¹ basama, Yesus lao hela' mamana naa de Ana lao Yudea neu boema loe Yordan seri'na. de, atahori nae' rema heo rala'E fai. de ona' ma'ahulu nara de Ana nanori'se fai. ² basama, atahori Farisi'rao hira rema rae sangga dala' fo ra'atutuda' Yesus de ara ratane rae, "tungga hita too-lane'na, naa tou esa masao te ana bole' mahela' doo hoko?" ³ ma Yesus na'ta'se nae, "Musa fee parenda neu hei ona' na'ke doo?" ⁴ ma ara ra'ta rae, "Musa oi fee sao tou esa musi tao susura mahela' na'ahulu' dei fo ana mahela'." ⁵ te hu, Lamatua Yesus nafade mbali'se nae, "Musa fee parenda' ona' naa, hu naa hei hi'ra langga fatu mara seli. ⁶ te hu, eni'a mia ma'ahulu'na nema, 'te Ama Lamatualain na'adadadi' tou' no ina'. ⁷ naa'de, tou esa ana lao hela ama'na no ina'na. ⁸ naa fo ana na'abue no sao'na dadi reu ao sisi' esa.' no naa ru'ase nda sudi dadi reu rua'sa, te hu ru'ase dadi reu ao sisi' esa. ⁹ de mete ma, Ama Lamatualain yang na'asaso'se naa afi' losa atahori fee'se mahela'." ¹⁰ basama, Yesus no ana nanori nara risi' ume rala, ma ara ratane selu' mbali Lamatua Yesus fai. ¹¹ de, Ana nafade mbali'se nae, "tou' seka mesan'e yang mahela' no sao'na fo ana sao selu, naa eni hohongge. ¹² boema, kalu ina' seka yang mahela' no eni sao'na fo ana sao selu', naa eni boe hohongge," Lamatua Yesus Fee Ua Nale' Neu Ana Diki'ra ¹³ basa na, ma atahori'ra rema ro sira ana'ra risi' Lamatua Yesus fo Ana nggama lima'Na neu ana'kara, te hu Yesus ana nanori nara ai'se. ¹⁴ hu, pas Yesus mete nita'se, ma Ana namanasa'se de Ana ola' mbali ana nanori nara nae, "hela' neu fo ana diki' nara rema risi' Au, ama afi' mi'ingge te ana diki' ia'ra fo ra'ena Ama Lamatualain Nusak'Na. ¹⁵ misineda matalolole, te sa'ka yang nae nema nisi' Ama Lamatualain Nusak'Na te nda ona' ana diki' ia'ra saa na, ana nda hambu rala neu sa." ¹⁶ basa naa, ma Yesus holu nala ana diki' nara, de Ana so'u lima'Na neu langga nara de Ana fee ua nale' neu'se. Atahori Mamasu'i a Nda Nau Tungga No Lamatua Yesus ¹⁷ de, pas Lamatua Yesus se raote fo rae lao, ma atahori mamasu'i esa nela' nema de ana sende' lulangga'na neu Yesus mata'na boema ana natane nae, "Meser mana sue, sa'ka yang tao fo au u'ena masoda' losa losa'na neu?" ¹⁸ boema Lamatua Yesus nafade mbali'e nae, "saa de hoo ola' mae Au mana sue? nda hambu atahori esa mana sue' sa boe, aka'a Ama Lamatualain mesa'Ne. ¹⁹ hoo bubulu' Ama Lamatualain parenda'Na mia fai ma'ahulu na nema nae, 'afi' hala-mbau atahori, afi' hohongge, afi' mumuna'o, afi' dadi sakasii leleko', afi' leleko', boema fee hadat neu hoo ama'ma no ina'ma." ²⁰ boema, atahori naa ola' nae, "Meser, au uhine basa parenda' nara eni'a mia au a'ana ngga nema." ²¹ hu, Lamatua Yesus mete mbali'e ma Ana kasian'e, de Ana nafade mbale'e nae, "tebe, te hu, fe'e hela' dala' esa sia naa hoo nda fe'e tao'sa. bali' ume'ma fo seo hendi' basa-basa' hoo su'i-ota mara, fo babanggi fee neu atahori hata-taa'k ra, basa naa, na bali' uma fo tungga Au. te Ama Lamatualain pala-banggi fee hoo su'i-ota sia sorga ena." ²² te hu, atahori mamasu'i a rena nala, ma rala'na nambalulutu, te eni su'i nara nae na seli. de ana lao bali' ume'na no rala'na mera'. ²³ basama, Lamatua Yesus mete mbali basa atahori mana sia bobo'Na no Eni ana nanori nara de Ana ola' mbali'se nae, "mema' tebe, atahori mamasu'i a sie te susa' fo ana maso' sorga neu!" ²⁴ ana nanori nara rena ma ara nggengger. hu, Yesus ola' selu' fai nae, "atahori mamasu'i nara susa' fo ara maso' Ama Lamatualain Nusak'Na rala reu! ²⁵ banda onta monae' esa nae rala neu tungga sosot'a kolo'na oo ana fe'e nala, te hu atahori mamasu'i a nae sorga rala neu, naa ana nda nala'sa." ²⁶ Yesus ana nanori nara basa'se esa ola' mbali esa rae, "boema, ta'o naa, na se'ka yang bisa hambu masoda?" ²⁷ Yesus mete mbali'se esa-esa de Ana ola' nae, "mema' atahori nda tao rala'sa, te hu Ama Lamatualain bisa tao basa'e." Tungga Lamatua Yesus Naa Hambu Ua-nale' ²⁸ basa boema, Petrus ola' mbali Yesus nae, "mita ena, te hai lao hela basa hai sudi'a sa'sa mara de tungga mo Hoo!" ²⁹ de Yesus nafade nae, "Au ufade neti nggi tebe-tebe', te nda fe'e hambu mita atahori esa yang ana lao hela ume-loo'na, do odi-a'a tou nara no odi-a'a ina nara, ina'na no ama'na do ana nara, do mole-osi nara fo tungga ro Au mi dui-bengga Ama Lamatualain hara-lii Na, ³⁰ yang sia fai'ia ana nda simbo' bali' ume nara yang ara lao hela nara, odi-a'a nara tou' do odi-a'a nara ina'ra, ina nara no ama nara, ana nara, boema mbule-boa'na lao natun esa sia mole-osi nara, te hu sira simbo a'ka'a sususa-sosona' ia, te losa raefafo' mate'en naa, te sira yang simbo masoda'a losa lolosa'na neu. ³¹ boema mete te atahori yang ma'ahulu'ra dadi reu atahori mana tungga dea, boema atahori mana tungga dea'ra dadi reu atahori ma'ahulu'." Lamatua Yesus Nafade Selu Eni Mamate'Na Fai ³² Lamatua Yesus se fe'e sia dala' talada na rae risi' Yerusalem reu. aiboi' ma Yesus lao na'ahulu basa'se, de basa atahori mana tungga'ra ramatau. basama, Lamatua Yesus no ana nanori ka sanahulu rua nara bali' rema, de Ana nafade selu'se fai nae, sa'ka yang nae dadi neu Eni sai fai muri mana nema'ra iara, ³³ Ana ola' nae, "mete, te hita fe'e tae sae ofa' fo Yerusalem teu, te Ara seo hendi' Ama Lamatua Ana'na neu Malangga-malangga nggarei'ra, no nama to'u too-lane raefafo'ra ena. basana ara fee neu atahori nda mana rahine Lamatualain sa fo ara huku-doki' risa'E. ³⁴ fo ara ola' ramama'E, boema ara miru' miru neu'E, ma ara poko-paru'E basana ara mbau risa'E. te hu, fai ka telu na, te Ana fela bali' lao' mia mamates'sa nema." Yakobus No Yohanes Ro'e Fo Sira Sia Lamatua Yesus Boboa'Na ³⁵ basa naa, ma Zebedius ana nara Yakobus no Yohanes, rema randa ro Yesus de ara ola' mbali'E rae, "Meser, hai mae mo'e saa esa mbali Nggo, de rena mala hai dei." ³⁶ boema, Yesus na'ta nae, "hei mae ola' saa, fo fee Au rena?" ³⁷ ma ara rafade rae, "mete ma, Hoo to'u padenda' naa fee hai ru'a nggi esa endo' nisi' boboa ona'Ma, boema esa endo' nisi' boboa dii'Ma, sia mandela masa'a'Ma rala." ³⁸ te hu, Lamatua Yesus ola' mbali'se nae, "hei ru'a nggi nda bubulu' sa'ka yang hei mo'e a sa'boe. hei mae ne'oke meulau', hei nda lemba be'i sa'ka yang ara mamasi-rarai neu Au, boema hei du'ana mae hei lemba be'i doi-doso' yang Au lemba losa mate, do?" ³⁹ ma ara ra'ta rae, "hai lamba be'i, boema Yesus ola' selu nae, "mema' hei lemba be'i yang ara mamasi-rarai neu Au boema doi-doso yang Au lemba'. ⁴⁰ te hu, fee seka yang endo' sia Au boboa ona Ngga, do seka yang endo' sia Au boboa dii Ngga, naa nda Au denu saa, te mamana' naa Ama Lamatualain na'etu' basa ena, nae fee neu atahori seka." ⁴¹ rena ta'o naa, ma Yesus ana nanori ka sana hulu nara ramanasa Yakobus no Yohanes. ⁴² basama, Yesus no'e nala basa'se de Ana nafade mbali'se nae, "hei bubulu' to? atahori raefafo mana to'u parenda sia raefafo ia ara aka'a tuni-ndeni rauinggu nara, hu rauinggu nara nda ra'alalu'sa, boema malangga nusak'ra o tao ra'alelena' losa rauinggu'ra nda boti' langga nara'sa. ⁴³ hu, hei afi tao ona' naa, hei iara seka yang mae dadi monaen, naa ana dadi a'te soa neu basa atahori na'ahulu dei, ⁴⁴ boema hei seka yang mae dadi malangga, naa eni dadi na'ahulu neu a'te soa neu basa hatahori dei. ⁴⁵ hu na'naa, Ama Lamatualain Ana'Na onda raefafo ia nema nda fee atahori tao mata neu'E saa, te hu Ana nema dadi neu A'te soa neu basa atahori boema Ana fee Ao'Na teme-teme fo soi basa atahori lao' mia sala-kilu nara." Yesus Nahai' Atahori Poke' Esa Nara'na Bartimeus ⁴⁶ basa naa, ma Yesus'se lao losa Yerikho. lele' naa Yesus'se no ana nanori nara rae lao rakando ma atahori nae tungga'se, sia naa o hambu atahori poke' esa endo' si'a dala'a bife'na fo ana hule-hule' nara'na Bartimeus, ama'na nara na Timeos. ⁴⁷ ana rena athori ola' rae Yesus mia Nazaret nema, ma ana nggasi nahere' nae, "Yesus, Daud titi-nonosi'na, sue-laimala au dei!" ⁴⁸ te, atahori nae' mana sia nara ramanasa de ara denu'e nene. hu ana nggasi nahere' selu' fai nae, "Daud titi-nonosi'Na ee, sue-lai mala au de!" ⁴⁹ boema, Yesus namabari' de Ana denu nae, "mo'e nema." de ara reu ro'e atahori poke'a ma ara ola' mbali'e rae, "fee manggate neu rala'ma fo uma'!, te Lamatua Yesus no'e nggo." ⁵⁰ rena nala ma ana tu'u hendi' badu'na de ana neu nanda no Yesus. ⁵¹ ma, Yesus natane mbali'e nae, "hoo mae fee Au tao saa neti nggo?" ma atahori poke'a na'ta nae, Meser, fee au mata nggara rita dei," ⁵² basama, Yesus nafade mbali'e nae, "lamu. te hoo nemehere'ma fee hoo hai ena." aiboei' te ana mete nita basa'e loa-loa ru esa ena, basama ana tungga namalolo' no Yesus'se.