¹ Mbenggu nikka tu ma dedi, rangngi nikka! Mangasi dangngu doddurannanika tutni sandukka ni ma hammina ma janginggu. ² Ni dedimu mbadda mosunga narrisa dangngu ni pa pakimu na ngandika warunga. ³ Ammasa dangngu ni perakmu mbadda patai rara narrika, dangngu ni patai rara nggo ma njadi saksi ma pambuatuwu lappa banna nganggui ni tolumu samatu api. Yinni mbadda pakabuanika ngawu ti ladu-laddu makamuri. ⁴ Rangngika, uppada maramma ma urusai ni ommamu, ni patahmu waina curang, da pakawawuka na badda lawawu. Dangngu, kawawuka da ma rammari ni issi oma mbadda tomanisa ti katillu-Nai Muri sanggubulla ni awangu tana. ⁵ Yinni mbadda muripa nikka ti pannu tana ti dalu wurru weta dangngu sannangu tutuni kalitta wikki, yimmi mbadda pakamubbura nisa ni atimi ti laddu pa sambarri wai. ⁶ Yimmi baisaka pawukkundarra dangngu pa malira tu ma pullupia, dangngu yinna attana lawawu. Tahana Ti Dalu Sandukka ⁷ Tunihaisa, bakku olidadinggumi, maloyangu toma ti laddu patakka wainai Muri. Etaraka ba appalinni mangngu oma banna patenggi ni wuama lalludassawa ni pakolini ni tana, ba patenggi waina maloyangu lappa banna takka ni urra kawunga dangngu Urra Kamuri. ⁸ Yimmi mannu mi maloyangu, pakaluasani ni atimu mabba ni takkaNai Muri mbadda tukkinisa. ⁹ Bakku olidadinggumi, ammaka pa ngungu-ngungundara olimu pa tu ka amba kolina hukku. Etasa, ni maketana Hukku mbadda ndengirana ka ti saga malowi. ¹⁰ Bakku olidadigumi ma mapatakkanggi ni sandukka dangngu ni maloyangu, etaraka nabi-nabi ma panewi ti dalu ngaraNai Muri. ¹¹ Yammi limmandara masannangu yidda ma manundu, mataha yimmi mbadda rangngi nisa ni tahanai Ayub dangngu ba etani wukkuNai Muri ti kamuri ni, mabba ma mbannu mbussa dangngu maradda ati. Ammada Pa Sarrana ¹² Takka bakku olidadingumi, ti pannu ngarandukkani , ambai sarradana, ndassa tutuni ni awangu, pannu tana aita wallika tutni pani widdi. Takkisa "O" nikaba O dangngu "Aita" nikaba aita kai amba kolina hukku. Bisa Sambaya ti dalu Pawai ¹³ O ti jongami yimmi ma tanggu padisa? Amma ammunika banna sambaya. ¹⁴ O ti jongami yimmi ma tanggu analalu? Amma ammu nikka kanna kayeka na tua-tua kalembu tu matua dangngu yidda musti badda sambayani, dan sami waini minya ti dalu ngaraNai Muri. ¹⁵ Sambaya ni pa patoma ti dalu pawaina pamannu marai ni tu ma analalu dangngu Muri ma pakaddi yinna. Dangngu, yinna ba mbadda wolu kanna djala, ni djalana na mapodasa narri. ¹⁶ Tunihai, kai maranja mangakundisa ni djalami dangngu kai maranja pa sambaya wikkina nakka ka mi tanggasa. Sambaya tu ma pullupia ma pajolanggi dangngu walli ati kanja, na kalada pungngu ni bisani. ¹⁷ Elia samatu yitta kadda walli, na sambaya dangngu pa langu takka na ka amba na mburruni urra, dangngu na urra atta na mburru ammai ti manua hai taula tau nammu wullani manjaddangnguni. ¹⁸ Baisa kahai, na sambaya bali, takka ni awangu dinna pamburrunggi ni urra dangngu ni pannu tana na patumbundi ni wuanarri. Tuluna Tu ma Pabali ti Allah ¹⁹ Bakku olidadinggumi, ba o kakka ti dalumi yimmi ma sibitana walli ti ma pullupia, takka baisa o tu matuluni banna pabali balina, ²⁰ kai lakkasanggi ni tu no ma ngindi ni tu ma djala ma bali ti lara ma pullupia na pamannu marai ndewana ni tu no walli ti mati dangngu na todiri ni djala dangu.