Yesus Naha Tagahi Wu Ata Halewana Perwira ¹ Kolei Yesus bana be kahhayi hanewe-Na ta aro ata buta, Nyi natama ta Kapernaum. ² Neda bali, dani wu Perwira Romawi kadayo atana paha akana. Atana nadda tamrana kalawara aika anana mono hodi mowe mate. ³ Kole Perwira nada rangeyi tuti Yesus, nyi naha lawayi kapirana bai ata Yahudi tabo kayi Yesus mono karaiyi Nyi ka ammini patagaha nani ata paha lewana nadda." ⁴ Ba amini ata nadda tabarai Yesus, tau takkage da maraino tabara-Na. Lidage yidda, "Ata nadda tubawe bana hibbawe matullu-Mu, ⁵ oro nyi na manawaradi atada yitta mono nyi karayina sinagoge tubada yitta." ⁶ Kako nagei Yesus oledi yidda. Kole Nyi bana dahe kawe ummana perwira nadda, perwira nadda naha lewayi kapirana olena kada takkiwe tabranai Yesus, "Mori, Yau ilam hamayilla wiki kamu tutugu oro nauwa waleg tubak mawa nauwa bagu hiba-Wu ta ummagu. ⁷ Inna nyiwe oroge, nauwa dau waleg tubak mawa tutu mai tabara-Mu. Ta nyiduwe, takki kage wu haneweMu, nyiwe ata paha lewagu na tagaha. ⁸ Oro, nauwa dummo wywa ata ta kabu harehana ta kabugu dadi prajurit-prajurit. Nyi bagu takki kawe tabarana wu prajurit, 'Kakowula!,' nyi dummo na kako. Nyi ba lugu kawa tabarada wadeka prajurit, ' Maiwula!,' nyi dummo na mai. Mono, nyi bagu takki kanage tabarana ata paha lewagu, 'Rayige inne!,' ata dummogu enga na rayige." ⁹ Kole Yesus rangewe hada inna, Nyi naha ngatara ta perwira Romawi nadda. Hagapege gillaka tabarada ata buta ka dokuni-Nyi, Nyi linage, "Nauwa luguge tabramu, lohho ta jonga ta Israel dummo Nauwa waleg kali tabok mahowe hatena kamadaka katauna inna." ¹⁰ Kole ata paha lewana tabarai Yesus hagga ta umma perwira nada, yidda da dikkini ata pahalewana na tagahabe. Anana Wu Lawai Balu Ha Kaddeyi ¹¹ Bana damma hege tana, Yesus na kako ta dihha wu haraona ka ngarana Nain oledi tangadi anaha kodo-Na mono ata buta kadokuni Nyi. ¹² Kole Nyi dahhe kawe binna kalla harona, dani karogo wu ata kabani ha dita ta bali haddi. Ata kamate nadda nyi ana nahha nani wu lawai balu. Mono, dadi ata buta wali ta harona inna kamarangani lawai nada. ¹³ Kolei Mori etayi lawai nadda, Mori na marabe hawe atena tabarana mono linage, "Ilam hokawu." ¹⁴ Bege, Nyi na dahhe kayi mono na jojayi dita ata mate nadda. Ata kaditawe raka inna dummo ngahu. Nyiwe, Yesus linage, "Ta bau mane, Nauwa luguge tabaramu, kadewula!" ¹⁵ Bege, ata nada kamate ngodo mono halege nage hanewe. Mono, Yesus na pahagani ta inyana. ¹⁶ Tangada ata ka etawe hada inna na bannudi hada kama dauta nyiwe halege dage daikayi Allah mono lidage, "Tangada nabimadakka da hudda be ta jongada yitta!" mono "Allah na mai diki bedi ana huhu-Na." ¹⁷ Mono, liyo tutuna Nyi matalarawe ta tangage Yudea mono ta tangage hadu wadeka ta kalingorada. Yohanes Pembaptis Naha Lewayi Ana Hakodona Tabarai Yesus ¹⁸ Ana hakodo nai Yohanes da takkiwe tabarai Yohanes tutu tngage kama hada inna. ¹⁹ Nyiwe, Yohanes na kamaikadi duda ata ana hakodona mono halewayi yidda tabarai Mori kanukayi, "Yau na ge ka ammi na nadda? Waleka, ma rema dahoni kahekana?" ²⁰ Kole yidda ammidi tabarai Yesus, yidda dummo lidage, "Yohanes Pembaptis halewama nami mai tabara-Mu mono kanukawe, 'Yau nage ka ammina nadda ge? Waleka, nami ma rema dahoni nami kahekana?" ²¹ Ta mahiggo inna, Yesus tamrana hatagahayi ata buta wali ta tanga ngara kalawara, kapore, mono waddi japata. Nyi dummo na yidi kajurru eta tabara ata buta ata kamoro. ²² Balehawe Yesus tabarada duda ata radda, "Kakomi mono halara nage tabarai Yohanes tutu agawe pa eta bemi mono ha rangimi: ata moro na eta, ata kalikku na kako, ata kalawara na katobi na tagahayi, ata katillu na range, ata kamate na kadde, mono tabarada ata milla na dikiwe liyo kadahha. ²³ Oroge inna, maringi kana nyila aika widda oro-Gu." ²⁴ Kole rada paha lewai Yohanes kako, Yesus linage tabara ata buta tutui Yohanes, "Tutu ba etayi appa yau kakowu ta maradda gilra? Etayi kaba bana ha uppuwe rereha? ²⁵ Tabolo, agayi mi hakakom torro? Ata katau kalabe dahha? Etayila, ata kawaina kalabbe dahha mono morha lari kama jabola ta Ta hadauna raja. ²⁶ Nyiwe, agayi miyo hakakom eta? Wuyo nabi? Ngo, Nauwa luguge tabaramu, lohho na rehi wali ta wu nabi. ²⁷ Nyikna atana, lohho tutuna dage kama tolha: 'Rangewela! Nauwa ug halewayi paha lewa-Gu ullugu Yau. Nyila kaha inyakayi lara ta aro-Mu.' Maleakhi 3 : 1 ²⁸ Nauwa luguge tabaramu, ta jonga ata paha dadi bena lawai, wale lahingmana karehi wali ta Yohanes. Ta nyiduwe, kahadda marraha lari ta kalingora harehai Allah, rehi madakka wali ta nyiyo." ²⁹ Kole ata buta mono tangada ka kahha walu katakku rangewe hada inna, yidda tangada da mangakuge tijanai Allah oro yidda ba hariha beduyi waige harihai Yohanes. ³⁰ Ta nyiduwe, ata Farisi mono ahli-ahli Taurat tulla rage hakabu atenai Allah ta tuba tau dauda yidda oro yidda aina hariha hoyi Yohanes. ³¹ "Nyi aga lugu dahowa bagu ha tujani ata kamorha ta dalara ata batauge inna? Yidda aga dahho dau hatujayi rada? ³² Yidda tujao lakawa ka ngodo ta pahara, kaha wula- wula wikina, ' Nami ma ha uppuyi kapika tutumi, tabolo miyo walem ma nyayik mani manyanyi kalallu, tabolo miyo wale hokma.' ³³ Oro, kolei Yohanes Pembaptis ammini mono wal na yakma roti waleka enu anggur, 'Nyi tama nani waddi japata.' ³⁴ Ta nyiduwe, kole Anana Kadadi ata ammini yayo mono enu, miyo limmige, 'Etayila! Nyi wuyi ata kadadara mono ka enu! Nyi dummo ole ate nadi ka kahha walu katakku mono ata jala!' ³⁵ Ta nyiduwe, tada paha tenada anana." Lawai Kajala Na Lewuyi Yesus ³⁶ Dihha wu hadakka, dani wu ata wali kalibbo Farisi ka lehuni Yesus tutu yayo dangani Nyi. Yesus kako ta ummana ata Farisi nada mono na ngodo yayo. ³⁷ Ta harona inna, dani wu lawai kajala. Kole nyi tadayi Yesus ba tamrana yayo ta ummana Farisi nada, nyi dummo na hiyo wuyo gori katero ka ngihina ka bau mumra. ³⁸ Nyiwe, nyi na dede ta liranai Yesus, ta ledu-Na, ha gapege hoyo mono naha baha nadi ledunai Yesus waidi weyo matana mono na hpi wainadi wuna. Kole innage, nyi na gakha nadi ledunai Yesus mono na lewu waidi we ka bau mumra. ³⁹ Kole ata Farisi ka maikani Yesus etawe hada inna, nyi linage lari ta atena, "Nyi ata nadde ba wukayi nabi, Nyi na tadayi iyayi mono lawai aga dayi nadde ka jojayi-Nyi nada oro lawai nada nyi wuyi ata rayina jala." ⁴⁰ Yesus na balehawe mono linage, "Simon, dage ha baigu Bagu takkiwe tabaramu." Balehawe Simon, "Takkiwe ge Guru." ⁴¹ Yesus linage, "Dadi duda ata kadayo wuttana ta wuyo ata ka bunga amaha, nada wu ata na wutana lima ngahu dinar mono nada wuyo wuttana limma kabulu dinar. ⁴² Kole kadudana aida mukkadi bayaradi wuttada yidda kadudana. Nyi dawe, iyayi ta jonga kadudana ata radda karehi manwarana ta ata kabunga amaha nadda?" ⁴³ Bale hawei Simon, "Paha ngadagu, ata kahada buta papa lohta wutana." Yesus linage tabarana, "Paha ngadamu tenawe." ⁴⁴ Tamrana peli tabarana lawai nadda, Yesus linage tabarai Simon, "Appa yau etayi lawai nadda? Kole Nauwa maiwa ta ummamu, yau walem yik maga weyo bamu baha gadi ledu-Gu, tabolo nyi na baha gadi ledu-Gu, tabolo nyi na baha gadi ledu-Gu waidi weyo matana mono na hopi gadi waige wuna, ⁴⁵ Yau walem ngak hak Mawa, tabolo nyi wale na gahu hing mana ngak hagadi ledu-Gu wali wunga tamagu Nauwa. ⁴⁶ Yau walem lewuk mage katakku-Gu waige kabau mumra, tabolo nyi na lewu gadi ledu-Gu waige kabau mumra. ⁴⁷ Oroge inna, Luguge tabaramu, jalana kabutala radda hawali bedi oro nyi ha tingo bege manawara kma dakka. Ta nyiduwe, ata ka hodi kina hawalini, hodi jalaki ba manawarani." ⁴⁸ Nyiwe Yesus linage tabarana lawai nadda, "Jalamu hawali bedi." ⁴⁹ Ata ka ngodo ole dangani Yesus yayo kapudage kanukkawe ta ateda yidda, "Iyayi ata nadde dajalage Nyi dadiwe hawalina jala?' ⁵⁰ Yesus linage tabarana lawai nadda, "Hatenamu napa hoila bewu, kakowu waina moli."