¹ Rasul-tasul wo se patuari-patuari waki Yudea se liminga, kaa se bangsa-bangsa walina kangkasi se simungkul e nuwu’ ni Empung. ² Katoroan si Petrus i ka’ayola waki Yerusalem, se tou-tou witu e weteng ne makasunat se minesali’isi’an ghenang ampit nisia. ³ Pokeiy nea : “ Nikoo koo ghimoremouw witu em bale ne tou-tou se reiy’ makasunat wo kumaan mewali-wali ampit nisea.” ⁴ Ta’an si Petrus si minitarla e reiy’ sa mina’asa minenodo-nodong, pokeiyna : ⁵ “ Niaku ku kasuatan masombayang waki kota Yope, i kalo’ositi e rohku en sinongkouwi eng kuasa ilahi wo niaku ku limoo’ e nesa pineleloo’: e nesa roko’ penar eng kimayong witu e nepat ruuna neiy i tumpami waki langit i ka’ayomi witu en sinaruku. ⁶ Niaku ku timu’usla nyi’a wo witu eng goremna niaku ku limoo’ se reiy’ sa mina’asa en jenis ne tekapen maka ne’a epat wo se tekapen siru wo se tekapen maanap wo se burung-burung. ⁷ Laa o ku luminga en suara e limila’ wia niaku : Tumo’orouw, heiy Petrus, reretanouw wo kumaanouw! ⁸ Ta’an niaku ku limila’ : Reiy’, Tuhan, reiy’, karengan reiy’pe’ ma’an mekasa e wo’o sapa eng haram wo e reiy’ lenas e ghimorem witu eng gorem en sumaku. ⁹ Ta’an e laa eng karuana en suara waki sorga e limila’ wia niaku : Sapa e neiy i lila’la halal ni Empung, e reiy’ toro i welarmula haram! ¹⁰ Eng kapualitan i ti’i e minamuali maka telu, laa o em baya nyi’a eng kineonge mareng waki langit. ¹¹ Wo katoroan i te ni’itu kangkasi se telu tou se rimedeiy mouw witu en sinaru em bale, wisa keiy time’up; nisea se neiy i tokemi wia niaku waki Kaisarea. ¹² Laa o pokeiy ni Roh wia niaku : Mea mewali nisea amit e reiy’ meware-wareng! Wo se enem patuari i yi’i se rimapitla niaku. O keiy ghumorem witu eng gorem em bale ni tou i ti’i, ¹³ wo nisia si simusuiyla wia nikeiy, kumura sia limoo’ siesa malaikat si rimedeiy witu eng gorem em balena wo lumila’ wia nisia : “ Rumeo mouw tou mea waki Yope kaa mea mesesungkulla si Simon si patotoren Petrus. ¹⁴ Nisia si laa ma’ayola e nesa abar wia nikouw, e laa mapaeiyla eng kalawiran i wee nikoo wo i wee se minapekasa em pumpun em balemu. ¹⁵ Wo katoroan niaku nu muleiy mesesusuiy, wo tu tumumpa mouw e Roh Kudus witu e natas nea, masuat tanu eng ketarean witu e natas ta. ¹⁶ Takar i kaghenangouw aku witu e lelila’an ni Tuhan: Yohanes si mebaptis ampit e rano, ta’an nikouw kouw laa baptisea ampit e Roh Kudus. ¹⁷ Jadi sa si Empung si mineela eng karunia-Na wia nisea masuat tanu wia nikita witu e nedo kita muleiy ma’eman wia si Yesus Kristus, kumura mouw wona’ niaku mepepero Nisia?” ¹⁸ Katoroan sea nu liminga eng kapualitan i ti’i, nisea se minatenang, laa o lumo’orla si Empung, pokeiy nea : “ Jadi wia se bangsa-bangsa walina kangkasi si Empung si kimaruniala em pakedo’an e ma’aka-aka witu em patou-touan.” ¹⁹ Kasuatan e ni’itu laker se patuari-patuari se neiy mouw i kasera karengan em pasiasa’an e limentut nu reiy’ mouw si Stefanus nu niukum paten. Nisea se neiy i kasera mina’ayo waki Fenesia, Siprus wo Antiokia ; ta’an nisea se maabarla e Injil wia se tou Yahudi i te. ²⁰ Ta’anouw witu e nelet nea wawean se pirala tou Siprus wo se tou eng Kirene se neiy i ka’ayomi wia e Antiokhia wo mengila-ngila’ kangkasi wia se tou-tou Yunani wo maabarla e Injil, kaa si Yesus nyi’a mouw si Tuhan. ²¹ Wo e lawas ni Tuhan e rimapitla nisea wo se kasa ka’asa’an setou mina’eman wo minurikit wia si Tuhan. ²² Takar tu ma’ayo mouw e nabar en tanume nisea i ti’i wia se jema’at waki Yerusalem, laa o se jema’at i ti’i tumoke si Barnabas mea waki Antiokhia. ²³ Nu reiy’ mouw si Barnabas nu mineiy wo lumoo’ e nupus karunia ni Empung, mepa’a-pa’arouw sia. Sia ngume’enge’la nisea, rio sea nu waya se minena’ lale wia si Tuhan, ²⁴ karengan si Barnabas nyi’a mouw sitou le’os, minawuta ampit e Roh Kudus wo iman. Eng kelakerouw ne tou se niali wia si Tuhan. ²⁵ Laa o mea mouw si Barnabas waki Tarsus kaa mea mesesero si Saulus; wo sia nu minaatoanola ampit nisia, sia alinna waki Antiokhia. ²⁶ Nisea se minena’ mewali-wali ampit se jema’at i ti’i esa nge te’un eng keurena, kasuatan mawee teturu’ se kelaker tou. Waki Antiokhia mouw se murid-murid i ti’i eng kasa ketarena se patotoren Kristen. ²⁷ Witu en toro ni’itu o meiy mouw se pirala nabi waki Yerusalem mineiy waki Antiokhia. ²⁸ Siesa wia nisea si mekengaran Agabus rumedeiy wo kaa eng kuasa Roh sia lumila’la, kaa e minapekasa eng kaoatan e laa toron em bahaya kelalenan wangko’. Eng kapualitan i ti’i e minamuali kangkasi witu en zaman ni Klaudius. ²⁹ O laa se murid-murid se timantula kaa laa ma’arurla sumbangan, minatoroan ampit eng kaawoan nea siesa o siesa wo mapa’alila nyi’a wia se patuari-patuari se maana’ waki Yudea. ³⁰ Eng kapualitan i ti’i en tinuana neala kangkasi wo sea mapa’alila nyi’a wia se penatua-penatua ampit e nieletala ni Barnabas wo ni Saulus.