¹ basa naa, ma Lamatua Yesus nanori'se nendi' dudui-dudui ne'etata' nae, " hambu atahori esa yang tao osi anggor. ana lutu-mba nala basa osi'a, basama ana ali ndola' fo na'anunumbu' anggor deke', boema ana nafefela mamana nenea' naru' esa, de basa naa, ma ana sela-nggari nala basa-basa'e, basa boema, ana seba neu atahori laen fo ara mete-se'u'e, dei fo mbule-boa'na nema fo ara babanggi. de ana lao nusak laen neu. ² losa fai etu-oru, ma tenu osi'a denu a'te'na esa neu nisi' mana tao osi fo ha'i eni babangi'na. ³ te hu, mana tao osi'ra humu rala'e, de ara poko-paru'e, basama ara oi bali'e no lima rou' ⁴ basa naa, ma tenu osi'a denu selu' a'te'na esa neu fai, ona'o ara poko-paru langga'na, boema ara lea-nonore tungga dala' ata fo ramamae'. ⁵ boema, ana denu selu' a'te'na laen reu selu' fai, hu ara mbau risa'e. ona-ona' naa nekendo'a, ruma reu naa ara poko-paru'se boema ruma reu naa ara hala risa'se. ⁶ losa basa hendi' tenu osi'a a'te nara, ma ana denu ana mone susue'na neu, ana ola' nae, 'ara mete rita au ana mone susue ngga te ara simbo rala'e malole' boema ara fee hadat neu'e.' ⁷ te hu, ara mete rita'e nema, ma esa ola' mbali esa rae, 'ia'ka mana simbo' waris, de ima fo ata hala tisa'e, te ana mate naa hita hambu basa sudi'a sa'sa nara." ⁸ basama, ara humu'e, de ara hala risa'e, basa naa, ma ara mbia'e osi anggor'a dea neu. ⁹ tenu osi'a rena ara mbau risa ana'na, naa ana tao mana tao osi anggor'ra ta'o bee?, Au ufade neti nggi, te tenu osi'a nema, naa ana hala nisa basa mana tao osi anggor'ra, fo ana fee osi anggor'na neu atahori laen tao'e. ¹⁰ te hei se'u mita do hoko' sia Ama Lamatualain susura'Na rala na'o ia: 'fatu esa yang tukan ara nggari hendi'e ena' te ia naa, ana didi bali' neu fatu lalaka' ena. ¹¹ ia naa Lamatualain tengga nala'e, fo na'e'endo'e fatu lalaka' naa, dehita tita'E susue-lalai'Na soa neu hita." Mazmur 118:22-23 ¹² te hu, basa naa, ara sangga-sangga dala' fo rae humu'E, hu ara fe'e ramahia atahori nae' te ara bubulu' oi Lamatua Yesus ola' dedea ne'etata' naa neu sira. de ara fela lao hela Yesus no ana nanori nara. Ne'etata' Neu Mana Bae Bea ¹³ basama, moko-moko' Yahudi'ra, denu atahori Farisi hira ro atahori Herodian'ra rema randa selu' ro Lamatua Yesus fo rae sangga dedea-o'ola mana tuda nara. ¹⁴ rema boema ara ola' mbali Lamatua Yesus rae, "Meser, hai bubulu' tebe' Hoo nda de Hoo nda tao afi' neu atahori laen dedea-o'ola nara sa. hu, Hoo nda mete atahori rou dea'na sa te hu Hoo munori Ama Lamatualain dala ndo-tetu'Na. de hai mae mitane Nggo, tebe do hoko' hita musi bae bea nisi' mana parenda Roma?" ¹⁵ musi hai bae bea do afi' fee hai bae? te hu, Lamatua Yesus bubulu' ara rae ra'atutuda'E, de Ana na'ta mbali'se nae, "ta'o be de hei mae mi'itutuda'au? mendi fee Au doi fula' esa nema fo Au mete soba'e dei." ¹⁶ boema, ara rendi' doi fula'a nema, ma Yesus ha'i nala'e de Ana natane mbali'se nae, "ia se'ka mata'na, no se'ka nara'na sia doi fula' ia ata'?" boema ara ra'ta rae, "naa mana parenda Roma no manek'a nara'na." ¹⁷ basama, Yesus nafade mbali'se nae, "ta'o naa, saa yang mana perenda ena'na, naa fee neu mana parenda, boema saa yang Lamatualain ena'Na, naa fee neu Lamatualain." Yesus ola' ta'o naa, ma ara nggengger. Atahori Saduki Natane Nae Na'atutuda' Yesus ¹⁸ boema, atahori Saduki'ra ola' oi nda hambu atahori mate naa, ana fela bali'sa, basama ara rema de ratane mbali Yesus rae, ¹⁹ "Meser, Musa sura' hela fee hai tungga hadat'a nae, mete ma tou' esa mate hela sao'na, te hu nda ma'ena' ana'sa naa, tou'a odi'na esa musi sao nala bali' ina falu'a, naa fo ana bonggi hela fee a'a'na mana mate'a. ²⁰ de mete ma, sira mone' hitu. fo a'a mone hulu'a sao, basama ana mate te nda fee hambu ana'sa, ²¹ naa odi'na mone' ka rua'na sao nala bali' ina falu'a, basana ana mate fai te nda fe'e hambu ana'sa, naa odi' mone' ka telu'na fai sao nala bali' ina falu'a. ²² de, ta'o-ta'o naa nakandoo'a, losa odi' mone muri'a oo mate. basa naa boema, ina falu'a mate. ²³ hai mae mitane neti Nggo, losa fai mate'en na, Ama Lamatualain nenema'Na, fo atahori mana mate'ra fela bali', naa ina'a dadi neu se'ka sao'na mia tou ka hitu' naa ra.?" ²⁴ basama Yesus na'ta nae, "hei mitane' mara ia'ra rangga papa' leli, te hei nda mihine' Ama Lamatualain sususra'Na isi nara'sa boema hei o nda mihine' Ama Lamatualain koasa'sa boe. ²⁵ hu naa, pas ara mate'ra mori bali' lao' mia mamates nema, naa esa nda sudi sao esa'sa, te hu ara sama ona' Ama Lamatualain A'te nara sia sorga. ²⁶ soa' no, atahori mana mate'ra fo ara mori bali', hei mita nenesura' sia Musa susura'na do hoko', Ama Lamatualain ola-ola' no'e mia uru-hau ana'ra rala'a nae, 'Au ia, Abraham no Ishak boema Yakub se Ama Lamatualain' ²⁷ Eni Ama Lamatualain nda mana mate'sa, te hu Ama Lamatualain mana mori'. hei ia'ra atahori mana rangga'ra!" Too-Lane' Ama Lamatualain No Too-Lane' Raefafo' ²⁸ basama, atahori mana to'u too-lane raefafo esa nema de ana rena Yesus nareresi no atahori Saduki'ra. de ana rena Yesus na'ta'se melole', ma ana o natane mbali Yesus nae, "too-lane' beka yang nalena' basa too-lane'ra?" ²⁹ ma Yesus na'ta nae, "too-lane ma'ahulu'ra, ta'o ia: 'rena', basa atahori Israel! Ama Lamatualain aka'a esa'a, nda hambu laen'sa. ³⁰ de, sue'lai Ama Lamatualain no hoo rala teme ao'ma, boema no hoo ao samana'ma, boema no hoo dudu'a-a'afi'ma, boema no hoo bebe'i-bara ai'ma.' ³¹ boema, ka rua'na nae: 'sue-lai hoo torano' mara sama ona' hoo sue-lai hoo ao'ma.' nda hambu too-lane' esa lena'a lao mia ia'ra sa boe." ³² basama, mana to'u too-lana raefafo'ra ola' selu' mbali Yesus rae, "mema', Meser. Hoo mufade'ma naa nda' Ama Lamatualain esa nda hambu laen'sa. ³³ de, hita musi sue-lai'E no rala teme ao, boema no hita dudu'a-a'afi'na, boema no hita bebe'i-bara ai'na, boema hita o musi sue-lai tora'no tara ona'a hita sue-lai hita ao' nara boe, meme' naa lena' lao mia hita fee banda tunu-hohotu tara." ³⁴ Lamatua Yesus rena'e na'ta na sofe' no'a dudu'a-a'afi' meulau', ma Ana ola' mbali'e nae, "Hoo ia nda mu'udodo' mo Ama Lamatualain nusak'Na sa." basa naa, ma nda sudi hambu atahori laen natane selu' Yesus fai. Kristus Naa Lamatualain ³⁵ lele' naa Yesus fe'e nanori atahori'ra mia Ama Lamatualain ume'Na rala, de Ana natane'se nae, "ta'o be de atahori mana to'u too-lane raefafo'ra rafade rae Kristus naa Daud ana'na? ³⁶ fai ma'ahulu na Lamatualain Dula-dale Meumare'Na sia Daud susura'na nae, 'Ama Lamatualain nafade nneu au malangga ngga nae: endo' misi' Au boboa ona Ngga, dei'fo Au tao Hoo musumara ta'alok neu nggo.' Mazmur 110:1 ³⁷ mia naa, ma Manek Daud'a o no'e Kristus nae 'Malangga'. de, ta'o be fo Kristus naa Eni ana'na?." Ana ola' naa, ma atahori mana rena'ra fe'edo rahine' de ara ramaho'o. Yesus Nafade Nae Besa-Besa Mbali Atahori Mana To'u Too-Lane Raefafo'ra ³⁸ lele' naa, Lamatua Yesus nanori rauinggu'ra nae, "ama besa-besa mbali atahori mana to'u Too-lane raefafo'ra, yang ara hika'a pake lafe naru' fo atahori fee hadat neu'se sia mamana-mamana ma'abubue', ³⁹ mete ma ara risi' ume huhule oo'e do hoko'na ara risi' mamana fefetas naa ara fee'se endo' risi' mamana e'endo mata' fo atahori mete rita'se. ⁴⁰ de besa-besa! te ara boe hika' peko-leleko' ina falu'ra, fo lea rala ume nara, boema ara rambari' hule oo'e naa doo'na sali naa fo oi atahori koa sira. atahori ona' nara mete te Lamatualain fee huku-doki menae'se." Lamatualain Mete-se'u Ina Falu Esa Doi Derma'na ⁴¹ basa naa, ma Yesus endo mbali mamana derma mata na de Ana memete rauinggu'ra rema mbeda' doi derma. atahori mamasu'i nae' rema mbeda' doi derma nae' nisi' peti rala. ⁴² basa naa. ma ina falu esa nema mbeda' doi derma'na boe, ana mbeda' doi sen rua nisi' peti'a rala. doi' naa feli' na mbei ana'k. ⁴³ basama, Lamatua Yesus no'e nala ana nanori nara de Ana nafade mbali'se nae, "hei mete mata lolole', te ina falu ia fee doi derma'na aka'a sen rua, te hu derma'na monae' lena' basa atahori mana fee derma ia'ra. ⁴⁴ hu na'naa, basa atahori ia'ra fee derma nara lao' mia sira doi lena nara, te hu ina falu ia, fee nabasa eni doi nara, nda hela mbei fo eni tai neu'e sa boe."