¹ fe'e fefetu ana', ma malangga-malangga agama'ra ra'abue ro basa atahori lasi-lasi'ra, boema mana to'u too-lane raefafo'ra. de ara pa'a Yesus fo rendi'E nisi' hofernor Pilatus. ² losa hofernor Pilatus ma ana natane mbali Yesus nae, "tebe Hoo ia Manek?" de, Ana na'ta nae, "hoo yang ola' ao'ma, ma'o naa." ³ basama, basa malangga agama'ra fua-dae basa sala'ra reu Yesus. ⁴ boema, hofernor Pilatus natane sulu'E fai neu nae, "saa de hoo nda nau mu'ta saa?, mita ena?, ara fua-dae basa sala'ra reu Nggo." ⁵ te hu, Yesus nda sudi nau na'ta sa ena, de hofernor Pilatus o nggngger. Lamatua Yesus No Barabas ⁶ lele' naa, pas no atahori Yahudi'ra fai fefeta Paskah, de tungga too naa, hofernor Pilatus mbo'i hendi' atahori bui esa yang ana fee rauinggu'ra here. ⁷ lele' naa, atahori bui esa nara'na Barabas, fai ma'ahulu'ra ara humu de ara'e bui rala neu, ana tao onar mbali mana parenda Roma boema ana nisa atahori. ⁸ atahori nae' rema rameli mbali Pilatus fo ana mbo'i hendi atahori bui esa ona' ma'ahulu nara. ⁹ basa ma, pilatus naseselu no'se nae, "hei nau au mbo'i se'ka?, hei nau au mbo'i Yesus, atahori Yahudi'ra manek'na do hoko?" ¹⁰ te pilatus bubulu'u oi malangga-malangga agama'ra rambeda' rala' ro'E de ara humu Yesus. ¹¹ te hu, Malanga-malangga agama'ra dudunggu-mba'mbau rauinggu'ra, de ara ro'e mbali Pilatus fo ana mbo'i Barabas. ¹² basama, Pilatus natane selu' fai nae, "de, hei nanau mara, fee au tao'E ta'o bee, atahori yang hei mae fee'Ne manek soa neu atahori Yahudi'ra?" ¹³ boema, ara nggasi-ki rahere' rae, "mbaku misa'E nisi' hau nggangge' a ata!" ¹⁴ basama, hofernor Pilatus natane nae, "ta'o bee?, te Ana tao sala' saa?" au paresa' basa ena, te au nda hambu sala'Na sa. hu, ara nggasi-ki rahere' selu' fai rae, "mbaku misa'E nisi' hau nggangge' a ata!" ¹⁵ Pilatus aka'a nae fee atahori nae'ra rala nara ramaho'o, de ana mbo'i Barabas tungga sira hihi-nanau nara. basama ana parenda mana manea'ra fifilo Yesus, de fee'se rendi'E nisi' mbuku' Golgota neu. Ara Ra'a'e'ei' Yesus Boema Ara Fifilo'E ¹⁶ de, soldadu'ra ro Yesus nisi' ume manek'a, naa mamana' ne'etu-neladi', basama ara ro'e basa sira nono nara bubue' esa rakukumbu. ¹⁷ de, ara fee Yesus pake badu naru' esa dula'na mbila-maranggeo', boema ara ha'i rala hau manggou'a dana'na de ara hano neu solo' de rasolo neu Yesus langga'Na. ¹⁸ basama, basa'se fee hadat ne'emimina' neu Yesus rae, "soda mole', papa manek Yahudi!" ¹⁹ boema ara be'ute e'edik fee had'at neu Yesus, ma ara puras miru bali-bali' neu mata'Na. basama, ara hemba rasabali'E rendi' hau e'etu' neu langga'Na. ²⁰ ara ra'a e'ei'E basama, ara olu hendi badu naru mbila maranggeo'a mia ao'Na, de ara fee'Ne pake Eni badu'Na, basama ara roo'E lao lete' Golgota neu fo ara mbaku'E sia hau nggangge'a losa Ana mate. Ara Mbaku Yesus Sia Hau Nggangge' ²¹ de, ara lao ma randa ro atahori esa mia dala' talada na, ana fe'e do nema mia Keirene, nara'na Simon, ana nara Aleksande no Rufus. de ara ra'asusu'e fee'ne lu'a nala hau nggangge'a. ²² boema, ara rendi Yesus losa mamana esa nara'na Golgota, yang ara rafade naa rae, "mamana langga rui'". ²³ basama. Yesus na'amada, ma Ana no'e oe, te ara fee'Ne ninu anggor ma'ei' mana sambor no bot', te hu Ana nda nau ninu'sa. ²⁴ basa de, ara mbaku Yesus neu hau nggangge'a de rariri'e, boema ara ramoa' Yesus badu'Na. ²⁵ lele' naa, ara mbaku Yesus nisi' hau nggangge'a pas lii telu bobo'na. ²⁶ basa naa. ma ara sura' neu papa' esa de ara mbaku nisi langga'Na ata' nae, "atahori ia, Yahudi'ra manek'Na." ²⁷ boema ara o mbaku atahori na'o rua, esa nisi' Yesus boboa ona'Na boema esa nisi' Yesus boboa dii'Na. ²⁸ no ta'o naa, tungga Lamatualain susura'Na nae, "ara tao'E ona' atahori de'ulaka'." ²⁹ de, basa atahori mana lao' tungga mamana' naa, mete rita Yesus mana mbaku sia hau nggangge'a ata naa ara kakaler langga nara boema ara ola' piru-fafare rae, "woe! Hoo mufade mae ndefa' hendi' ume nggarei'a, fo Hoo mufefela bali'e si'a aka'a fai telu'a too? ³⁰ soba' hai mae mita, Hoo onda lao' mia hau nggangge' naa!" ³¹ malangga-malangga agama'ra, ro mana to'u too-lane raefafo'ra o ra'a'e'ei' Yesus boe rae, "Ana nafefela bali' atahori mana mate'ra, te hu Ana nda tao nala saa, soa neu ao'Na sa boe! ³² hela fo Mesias, yang ara oi atahori Israel manek'Na, onda lao' mia hau nggangge'a ata fo hita mete tiro'E, naa fo hita tamahere." atahori ka rua' mana mbaku ra'abue ro Yesus sia hau nggangge'a ata' o, ara ra'a e'ei' Yesus boe. Lamatua Yesus Mate ³³ basama, ma'ahatu'a tatana nala basa mamana' naa, lao' mia lii nee' fefetu'na losa lii' sio. ³⁴ de lii' sio. ma Yesus nameli nahere' nae, "Eloi, Eloi, lama sabatani," naa oi, "Ama Lamatualain Ngge, Ama Lamatualain Ngge, saa de Hoo hiru' musudea Au?" ³⁵ de, ara rena, ma atahori hira mana rambari' deka naa, ara ola' rae, "mete mita'E! te Ana randu Elia." ³⁶ basama, sira esa nela-nela' neu ha'i nala busa, de ana dombo nisi' anggor ma'ei'a rala, de ana mbau nisi' tetea'sa tonggo'na, basama ana soro neu Yesus nudu'Na fee'Ne musi, ma ana ola' nae, "hela' neu fo hita tahati soba', se'ute, fafe'ma Elia nema na'onda'E lao mia hau nggangge'a." ³⁷ basama, Yesus nggasi hendi basa hara'Na, basa ma Ana lea hahae'Na. ³⁸ lele' naa, ume nggaei'a, fe'e hambu teme monae'a babata nala Lamatualain kama'Na, te Yesus lea hahae'Na, ma teme monae'a, sii hendi'e lao' mia ata' losa rae' ³⁹ sia naa boe, malangga soldadu esa nambari' mbali Yesus, de ana mete nita'E lea hahae' mate'e'Na, basama ana ola' nae, "tebe, atahori ia, Ama Lamatualain Ana mone'Na!" ⁴⁰ lele' naa boe, hambu ina' hira rambari' mi'a ra'adodo', ina' nara esa Maria Magdalena, boema Yakobus soru'a mama'na Maria, ma Yoses, no Salome. ⁴¹ fe'e ma'ahulu naa Yesus mia mamana' Galilea, ina' nara yang tungga ro Yesus fo ara tao mata' neu'E. boema sia naa o hambu ina' bubue' esa, ara rema ramalolo' ro Yesus mia Yerusalem rema. Ara Ra'oi Lamatua' Yesus ⁴² relo'a nae tena, ma fai'naa o nanda no atahori Yahudi'ra fai huhule-oo'e nara boe, ⁴³ basama atahori esa nara na Yusuf lao' mia Arimatea nema, eni o mana nggero-furi sia mamana ngenggero agama Yahudi'ra, boema eni atahori meulau, de eni o nahani Lamatualain nusak'Na nenema'na boe. ana neu nanda no hofernor Pilatus de no'e Yesus ao sisi'Na. ⁴⁴ Pilatus rena oi Yesus mate, ma ana nggengger. basama ana no'e nala malangga soldadu'a de ana natane hehelu nae, 'tebe, Yesus mate ena do?' ⁴⁵ de malangga soldadu'a nafade nala, ma Pilatus denu Yusuf neu na'onda' Yesus ao sisi'Na fo na'oi. ⁴⁶ basa de Yusuf neu na'onda' nala Yesus ao sisi'Na, ma ana mboti malolole nendi teme feu mafeli't. lele' naa o ara fe'e do paa' basa rates sia mbuku' fatu'. boema Yusuf o'o nendi Yesus ao sisi'Na, de tao rates rala neu, basama ara lolir fatu bebela monae' esa, de tatana neu rates'a. ⁴⁷ lele' naa Maria Magdalena no Yoses mama'na rita Yesus rate'Na.