Yesus Nadahawe Jawana ¹ Yesus linage, "Waige katau takana, Nauwa luguge tabarami, ata katanma ta gallu bebe aina lika tabina, tabolo waige bana panne liyo ta lara wadeka, ata nada yikna ata kedu mono karebo. ² Tanyiduwe, ata kaliyo ta bina, nyi nyikna kajawa bebe. ³ Tubana, ka aguna bina nabugerana bina, mono tangada bebe rangewe liyo, mono nyi na maikadi bebe dauna waige ngarada yida, loho irui yida tabali hadu. ⁴ Kole bana pahu kahadi tangadi bebena, nyi na kako ta aroda yita mono bebena enga dokuni nyi oro yida tada nage lina. ⁵ Ata li palaka enga waleda dokuk madi yida, tabolo yida enga malaida wali tabarana oro yida aida tada nage lina ba ata li palakayi." ⁶ Hatuja innala nyiwe hataknai Yesus tabrada yida, tabolo yida waleda yapak mawe agawe ab hataknai Yesus tabarada yida. ⁷ Orogr innage, Yesus lina walige tabrada yida, "Tau taka nage, Nauwa luguge tabarami, Nauwa bina ka aro ta bebe rada. ⁸ Tangana ata kamai ai Nauwaho yikna ata kedu mono karebo, tabolo tangada bebe walda rangek mayi yida. ⁹ Nauwagna bina. Nyi wu ata bana tamaka ledega Nauwa, nyi enga mane marana, mono enga hu tamana, loho na dikina marada kadyo ruta morona. ¹⁰ Ata kedu bana mai duka hege bana kedu, hamate olena, mono halilokona; Nauwa ug maiwa dajalage yida kada dauge morha, mono hadauda majabolawe. ¹¹ Nauwa kama jawa kahada daha; kama jawa kahada daha na yiwe ngahuNa tubada bebena. ¹² Wu ata pahewa, wale ata kama jawak mayi, wale dau jalak manadi bebe rada, etayi serigala ba amidi, nyi natanadi bebe rada mono malaiyi; Serigala rada enga yapa dadi mono hai haidadi bebe rada. ¹³ Nyi malaioro nyi ata pahewayi mono wale na apek mayi bebe rada. ¹⁴ Nauwagna kahada daha jawami. Nauwa ug tadayi bebeGu mono bebeGu tadawa nauwa ¹⁵ tujawe AmaGu bana tadawa Nauwa mono Nauwa bagu tadayi AmaGu; mono Nauwa bagu yiwe ngahuGu tubada bebe rada. ¹⁶ Nauwa dajaladi bebe wadekaGu aika wali ta gallugu inna; Nauwa ug ngidi hoyi yida, mono yida enga range dage liGu; mono yida dadiwe bada hawuna ta wu kajawayi. ¹⁷ Oro yiknai Ama kamanawaraga Nauwa, oro Nauwa ug yiwe ngahuGu dajalage Nauwa dadiwe ngala hagawe. ¹⁸ Lakma wuak ata kangalawe wali tabaraGu, tabolo nauwa dahola kayiwe dokoge hakabu ate dauGu. Nauwa dayo hakkugu tutu yiwe ngahuGu, mono nauwa dumo dayo hakkugu tutu ngala hagawe. Inna yiwe pareha pa hibagu wali taAmagu." ¹⁹ Hadaka piwali, na bahawe kahawuna tajongada Ata Yahudi oro hatakanai Yesus inna. ²⁰ Buta wali tayida kaha newe, "Nyi tamanani wadi japata mono dadi ngade nage. Aha mamu rangeyi Nyi?" ²¹ Wadeka lidage, "Inna wale hanewe ata hatama maknani wadi japata. Dak kawe wadi japata bugeradi mata ata?" Yesus Monoi Ama Wuwe ²² Ta mahigo neda, lado madaka Pentahbisanuyi kadadi ta Yerusalem. Mahigo neda rahi kalikawe, ²³ mono Yesus tamra ta uma Allah, ta Serambi Salomo. ²⁴ Loho, Ata Yahudi kama kaha kilorani Nyi mono lidage tabaraNa, "Pirahoge madi walge Yau bamu pahaini dewama gedo? Nyi yau Kristus, tak lurhawetabrama nami." ²⁵ Yesus balehayi yida, "Nauwa lugu bege tabarami, tabolo mi walem hatenak mami. Haulla harayiGu lar tangara AmaGu, yiwe kayiyo hatakki tutu Nauwa. ²⁶ Tanyiduwe, mi walem hatenak mawe oro mi aim tamami tajonga bebeGu, ²⁷ Tangada bebeGu rangewe liGu, Nauwa ug tadayi yida mono yida dadokuga Nauwa. ²⁸ Nauwag yiwe morha ai kadukana tabarada yida, mono yida wale da lilokokma; mono wale wuhingmana dadi karama gimi miyo wali talimaGu. ²⁹ AmaGu, kayibedi yida tabraGu, rehi madaka hoda wal tatangada, mono wale wuhingmana ata karamadi yida wali ta limanai Ama. ³⁰ Nauwa monoi Ama wuwe." ³¹ Hadaka piwal, ata Yahudi ngala dage watu tukuyi Yesus. ³² Tanyi dawe, Yesus linage tabarada yida, "Nauwa ug hatingo bege tabrami butai haula kadaha wali tai Ama, haula aga dal howe wali tajongami kapahadami mamu tukkuwa nauwa waiga watu?" ³³ Ata Yahudi rada dabalehayi Nyi, "Wale oro wu ha ullak mawe kadaha nami mama tukkuwu Yau, kawukina ata, bamu hadadige tauMu Allah. ' ³⁴ Yesus nabalehayi yida, "Walna matolhakwe lar tajurata Taurat mi, 'Nauwa ug yibewe Ligu, Mi yiknai allah'? ³⁵ Nyi Allah bana takkayi yida kahibawe li inna'allah', doku dage Jurata Biha wale nadadik mawe bana hadukkawe, ³⁶ apa mi um takkiwe tutu Nyi paha tengu benai Ama mono halewa lar tapanu tana, 'Yau um paddayi, ' oro Nauwa luguge tabarami, 'Nauwa Anai Allahwa'? ³⁷ Nyi Nauwa aigu rayi kage haulana AmaGu, ilam hatenaka tabaraGu. ³⁸ Tanyiduwe, Nyi nauwa bagu rayi kage haulla inna, loko aim patenakna tabaraGu, hatenaila rada haulla dajalage mi tadayi mono yapayi inna Nauwa Ama innai ta Nauwa, mono Nauwa innaga tai Ama." ³⁹ Hadaka pige, yida kabage yapayi Yesus, tabolo Nyi na hoila wali tayida. ⁴⁰ Lohoi, Yesus kako nage palani laiwe Yordan aro taha dau Yohanes wunga hariha kina ata ululge mono Yesus engana neda bali. ⁴¹ Buta ata kamai tabaraNa mono linage, "Lokoi Yohanes aina rayiduge wu tada kaheka gaina dumona, tabolo tangadi hataknai Yohanes tutu ata nade natenawe." ⁴² Mono, buta ata kadadi hatena tabaraNa neda bali.