Ha Inyakawe Tutu Hamateyi Yesus ¹ Laddo madakka Kababa kabba paha ngara da Paskah dage tanage. ² Rato-rato madakka mon o ahli-ahli Taurat da rayige hada tutu hamateyi Yesus, oro yidda madautadi tabarada ata buta. Bokalanai Yudas ³ Bege, tama nage Kabalka lari tai Yudas, paha ngarai Iskariot. Nyi wuyi ana hakodo-Na wali kabulu dudana. ⁴ Nyiwe, kako nagei Yudas bana woro dangadi rato-rato madakka mono ka anguge Ummanai Allah tutu aga linna dawe nyi bana yiyi Yesus tabarada yidda. ⁵ Mono, yidda na dahha hingyi ateda mono da ha wuna yini amaha. ⁶ Nyiwe, Yudas na baige mono na mayegana mahiggo bana yiyi Yesus tabarada yidda ba ai dadi ata buta. Paha Inyaka Paskah ⁷ Bege, diki nage laddo madakka Kababa kabba, inna yiwe mahiggo tutu ba marakana ana bebbe Paskah. ⁸ Ta mahiggo inna, Yesus naha lewayi Petrus monoi Yohanes, linage-Nyi, " Kakomi mono ha inyakami hayayo Paskah kada yayo." ⁹ Lidage tabarai Yesus, "Gige hakabu ateMu bama inya kawe?" ¹⁰ Balehawei Yesus tabarada yidda, "Kole mi bamu tamanmi taha rona, mi enga tabo kamini wu kabani kangidi kedehi; dokuni nyi ta umma hadau tamana, ¹¹ mono takki nagela tabarana mori umma nada, ' Guru naka nukka tabarami: Gige hadau Nauwa bagu ha inya kawe ha yayo Pasakah oledi ana hakodo-Gu?' ¹² Nyiwe, nyi naha tingoge tabarami wu hadau kamadakka, mono hatau wai na maganna beyi. Inyaka kayi ha yayo tutuda yitta neda bali." ¹³ Lohho, Petrus oleni Yohanes kako mono nadadiwe tangage inna hatakkinai Yesus mono yidda dummo da ha inyaka hayayop Paskah. Hakulla Paskah ¹⁴ Kole dikkiwe rahige, Yesus mono tangadi rasul ngodo yayo hakilora meja. ¹⁵ Bege, Yesus linage tabarada yidda, "Nauwa ug kabbu atege yayo Paskah ole danga gimi, Nauwa aig mayilla howa. ¹⁶ Oro Nauwa luguge tabarami, Nauwa walle hilug yakmawa lage kahha inna bana bannuge lari taka lingora nai Allah." ¹⁷ Lohho, Yesus na ngalayi koba weha enu kadayo anggurna mono wai linnage, bege linage, " Ngalayi koba weha enu nadde mono bawe kiyi ta jongami. ¹⁸ Oro, Nauwa luguge tabarami wali inna batauge nauwa wale gu hilu enuk mawa angguru kahha Ta kalingora nai Allah bana dikkiwe." ¹⁹ Bege, Yesus na ngalayi kababa mono wai linage, Nyi na hibiyi kababa radda mono na yidi tabarada yidda ha gapege ba linna, "Kababa inne nyiwe tau-Gu ha yiyo tabaramu; um rayige innala kamu ape waiga Nauwa." ²⁰ Tauda dummoge, kole bana yayo, Yesus na ngalayi koba weha enu hatau angguru mono linage, " Koba weha enu ha biyo tubami inna yiwe Pajaji beru lari ta ra-Gu. Dulkayi Tutu Ata Kayiyi Yesus ²¹ Ta nyiduwe, etayige, limmana ata ka yiwa Nauwa na olega Nauwa ta meja inne. ²² Oro, Anana Kadadi ata enga kakona dokuge hada paha didarabe, tabolo mayillawe halina ata kayiyi Nyi!" ²³ Ana hakodo-Na da kanukka wikina dihha-dihha tutu iyayi ta jongada yidda karayige inna. Dadai Dakimi Ata Kaha Nukku ²⁴ Hagabbana na dadiwe ta jongada tangada rasul tutu iyayi ta jongada yidda ka hadda madakka. ²⁵ Ta nyiduwe, Yesus linage tabarada yidda. "Raja-raja kabihhu ata ai katadayi Mori naha harehayi ana kaha rehana, mono ata kaha reha ta raja-raja radda daha ngaradi 'Kaha todana ana kaha rehana.' ²⁶ Tabolo, mi ilam tujjayi radda. Kabali dalge, kahadda madakka ta jongami na tujja dahoyi ka gikkana ata bodi nakde, mono ha ama na tujja dahoyi ata kaha nukkuwe tangage. ²⁷ Iyayi ka rehi madakka, ata ka ngodo waleka kaha nukkuwe? Wale ata kangodok na yayo? Ta nyiduwe, Nauwa daga ta jongami ba wuwa ata kaha nukkumi. ²⁸ Miyo ata ka engana olega Nauwa lari ta kama kirraha-Gu. ²⁹ Oroge inna, Nauwa ug yigi mige tabarami wu kalinogra pareha,katauna ha yina ama-Gu tabara-Gu, ³⁰ dajalage mi kana dadiwe yayo mono enu ole dangaga Nauwa ta meja lari ta Kalingora-Gu. mono, miyo enga ngodomi ta hadau-Gu tutu yini rakana kabullu duda kabihhuna ata Israel." Petrus Na Kaballuni Yesus ³¹ "Simon, Simon, rangewa Nauwa. Kabalka karuhhu nagu kagu nyurau yau tujai pare, ³² tabolo Nauwa ug sembayang bena tutumu dajalage hatenamu ilna monuwe. Mono, kole yau bamu jarra, hamaddo kidi ole baimu." ³³ Tabolo, Petrus linage tabrai Yesus, "Mori, nauwa ug ha inyakawa tama ta gallu lohho mate lummu danga-Gu!" ³⁴ Balehawei Yesus tabarana, "Nauwa luguge tabaramu, Petrus, laddo nehhe mayailo wale na kukuk mayi aim hadal wudda dahona bamu kabalga Nauwa." Ha Inyaka Aroge Kapitona ³⁵ Bege linagei Yesus ta ana hakodo-Na, "Kole Nauwa bagu halewami miyo ai damo kaleku amahami, tasimi, waleka kopa ledu, appa inna miyo um dabbomi?" Baleha dage yidda, "Walekma." ³⁶ Lina-Ge tabarada yidda, "Tabolo batauge, iya kadayo kaleku amahana waleka tasna, ngidiyi. Mono, iyayi ai kadana katopona, nyammani nyi kana malajadi kalabbena mono hiwaina katopo. ³⁷ Oro, Nauwa luguge tabaramu agawe kama tolha ta Jurata Bihha inna na banu dahoge lari ta Nauwa, ' Nyi rnga yapu gauni ta jonga ata japata.' Yesaya 53; 12 Oro, kama tolha tutugu Nauwa dadai nage batauge." ³⁸ Nyi dawe yidda lidage, "Etai ge Mori dadi radde duda gayi katopo." Mono,Yesus linage tabarada yidda, "Radda ge na tutuyi." Yesus Na Sembayangna Ta Oma Getsemani ³⁹ Bege, Yesus na huna mono na kako ta lete Zaitunna tauna ka kali damma bana rayige-Nyi; mono ana hakodo-Na da kakao jala dokuni Nyi. ⁴⁰ Kolei Yesus dikki taha dau nedda, Nyi linage tabarada yidda, "Kam sembayang nage dajalge mi ilam tamami lari kama kaba." ⁴¹ Bege, Yesus naha marau wikini wali ta yidda ba katutu kawe tujawe maraugwe ba tukkuyi watu, lohho na takkodi kuddona mono na sembayangna, ⁴² "Ama, Nyi tau bamu aukawu, ngalayi koba weha enu nadde wali tabara-Gu. Ta nyiduwe, illa hakabu ate-Gu kadadi, tabolo hakabu ate-Mu." ⁴³ Kole innage, wu malaikat wali ta surga naha dedala wikina tabara-Na mono naha kulhayi-Nyi. ⁴⁴ Mono, lari ta mayilla-Na, Nyi na sembayang- na karehi tau takkana walna; kabut-Na natujjawe rayo katehheka ta tana. ⁴⁵ Kolei Yesus beyo sembayangna, Nyi na kako tabara ana hakodo-Na mono dikkidi yidda tamrada dura oro maropo ateda. ⁴⁶ Yesus linage tabarada yidda, "Ahha miyo mamu durami? Kadem mono sembayang nage dajalage miyo ilam tamami lari kama kaba." Yappayi Yesus ⁴⁷ Kole Yesus bana hanewe ho, ammidi ata buta; mono nyi Yudas, wu ata wali kabulu dudana ana hakodo radda, na kododi yidda. Lohho, Yuidas na dahe kayi Yesus bana ngakhayi-Nyi. ⁴⁸ Ta nyiduwe, Yesus linage tabarana, "Yudas, ahha yau mamu yiyi Anana Kadadi Ata waini bamu ngak hayi?" ⁴⁹ Kole Ana hakodo kadede kilorani-Nyi etawe agawe kadadi, yidda liddage, "Mori, Na dadik kakwe nami gabba waidi katopo?" ⁵⁰ Bege, Wuyi wali ta ana hakodo-Na nadda na kadukani kaha nukkuyi rato banningna lohho na lakka tanani katillu kawanana. ⁵¹ Ta nyiduwe Yesus linage, "Na tutu,wege!" Lohho, Yesus na narro nani katilluna ata nadda mono naha tagaha nani. ⁵² Bege, Yesus linage ta rato kapala, kapala ka jawawe Ummanai Allah, mono bai ata kamai yapayi-Nyi, "Ahha miyo mamu mai kahhami waina katopo mono palu todo mna tujja dawe bamu yapami ata karebo? ⁵³ Kole Nauwa bagu ole hakita gimi nahiyi laddo ta Umma Allah, aim yapawa Nauwa. Tabolo,inne nyiwe rahige tubami mono tubana kulhage harehana kapagtana." Petrus Na Kaballuni Yesus ⁵⁴ Kole bada yappayi-Nyi, ata dummo radda da tudayi mono na ngidiyi Yesus ta umma rato madakka. Ta nyiduwe, Petrus na dokudi yidda wali kama rau. ⁵⁵ Mono kole ata radda ha tutkana latti ta tillu aro umma mono ngodo kahha, Petrus dummo ngodo ta jongada yidda. ⁵⁶ Tabolo, wu lawai ka etayi Petrus ngodo ta nirri latti naha matara nage matana lodoge linage, "Ata nadde ole jala nani-Nyi." ⁵⁷ Ta nyiduwe, Petrus naka balluni, linage, "Ta lawai, nauwa walegu tadak mayi Nyi." ⁵⁸ Walena mojak mahoge, wuyo ata wadeka etayi mono linage "Yau dummo yapu gaugu wali tajongada yidda!" Tabolo Petrus linage, 'Walekma, nauwa wale yapu gauk maga wali ta yidda!" ⁵⁹ Baka tutuwe ge dihha jamge, wu wali ata wadeka linage kaha tetakkana, "Tau takkage ata nadde ole nani-Nyi, oro nyi dummo ata Galileayi." ⁶⁰ Ta nyiduwe Petrus linnage, "Nauwa walegu tadak mawer hatakkimi!" Inna mema dummo, ba tamranai Petrus hanewe, kkuku nage mayailo. ⁶¹ Lohho, gila ka nagei Yesus torroyi Petrus. Mono, Petrus na apewe hataknai Yesus, inna Nyi balinage tab arana, "Aina kuku hoyi mayailo laddo nehhe, yau um hadalllu wuda bega kaballuga." ⁶² Bege Petrus kako nage huna mono honage mono na maropowe atena. Ata Dahha Mayillayi Yesus ⁶³ Ata ka pattuyi Yesus halege dage terekayi mono paluyi-Nyi. ⁶⁴ Yidda da toni nadi mata-Na mono lidage, "Um huru bale holawu! Ba iyayi ka paluwu yau?" ⁶⁵ Yidda dummo butawe hatakki dani bada gabbani-Nyi waige bada hameloni-Nyi. Yesus Ta Arona Pa Ama Yahudi ⁶⁶ Damma hege tana, bai ata pa ama Yahudi, rato-rato kapala, lohho ahli Taurat da makahha mono da ngidiyi Yesus ta Mahkamah Banning da yidda. ⁶⁷ Yidda liddage, "Nyi Yau bai Mesias kawu, takki hola mage tabarama." Tabolo Yesus linage tabarada yidda, "Nyi Nauwa bagu takki kamige, miyo walem hatenak ma tabara-Gu. ⁶⁸ Mono nyi Nauwa bagu kanukkawa tabarami, miyo walema balehak mawa. ⁶⁹ Ta nyiduwe, wali batauge Anana kadadi Ata enga ngodona tabara kawananai Allah kahada bikta Parehana." ⁷⁰ Yidda tangada lidage, "Nyi bataudage, appa yau Ana Allahwu?" Yesus na balehayi yidda, "Mi dau katakkiwe inna Nauwaknala Nyi." ⁷¹ Bege, yidda lidage, "Aga dummo hona ha kabu ateda yitta? Yitta da range dau beyi wali ta bana-Nyi!"