¹ Kasuatan e ni’itu eng kasa melayas e nate ni Saulus kaa si mapero wo mewewunu’ se murid ni Tuhan. Nisia si minea sumaru si Imam Wangko’, ² wo si kimiwee surat kuasa wia nisia kaa em pa’alin wia se majelis-majelis Yahudi waki Damsyik, rio, sa sia matola tuama ka’apa wewene se maki’itla e Lalan ni Tuhan, sia si sumikop nisea wo mali nisea waki Yerusalem. ³ Witu em pakela-kelanganna mea waki Damsyik, katoroan sia nu tawi mouw eng kota i ti’i, i kalo’ositi en sena’ e rimesiki waki langit e limedongla nisia. ⁴ Sia i karewa witu en tana’ o kalinga’anna mouw e nesa suara e limila’ wia nisia : “ Saulus, Saulus, ka’a re’en ku’a koo masiasa Niaku? ⁵ Wingkot ni Saulus : “ Seiy re’en Nikoo, Tuhan?” Pokeiy-Na : “ Niaku mouw si Yesus si pasiasannu i ti’i. ⁶ Ta’an tumo’orouw wo mea mouw waki eng gorem eng kota, o maname e laa i lila’la wia nikoo, sapa e lewo’ sa reiy’ siwonnula.” ⁷ Takar minaliko-likoko mouw se ka’ampit-ka’ampitna esa nga pakela-kelangan, karengan nisea se memang liminga en suara i ti’i, ta’an se reiy’ limoo’ siesa tou tu’u kangkasi. ⁸ Saulus si timo’or wo rumedeiy, laa o muka’ em berenna, ta’an nisia si reiy’ mouw mete’u lumoo’ sapa-sapa; nisea se lewo’ sa reiy’ rumawir nisia ghumorem waki Damsyik. ⁹ En telu nga endo eng keurena sia si reiy’ mete’u lumoo’ wo en telu nga endo sia si reiy’ kimaan wo kimoo. ¹⁰ Waki Damsyik wawean siesa murid ni Tuhan si mekengaran Ananias. E nuwu’ ni Tuhan wia nisia witu e nesa pineleloo’: “ Ananias!” Wingkotna : “ Nyi’ikan niaku , Tuhan!” ¹¹ E nuwu’ ni Tuhan : “ Meiy, mea mouw witu e lalan mekengaran Lalan Teren, wo seronouw witu e wale ni Yudas siesa tou waki Tarsus si mekengaran Saulus, Nisia en teakan si masombayang, ¹² wo witu e nesa pineleloo’ nisia si limoo’, kaa siesa tou si mekengaran Ananias si ghimorem witu eng gorem wo si time’upla e lawasna witu e natasna, rio sia toro lumoo’ kasi.” ¹³ Wingkot ni Ananias : “ Tuhan, waki eng kelaker ne tou e liningaku mouw en tanume sitou i ti’i, kumura eng kelakerna eng kalewo’an en tinuananala wia se tou-tou kudus-Mu waki Yerusalem. ¹⁴ Wo nisia si mineiy wia nyi’i amit eng kuasa kasa waki se imam-imam kepala kaa mesesikop em baya ne tou se makeret e ngaran-Nu.” ¹⁵ Ta’an e nuwu’ ni Tuhan wia nisia : “ Mea mouw, karengan sitou i yi’i nyi’a mouw si pakakas pineleng i wee-Niaku kaa laa ma’abarla e ngaran-Ku wia se bangsa-bangsa walina ma’an se raja-raja wo se tou-tou Israel. ¹⁶ Niaku nuesa ku laa tumuru’la wia nisia, kumura eng kelakerna em peme’itan e lewo’ sa reiy’ pesa’anenna karengan e ngaran-Ku.” ¹⁷ Laa o mea mouw si Ananias witu wo ghumorem witu em bale i ti’i. Sia tumo’upla e lawasna witu e natas ni Saulus, pokeiyna : “ Saulus, patuariku, Tuhan Yesus, si minapa’ato mola en tou wia nikoowitu e lalan tinoroannumi, si rimeo mouw niaku wia nikoo, rio koo toro lumoo’ kasi wo mawuta ampit e Roh Kudus.” ¹⁸ Wo en toro i te ni’itu kangkasi en tanu mokan eng kuli’ ipis e rima’araghiwitu em berenna, i ka’ayo sia si toro mouw lumoo’ kasi. Sia tumo’or laa o babtisen. ¹⁹ a Wo sia nu kimaanola, en segaya’ mouw eng keterna. 19b Saulus si minena’ pirala nga endo mewali-wali ampit se murid-murid waki Damsyik. ²⁰ Katoroan i te ni’itu kangkasi sia si maabarla si Yesus witu e wale-wale ibadat, wo meila’la kaa si Yesus nyi’a mouw si Oki’ ni Empung. ²¹ Em baya se tou liminga eng kapualitan i ti’i se ma’erang wo lumila’ : “ Reiy’ ku’a nisia i yi’i si waki Yerusalem si pa’ar mepepunengla seiy i te tu’u si makeret e ngaran ni Yesus i yi’i? Wo reiy’ ku’a nisia si mineiy wia nyi’i ampit e maksud kaa mesesikop wo ma’ali nisea witu en sinaru ne imam-imam kepala?” ²² Ta’an si Saulus e makasela mola em pengaruna wo nisia si minapalikokola se tou-tou Yahudi se maana’ waki Damsyik, kaa nisia si minapa’atola, kaa si Yesus nyi’a mouw si Mesias. ²³ Em pirala nga endo kamurian se tou Yahudi se simusuiyla e nesa petetuanan kaa laa mewewunu’ si Saulus. ²⁴ Ta’an e maksud e lewo’ i ti’i eng kinakete’uan ni Saulus. Oat o wengi se tou-tou se timayur witu em pepalen lengko’an kota, rio sea toro munu’ nisia. ²⁵ ma’anouw tu’u tuana witu e wengi mekasa se murid-muridna se minedo nisia wo tumumpala nisia waki atas em beton eng kota witu eng gorem e nesa karanjang. ²⁶ I kekeka’ayome waki Yerusalem saulus si mina’awa’ mekeka’ampetla en tou wia se murid-murid, ta’an em baya nisea se meide’ wia nisia, karengan nisea, karengan nisea se reiy’ ma’eman, kaa nisia kangkasi siesa murid. ²⁷ Ta’an si Barnabas si simungkul nisia wo mali nisia wia se rasul-rasul wo neiy i susuiyla wia nisea, kumura si Saulus nu limoo’ si Tuhan witu e nuner e lalan wo kaa si Tuhan si minesesusuiy ampit nisia wo kumura eng kaberanianna mawee teturu’ waki Damsyik witu e ngaran ni Yesus. ²⁸ . Wo si Saulus si minena’ mewali-wali ampit nisea waki Yerusalem, wo ampit eng kaberanian mawee teturu’ witu e ngaran ni Tuhan. ²⁹ Nisia kangkasi si mesesusuiy wo mewewueiyan ampit se tou-tou Yahudi, mabaasa Yunani, ta’an nisea i ti’i se me’inakut mewewunu’ nisia. ³⁰ Ta’an eng kapualitan i ti’i nu kenakete’uanola ne patuari-patuari jema’at, nisea se minali nisia waki Kaisarea wo witu sea sumawang nisia mea waki Tarsus. ³¹ Eng kaurean pirala nga edo se jema’at waki e minapekasa Yudea, Galilea wo Samaria se witu eng ka’ada’an dame. Jema’at i ti’i neiy i redeiy wo matou-tou witu e meide’la wia si Tuhan. Eng kelakerna e maka’awesola eng kasela kaa en tulungan woe m pangiboran e Roh Kudus. ³² Witu en toro ni’itu Petrus si makelang materok, melalesla waki wisa-wisa i te. Witu em pakela-kelangan i ti’i sia tumuli kangkasi wia se tou-tou kudus se waki Lida. ³³ Witu niatonala siesa tou mekengaran Eneas, si uwalu mouw nge te’un neiy i katekel witu en tetekelankarengan si kepor. ³⁴ Pokeiy ni Petrus wia nisia : “ Eneas, Yesus Kristus lume’osla nikoo; tumo’orouw wo tu’tulenouw en tetekelannu!” En toro i te ni’itu kangkasi o tumo’orouw sitou i ti’i. ³⁵ Em baya se penduduk Lida wo e Saron se limoo’ nisia, laa o sea murikit wia si Tuhan. ³⁶ Waki Yope wawean siesa murid wewene mekengaran Tabita – witu em baasa Yunani Dorkas. Si wewene i ti’i si laker kasa masiwo e le’os wo mawee esa nga wuntul. ³⁷ Ta’an witu en toro ni’itu si rara’an laa o tumayan. Wo sia nu linele’ mola, e mayatna neiy i gholeiyla witu e woang atas. ³⁸ Lida e minetawian ampit e Yope. Katoroan se murid-murid nu liminga, kaa si Petrus si waki Lida, nisea se rimeo se rua tou wia nisia ampit em pakiween: “Maka-renganouw meiy wia en tampa meiy.” ³⁹ Takar rumingangarouw si Petrus wo mae mewali-wali ampit nisea. Sea nu neiy mouw i ka’ayome mana, sia alin waki woang atas wo em baya ne balu se mineiy rumedeiy witu e retenna wo kasuatan maame’ sea mapa’atola wia nisia em baya e labung wo em pakean, en siniwo ni Dorkas witu e nedo sia nu matou-toupe’. ⁴⁰ Ta’an si Petrus si rimeo nisea nu waya rumou’, laa o sia kumurur wo sumombayang. Kamurian sia lumengeme waki e mayat i ti’i wo lumila: “Tabita, tumo’orouw!” O laa si Tabita si minuka’ em berenna wo katoroan limoo’ si Petrus, sia tumo’or laa o rumuber. ⁴¹ Petrus si timiboiy e lawasna wo sumawang nisia rumedeiy. Kamurian sia kumeret se tou-tou kudusma’an se balu-balu, laa o mapa’atola wia nisea, kaa si wewene i ti’i si matou-tou. ⁴² Em peristiwa i ti’i e neiy i ka’abar waki e minapekasa Yope wo kelaker se tou mina’eman wia si Tuhan. ⁴³ Kamurian witu e ni’itu Petrus si minena’ pirala nga endo waki Yope, witu em bale ni esa tou mekengaran Simon, siesa tou lumelutu’ kuli’.