Kanukka Tutu Bikta Parehanai Yesus ¹ Dihha wu laddo, kolei Yesus tamrana hanuana ata buta ta Umma Allah mono talarage liyo ege ate, rato-rato kapala mono ahli-ahli Taurat oledi bai ata ammidi tabara-Na. ² Yidda lidage tabara-Na, "Takki mage tabarama nami bikta pareha agawe Yau bamu rayige hada inna? Waleka, iya ka yiguge-Yau bikta pareha inna?" ³ Balehawei Yesus tabarada yidda, "Nauwa dummo enga kanukka gimi wuyo kanukka tabarami. Balehawa Nauwa, ⁴ gi dau walige harihanai Yohanes? Wali ta surga waleka wali ta kadadi atawe?" ⁵ Yidda da woroge hada inna ta jongada yidda waige balidda, "Nyi yitta bada balehayi, 'Wali ta surga,' Nyi enga linage, ' Ba taudage, ahha mi walem hatenayi Yohanes?' ⁶ ta nyiduwe, nyi yitta ba liddage,'Wali ta kadadi atawe,' tangada ata enga tukku dada yitta kahha bada mate oro yidda dahatenawe nadai Yohanes ba wuyi Nabi." ⁷ Nyiwe, yidda dummo da balehawe inna yidda ai da tadawe ba giyo dau walige hariha inna. ⁸ Bege, Yesus linage tabarada yidda, "Batau dage, Nauwa dummo waleg takki jalak mige waige kawaha iyana Nauwa bagu rayidi hada radda." Hatujja Tutu Tangada Paha Hewa Ta Oma Anggur ⁹ Lohho, Yesus naha larayi wu hatujja nada tabara ata buta, "Dani wu ata kataddoge oma anggurna lohho na kahewawe tabarada kapirana ata, mono kako nage ta wuha dau kama rau na moja hona. ¹⁰ Kole ba rahi kopiyi bana dikkiwe, nyi naha lewayi wu ata kaha nukkuyi kako taka ullana radda dajalage yidda kada yiyo wadeka tabarana wali ngihi oma anggur rada. Ta nyiduwe, tangada ka ullana rada da paliyi paha lewa nadda mono da wugayi hagga waina limma kaluyo. ¹¹ Mono nyi dummo naha lewa liyi ata wadeka, tabolo ata rada kaullana da paluyi ata paha lewa nadda mono da rayi nage kahadda aita, lohho da wugayi kako waina limma kaluyo. ¹² Lohho. mori oma angguru nadda naha lewayi ata ha tauda wai tabara tangada ka ullana rada, ka ullana radda dummo dahha manuyi ata paha lewa nada mono da wugayi huna. ¹³ Mori oma nadda dummo linage, 'Aga dahhona ha rayi-Gu? Nauwa enga halewa guni Ana-Gu hama nawara-Gu, yidfda enga ha aka dagani.' ¹⁴ Kole ata ka ullana rada etayi anana mori oma, yidda da woroge dihha-dihha, 'Nyi kadauge oma anggur inna, inna maida yitta kada hamateyi nyi dajalage hadauna radda kana dadiwe bada daudi yitta!' ¹⁵ Bege yidda dummo da tukkuyi lakawa nadda ta bali oma anggur mono daha mateyi. Nyiwe, aga dawe harayina mori oma anggur nadda tabarada yidda? ¹⁶ Nyi enga ammini mono naha lilokodi ata radda, lohho na kahewawe omana ta ata wadeka." Kole ata buta rangeyi liha tujja nadda, yidda lidage, "Ilna dikki kawe dadi hada inna!" ¹⁷ Ta nyiduwe, Yesus na torroyi yidda mono linage, "Nyi bataudage, agawe ngihhige inna: 'Watu ha baitada tukkang umma na dadi watu hadda'? Mazmur 118:22 ¹⁸ ata kabukka ta watu nadda enga mukkana kahha bana kajikna mono iya dummoyi ha birakana watu nada enga mauhana!" ¹⁹ Kole ahli-ahli Taurat mono tangada rato kapala tadawe nada hatujja tuba tutuda yidda, yidda da kabu atege yappayi Yesus inna mema dummo. Ta nyiduwe, yidda da madautadi rada ata buta. Kanukkawe Tutu Bayarana Walu Katakku ²⁰ Bege, tangada ahli Taurat da hamatarani Yesus mono hangididi kapirana ata kaha matarani ka kobo ateda yidda kana dadiwe mayegani jalanai Yesus waige bada kanukkayi dajalage yidda dadiwe yapayi-Nyi dokuge hatakki dauna Nyi maono yiyi Nyi ta limmada ka kawaha mono hadauna Gubernur. ²¹ Ata paha lewa radda dummo da kanukka tabaranai Yesys, "Guru, nami ma tadawu Yau hatakkimmu mono hanuamu na tenayi.Yau dummo walem hawattek mana ata, tabolo um halarayi lara nai Allah lari katena. ²² Apapa nami dadi kakwe bayarana walu katakku ta Kaisar ba walekka?" ²³ Ta nyiduwe, Yesus na tadawe ta melhage ta bada yidda mono linage tabarada yidda, ²⁴ "Um hatingo hola gani tabara-Gu walla amaha dinar. Hada mono hatolha iya nage kadana ta amaha inna? Balehada yidda, "Hada mono hatoha Kaisarwe." ²⁵ Nyiwe, Yesus linage tabarada yidda, "Nyi bataudage, yikiyi ba agayi hadauna Kaisar, mono yikiyi tabaranai Allah agayi hadaunai Allah." ²⁶ Nyi dawege, ata rada walena dadik mawe bana hirra Yesus waige hanewe dauna-Nyi ta aro ata buta; yidda daha ngatara inna baleha-Na mono da kadanna. Kanukkada Ata Saduki ²⁷ Bege, ammidi tabaranai Yesus kapirana ata Saduki, yidda kalibbo ata ai kaha tenawe ba dage kadde hagga, mono da kanukka tabara-Na, ²⁸ "Guru, Musa na tolhawe tubada yitta, nyi wu kabani mateka, tabolo nyi dani ole ummana mono wale lakma anana, angu wuna na ole umma dahoni lawai balu nadda mono da dalidi anana tubana. ²⁹ Linna dawe, dadi pittu ata ka angu wuna. Anguna kadihhana na ha ummana, tabolo mate wale lakma anana. ³⁰ Bege, angu wuna ha duda wai na ole umma walini lawai balu nadda mono mate jala lajalakma anana. ³¹ Lohho, angu wuna ha tauda wai ole umma walini lawai nadda mono hada inna dadiwe kahha ta angu wuna ha pitu wai, tabolo yidda tangada mate lajalakma anada. ³² Kapodi gege, lawai nadda dummo mate. ³³ Oro batau dage, ta laddo yige rakage, iya dayi laina lawai nadda oro ba pittudi ka ha angu wuna radda bada ole umma beni?" ³⁴ Bale hawei Yesus tabarada yidda, "Ata ta mahiggo nehhe kaha ummana mono paha umma, ³⁵ tabolo ata kama rakka tutu kolege hadauna lari ta panu tana nimi ka ammina, mono lari ta kadde hagga wali ta jonga ata mate, enga wale hilu ha ummak madi mono ha ummak mana. ³⁶ Yidda wale na dadik mawe mate lage oro yidda hamera dangadi tangada malaikat. Yidda ananadi Allah oro yidda ba ha kadde hagga beduyi wali ta mate. ³⁷ Lohhoi Musa naha tigoge tutu kadde wali ta ata matelari tubage hatolha tutu tara warri kamuttu. Neda lari inna, Mori da hangar dani 'Allah Abraham, Allah isahak, mono Allah Yakub.' ³⁸ Nyi walei Allah ata kamatek mayi tabolo Allah ata kamorhayi, oro tangada kamorha ta aro-Na. ³⁹ Beyo innage, kapirana ahli Taurat lidage, 'Guru, balehamu wingiwe." ⁴⁰ Mono, wale hilu lakma ata kabani atena kanukayi tabara-Na. Kristus Nyiknai Mori ⁴¹ Bege, Yesus linage tabarada yidda, "Aga linak kawe bana dadiwe ata nadai Kristus ba Ana nani Daud? ⁴² Inna lari ta jurata lawiti, Daud wiki dau linnage, 'Mori Allah linage tabara morigu, "Ngodowuge tabbara limma kawana-Gu, ⁴³ kahha Nauwa bagu ha yodadi muhhu-Mu takabu ledu-Mu.'" Mazmur 110:1 ⁴⁴ Nyi Daud bana takki kayi Kristus ba 'mori nani,' aga linnak kawe Kristus nyi ba anai Daud tuyi?" Hanamu Kapiku Ha Atedi Ahli Taurat ⁴⁵ Kole ata buta rangewe, Yesus linage tabara ana hakodo-Na, ⁴⁶ "Ha ate kimila tabarada ahli-ahli Taurat kabaige kako talara waina kalabbe madakka kama lauyo, kadahha ateda bada ha akadi ta haragana, kabaige ngodo taha dau kama dehta ta sinagoge, mono taha hadau paha aka ta wuha ulla. ⁴⁷ Yidda daka ramadi ummada lawai balu mono hamalauna sembayang kapiku eta dadi ata. Ata katauda dana radde enga hibada li hoku kahada bikta."