¹ mia fai sabat esa ma, Yesus lao nisi malangga Farisi esa ume'na fo Ana naa roti boema basa'se mete bebesa Yesus sa'ka yang Ana nae tao. ² fai'na, pas atahori esa namahedi busung oe mia mata'Na. ³ de Yesus nafade mbali atahori-atahori Farisi no ahli-ahli Taurat ra oi, "bisa do hoko'o tao nahai'i atahori sia fai sabat?" ⁴ te hu, esa nda na'ta E'sa boe. basama, Yesus to'u nala atahori mamahedi'a boema Ana na'ahahai'e, de denu'e lao hela mamana na. ⁵ basama Yesus nafade mbali'se oi, "hei se'ka yang kalu hei ana mara do sapi mone'ma nggodi nisi'i oe'a rala sia pas fai sabat na, ana nda nore hendi'e dea neu sa? ⁶ te, esa nda nambarani na'ta neu'E oi sasa boe. Mamana Ma'hadat ⁷ basama, Yesus na'asasama'a duduit esa neu basa tamu nene no'e ra pas Ana mete nita mamana-mamana e'endo yang ma'hadat ara sia deka ro'a mei nanat ara, de Ana nafade mbali'se oi, ⁸ "kalu hoo nene no'e sia mamana fefeta ninika esa, na afi'i hoo endo misi'i mamana ma'hadat ara karna ne'oke tenu fefeta'sa no'e atahori yang manara'a lena no hoo'e. ⁹ boema, tenu ume'a nema neu nggo fo ana nafade nggo oi, 'fela fo fee mamana e'endo ia neu atahori ia'ka!' boema, hoo boe fela hela mamana e'endo na fo hoo sangga mamana e'endo sia seku dea'a te hoo mae ena. ¹⁰ hu na, kalu hoo nene no'e, na endo misi'i mamana seku dea neu fo pas tenu tatao'sa nema na, ana nafade mbali nggo oi, 'torano, uma fo endo misi'i mamana e'endo yang ma'hadat.' at'o na fo, hoo hambu hadat sia basa atahori-atahori yang nene no'e ra mata nara. ¹¹ hu na, basa atahori ra yang mana so'u ao nara hambu mamaet, te hu, se'ka yang neloloe aona na hambu nebebenggat soa neu aona." Ro'e Fo Ara Raa Te Basana Ara Ro'e Bali'ie Fene Naa ¹² de, Yesus nafade mbali atahori yang ana no'E fo fene naa oi, "kalu hoo tao nana nininu sia rerelo do tetemba, na afi'i mo'e dedena baba'uma, torano'ma, bobonggi mara, do ume titia mara yang ma ena hata eto'ra karna ara boe ro'e bali'i hoo fo hoo mu mua minu bali'i sia ume nara. ¹³ te hu, kalu hoo tao fefetas, na mo'e aka'a atahori-atahori hata taa'ra, atahori-atahori keko'ra, atahori-atahori mamalu'u ra, no atahori-atahori poke'ra. ¹⁴ fo, hoo hambu ua ma nale'a karna athori-atahori ona'a iakara nda balas rala'sa; hoo hambu balasan sia pas fai tahori-atahori ndo'tetu'ra fefela nara." Dududit Ne'esasama'a Soa Neu Nono'e Fo Raa Rinu ¹⁵ pas atahori esa yang mana naa ro'E rena Ana ola-olah iaia, ma ana olah io, "uanale' soa neu atahori yang mana raa roti sia Ama Lamatua nusa'Na rala." ¹⁶ te hu, Yesus nafade neu'e oi, "atahori esa tao fefetas sia fai tetemba fo ana no'e atahori nae rema raa rinu, ¹⁷ de pas no fai'na fo ara rae raa rinu, ma atahori na denu a'te na neu nafade basa atahori yang eni no'era fo ara rema raa rinu de a'tea neu nafade'se oi, 'ima leo, te basa'e nene siap ena.' ¹⁸ hu, basa tamu yang ana no'era tao alasan-alasan. ruma rafade rae, 'au fe'edo hasa ala molek esa feu' de au ae use'ue ita'e dei, de au hule fo fee ma'af neu au.' ¹⁹ laen ara rafade rae, 'au fe'e do hasa ala sapi mone esa no ine esa de au boe ae u parisake'se dei. au hule fo fee ma'af neu au.' ²⁰ boema yang laen ara fai rafade rae, 'au fe'e do sao ia de au nda bisa uma'sa.' ²¹ boema, a'tea bali'i nema nafade neu lamatua'na. ma lamatua'na namanasa, de ana denu a'tena oi, 'lao lai'! lamu misi'i dala-dala'ra boema misi'i basa gang sia kota ia rala. mo'e mendi basa atahori hata'ta ra, atahori-atahori mamalu'ura, atahori-atahori doka saki'ra, boema atahorio-atahori poke'ra.' ²² basama, a'tea nema nafade bali'i nae, 'lamatua, au tao basa ena ona'a sa'ka yang lamatua parenda neu au, te hu fe'e hela mamana rou.' ²³ ma lamatua'na nafade mbali'e oi, 'lamu misi'i bali'i dala-dala'ra boema gang ara fo mo basa atahori-atahori mana sia nara rema rasofe au ume ngga. ²⁴ Au ufade neti nggi, nda hambu atahori esa'sa boe yang lao mia sira'e yang Au o'e ma'ahulu'ra hambu raa rinu sa'ka yang Au ae fee neu'sesa."' Soa Neu Tungga Lamatua Yesus ²⁵ atahori nae' lao ramalolo' ro Yesus. basama Yesus heo' mbali'se de Ana olah nae, ²⁶ "kalu atahori esa nema nisi Au te hu ana nda namanasa ama'na no ina'na, sao'na boema no ana nara, odi a'a tou nara no odi a'a ina nara, boema no aona sa, na ana nda bisa dadi neu Au ana nanori Ngga'sa. ²⁷ se'ka mesan yang nda nau lemba salib boema ana tungga Au sa, na ana nda bisa dadi neu Au ana nanori ngga sa. ²⁸ se'ka yang sia hei talada mara yang nau tao na'ariri'i menara esa, te hu nda endo fo ana hitu reke rurunggi'a na fo ana doina dai do hoko'o? ²⁹ de kalu nda ona'a na'ka sa na, pas ana tao fanderen'a boema ana nda tao nabasae sa'na, basa atahori ra mete rita'e fo ara ramamae. ³⁰ atahori-atahori ra ola-olah oi, 'atahori ia mulai tao banguna'a, te hu ana nda tao nala nabasa'e sa.' ³¹ do, manek be'ka yang ana nae neu namusu no manek laen te hu ana nda endo na'ahulu fo ana tao titimba tatais fo ana nendi tentara'na 10.000 na bisa do hoko'o ana lawan musuh nara 20.000? ³² de kalu ana rasa nda bisa nakala'a manek laen na, ana denu atahori dedenu nara reu fo ara ratane syarat-syarat dame pas musuh nara fe'e seku sia dodo'o. ³³ ona'a na'ke boe basa hei nda hambu esa sa boe yang sia hei talada mara yang nae dadi neu Au ana nanori Ngga te ana nda nau fee basa-basa sa'ka yang dadi neu eni ena'na sa." Masi' Yang Mana Noe Ena Na Nda Sudi Pake'sana ³⁴ "masi' na malole, te hu kalu masi'a ana dadi neu oe fo ana nda masi sana, na tao'e ta'o be fo ana masi bali'? ³⁵ masi' na nda sudi pake sa ena mae neu mole'a do pupuk de aka'a atahori ra nggari hendi'e. de se'ka yang ma ndiki'i na hela fo ana rena nala!''