Yasa Ni Muripamu Ti Muri Allah ¹ Be walli nyiani banna mai ni patappaka dangngu ni pasanggana ni madadi ti yimmi? Angga wallini ti takkimi ni ati dammi ma pattau ti dalu ngarandukkani ni kalittamu? ² Yimmi mi mbussa nammi pani-pani, takka attai kolimanggi, makka yimmi ka patappakamisa dangngu bai pasangga nammi, yimmi ba attai kolinammi mullani ba atta dangngimi. ³ Mi dangngi kaddawi, takka attai kolimanna, mullsni mi lata padangngi waimi ni madjala, atta na pawali ati manni, malli ngara takkimi bau keri lolui ni takki atimu. ⁴ Kai rangngimi ma mbussanggi ni jangngi. Attai lakkasa doku pungngi? Ni pa ondila dangngamui ni pannu tana sama kaddani bai mussuni Muri Allah? Mabba nikadai languka hera pungngui ni tu ma mbussana pa paondila dangngagi pannu tana, sama kaddani banna wolu wikkina banna mussuni Muri Allah. ⁵ Appalinni pungngui bai pangaddanggi, angga o da latani ni mbukku kalada banna panewi, "Ni ngasumi, ni pa binjala-Na ti kalitta nda yitta banna walli ati pungngugi banna mbussanggi Muri Allah?" ⁶ Takka lummu, Muri Allah Na ya mannu pundai ni Muripa pakoli njuanda ni marisi langu takka. Mulla nikadai ni mbukku kalada dinna panewi: "Muri Allah attana mbussa mandara tu majangga ati na; takka na ya ndai ni muripa pakoli njuanda ti tu ma atta njaga atina." ⁷ Mabba tunihaidai, risini pandassa kau yasa ni muripamu ti Muri Allah, lawai kamballiku, makka enga kaina kaballiku wallitimu. ⁸ Patukkinggi ni muripamu ti Muri Allah, makka Yinna enga patukki wikki mannu kaddani ti muripamu, mallihai kau pa belai ni atimu ti Muri Allah rummu tu ma pa kasanga atina. ⁹ Ni kanabu atimu, ni sandukkamu dangngu kau mangasi doddura wukka; ammanja ni rikkimu kanna pambali mangasini dangngu ni sannangumu kanna pambali sandukkanisa. ¹⁰ Pa pandakai ni atimu ti sagaNai Muri Allah, ma enga pa njagganawu Muri. Amba Pulu Waimani Ni Olimu ¹¹ Bakku olidadinggumi, amabi paranja pa puluwai wikki amma nami ni tu ma puluwaini ni olina dangngu ma panjalai ni olina, badda lawa nassa ni hukku dangngu badda panjalanasa ni hukku. Bai panjalakassa ni hukku, atta yimmi amma tu ma pasalakui ni hukku, takka yidda Hakim ma pasalakui. ¹² Da mema kaddana na sa'tu ni mapndowi ni hukku dangngu ma pandowi ni Hakim, Yinna kaddai Muri Allah, ma paluputanda dangngu ma pasalla nda takka ma hega pungngu dawulla yona takka dikeri panjalamura olimu? Amba Bulla Kanni Muri ti Dalu Wukku Atimu ¹³ Ni manggiana, kai rangngimi rummu tu ma panewi, "Ladduni nggia attau ma sarammu enga salakunggu ti panyia hai attau ti panyia halau, ka engana hai sisa tau nggu baisa ku battana dangngu ku kolina utu." ¹⁴ Takka attai lakkasa ammanggi pani ni madadi masarammu, panisa pakolini ni muripamu? Ni muripamu sama kaddani dangngu ni ni sambuangu ni paeta tunjunda baisa na olu mallasai. ¹⁵ Ba tunihai, yimmi mi panewi tunihai, ti Muri: "Banna wukku kassai pandowi tuni nggoi, limmi punggi dinna pulupia. ¹⁶ Takka toma tuni nggiasa, yimmi kalada nassa ni atimi ti dalu jaga atimi, ni kalada ati tunihai attana dassa ammai. ¹⁷ Banna tunihaisa, o kannisa ni tu na lakkasa pawolui ni mandassa takka attana pasalakusa, yinna badda ndoku djala nakka.