¹ basa mana tagi bea boema atahori mana tatao de'ulaka'ra rema deka risi'i Yesus fo ara rena nanori'Na. ² basama atahori-atahori Farisi no ahli-ahli taurat ara ra'amumuti rae, "atahori ia Ana simbo atahori-atahori yang sofe' no'a salah singgo'ra boema Ana naa ninu no'se." ³ basama Yesus dui na'asasama ia neu'se, Ana olah nae, ⁴ "hei se'ka yang kalu ana na'ena bibi lombo 100, boema kalu bibi lombo esa mipo, na ana nda lao hela ka 99 sia mo'a loana'sa fo ana neu sangga bibi lombo ka esa'asa losa ana nita' bali'esa? ⁵ boema pas ana nita'e na ana o'o bibi lombo'a neu aru'na fo nendi bali'e nisi ina'na no ana namaho'o. ⁶ ana bali losa ume, na neu se'u torano nara boema ume titia nara fo ana nafade mbali'se oi, 'ama mimiho'o mo au karna au ita bali'i au bibi lombo ngga yang mana mopo'a ena.' ⁷ Au ufade neti nggi, ona'a na'ke boe Ama Lamatua no basa mana sia surga ra boe ramaho'o soa neu atahori esa yang mana sofe' no'a de'ulaka'a yang ana tobat lena'a hendi lao mia atahori ka 99 yang ndo tetu'ra. Dudui Na'asasama Doi Perak Yang Mana Mopo' ⁸ do ina'a be'ka yang na'ena doi perak keping sanahulu, kalu ana namopo hendi keping esa na, ana nda nambila'a lambu'asa boema ana sapu ume'na, fo ana sangga doi keping na no mata lolole losa ana nita bali'esa? ⁹ de kalu ana nita bali' doi'a na, ana no'e basa torano nara no ume titia nara fo ana dui'se nae, 'basa nggi mimiho'o mo au te au ita bali'i au doi keping ngga esa yang mana mopo'a ena.' ¹⁰ Au ufade neti nggi, sama ona'a nake boe, Ama Lamatua malaikat nara basa'se ramaho'o soa neu atahori esa yang mana sofe no'a salah singgo'a ana bertobat." Na'asasama Ana Mone' Rua ana muri'a lao hela ama'na ¹¹ basama Yesus dui oi, "atahori esa ana na'ena ana mone' rua. ¹² ana mone muri'na nafade mbali ama'na nae, 'papah'e, banggi fee au papah hata eto'na yang dadi neu au hak nggara.' de ama'na banggi hata heto nara fee neu ru'ase. ¹³ basa hendi'i na ma, ana mone muri'a kumbu nala basa ata heto nara, de ana lao nusak dodo'neu boema ana feta dote nabasa' hendi hata heto nara sia atahori nusak nara. ¹⁴ de basa hendi ata heto nara, pas no ndoe mara'a boeo sia nusak na, de ana nda sudi na'ena sasasana boe. ¹⁵ de, ana neu sangga ues sia atahori esa mana sia nusak na, boema ara denu'e neu hani hao fafi'ra yang mana sia atahori na hosina. ¹⁶ ana ndoe nda bolesana te esa nda fene naa ninu sasasaboe ma ana naa nose'a yang fafi'ra nana nara. ana mone muri'a bali' nisi ama'na ¹⁷ pas ana mone muri'a nggengger, ma ana dudu'a sia rala'na nae, 'au ama ngga a'te nara sia au ume nggara sofe'e no'a nana nininu, te hu au sia ia ae'a mate o ndoes'a. ¹⁸ au fela fo au lao bali'i isi'i au ama ngga. losa na na au ufade neu'e ae: papah'e, au tao salah soa neu surga boema sia hoo matama. ¹⁹ au nda sudi pantas dadi neu hoo anamasa, de tao au u dadi neu hoo a'tama.' ²⁰ de, ana fela fo ana lao bali'i nisi'i amana. te hu, pas ana mone muri'a fe'e seku sia dodo, te amana mete nita'e ma amana kasian'e, amana nela' neu soru'e de holu nala'e boema amana idu'e. ²¹ basama, ana mone muri'a olah mbali amana nae, 'papah'e, au tao salah soa neu surga boema sia hoo matama boe. au nda sudi pantas dadi neu hoo anama'sa.' ²² hu, amana nafade neu a'te nara nae, 'laolai! mendi badu yang paling meulau'u fo fee neu au ana ngga pake. fee ne pake ndeli neu lima u'una boema fee ne pake sendal. ²³ pa'a mala sapi yang mambaruna' esa ama tati'e. boema ima fo ata taa tinu tamaho'o neu'e, ²⁴ karna ana mone muri ia ana mate ena, te hu sia fai ia ana fela bali'i! ana mopo, te hu sia fai ia au ita bali'e!' de basa'se ra'amina'a ramaho'o." Ana Mone Ulu'a Namanasa Ama'na ²⁵ "fai na, ana mone ulu'a ana sia osi, de pas ana losa deka no umena, ma ana rena hara li'i tep boema ara lendo foti sia umena. ²⁶ de, ana no'e a'te esa lao mia ume rala nema boema ana natane nae ara feta dote sa sia ume rala?. ²⁷ a'tea na'ta neu'e nae, 'odima bali'i nema, de amama tati sapi mambaruna' esa karna ana oi odima ana bali'i no soda'a.' ²⁸ hu, ana mone ulu'a namanasa de ana nda nau ume rala neusa, de amana dea neu kokoe fene rala neu. ²⁹ te hu, ana mone ulu'a nafade mbali amana nae, 'too no too au o hoo tao ue osa'a fee hoo boema au nda fe'e ureresi ita o hoo'sa, te hu hoo nda fe'e fee mita au bibi ana'esasa boe fo au tao fefetas o au torano nggara'sa. ³⁰ hu, pas hoo anama bali'i nema lao mia nusak dodo'a boema ana nabasa hendi basa hata heto'a no ina mana hohongge'ra, te hu papah fe'e tati sapi mambaruna esa fee neu'e.' ³¹ ma, amana na'ta mbali neu'e oi, 'ama'e, hoo mo au fe'e iane, de sa'ka yang au ena ngga basa nara hoo enama boe. ³² hu, fai ia hita tao fefetas boema ata tamaho'o soa neu hoo odima yang hita tae ana mate ena, te hua fai ia ana fela bali'i; ana mopo ena, te hu fai ia hita tita bali'e."'