Marakana Lawai Balu ¹ Kolei Yesus bana tangara dete, Nyi na etayi kapirana ata pote hatamana marakada yidda taha dau maraka. ² Nyi eta dumoyi wu lawai balu kamilla hatamana duda balla amaha kaka. ³ Yesus linage, "Nauwa luguge katau takkana tabaramu, lawai balu kamilla nadde na yi rehi buta dahho wali ta tangada ata pote radda. ⁴ Oro yidda da yiyo maraka wali ta morihada kamajabola yidda, tabolo lawai balu nadde na yiyo maraka wali kadabbo ta morhana, haluguna wali ta tangadi hadauna kapikku nalodo kaige morhana." Tadaka Hadukka Rahi ⁵ Kole kapirana ana hakodo ba tamrada dukawe Umma nai Allah paha magillata wai watu kadahha mono maraka, Yesus linage, ⁶ Enga dikkige arahige, tangadi ha etami radde enga ha mukkadi. Wale wu hingmana watu kadede ta panu watu wadeka ai ha ta bohta." ⁷ Lohho, tangada ana hakodo da kanukka tabara-Na, "Guru, pirra ho hada inna bana dadiwe? Mono agawe tadkage wali tangage inna bana dadiwe?" ⁸ Balehawei Yesus "Hamatara kigela dajalage miyo ilda hajalorami oro buta ata kamai waige ngara-Gu mono lidda,' Nauwagna Nyi,' mono ' Rahige dagetawe,' Mioyo ilam doku kadi yidda. ⁹ Ta nyiduwe, kole miyo bamu rangewe tutu hatau mono hagabba, ilam madautami miyo oro hada inna na dadi ullu dahowe, tabolo hadukkage wale na geha dikkig mawe." ¹⁰ Bewalge Yesus linage tabarada yidda, "Labihhu ata enga kadena gabana kabihhu ata mono kalingora raja enga gabana kalingora raja. ¹¹ Na dadiwela epu ai ka anana, mono tanga ngara kapore ta dihha hadau-dihha hadau.Dummo enga huddadi tanga ngara kadadi ha mayiggi ate danga mono tadka kama dakka wali ta langta. ¹² Tabolo aina dadi hoyi tangadi, ata enga yappa da gimi mono da hama yillami miyo. Yidda enga yida gimi ta sina goge-sinagogeda yidda mono bada hatama gimi lari ta gallu. Yidda dummo enga ngidi da gimi ta aroda tangada raja mono Gubernur oro ngara-Gu. ¹³ Tabolo, hada inna enga wuwe mahiggo tubami bamu padela kage. ¹⁴ Oro bataudage inna, hadidarawe atemi ilam hangadage agawe miyo hatakkimi bamu dedege taumi, ¹⁵ oro Nauwa enga yigumi hatakki mono maniwola tabarami ai ha angtada gabage mono hagabawe muhhumi. ¹⁶ Miyo enga da palekami ata katumi,angu wumi, ole baimi, mono olemi, mono yidda enga hamate dadi ata kapirana ta jongam miyo. ¹⁷ Miyo eng butu gimi ate tangada ata oro ngara-Gu. ¹⁸ Ta nyiduwe, wale ngayuk mala wumi wali ta katakkumi kamonu. ¹⁹ Waige tahhimi, miyo enga kole mige morhami." Loluwe Tutu Mauhage Yerusalem ²⁰ "Ta nyiduwe, mole mi bamu etawe harona Yerusalem bana kilorage tentara muhhu, mi enga atada mige inna mau hage bana dagetawe. ²¹ Ma higgo innala, ata kadana ta Yudea da malai dahho ta panu letena, ata kadana lari ta harona da huda hona wali ta harona, mono ta kadana ta deha ilda tamaka Ta harona Yerusalem. ²² Inna nyikwe laddo rahi hokuna dajalage tangage hada kama tolhabe kana banuge. ²³ Mayilla wela lawai katamrana hatiyo mono pahuhu tama higgo inna oro innala enga dadige mayilla aika anana taha dau nedda, mono bani ai ka anana ta kabihu ata redda. ²⁴ Enga hamate waidi katopo mono da kaloka tadadi kabihhu ata. Harona Yerusalem enga da mehage kabihhu ata palaka kahha majabolege bana hadukkawe." Maina Anana Kadadi Ata Lari Tamanadana ²⁵ Enga dala tadka ta mata laddo, wulla, mono maduyo. Ta panu tana, kabihhu ata enga madautada lari bada aida hatada wikida oro kagurukage bannu mono madakadi ngalungu. ²⁶ Ata enga baddada oro madauta mono remage tangage hada inna bana dadiwe ta panu tana inne oro tangada kawaha kadana ta langta enga na makikkayi. ²⁷ Bege, yidda enga eta dani Anana Kadadi Ata ba amini taka rabba waige bikta parehana mono manadana ai ka anana. ²⁸ Nyi radala bana dadi kayi, dedemila mono keketayi katakkumi oro rahi hilami dageta nage." Hatujja Pu Kapullota ²⁹ Begei Yesus halara nani wu hataujja tabarada yidda: "Torroyi puka pulota mono tangadi pu yayu wadeka. ³⁰ Nyi pu yayu radda bana kalunga kayi roda, mi enga yappa mige mono tadawe inna martana ba dageta nage. ³¹ Tauda jala nage miyo nyi bamu etawe tangage inna kadadi, mi enga tada mige inna kalingoranai Allah bana degetawe. ³² Tau takka nage Nauwa luguge tabarami, dalara radde wale da matekma kahha tangage inna bana dadiyi. ³³ Langta mono tana enga bungadi, tabolo hanewe-Gu walena na bungak mayi." Ha Inyaka Hangatami ³⁴ "Hamatara gela dajalage atemu ilna banuge kamakna rayige ha ulla, kalango enu, mono gela gaggage morha. Mono, laddo nadda enga ammini tabarami tujjayi katoka. ³⁵ Oro, laddo nadda ega ammini tabarana tangana ka enga ta p[annu bedo tana inne. ³⁶ Ha inyaka hangata kimila mono sembayangna dajalage mi kamu kolege kulha bamu palohhota wikimi wali tangage hada kadadi radda mono kamu dedemi ta arona Anana Kadadi Ata." ³⁷ Bana laddoge, Yesus naha nuana ata buta ta natara Umma nai Allah, tabolo bana gaddige Nyi na ija kage harona inna mono na dauyo ta lete Zaitunna. ³⁸ Mono, kokokakge, tangada ata ammidi tabara-Na neda lari ta Umma Languna banda rangeyi-Nyi.