¹ lele' naa, hela' fai rua fo pas no fai paska no fefeta roti nda ma bibit'sa, ma malangga-malangga agama'ra ro atahori mana to'u too-lane raefafo'ra ra'abubue de ara sangga dala' tipu-dae fo ara humu Lamatua Yesus. ² hu, ara fe'e ramahia oi, "hita afi' humu'E die sia fai malole'ra, te du'aka atahori ramue hita." Ina' Esa Mbo'a Mina Ma'ameni'a Neu Yesus Ei'Na ³ Yesus mia kambo' Betania , mia atahori esa nara'na Simon ma'ahulu naa, eni mamahedi' kusta, te Yesus fee'ne hai. fai naa, Yesus se fe'e raa mia Simon ume'na, ma ina' esa nema to'u boto fatu esa, isi'na mina narwastu yang ma'ameni' boema mafelit. basama ana mbo'a neu Yesus langga'Na. ⁴ te hu, atahori mana mia nara rita'e de ara ramanasa', esa ola'mbali esa rae, " saa de ana mbo'a ngga-nggari'a mina ma'ameni' beoma mafelit ta'o naa? ⁵ ona' mina ma'ameni' naa eni seo'e dei na, feli'na losa dinar 300 lena' fo bisa fee neu atahoti hata'ta'ra." basama ara ramue ina'a. ⁶ te hu, Yesus nafade mbali'se nae, "hela'e neu. saa de hei mi'sususa' ina' ia? ana tao meulau' soa neu Au. ⁷ te, hei mo atahori hata-ta' ia'ra mikindo'a, boema hei mae minda mo'se fai hira boe o bisa, fo hei mae tao meulau' neu'se sudi'a fai hira boe bisa. te hu nda doo'sa te Au nda sudi u'ubue o hei saa ena. ⁸ ina' ia, nariu meme' Au, te Au masoda Ngga hela'a mbei ena. ana mbo'a mina ma'ameni' ia neu langga Ngga de ana o'ose neu basa ao Ngga. ⁹ misineda matalolole, mete ma atahori dui-bengga Lamatualain hara-lii malole'Na losa bee, naa ara o dui-bengga ina' ia tatao malole'na boe, fo basa atahori rasaneda'e." Yudas Nala Hara' Nae Seo Lamatua Yesus ¹⁰ basama, Yesus ana nanori kasanahulu rua nara esa nara'na Yudas Iskariot, neu sangga malangga-malangga agama Yahudi'ra de seo Yesus neu'se. ¹¹ ara rena rala ma, ramaho'o de ara helu neu Yudas oi rae fee'ne doi'. boema Yudas sangga dala' meulau' fo nae fee Yesus neu'se. Yesus Naa Fefeta Paskah No Ana Nanori Nara ¹² fai kaesa' naa atahori Yahudi'ra fai malole nara. fai naa o ara tunu roti nda mana tao bibit'sa, boema ara mbau bibi lombo fo feta rendi' sia fai paskah, lele' naa Yesus ana nanori nara ratane mbali Yesus rae, "fai ia fai Paskah, de Hoo nau fee hai mi dode-nasu nana-nininu'ra sia bee?" ¹³ basama Yesus denu ana nanori nara rua nae, "hei ru'anggi mi'misi' kota, hei mi te minda mo tou' esa nasa' nendi nggusi esa sofe no'a oe, de nanda no hei. ama tungga mo'e. ¹⁴ fo hei misi' se'ka ume'na, naa mifade mbali tenu ume'a mae, 'Meser fuli nae: hoo mae fee mamana' sia bee fo Eni no ana nanori nara rae tao fefetas Paskah reu rala?' ¹⁵ dei fo, ana natudu kama loa' esa neu nggi, sia tada' ata' ka, kama naa nene siap basa ena. de hela'a hei mi fo sa'dia nanat ara." ¹⁶ basa naa, ma ka rua'ra lao kota reu, de ara losa naa ma ara randa' ro atahori yang lu'a oe mia nggusi esa ona'a Lamatua Yesus nafade'Na boe, de ara tao tungga ona'a Yesus fufufli'Na, basama ara sa'dia hela nanat Paskah ra, dei de ara bali' reu rafade Yesus'se ¹⁷ relo'a tena boa, ma Lamatua Yesus no ana nanori ka sanahulu rua nara reu. ¹⁸ basama, ara endo' ra'abubue de fe'e raa-rinu boema Yesus ola' nae, "Au ae ufade hei esa sie, mema' basa hita fe'e taa-tinu ta'abubue sie, te basa naa lao' mia hei ia'ra esa seo Au neu atahori laen fo ara tati-mbau Au." ¹⁹ ara rena rala, ma basa'se rala nara mera', de esa ola' nae, 'nda au saa!' boema ruma rae, 'au hoko'!" ²⁰ de Yesus ola' mbali'se nae, "atahori mana seo Au a, ana sia hita dalada nara, de ana boro' roti'na manggo rala neu na'abue no Au. ²¹ hu naa, Ama Lamatualain Ana'Na nae mate' a ian, ona' yang nenesura' basa ena, te hu atahori mana seo Ama Lamatualain Ana'Na, naa atahorimana tu'u buku'u!. malole' naa atahori ona' naa'ka nda mori sia raefafo ia sa." Lamatua Yesus Helu Nae Roti No Anggor Dadi Neseneda' Neu Eni ²² basa'se fe'e raaa-rinu, ma Yesus ha'i nala roti Ana Hule o'e Ua'nale', basama Ana bibinggi rote'a de fee neu'se boema Ana ola' nae, "ha'i mala', fo ama mia, te roti ia, Au ao isi Ngga." ²³ basa naa, ma Ana ha'i nala saloki anggor'a, de Ana hule o'e ua'nale'. basama Ana loo saloki'a neu'se de basa ana nanori nara rinu. ²⁴ basama, Lamatua Yesus nafade mbali'se nae, "oe anggor ia, Au raa Ngga. raa nene'helu fufuli'basa ena, raa ia sai fo soi basa atahori'ra, de anggor ia dadi neu nesenedat neu Au. ²⁵ Au ufade neti nggi, te Au nda sudi inu anggor o hei saa ena, losa fai'na nema dei fio Au inu anggor feu' sia Au Ama Tualai Ngga nusak'Na." ²⁶ basa boama, ara soda sosodat esa fo koa-kio Lamatalain. basama ara lao risi' lete' Zaitun reu. Lamatua Yesus Nafade Nae Mete Te Ana Nanori Nara Rela Hela Eni ²⁷ basama Yesus ola' mbali'se nae, "nene sura' basa ena sia Ama Lamatualain susura'Na rala oi, 'mete te basa hei mela hela Au', 'Ama Lamatualain oe Eni nisa hendi' mana tada, ma bibi lombo naa'ra rela sara ngga-ngga leli.' Zakharia 13:7 ²⁸ te hu, mema' Au mate, te basa naa Au mori bali', fo Au lao u'uhulu' hei sia Galilea." ²⁹ hu Petrus ola' mbali Yesus nae, "mae au torano' nggara basa'se rela hela' Hoo, te hu au hoko'." ³⁰ boema Yesus nafade mbali'e nae, "Au ufade tebe-tebe' neti nggo, te tetemba' ia, manu'ra nda fe'e ko'o-kee lao rua'sa, te hoo mufuni', mae hoo nda muhine' Au'sa, lao telu ena." ³¹ te hu, Petrus nda no nanau'na'sa, de ana na'ta selu' fai nae, "hoko', mete ma Hoo mate naa, au o mate tungga Ngoo, te au nda nau lao hela Nggo'sa!" basama basa'se ola' ra'o naa boe. Lamatua Yesus Hule-oo'e Mia Osi Getsemani Rala ³² basama, Yesus'se lao' losa mamana' esa nara'na Getsemani sia lete' Zaitun ata', ma Ana nafade mbali' ana nanori nara nae, "hei endo' mihani ia, te Au ae uu hule-o'e sia osi'a rala." ³³ basama, Ana oi Eni nae'a namahia', de Ana no'e no Petrus, boema Yakobus, ma Yohanes fo ara ranea'E. ³⁴ de, Ana nafade mbali telu'se nae, "Au rala Ngga mera'!, Au oa Ngga Nameda' ona' Au ae'a mate ena. mihani mi ia fo ama minea." ³⁵ basama, Ana lao na'a dodo' mbei, ma Ana sende' lulangga'Na neu rae'a de Ana hule-oo'e neu Ama Lamatualain ³⁶ nae, 'mete ma, Papa nau naa, afi' fee Au lemba doi-doso' ia losa mate, ha'i mala bali' sanggi ma'ei' ia lao' mia Au, hu, afi' tungga Au hihi-nanau Ngga, te hu, Papa Hoo hihi-nanau'Ma yang dadi." ³⁷ basama, Ana bali' nisi ana nanori ka telu nara, ma Ana hambu nala'se mana sunggu masambeta ena, de Ana fafae'se, ma Yesus natane mbali Petrus nae, "Simon, saa de hoo sunggu? saa de hoo bisa munea mo Au lii esa'sa boe doo? ³⁸ hei musi minea boema ama hule-oo'e, naa fo ama afi' tuda sala' rala mi, dula-dale'a mema' malole' te hu ao sisi'mara nda be'i'sa." ³⁹ basa naa, fai ma Ana Lao neu hule-oo'e selu' ona'a hule-oo'e ma'ahulu'Na boe. ⁴⁰ basama, Ana bali' nema fai, te ana nanori nara, mata nara rama bera', de Ana hamu nala'se mana sunggu'ru, de ara nda rita' rae ra'ta saa mbali Yesus boe. ⁴¹ basa naa, ma Yesus lao hela'se fai, de neu hule-oo'e lao ka telu'na, basama Ana bali' nema de nafade mabli'se nae, "hei fe'e mana sunggu'ru doo? dai ena, fai'na losa ena, mete mita, te Ama Lamatualain Ana'Na ara seo'E nisi' atahori de'ulaka'ra lima nara. ⁴² fela leon, fo ata lao, mete te, mana seo Au'a nema ena." Ara Humu Rala Lamatua Yesus ⁴³ basa hendi' naa, de Yesus fe'e ola-ola', aiboi' ma Yudas nema namalolo' no atahori nae', sira ruma to'u dombe tafa', boema ruma to'u au e'e'tu' ru, ara hambu parenda' lao' mia malangga-malangga agama'ra no mana to'u too-lane raefafo'ra boema atahori lasi-lasi Yahudi'ra fee'se rema humu Yesus. ⁴⁴ Yudas nafade mema' neu atahori nae' nara nae, "mete ma, hita losa fo au idu se'ka, naa humu mala'E leo!, te atahori yang hei sangga'a naa Eni ena." ⁴⁵ de, ara losa, ma Yudas nakando nisi' Yesus de ana ola' nae, "Meser!" boema, ana idu Yesus. ⁴⁶ basama, atahori nae'ra mata reu de ara humu rala Yesus. ⁴⁷ hu, Yesus ana nanori nara esa lesu nala dombe tafa'na de ana tati neu malangga agama'ra esa ndiki-doo'na de etu' hendi'e. ⁴⁸ boema Yesus ola' mbali atahori nae' mana rema humu Eni'ra nae, "ta'o bee de hei ima humu Au, mendi'a dombe tafa' no hau e'e'tu, ona' atahori de'ulaka'? ⁴⁹ tungga'a fai naa Au umulolo' o hei sia Ama Lamatualain ume'Na rala fo unori, naa hei nda humu Au sa. hu, basa ia'ra dadi ta'o ia, naa fo tungga' no mana sura' hela ena." ⁵⁰ lele' naa Yesus ana nanori nara, basa'se rela hela'E mesa'ne. ⁵¹ hela aka'a mone tena' esa tungga no Yesus, ana mboti ao'na nendi' teme e'etu' esa. de atahori'ra o rae humu'e boe, ⁵² te hu ara to'u rala aka'a eni teme'na, de ana nela no ao ma'ahola'na. Ara Ro Lamatua Yesus Nisi' Manek Yahudi ⁵³ basa naa, ma ara to'u rendi Yesus nisi' malangga monae'a no malangga agama'ra, basama ara ro'E nisi' atahori lasi-lasi Yahudi'ra boema mana to'u too-lane raefafo'ra yang mana ma'abubue're sia mamana esa. ⁵⁴ de, Petrus tungga-tungga dea nara mi'a seku dodo', losa malangga monae'a ume'na, ma Petrus endo' na'abue no atahori mana dara ai'ra. ⁵⁵ sai ume'na rala, basa malangga agama'ra ra'abubue fo sangga dala' no sakasi fo rae fee sala' neu Yesus, naa fo sira hambu huku-doki risa'E. te hu ara nda hambu dala' sa'saa boe. ⁵⁶ hu na'naa, ara ro'e rala sakasii falus nae' fo rae ra'atutuda' Yesus, te hu sira dedea o'ola nara, esa nda nandaa no esa'sa boe. ⁵⁷ basama, hambu atahori hira fela rambari de ara fee sakasii sakasii peko-leleko' rae, "hai rena Ana ola' nae, 'Au ae ndefa' hendi nggarei' yang atahori rafefela rendi' sira lima nara, te hu si'a fai telu te Au ufefela bali' ume nggarei feu' esa, yang Au nda tao endi' lima Ngga saa." ⁵⁹ hu, mae ara fee sakasii ta'o naa o, esa nda nandaa no esa sa'sa boe. ⁶⁰ basama, malangga monae Yahudi fela nambari' nisi' talada', de ana natane mbali Yesus nae, "saa de Hoo nda mu'ta atahori mana fee sakasii ia'ra sa?" ⁶¹ te hu, Ana nene nakandoo, Ana nda na'ta sa boe. basama malangga monae'a natane selu' fai nae, "tebe Hoo ia Mesias, Ama Lamatualin Ana mone'Na doo?" ⁶² boema, Yesus na'ta nae, "tebe, Au ia Eni, mete te hei mita'E endo' sia Ama Lamataulain boboa ona'Na sofe' no'a koasa fo basana Ana onda nema no lele'a sia lalai ata'." ⁶³ rena Yesus ola' na'o naa, ma malangga monae'a sida hendi' badu naru'na de ana ola' nae, "ta'o bee de hita fe'e sangga sakasii fai? ⁶⁴ hei rena oa' mara, Ana na'amumuti oi Eni Ama Lamatualain Ana'Na. de bas hei mae mi'etu' saa neu'E? ⁶⁵ basama, sira atahori hira mia naa ara puras miru neu'E, de ara ola' rae, "mutudu Hoo koasa'ma leon!" boema ara parenda mana manea'ra de ara mba-mbasa'E. Petrus Nafani Oi Eni Nda Nahine' Yesus Sa ⁶⁶ Petrus fe'e endo mia malangga monae'a ume nembeleo'na, ma malangga monae'a a'te na ina esa nema. ⁶⁷ de, mete nita Perus mana dara ai, ma ina'a mete namemeu Petrus de ana natane mbali'e nae, "au mete ita hoo mo Yesus, atahori lao' mia Nazaret naa boe too?." ⁶⁸ hu, Petrus nafani de ana ola' nae, "hoko' boema au nda uhine' hoo ia o'ola' sa'sa boe?" basama ana lao nisi' lelesu parapunggu'a mata'na, ma manu lai'a ko'o-kee. ⁶⁹ ina'a nanda selu' no Petrus fai de ina'a nafade mbali basa atahori mana mambari' mia nara nae, "atahori ia esa boe, Yesus atahori lao' mia Nazaret ana nanori nara esa." ⁷⁰ te hu, ana o nafani fai. nda doo'sa fai, ma atahori mana mambari'ra o ola' rae, "tebe hoo ia esa boe, basa hei atahori lao mia Galilea too?." ⁷¹ hu, Petrus ola' sumba ao'na nae, "au nda fe'e uhine ita atahori yang hei dui' naa sa!" ⁷² basama, manu lai'a ko'o-kee selu lao ka rua na, boema Petrus nasaneda Yesus o'ola'Na oi, "manu lai'a nda fe'e ko'o-kee lao rua sa, te hoo mufuni' mae hoo nda muhine' Au'sa lao telu ena." de, Petrus nasaneda nala ma ana nggae ei-ei.