¹ Kadukkana, oledadi-oledadi yamme madengi monno papalolo dangago barra Maramba Yesu ba neghe niawe ne pababada yemmi deiba wali yamme tagu peina yemmi moripa takka monno pasenanga Mori, rawige ghetti domo. ² Niawe, yemmi bi paddege pareta-pareta appawe ne yamme pangidima barramu lede ghaina kuasa Maramba Yesu ³ Ne niawe, ne nia pabeina Mori: zingiramu,* ne ba yemmi pa marroge toumu wali percabulan; ⁴ Ba ne yemmi masing-masing paddege bi pattu wekina tagu toumu douna ne barra zingira monno nepangaka dana, ⁵ Da niake ne'egu gairah abonunah nafsu ne azama ata-ata adapaddei Mori, ⁶ Gaika kadaikana ia ata a langgarrawe monno amapodeta oledadina barra tagu ne. Ne niawe, Maramba niadona abalasa wali ngarakua ne, ne ghina ne yamme patekina netipona monno yamme papalomi takka-takkami barramu. ⁷ Mori akanangada ghitto dania kipo ne datazingira, ne ghina we gai kata zingira. ⁸ Neka ne ghina we ghetti,garrakugu atolaka ne pateki ne, datolake ata pia, takka ba niawemu tolaka Mori, a yagu Ngau amatua-Na* nebarramu. ⁹ Ne ghina we, tagu manawara oledadi, yemmi diwaiki ata a tulisa barramu orona yemmi douna na panungami Mori gai kipamanawara wekina. ¹⁰ Ghina we, yemmi bi rawige barra ngarakua oledadi ne ghaina ne Makedonia. takka niapo, oledadi-oledadi, yamme madengigu monno ponnugu gai yemmi birawige alouka dommo, ¹¹ Monno usahapun ne moripa ne'e tenang dana, urussa urusan-urusanmu doumu, monno panghili ne limma doumu, ne azama ne papareta bama yamme barramu, ¹² Gaika yemmi kikolege bipakako moripa monno pantas nearo ata-ata gounga monno gai kadaikana a ghaina. Ne ba'ammi Maramba ¹³ Oledadi-oledadi, yamme dama nauki yemmi be dipaddege tagu ata-ata a mate ba gai yemmi daikana karegu ate netudda ata-ata a dai nungubaki pamanne ghaida. ¹⁴ Ne ghinawe, ne ghitto tawaige ba Yesu na mate monno nakede bali, ghitto kaina tawaige ba Mori na pakuadi ghida a mate ne barrana Yesu dipalolo dangae Nia. ¹⁵ Yamme matekiwe tagu ne barrana neghe li'ina Maramba, ne ghitto amoripapo, a ghaina ne ba'ammi na Maramba, dapa ullubaki ghida a mate ba. ¹⁶ Maramba douna Nia na burru wali surga dana neghe kawaro, li'i wali penghulu malaikat, monno neghe li'i trompet Mori, monno ata-ata a mate ne barrana karittu na kedde ullu. ¹⁷ Niawe, ghitto a engapona moripa , a engapona adangi, ta makeketa daba-daba barra karoba-karoba neghe ghida gaika katemu Maramba ne paringi deta, monno neghe ghitto ne'ebada apalolo dangai Maramba. ¹⁸ Orona ghetti, hiburai ia ata monno a wedeka ne pateki-pateki ne.