A'afi tala Dedea O'ola yang Hita Ola'a ¹ Torononggeru, afi hei hetar mae dadi meser karna hei bubulu hita yang tae tanori, nene huku doki nendi u'uku u'uli lebih manae'e. ² Basa hita tao salah tendi'i hal nae'e. Kalu hambu atahori yang pernah tao sala'sa sia eni dedea o'ola na'ra, ana adalah atahori ndo tetu, tehu ana bo harus mampu ator nala basa eni ao aru'na. ³ Hita pasa sue'a neu ndara'a bafa'na supaya ara tungga hita hihi ma nanaun, boema hita bo bisa ator tala basa ndara ao aru'na. ⁴ Mete boe basa ofa'ra, walopun ao'na manaen seli boema anin'na yang ator eni leleo lalao'na, ofa na'ka nene ator nendi uli ana ke'sa, de ana akan lao sesuai no juragan'na hihi ma nanau'na. ⁵ Boema sama ona'a, hita ma'na yang adalah palin ana'ka lao ma hita ao'na, tehu ma na'ka bisa koao nisi'i dala-dala manae. Mete mita ai'a yang begitu ana diki, tehu ana bisa na hendi lasi yang loa'na seli. ⁶ Ma na'ka sama ona ai boe, dadi neu nusa de'ulaka, nene mbeda sia basa hita ao aru'na talada'na de ana tao nambalutu basa hita ao'na. Ana na hendi basa hita momori'na boema eni ao na nanti nene lalangge sia ai neraka rala. ⁷ Huna, basa banda fui no mbui manu, no basa banda mana mori sia tasi na'ka mamaus karna atahori'ra ra'a mamau'se, ⁸ tehu, nda hambu atahori esa fo bisa na'a mamau nala hita ma na. Hita ma na adalah de'ulaka, ana nda pake ne'ne sa, sofe no raso yang nanisa hita. ⁹ No hita ma na, hita bisa fe maua manale neu hita Ama Lamatua'na, tehu no na bo hita bisa fe kutuk neu atahori, fo yang nene ne'e dadi sama ona Ama Lamatua. ¹⁰ Mia basa esa kalua koa kio boema kutuk. Torononggeru, kalu bisa na afi ona na'a. ¹¹ Apakah hambu oe mata esa na ana kasi kalua oe ma'e ma manameru sama-sama boe? ¹² Torononggeru, pakah hambu hau ka'a ana naboa zaitun; do hau anggur ana naboa ka? Ona'na boe, oe mata mana masi ana nda nda hambu fe oe mina'sa. Mahine Macam Rua ¹³ Seka sia hei mana mi'ena dudu'a a'afit? Helanu fo no tatao nono'i meulau, ana natudu tatao nono'i sia neloe nedae ao’o no mahine. ¹⁴ Tehu, kalu hei mi'ena rala makafufulu fo sofe no manameru sia rala ma, afi koa'o boema afi e'edik untuk lawan ndo tetu'a. ¹⁵ Mahine ona'na nda onda mia ata nema'sa, tehu mia raefafo'a nema, fo nda rohani'sa tehu de'ulaka. ¹⁶ Kalu hambu rala makafufulu no nau'a menang mesa'na, sa'na hambu netofa neu'u boema hambu basa tatao de'ulaka'ra. ¹⁷ Mahine mana mia lalai nema, ma'ahulu'na na tetebes, basa'na suka dame, naloe nedaae ao'o, nda na'afuni'sa, sofe no susue lalai'i no boa-boa meulau'u, nda mana pila-pila, boema nda mana peleder nahine'sa. ¹⁸ Boa meulau'a nene sela tande sia dadame'a mia mana nendi dadame'a nema.