Mori Ta Laddo Ngahu ¹ Haddakka rahi, ta laddo Ngahu, Yesus nakako lida ta wu oma gandum. Ta mahiggo inna, ana hakodo-Na mangatti dage kapirana gandum, da kohe waidi limmada yidda, nyiwe na yadi. ² Kapirana ata Farisi da kanukawe, "Ahha miyo mamu rayige inna hada ta laddo Ngahu?" ³ Yesus na balehay yidda waige ba linna, "Walem kalli bahhak mawe agawe harayi nai Daud kole nyi mono ata ka oleni bada kalabba, ⁴ tutu aga linawe nyi tama lari ta Ummai Allah, bana ngalayi kababa manuta, yadi kababa radda, lohho na yidi tabarada ata olena, aiha dadi yadi, dukka dahhe tangada rato?" ⁵ Nyiwe, Yesus linage tabara ata Farisi rada, "Anana kadai ata yikna Mori ta laddo Ngahu." Yesus Na Hatagaha Ata Ta Laddo Ngahu ⁶ Ta laddo Ngahu Yesus na kako ta Sinagoge mono naha nuana ata. Taha dau neda dani wu ata kamate gabba limma kawanana. ⁷ Ahli-ahli Taurat mono ata Farisi da hamatarani Yesus kapiku etayi appa Nyi na hatagahayi ta laddo Ngahu, dajalage yidda kadayo kadoleda rayini Nyi. ⁸ Ta nyiduwe, Yesus tadawe agawe paha ngadada. Nyi linage tabarana ata kamate gabba limma kawanana nada, "Kaddewu mono dede ta tilluna." Nyiwe, ata nadda kadde nage mono na dede neda bali. ⁹ Yesus linage tabarada yidda, "Nauwa ug kanukami miyo, gidahoge parayi ta laddo Ngahu: Rayige kadahha waleka kajapata? Pahoilawe ngahu waleka ha lilokowe?" ¹⁰ Kole bana torro ta kalingorana, tabarada yidda tangada, Yesus linage tabarana ata kamate gabba limma kawanana nadda, "Pajolani limmamu.' Bege, ata nadda hajolani limmana mono limmana na dadi tagaha. ¹¹ Ta nyiduwe, ata Farisi mono ahli-ahli taurat da bani mono da woroge tutu agawe harayi da tabaranai Yesus. Pediyi Kabulu Duda Rasul ¹² Ta laddo inna, Yesus na panne ta letena bana sembayangna, mono neda bali Nyi sembayangna tabarai Allah tara gagaddi. ¹³ Koko kak dama ge tana, Nyi na kamai kadi ana hakodo-Na kabulu dudana ata wali ta jongada yidda, rada ha ngarada-Na rasul : ¹⁴ Simon paha ngara dumo "Petrus", Andereas angu wunai Petrus, Yakobus, Yohanes, Filipus, Bertolomeus, ¹⁵ Matius, Tomas, Yakobus anai Alfeus, Simon ha ngarai ata Zelot, ¹⁶ Yudas anai Yakobus, mono Yudas Iskariot kadadi malajani Nyi. Hanuanai Yesus ¹⁷ Kolei Yesus mono tangada rasul burru, Nyi na dede ta dihha wauha dau kalijana. Nyiwe, ammidi tabara-Na kalibbo ata ana hakodo-Na mono ata buta kamai wali ta tangage kalingora Yudea, Yerusalem, lohho wali ta kalingora huppu harona Tirus mono Sidon. ¹⁸ Yidda tangada mai kapiku rangeyi Yesus mono kapiku kolena tagaha wali tanga ngara kalawarada yidda. Mono, ata hatamana waddi japata dummo hatagahayi. ¹⁹ Tangada ata harujjina kapiku jojayi Yesus oro dage kawaha ka huna wali ta Nyi mono naha tagahiyi yidda tangada. ²⁰ Yesus natorroyi ana ha kodo-Na rada mono linage, "Hamaringi kami mila ka milla oro badau mugela Kalingora parehai Allah. ²¹ Maringi kanala miyo batauge inna ka labba oro miyo enga ha boktami. Maringi kanala miyo inna batauge ka hoyo oro miyo enga malhami. ²² Maringi kanala miyo batauge bada buttu gimi ate, pali heka gimi' hamelo gimi, lohho ha otora gimige ngara dahhami oro anana kadadi ata. ²³ Lagahari mila ta laddo miyo bamu paddage tangage, mono talahho kamila lagaharami oro upam madakka lawe ta surga; oro tauda dagela weda waikamu yidda bada rayidi tangada nabi. ²⁴ Ta nyiduwe, mayilla lawela ta miyo kapote oro miyo um kole bege kama inyaka morhami. ²⁵ Mayilla lawela miyo inna batauge kabokta oro miyo enga kalabba mila. Mayilla lawela miyo inna batauge kamalha oro miyo enga kalallumi mono hoyo. ²⁶ Mayilla mila miyo nyi tangada ata bana takki kawe hada kadahha tutu taumu oro batauda dahoge inna weda waikamu yidda kole dulkayi tutuda nabi-nabi paleka.' Manawarani Muhhumu ²⁷ "Ta nyiduwe, Nauwa luguge tabrami karangewa Nauwa. Manawara kini muhhumi mono rayi dage kadahhala tabarada ata kabutu gimi ate. ²⁸ Hamaringiyi ata ka tukku gimi miyo mon sembayangkinila tubada yidda kaha mayilla miyo. ²⁹ Tubana ata kapoka mige papimi, paturru walige papi wu wali. Mono, tabrana iya hingu kayi karama mige kalabbemi, ilam heri kani bana karama guge kalabbe walimi u. ³⁰ Yini tabara tangana ata karai tabaramu, mono nyi wu ata ngala ka gudi daumu, ilam karai hagga kayi. ³¹ Um rayi kinagela ata wadeka katauna miyo kabu atege rayige tabarada yidda. ³² Nyi miyo bamu manawara heni ata kama manawara gimi, madaika agawe ha yiyo tabarami? Oro, ata kajala dummo manawa rani ata kamanawaradi yidda. ³³ Nyi miyi ba duka dahege rayige kadahha tabara ata karayina kadahha tabarami, marakkakwe miyo kolege madaika? Oro, ata jala dummo rayaige hada kataudana. ³⁴ Nyi miyo bamu yi tuddu kayi ngawumi tabarada ata wadeka waige bamu mannege da jeludi, agak we madaika ha yimi tabarami? Oro, ata jala dummo na yi tuddu tabara ata jala wadeka dajalage yidda dadiwe hibba hagayi waidi butadi kaha tujja. ³⁵ Ta nyiduwe, manwara kini muhhumi mono rayi kinage kadahha, yi tuddu kini tabarada ata wadeka ilam mannege haggadi. Waige bataudage, miyo enga kolemi uppage kama dakka mono mi enga dadiwe ba anana gimi Ka hada Madehta, oroi Allah nadda dahha tabarana ata ai katadawe lima wai mono kajapata. ³⁶ Oroge inna, nyi miyo maradda atewu, kataujawe Amamu kabannu na maradda ate." Ilam Yikani Rakkana Ata Wadeka ³⁷ "Ilam yikani rakkana dajalage miyo illa yigimi rakkami. Ilam hoku kani dajalge miyo illa hoku gimi. Ha wali kinila mono mi enga hawali gimi. ³⁸ Yikimila enga yigimi tabarami: matakara kadahha, paha ngati, pa kikka mono banu bannu na, mono ha biyo ta babamu. Oro waige ukra kaha mera hawaimu bamu ukrana, hada inna enga ukra hagga guge tabaramu." ³⁹ Yesus naha larawe tangage tabarada yidda hatujja inna, "Dadi kakwe ata moro irruyi ole ata morona? Yidda kadudana wale da monu kakna ta kalena? ⁴⁰ Wu lakawa hakola walena rehikma wali ta guruna. Ta nyiduwe, tangana ata pa latibe enga dadi tujai guruda yidda. ⁴¹ Ahha miyo mamu eta nani karabka yayu ta matana ole baimu, tabolo yau wiki dau walem tadak mayi bai bola yayu ta mata daumu? ⁴² Aga linak kawe ba limige ta ole baimi, 'Ole baiyo, pahaiga kagu lai guni karabka yayu nada wali ta matamu,' tabolo yau wiki dau walem etak mayi bai bola yayu ta matamu? Ta ata dahha dete! Pahuyo ullu toni bai bola yay tamata daumu. Beyo innage, yau dadiwe eta dahhayi bamu lainani karabka yayu wali tamata ole baimu." Pu Yayu Kadahha Na Wuyo Jalana Kadahha ⁴³ "Pu yayu kadahha walena wudak mana ai kadahha, mono pu yayu ai kadahha walena wu dak mana kadahha. ⁴⁴ Tangada pu yayu da tadayi wali ta wuna bana dadi. Ata wale na kahhakma wu kapulota wali ta tara warri, waleka koppi anggur wali ta jonga ramma. ⁴⁵ Ata kadahha na pahuna hada kadahha wali ta atena kadahha mono ata kajapata na pahuna hada kajapata wali ta atena kajapata. Agawe kahuna wale ta bana wu ata walige agawe kabanuna ta atena," Duda Hadau Hadede Umma ⁴⁶ "Ahha mi kamaikaga Nauwa,' Mori, Mori,' tabolo aim rayi moge agawe Nauwa hanua gimi? ⁴⁷ Nauwa enga hatingo guge tabaramu, katauna aga linna dahho ata kamai tabara-gu, range gage hanua-Gu mono rayidi. ⁴⁸ Nyi tujai ata kaha kadde batu ummana, ka koja hakiddige, nyiwe na ijalawe hadau ummana inna ta panu watu. Kole ba ami kani lai weyo, weyo bana likawe umman inna, tabolo wale na dadik mawe gedowe oro umma inna bana kulhawe baha kaddewe. ⁴⁹ Tabolo, ata karange gage hanua-Gu tabolo wale dokuk madi, nyi natujayi ata kaha kadde ummana ta pannu tana aika mangu fondasina. Kole ammini lai weyo, umma inna ta bohtawe mono na liwe mayegara kaha tetakna."