¹ basama, Lamatua Yesus nafade mbali'se nae, "Au ufade netin nggi tebe-tebe', te atahori hira yang rambari' ra'abue ro hita sia ia, ara nda mate'sa losa sira mete rita Ama Lamatualain Nusak'Na nema no koasa." Lamatua Yesus No Musa Ma Elia Sofe' No'a Mandela Masa'a Mia Lete' Ata ² Basa hendi' fai ka nee'a, ma Yesus no'e nendi Petrus, Yakobus no Yohanes, de Ana no'se hene risi' lete'a tonggo'na. losa ata ma Yesus uba' ao'Na dadi laen mia sira telu'se mata nara. ³ de, badu'Na dadi muti makandedelak'. nda hambu saa sia raefafo ia mutina ona' naa sa. ⁴ aiboi', ma ara mete te rita Musa no Elia ola-ola' ro Lamatua Yesus sia sira mata nara. ⁵ basama, Petrus ola' mbali Lamatua Yesus nae, "Meser, mamana ia malole', de nau naa hai tao tenda telu neu ia fo fee esa neu Nggo, boema esa fee neu Musa, ma esa fee neu Elia." ⁶ hu naa, Petrus ola' ta'o naa, te basa telu'se ramatau rasili'. ⁷ basa naa ma, lelee'a onda nema, de tatana nala basa'se boema rena hara' esa nema lao' mia lalai ata' nema nae, "Ia'ia Au ana susue Ngga. de rena matalolole neu'E" ⁸ Petrus'se rena rala hara' naa, ma ara mete sira boboa nara te nda sudi rita sa'sa sa boe, ara rita aka'a Yesus sia sira mata nara. ⁹ basa naa, ma Yesus no ana nanori nara onda bali' mia lete ata' nema, ma Yesus ai'se nae, 'hei nda bole mifade atahori sa, sa'ka yang hei fe'edo miata fa'ra, losa Ama Lamatua Ana'Na musi mate dei'fo Ana mori bali' sia fai ka telu'na.' ¹⁰ hu naa, ara to'u rahere' Yesus hehelu-fufuli'Na de ara nda rafade atahori esa sa'boe, hu ara ratatane sia sira rala nara, saa de Ana ola' na'o naa? ¹¹ boema, ara ratane mbali Yesus rae, "saa de mana to'u toolane raefafo'ra ola' rea Elia musi nema na'ahulu'?" ¹² ma Yesus na'ta neu'se nae, "mema' tebe, Elia musi nema na'ahulu' fo ana tao natetu basa dala'ra dei. boema, ta'o be de nenesura' nae, Ama Lamatualain Ana'Na musi hambu sususa-sosona' boema ara ra'a'eei'E? ¹³ hu, Au ufade neti nggi te Elia mema' ana nema ena, te hu ara tao ra'asususa'e, ara nau'a tungga no sira hihi nara, sama ona' nenesura' basa ena eni mia doo na nema." Yesus Ana Nanori Nara Nda Bole' Atahori Esa Yang Dula-Dale De'ulaka' To'u 'a ¹⁴ Lamatua Yesus no Petrus, Yakobus ma Yohanes bali' reu se'u nono nara, te ara mete rita atahori nae rakarurumbusia sira nono nara, de mana to'u toolane raefafo'ra rareresi ro'se. ¹⁵ de, atahori mana ma'abubue' nae nara mete rita Yesus nema, boema ara nggengger de ara rela' rema soru Yesus. ¹⁶ boema, Lamatua Yesus natane'se nae, "hei mireresi saa mo mana to'u toolane raefafo' nara?" ¹⁷ te atahori esa nema de ana nafade nae, "Meser, au oo ana mone ngga nema nisi Nggo, te dula-dale de'ulaka' to'u'e, de ana nda ola-ola'nala'sa. ¹⁸ mete ma nitu'a maso' neu rala'na, naa ana rupa mbe'mbesi'e ao'na neu rae'a fo bafa'na lua' fufure, boema ana dali' ngio-nggio nisi nara, no ao'na o bara'ai ona'a hau e'etu'. au o'e neu Hoo ana nanori mara fo ara oi dula-dale deulaka' ia te hu ara nda bole'sa." ¹⁹ rena nala, ma Yesus namanasa' de Ana bua'se nae, "he, hei iara nda ma'ena' nemehere'sa! Au musi oo hei losa fai hira' fai? Au fee tembo neu hei losa bee fai? mendi ana'k naa nisi'ia nema! ²⁰ boema, ara ro ana'ka nema nisi' Yesus. de, pas dula-dale de'ulaka' mete nita Yesus, ma ana mbe'mbesi' ana'ka neu rae'a de ana lengga-lololi boema fufure'a dea neu tungga bafa'na. ²¹ basama, Lamatua Yesus natane mbali ana'ka ama'na nae, "hoo ana'ma ia manahedi eni bess?" ma ana ama'na na'ta nae, "au ana ngga namahedi eni mia a'ana'na. ²² de, dula-dale de'ulaka' ia ana tao hendi' ana ngga ia bali-bali' ai rala neu, no ana na'atetena'e oe rala neu boe. de hu au hule neu Nggo fo sue'lai mala hai dei, fee ana ngga hai!." ²³ ma Yesus ola' mbali'e nae, "kalu hoo nau? te saa mesan dadi soa neu basa atahori yang mana namehera'ra." ²⁴ basam naa, ana'ka ama'na nggae de ana ola' nae, "au umuhere'! de fee manggate' neu au umuhere ngga!" ²⁵ Lamatua Yesus mete nita atahori nae rela' rema rakarurumbu', ma Yesus bua' dula-dale de'ulaka' naa de Ana ola' nae, "hoo dula-dale poke, mbake', Au parenda nggo dea'mu lao' mia ana'ka ai rala boema afi' sudi maso' misi' ana'k ia rala fai!" ²⁶ nitu'a rena Yesus ola' na'o naa, ma ana nggasi-ki nahere' de ana rupa mbe'mbesi' ana'ka neu rae'a, basama dula-dale de'ulaka' nela dea neu. ma ana'ka ona'a atahori mates de atahori mana sia nara ola' rae, "ana'ka mate ena!" ²⁷ te hu, Lamatua Yesus to'u nala lima'na de nafefela'e, fene fela nambari. ²⁸ basama, pas Lamatua Yesus lao nisi' ume rala neu, ma ana nanori nara ratane mbali'E mesan'E rae, "ta'o bee de hai nda bisa oi dula-dale de'ulaka' naa sa?" ²⁹ boema, Ana nafade mbali'se nae, "dula-dale de'ulaka' ia'ka nda nau dea neu saa, ana namatau aka'a Hule'oo'e neu Ama Lamatualain." Yesus Nafade Selu' Eni Mamate'Na ³⁰ lao' mia naa, ma Yesus no ana nanori nara lao tungga kambo' Galilea. lele' naa, Ana nda nau atahori bubulu'sa. ³¹ te, Ana fe'e nanori Eni Ana nanori nara de Ana nafade mbali'se nae, "nda sudi doo' saa ena, te ara seo Ama Lamatualain Ana'Na neu atahori raefafo' ia, fo ara tati-mbau risa'E. boema, ara tati-mbau risa'E te hu, fai ka telu na te Ana fela bali'." ³² Yesus ola' na'o naa, ma ana nanori nara nda rahine' Eni o'ola'Na sa te ona'o ara ramatau ratane. Lamatua Yesus Ana Nanori Nara Rareresi Rea Se'ka Monae' Lena' ³³ basama, Yesus no ana nanori nara losa Kapernaum. ara risi' ume rala, ma Ana natane mbali'se nae, "faa'ra hei ola-ola' saa mia dala' talada na?" ³⁴ te hu, ara ramanene'. te faa'ra mia dala' talada na ara rareresi rae se'ka yang monae' lena sia basa-basa sira. ³⁵ basama, Lamatua Yesus no'e nala basa-basa'se, de Ana nanori'se, Ana nafade mbali'se nae, "kalu atahori se'ka nae dadi monae' do dadi neu atahori mana sia mata' naa eni musi dadi neu atahori mana seku sia dea-dea fo eni yang su'u-o'o fee basa atahori'ra." ³⁶ basa boema, Yesus no'e nala ana diki' esa de Ana fee'ne nambari nisi' sira talada nara. boema, Ana holu nala ana'ka de Ana ola' mbali'se nae, ³⁷ "se'ka mesan yang simbo' ana diki' ona' ia'ka nendi' Au nara Ngga, naa eni'o simbo' Au boe. boema, se'ka yang simbo' Au, naa eni nda a'ka'a simbo' Au saa, te hu ena'o simbo' mana denu Au uma boe." Atahori Yang Oi Nitu Nendi' Lamatua Yesus Nara'Na ³⁸ Yohanes ola' mbali Lamatua Yesus nae, "Meser, hai mita atahori oi nitu'ra rendi' Hoo nara'Ma, de hai mi'ingge'se te hai bubulu' sira nda ro hita'sa." ³⁹ te hu, Lamatua Yesus nafade nae, "afi' mi'ingge'se te nda hambu atahori esa tao nala' nendi Au nara Ngga, te ana nae tao ma'afo Au nara Ngga. ⁴⁰ hu na'naa, mete ma se'ka yang nda laban hita'sa, naa eni boe no hita. ⁴¹ misineda matalolole', Au ufade neti nggi, mete ma se'ka mesan' yang fee hei oe nggalas esa te ana nahine' hei mana tungga' Kristus, naa nda lili' eni tatao nono'i na sa boe." Afi' Na'amimina' Mo Sala-kilu ⁴² basa naa ma Lamatua Yesus nafade nae, "se'ka mesan yang nanae'na fo ana'diki esa tao sala-singgo' fo ana nda sudi nau namaher' Au sa, malole' naa eni ha'i nala fatu monae' esa fo pa'a neu boto'na basana tu'u hendi'e nisi' tasi'a taladana rala. ⁴³ boema, kalu lima'na be'ka yang nanae'na fo tao sala-kilu', naa tati hendi'e. malole' lena' naa hoo sorga mu mendi'a lima seseri'. afi' losa hoo nau'a lima mara ru'ase te ara nggari hoo misi'i aii neraka mu, ⁴⁴ mamana' yang sofe' no'a ula'ra boema aii'na nda mate-mate nita sa. ⁴⁵ mete ma, hoo ei ma seri nanaena fo tao sala-kilu', naa tati hendi' ei' naa. malole' lena' hoo sorga mu mendi'a ei seseri', afi' losa hoo nau'aei mara ru'ase te ara nggari hoo misi' neraka rala mu, ⁴⁶ mamana yang sofe' no'a ula'ra boema aii'na nda mate-mate nita'sa. ⁴⁷ mete ma, hoo mata'ma yang nanaena fo tao sala-singgo', naa edo hendi' mata'm mana tao sala-singgo'a. malole' naa hoo Ama Lamatualain Nusak'Na mendi'a mata seseri'ma, afi' losa hoo nau'a mata mara ru'ase te ara nggari hoo neraka rala mu, ⁴⁸ mamana' yang sofe' no'a ula'ra boema aii'na nda mate-mate nita'sa ⁴⁹ hu na'naa, basa atahori mana risi' naa reu, ara mamasi'se rendi' aii. ⁵⁰ masi' naa meulau', te hu kalu masi'a nda sudi masi'sa ena, naa hita nda sudi tae naa masi'sa ena fo fe'e tae tao neu saa fai?, ama dadi ona'a masi'a sia ao mara rala boe fo ama esa suelai esa."