¹ Waki Kaisarea wawean siesa tou mekengaran Kornelius, siesa perwira pasukan se patotoren pasukan Italia. ² Sia si saleh, nisia ampit se esa nga pumpun em balena se meide’la wia si Empung wo nisia si mawee kelaker esa nga wuntul wia se umat Yahudi wo reiy’ mena’ masombayang wia Empung. ³ Witu e nesa pneleloo’, wo’o wona’ jam tiga mawengindo, kaleno minapa’ato wia nisia siesa malaikat ni Empung ghimorem witu em balena wo lumila’ wia nisia : “ Kornelius!” ⁴ Sia tumu’us si malaikat i ti’i wo ampit e nide’ sia lumila: “Wawean sapa, Tuhan?” Wingkot ni malaikat i ti’i: “Em baya en sombayangmu wo esa nga wuntulmu e mina’ayo mouw witu en sinaru ni Empung wo si Empung si ghimenang nikoo. ⁵ Wo teakan, i reo mouw se pirala tou mea waki Yope mea sumungkulla siesa tou mekengaran Simon wo si patotoren Petrus. ⁶ Nisia si time’up witu em bale ni esa tou lumelutu’ kuli’ mekengaran Simon, si maana’ witu e li’ilik en tasik.” ⁷ Nu reiy’ mouw si malaikat si simusuiyla wia nisia i ti’i nu timele’ula nisia, o keretenna mouw se rua tou se hambana ma’an siesa prajurit saleh wia se tou-tou reiy’ mena’ mewali-wali ampit nisia. ⁸ Wo nu reiy’ mouw sia nu minitarla e reiy’ sa mina’asa wo’o sapa wia nisea, sia rumeo nisea mea waki Yope. ⁹ E nendo kawo’odoanna se telu tou i ti’i se witu em pakela-kelangan wo se tawi mouw eng kota Yope, wo’o wona’ jam dua belas marorake, o lumongkotouw si Petrus witu natas em bale kaa mesesombayang. ¹⁰ Sia si mapedam maarem wo pa’ar mekekaan, ta’an kasuatan eng kekaanen patiro’on, i kasenge’mi e rohna en sinongkouw mouw eng kuasa ilahi. ¹¹ Eng kinaloo’anna e langit mina wuka’ wo tu tumumpa mouw e nesa roko’ penar eng kimayong witu e nepat ruuna, e neiy i tumpala witu en tana’. ¹² Witu eng goremna niato se minegheghioan en jenis ne tekapen maka ne’a epat, tekapen maanap wo se burung. ¹³ O kalinga’anna mouw e nesa suara e limila’: “Tumo’orouw, heiy Petrus, reretanouw wo kumaanouw!” ¹⁴ Ta’an si Petrus si miningkot: “Reiy’, Tuhan, reiy’, karengan niaku ku reiy’pe’ ma’an mekasa kumaan e wo’o sapa eng haram wo e reiy’ lenas.” ¹⁵ O kalinga’anouw kangkasi eng karuana en suara e limila’ wia nisia: “Sapa e neiy i lila’la halal ni Empung, e reiy’ toro koo lumila’la haram.” ¹⁶ Eng kapualitan i ti’i e minamuali maka telu wo makarengan nu reiy’ mouw i tu o ka’adetanouw em benda i ti’i waki langit. ¹⁷ Petrus si memue-mueiy witu eng gorem e natena, saa wona’ em penorona em pineleloo’ e linoo’nala i ti’i. Kasuatan e ni’itu se mina’ayo mouw witu en sinaru em pepalen se tou-tou neiy i reo ni Kornelius wo se me’inakut metet’ula wisa em bale ni Petrus. ¹⁸ Nisea se kimeret siesa tou wo mueiy, Sapa ku’a si Simon si patotoren Petrus si time’up witu em bale i ti’i. ¹⁹ Wo katoroan si Petrus nu megheghenang en tanume em pineleloo’na i ti’i, o lumila’ mouw e Roh: “Wawean telu tou se masero nikoo. ²⁰ Tumo’orouw, tumumpa mouw waki wawa’ wo mae mouw mewali-wali ampit nisea, te’a meware-wareng, karengan Niaku ku rimeo nisea wia nyi’i.” ²¹ Laa o tumumpa mouw si Petrus waki wawa’ wo lumila’ wia se tou-tou i ti’i : “ Niaku mouw si peneron niouw; sapa e maksud kakouw mineiy.” ²² Wingkot nea : “ Kornelius, siesa perwira tulus ate wo meide’ si Empung, wo si kasine’uan le’os witu e nelet ne minapekasa bangsa Yahudi, si minaka’ato mola em pernyata’an ni Empung ampit e nieletan niesa malaikat kudus, rio sia mundang nikoo waki walena wo luminga sapa e laa i lila’mula.” ²³ Nisia si time’esla wia nisea tumekel witu. E nendo kawo’odoanna sia tumo’or wo mae mewali-wali ampit nisea, wo se pirala patuari waki Yope se rimapitla nisia. ²⁴ Wo witu e nendo tumodongla nyi’a i ka’ayo mouw sea waki Kaisarea. Kornelius si kasuatan ma’ana’la nisea wo nisia si kimeretouw se kawanua patuarina wo se kalo-kalona merur. ²⁵ Katoroan si Petrus nu ghumorem, meiy mouw si Kornelius sumungkulla nisia, wo kasuatan si neiy i kasungkur witu en sinaru e ne’ana, sia si simempe si Petrus. ²⁶ Ta’an si Petrus si timaga’la nisia, pokeiyna: “Tumo’orouw, niaku ku tou i te.” ²⁷ Wo kasuatan menusu-nusuiy ampit nisia, sia ghumorem wo matola kelaker tou se kasuatan minerur. ²⁸ Sia lumila’ wia nisea: “Kete’uan niouw, kumura eng kaketena em palouw wia sitou Yahudi kaa laa meka’ampetan ampit se tou-tou se reiy’ Yahudi ka’apa ghumorem witu em bale nea. Ta’an si Empung si timuru’ mola wia niaku, kaa niaku ku reiy’ toro tumotor sitou najis ka’apa reiy’ lenas. ²⁹ Ni’itu mouw en timuanala niaku ku reiy’ kaberatan katoroan niaku nu kineret, laa o meiy wia nyi’i. Teakan niaku ku pa’ar mamete’u, sapa en timuanala o kouw kumeret niaku.” ³⁰ Wingkot ni Kornelius : “ Epat nga endo limangkoiyla wo’o wona’ en toro ni’itu en tanu en teakan, nyi’a i ti’i en jam tiga mawengindo, niaku ku kasuatan masombayang witu em bale, I kasenge’mi wawean sitou rimedeiy witu en sinaruku, em pakeanna e masere-serengat ³¹ Wo sia lumila’ : “ Kornelius, en sesomb ayangen-nu e lininga mola ni Empung wo e nesa nga wuntulmu neiy mouw i papaghenangla witu en sinaru-Na. ³² Rumeo mouw tou mea waki Yope kaa mesesungkul si Simon si patotoren Petrus, nisia si kasuatan time’up witu em bale ni Simon, siesa tou lumelutu’ kuli’, si maana’ waki li’ilik en tasik. ³³ Kaa ni’itu makarenga kurumeo tou wia nikoo wo ampit en senang ate koo mineiy mouw. Teakan keiy nu waya keiy wia mouw nyi’i wia en sinaru ni Empung kaa melelingala sapa e lukarla ni Empung wia nikoo.” ³⁴ Laa o muleiy mouw si Petrus sumusuiy, pokeiyna: “Eng kaulitna niaku ku mangarti mouw, kaa si Empung si reiy’ mangi-nge’anla tou. ³⁵ Susur tou waki se bangsa wisa tu’u se meide’la Nisia wo se masiwola e nulit mekepa’aren wia-Nisia. ³⁶ Ni’itu mouw e nuwu’ ni’i pareo-Na i pa’ayola wia se tou-tou Israel, e nyi’a i ti’i e nuwu maabarla en damai sejahtera kaa ni Yesus Kristus, nyi’a mouw si Tuhan wia em baya ne tou. ³⁷ Nikouw kouw mete’u tanume e reiy’ sa mina’asa wo’o sapae minamuali waki e minapekasa en tana’ Yudea, muleiymi waki Galilea, nu reiy’ mouw em baptisan neiy i abarla ni Yohanes, ³⁸ nyi’a i ti’i en tanume si Yesus waki Nazaret: kumura si Empung minurapla Nisia ampit e Roh Kudus wo eng kuasa ente’, Sia, si makelang materok kasuatan masiwo e le’os wo male’osla em baya ne tou se kinuasa’ala ni Iblis, karengan si Empung si rimapit Nisia. ³⁹ Wo nikeiy mouw si sairi witu e reiy’ sa mina’asa wo’o sapa en siniwo-Na waki tana’ Yudea ka’apa tu’u waki Yerusalem; wo nisea se minunu’ mouw Nisia wo simangkong Nisia witu eng kayu salib. ⁴⁰ Yesus i ti’i si tino’orola ni Empung witu e nendo katelu, wo Si Empung si mepa’ar, kaa Nisia si mapa’atola en tou, ⁴¹ reiy’ wia se minapekasa bangsa, ta’an wia se sairi-sairi, sea nu reiy’pe’ nyi’a se tinuru’ mouw ni Empung, nyi’a i ti’i wia nikeiy nu kimaanouw wo kimoo mewali-wali ampit Nisia, nu reiy’ mouw Sia nu timo’or witu e nelet ne tou minate. ⁴² Wo Nisia si limukarola nikeiy mabarla wia se minapekasa bangsa wo sumairi, kaa Nisia mouw si neiy i tantula ni Empung mamuali akim wia se tou-tou matou-tou wo se tou-tou minate. ⁴³ En tanume Nisia mouw em baya ne nabi se masairi, kaa seiy i te si ma’eman wia-Nisia, sia si laa maka’ato em paampungan en dosa karengan e ngaran-Na.” ⁴⁴ Katoroan si Petrus si kasuatan meila’ tuana, tu tumumpa mouw e Roh Kudus witu e natas em baya ne tou se melelinga em paabaran i ti’i. ⁴⁵ Wo em baya ne tou ma’eman waki weteng ne tou makasunat se rimapitla si Petrus, se minenganga-nganga, karengan limoo’, kaa eng karunia e Roh Kudus neiy i wura’arakla witu e natas ne bangsa walina kangkasi, ⁴⁶ karengan nisea se liminga se tou-tou i ti’i se menoto-notor witu em baasa roh wo malo’orla si Empung. Laa o pokeiy ni Petrus: ⁴⁷ Toro re’en sitou si mape’la kaa mebebaptis se tou-tou i yi’i ampit e rano, kasuatan nisea se simungkulouw e Roh Kudus masuat tanu nikita?” ⁴⁸ Laa o sia rumeo nisea baptisen witu e ngaran ni Yesus Kristus. Kamurian sea kumiwee si Petrus, rio sia mena pirala nga endo kasi mewali-wali ampit nisea.