¹ fai esa'ma, pas Yesus nanori atahori hetar mia Ama Lamatua ume'Na boema Ana na'alolosa'a Lamatua hara li'Na, ma imam-imam no ahli-ahli Taurat ro basa atahori-atahori lasi'ra rema randa ro'E. ² ara ratane Yesus rae, "mufade neu hai'e, Hoo tao basa hal-hal iara mendi'i kuasa beka? do, seka yang fee Hoo kuasa iara?" ³ Yesus na'ta neu'se nae, "Au boe ae utane hei netane'e esa sie. ama mi'ta mala Au dei, ⁴ Yohanes sarani'na, naa lao mia be nema? lao mia surga do lao mia atahori nema?" ⁵ ara ra'abubue de esa natane mbali esa rae, "kalu hita ta'ta tae, 'lao mia surga nema,' naa ne'o Ana nae, 'kalu ta'o na, naa sa de hei nda mimihere Yohanes sa?' ⁶ te hu, kalu hita ta'ta tae, 'lao mia atahori nema na, 'basa atahori nae iara, ara honda hita rendi'i fatu losa hita mate karna ara bubulu'u Yohanes naa nabi." ⁷ de, ara ra'ta rae sira nda bubulu'u Yohanes sarani'na, naa lao mia be nema sa boe. ⁸ basama, Yesus olah mbali'se nae, "kalu ta'o na, naa Au boe nda ufade hei no kuasa beka Au tao hal-hal iara." Na'asasama' Duduit Soa Neu Atahori Mana Tao Osi Anggur ⁹ boema, Yesus dui na'asasama ia neu atahori nae'ra nae, "atahori esa selanggari nala osi anggur esa de basama ana seba osi'a ue osana neu atahori'ra, de ana lao nusak dodo neu dona seli deide ana bali'i. ¹⁰ pas faina losa etu anggur, ma ana denu a'te na esa neu nisi'i mana ote anggur ara fo ana ha'i eni lamatuana babanggi nara, te hu, mana etu anggur ara popoko paparu a'tea boema ara use bali'e no lima rou'u. ¹¹ boema ana denu selu'u eni a'te na esa neu fai, te hu mana etu anggur ara popoko paparu'e fai boema ara mamasi rarai'e, de ara oi bali'e no lima rou'u. ¹² de, tenu osi anggur'a denu selu a'te ka telu'na neu fai, te hu mana etu anggur ara boe ato ra'ahina'a a'te naa fai boema ara oi'e dea neu. ¹³ tenu osi anggur'a dudua sia rala'na nae, 'sa'ka yang au ae tao fai? Au denu Au Ana mone ise susue Ngga neu, ne'oko ara fee hadat neu'E.' ¹⁴ pas mana nanea osi anggur ara mete rita tenu osi'a ana'na nema, ma ara ra'abubue de ara ola-olah rae, 'Ana ia ahli waris osi anggur'a, ima fo ata tao tisa'E, fo osi anggur ia hita hambu'e!' ¹⁵ basama, ara boe honda ana'ka osi anggur'a dea neu de ara tao rarisa'e. de, saka yang tenu osi anggur'a tao neu mana manea osi anggur ara? ¹⁶ Ana nema'na, naa ana tao nisa basa mana manea osi anggur ara nara, fo ana fee osi anggur'a neu mana seba feu." pas atahori nae ara rena rala dudui na'asasama'a iama, ara olah rae, "afi'i losa hal iaka dadi neu hita!" ¹⁷ te hu, Yesus mete mbali'se de Ana olah nae, "kalu ta'o na'na, iaka arti'na oi saa: 'fatu yang tukang bangunan ara honda hendi'ra dadi neu fatu penjuru' Mazmur 118:22 ¹⁸ basa atahori yang ara tuda risi'i fatu naka ata'a naa ana nambalulutu boema fatu'a tendes dai seka naa ara rambalutu!" ¹⁹ pas ahli-ahli taurat no malangga imam ara meda dudui na'asasama naka olah neu sira, ma ara rae humu Yesus sia faina boe. te hu, ara ramatau atahori nae mana sia nara. Natanes Soa Neu Mana Bae Bea ²⁰ basama, ahli taurat ara memete'e Yesus boema ara denu atahori nara ruma reu fo ara memeteke yang ara e'ediki dadi neu atahori ndos fo ara hambu jebak Yesus no netanes fo ara hambu humu Yesus dedea o'olah tutuna'Na aona boema ara fee Yesus neu mana kuasa no gubernur parenda na. ²¹ Atahori-atahori dedenu'ra ratane mbali Yesus rae, "Meser, hai bubulu'u Hoo mufade'Ma boema Hoo munori mara tetebes. Hoo boe nda mana mbeda-bedakan atahori'sa, te hu munori Ama Lamatua'a dala ndo tetu'Na. ²² de bisa hai fee bea neu Kaisar do hoko'o?" ²³ te hu, Yesus nahine sira dudu'a nara de Ana olah mbali'se nae, ²⁴ "soba mitudu neu Au dinar keping esa. dula'a boema sura'a se'ka nara'na sia doi'a ata'a?" ma ara ra'ta rae, "dula'a boema sura'a Kaisar nara'na." ²⁵ de, Yesus nafade neu'se nae, "kalu ta'ona, na fee sa'ka yang Kaisar ena'na, boema fee Ama Lamatua'a sa'ka yang Ama Lamatua ena'Na." ²⁶ no naa, atahori-atahori nara nda hambu humu Yesus dedea o'olah Na aona sa sia atahori nae'ra mata nara; ara nggengger soa no Yesus na'ta'Na de ara ramanene. Atahori Saduki Natane'na ²⁷ basama, atahori Saduki ruma rema randa ro Yesus, sira atahori nda mana ramahere'e mamates yang ana fela bali'i sa, de ara ratane Yesus rae, ²⁸ "Meser, Musa sura'a soa neu hita, nae kalu tou'u esa ana mate, te hu ana na'ena'a sao ina esa nda ma'ena ana'asa, naa odi a'a tou na esa sao nala bali'e fo ana nanufa nelu. ²⁹ ta'o ia, atahori hitu ara odi a'a. a'aka ana sao, te hu ana mate te nda ma ena ana'ka sa. ³⁰ basama, odi'ka yang mana tungga'e sao nala mbali'i ina'ka boema ana boeo mate te nda ma'ena ana'ka sa. ³¹ de, odi'ka telu na ana sao nala bali'i ina'ka fai te hu sama fe'ena na losa odi'ka hitu na, te hu basa se mate hela ina'ka nda ma ena ana'asa. ³² losa mate'ena, ma ina'ka boeo mate. ³³ hu na'naa, sia fai na'etu naladi'a nema, naa seka yang dadi neu ina'ka saona karna basa tou ka hitu'ra sao ina esa?" ³⁴ Yesus na'ta neu se nae, "ale'ia atahori-atahori ara sao boema ara sao rala'se, ³⁵ te hu atahori-atahori'ra yang ara sia mata'a fo ara hambu raefafo'a mana nema'ia, boema ara fela bali'i lao mia mamates'a, ara nda sao'sa boema ara nda sao rala'se sa boe. ³⁶ sira nda sudi mate'sa ena karna sira sama ona'a malaikat boe. sira naa Ama Lamatua ana nara karna rafefela bali'i sira lao mia mamatesa nema. ³⁷ Musa boeo ana natudu soa'a atahori-atahori mana mate'ra yang ara fela bali'i tatada esa yang sura'a soa'a duri nggauta yang nenelalangge'e sai tatada'a esa, Lamatua ara rae fene 'Ama Lamatua Abraham, Ama Lamatua Ishak, boema Ama Lamatua Yakub.' ³⁸ Eni nda Ama Lamatua matesa te hu Ama Lamatua masoda'a, hu na'naa basa atahori rasoda sai lima'Na. ³⁹ basa hendi naa, ahli Taurat ruma olah rae, "Meser, Hoo mu'ta Ma naa tebe," ⁴⁰ de, nda hambu atahori esa nambarani ratane sa ena. Kristus Naa Lamatua ⁴¹ basama, Yesus olah mbali neu'se nae, "ta'obe de atahori'ra ola-olah rae Kristus naa Daud ana'na? ⁴² te hu sia kitab Mazmur, Daud nafade aona nae, 'Ama Lamatua olah neu au Lamatua ngga nae, "endo'o misi'i Au boboa ona Ngga, ⁴³ losa Au ue'endo hoo musuh-musuh mara risi'i hoo mata'ma. '''Mazmur 110:1 ⁴⁴ kalu Daud no'e Kristus nae 'Lamatua,' ta'obe de mae Kristus naa Daud ana'na?" Nasanetat Fo Meda-Meda'a Soa Neu Ahli Taurat ⁴⁵ pas atahori nae'ra rena, ma Yesus nafade neu ana nanori nara nae, ⁴⁶ "ama meda-meda soa neu ahli-ahli Taurat yang ara hika'a lao-lao na ara pake badu masarorombo'o, ara hika'a atahori fee hadat neu'se sai pasar, yang hika'a endo'o sia mamana mata'a sia nggarei-nggarei, boema sai mamana mata'a sia fefesa'sara. ⁴⁷ ara ha'i rala ina falu'ra ume nara boema ara hule oo'e naa naruna seli fo atahori koa'se. atahori-atahori ona'a ia'kara hambu huku doki'a nae na seli."