¹ Dage wuha dakka, ata buta koporani bada kilorani-Nyi kapiku rangewe linai Allah. Inna na, Yesus nadede ta huppu hoba Genesaret, ² mono na etayi duda tena ka huna ta huppu hoba inna, tabolo ata da hubena wali ta tena radda mono tamrada bahayi jalada yidda. ³ Yesus panne nage ta dihha wu tena ta tena nai Simon, mono naha lewayi Simon kapiku bohe hodiyi tena na marau wali ta tana yara. Bege, Yesus ngodo mono naha nuwadi ata buta ta pannu tena. ⁴ Kole bana beyo hanewe, Yesus linage tabarai Simon, "Kakowu ta weyo kalibbu hodi tubag jalamu kapiku kolemu kaboko." ⁵ Simon na baleha, "Guru, nami ma rayi ullabe tara gagaddi, tabolo wale lakma ha kole ama aga ana! Ta nyiduwe, oro ba Yau kaha lewawa, nauwa ug toba hoge jalagu inna." ⁶ Mono, kole yidda bada dokuge, yidda da kolena kaboko buta dajalage jalada hodi mowe majirraka. ⁷ Nyiwe, yidda da baddina ta oleda yidda ta tena wadeka kapiku ammidi tulludi yidda. Bege, ammidila oleda yidda mono taudi tenada radda kaboko dajalage tenada yidda hodi mowe bulloyi. ⁸ Kolei Simon Petrus etawe hada inna, nyi naka wojo ta aronai Yesus mono linage, "Yelana wali tabaragu, Morigu, oro nauwa ata dokuwa!" ⁹ Petrus lina dage bana hanewe oro nyi mono tangada ka oleni hangatara dage oro butadi kaboko ha yappada yidda. ¹⁰ Tauda dummoge Yakobus monoi Yohanes, anai Zebedeus ka oleni Simon. Yesus linage tabarai Simon, "Ilam madautawu. Wali inna ba tauge, miyo kamu majalami ata." ¹¹ Kole yidda bada tingiyi tenada yidda ta tana yara, yidda da tanadi tangadi mono dokuni Yesus. Ata Kalikku Hataga Hayi ¹² Dihha wu laddo, Yesus na dikki ta wuha rona. Ta harona inna, dani wu ata kabannu na tauna katobi. Kole ata nadda etayi Yesus, nyi nakawojo kahha matana jojawe tana mono na rainoge tabara-Na, "Mori, nyi Yau bamu auka duwu, Yau kamu hatagaha kiwa nauwa." ¹³ Nyiwe, Yesus na ha jolani limma-Na mono jojayi ata nadda. Lina-Ge, "Nauwa ug auwa, dadiwege tagaha." Inna mema dummoge, katobina ata nadda bungayi. ¹⁴ Taboloi, Yesus naha rehayi ata radda ilda takkiwe langka ta iya hingkayi mono linage, "Kakowu mono hatingoge taumu tabarada rato. Yiwu maraka aro bamu tagahawu katauna pahareha nai Musa ka wuwe tada tubada yidda." ¹⁵ Liyo tutu nai Yesus kiki mahabara nage dajalage buta ata kama kahha kapiku da rangeyi Nyi mono kapiku hatagahayi wali ta kalawarada yidda. ¹⁶ Tabolo, Yesus kali kako kabunyi taha dau ka hika bana sembayangna. Ata Kalikku Hataga Hayi ¹⁷ Ta dihha wu laddo, kolei Yesus batamrana hanuadi, ata Farisi mono ahli-ahli Taurat ka mai wali ta tanga harona ta kalingora Galilea, Yudea, mono Harona Yerusalem dummo ngodo neda bali. Mono, Kawahanai Mori oleni Yesus dajalage Nyi dadiwe patagahayi ata buta. Ata Kalikku Hataga Hayi ¹⁸ Nyiwe, kapirana ata ditayi wu ata kalikku ta pannu hadau dura, mono yidda da hurka ngidiyi tama mono ijalayi ata nadda ta aronai Yesus. ¹⁹ Ta nyiduwe, oro yidda ai dayo lara hatabo kada ba ngidiyi ata nadda tama oro ata buta, panne dage yidda ta toko umma mono haburruni ata kalikku nada mono pinyana ta tilluna ta aronai Yesus. ²⁰ Kole bana etawe hatenada yidda, Yesus linage, "Ta anguwuyo, jalamu ha wali begudi." ²¹ Ahli-ahli Taurat mono ata Farisi halege dage kanukawe, "Iyayi ata kapalekayi Allah nadda? iyayi kahawali na jala duka dahegei Allah?" ²² Kolei Yesus tadawe paha ngadada yidda, nyi linage, "Ahha mi mamu kanukka tauda dahoge inna ta atemu? ²³ Gi dahoge karehi lewara, takkiwe ' Jalamu ha wali begudi' waleka ' Kaddewu mono kakowula? ²⁴ Ta nyiduwe, dajalage miyo kamu tadawe nada Anana kadadi ata na dauge kawaha ta panu tana kapiku hawali nadi jala," Yesus linage tabara ata kalikku nada, "Nauwa luguge tabaramu: Kadewula, keketayi hadau duramu mono haggawula."' ²⁵ Inna mema dummo, ata nadda wingu kadde nage ta aro tangada ata mono na ngalawe hadau baikana, bege kako nage hagga hagapege daikayi Allah. ²⁶ Tangada ata rada da bangara mono daikayi Allah. Waige hada kama dauta hada madakka tabara kawahanai Allah, yidda lidage, "Laddo nehe nami ma etawe hada aika anana!" Lewi Na Dokuni Yesus ²⁷ Bewal inna ge, Yesus hunage mno na etayi wu ata ka kahha walu katakku ka ngaranai Lewi ka tamrana ngodo taha dau ngodona bana kahha walu katakku. Yesus linage tabarana, "Dokuga Nauwa." ²⁸ Lewi dede nage, tanadi tangadi, mono dokuni Yesus. ²⁹ Bewalge, nyi narayge ha ulla kamadakka tutu nai Yesus ta ummana. Buta ka kahha walu katakku wadeka ka yayo ole dangani nyi. ³⁰ Ta nyiduwe, ata Farisi mono ahli Taurat halege dage ka ngurka tabara ana hakodonai Yesus, "Ahha miyo yayo mono enu ole dangadi tangada ka kahha walu katakku mono ata jala?" ³¹ Yesus balehawe mono linage tabarada yidda, "Wale ata tagahak ma kabaina mata riyo, tabolo ata kalawara da. ³² Nauwa bagu maiwa wale kamaika dak maguge ata katena, tabolo kamai da guge ata jala dajalage yidda kada jarra." Ata Farisi Daha Tijadi Ana Hakodonai Yohanes Monoi Yesus ³³ Yidda lidage tabarai Yesus, "Anaha kodonai Yohanes Pembaptis da kabukta jua mono da sembayangna, tau da dummo nage ata Farisi. Ta nyiduwe, ana hakodo-Mu da yayo mono enu." ³⁴ Yesus linage tabarada yidda, Dadik kak we miyo bamu halewayi tangada ata ka oledi kabani kaha ummana ka bukta kole kabani kaha ummana nadda bana ole hodi yidda? ³⁵ Tabolo, laddo rada enga amini, kole kabani kaha ummana nadda ba ngalayi wali tabarada yidda, mono ta laddo innala yidda enga kabuktada." ³⁶ Yesus dummo na takkiyi hatujja nada tabarada yidda, "Wale wuhingmana ata kahirra kadibka kaba beru kapiku kadabarawe kalabbe katiyo. Ba nyi tauda dage, ata nadda enga hirra nage kalabe beru na, mono kaba hadabara wai wali ta kalabbena ka beru inna walena tutuk mawe ta kalabbe ka tiyo. ³⁷ Tauda dummo nage wale wu hingmana ata kabiyo anggur beru lari ta kantong kalita tiyo. Anggur beru inna enga hirra nage kantong tiyo dajalage anggur inna enga majokuge mono kantong kalita enga wetarage, ³⁸ Anggur beru ha ijala dahowe lari ta ta kantong kalita beru. ³⁹ Wale wuhing mana ata kole bana enu anggur tiyo, baige enu anggur beru oro yidda lidage, ' Anggur tiyo inna rehi dahha dahoge."'