou-tou rapa. ¹⁴ Wo nikoo koo la ma’aruiy, karengan nisea se reiy’ makapunya sapa-sapa laa mesesuli’la nyi’a wia nikoo. Karengan nikoo koo laa maka’ato en sesuli’na witu e nendo kineteto’or ne tou-tou ulit.” ¹⁵ Liminga ni’itu o lumila’ mouw siesa wia se sakeiy-sakeiy i ti’i wia si Yesus: “Ma’aruiyola sitou si laa i akirla witu eng Keraja’an ni Empung.” ¹⁶ Ta’an si Yesus si limila’ wia nisia: “Wawean siesa tou si simiwola pesakeiyan wangko’ wo nisia si minundang se kelaker tou. ¹⁷ Melaa’mouw mememuleiy em pesakeiyan i ti’i, sia rumeo si hambana lumila’la wia em baya se niundang: Meiy mouw, karengan e reiy’ sa mina’asa en tiniro’ mouw. ¹⁸ Ta’an nisea se mewali-wali kimiwee ampungan. Si ketare si limila’ wia nisia: Niaku ku timelesouw uma wo niaku ku lewo’ sa reiy’ mea lumoo’ nyi’a; niaku ku makiwee ampungala. ¹⁹ Si walina si limila’: Niaku ku timelesouw lima nge paar sapi kabiri wo niaku ku lewo’ sa reiy’ mea ma’awa’ nisea; niaku ku makiwee ampungala. ²⁰ Si walina kasi si limila’: Niaku ku weru kimaweng wo kaa ni’itu niaku ku reiy’ meiy. ²¹ Takar marengouw si hamba i ti’i wo i pa’ayonala em baya nyi’a i ti’i wia si tuangna. Laa o meupi’ mouw si mekewale i ti’i wo lumila’ wia si hambana: Mea mouw mario-rior waki e reiy’ sa mina’asa lalan wo e lorong kota wo alinomi wia nyi’i se tou-tou miskin wo se tou-tou cacat wo se tou-tou rapa wo se tou-tou pekol. ²² Kamurian si hamba i ti’i rumapotla: Tuang, sapa neiy i perentala ni tuang i ti’i en tinuana mola, ta’an ma’anouw tu’u tu tuana waweane’ tampa. ²³ Laa o pokeiy ni tuang i ti’i wia si hambana: Mea mouw waki em baya e lalan wo em papontaran wo se’esekenouw se tou-tou witu, ghumorem, karengan em baleku e lewo’ sa reiy’ mawuta. ²⁴ Karengan Niaku ku lumila’me wia nikoo: Reiy’la siesa tou tu’u wia se tou-tou niundangouw i ti’i si laa me’anla en sesakeiyan-Ku.” ²⁵ Witu mekasa kelaker se tou mareo-reok maki’it si Yesus witu em pakela-kelangan-Na. Kasuatan nu limenge Sia lumila’ wia nisea: ²⁶ “Sa wona’ siesa tou si meiy wia-Niaku wo nisia si reiy’ mari’iris si ama’na, si ina’na, si ka’awuna, se oki’na, se patuari-patuarina tuama ka’apa wewene, ma’anouw e nyawana nuesa, nisia si reiy’ mete’u mamuali murid-Ku. ²⁷ Seiy i te si reiy’ minesa’an en salibna wo kumi’it Niaku, nisia si reiy’ mamuali murid-Ku. ²⁸ Karengan seiy ku’a re’en si witu e nelet miouw sa sia pa’ar mereredeiyla e nesa menara si reiy’ rumubere’la ketare rumekenla em pesesiwona, sa wona’ tu awes loitna mesesampetla em pepa’ayangen i ti’i? ²⁹ Rio sa wona’ sia rumeta’ mola en teto’otolanna wo reiy’ mouw i kesampetnala nyi’a, wo’o wona em baya se tou limoo’ nyi’a, se sumero’ wia nisia, ³⁰ se kasuatan meila’: Sitou i ti’i si muleiy maredeiyla, ta’an si reiy’ makawoo mesesampetla nyi’a. ³¹ Ka’apa, si raja wisa ku’a re’en sa sia pa’ar me’a meseseke’ sumaru se raja walina si reiy’ rumubere’la rior kaa laa memili-miling’la, sapa ku’a re’en ampit se mapulu’ nga riwu tou sia si makawoo sumarula se kesaru se mineiy nisia ampit se rua nga pulu’ nga riwu tou? ³² Sa wona’ reiy’, nisia si laa mapa’ali se tetoke eng keurean se kesaru i ti’i se wa’akate’ kaa laa mewewueiyla en sarat-sarat medamean. ³³ Tuana mouw kangkasi susur tou witu e nelet miouw, si reiy’ minayala en touna witu e reiy’ sa mina’asa kapunya’anna, si reiy’ mete’u mamuali murid-Ku. ³⁴ Wuras memang le’os, ta’an sa e wuras kangkasi mina tewangouw, ampit en sapa ku’a re’en sia wurasen? ³⁵ Reiy’ mola kasi si penoronna le’os i wee e numa ka’apa tu’u i pupuk, wo se tou se matea’ i tela nyi’a. Seiy si makapunya talinga kaa ni’i palinga, satorona nisia si luminga!”