Ata Kamoro Wali Dadina Hataga Hayi ¹ Kole Yesus tamrana kako, Nyi naetayi ata moro wali dadina, ² Ana hakodonai Yesus dakanukawe tabraNa, "Guru, Iyayi kajala, ata nade waleka ata katuna nyi dajalage nyi maha dadi moroni?" ³ Yesus na bale hayi, "Wale nyikma loho dumo wale ata tukmana kajala, tabolo dajalage haulanai Allah kana dedowe neda lar ta nyi. ⁴ Yita da ula gahoge ha ulana Nyi kaha lewawa Nauwa bana lado hoge; gaddi enga amige wale lakma wuak ata ka dadi ulana. ⁵ nauwa ba enga hogu ta panu tana, Nauwag na magakaha panu tana." ⁶ Bana be ha tak kiwe katauda dana, Yesus nata rumi ta tana mono naha kilage we tarumiNa ha yongage tana, loho na oja nage tamatana ata nada, ⁷ mono nahanewe tabrana, "Kakowu, hamuraha wikimu taha dau hariha Siloam." Siloam ngara hekage "Paha lewa". Nyiwe ata nada nakako. hamuraha wikina mono nyi nahagga waina eta. ⁸ Ole bara umana mono yida ka etayi nyi ba wuyi ata moro lidage, "Wale yikakna nade ata ka damma ngodo momo kataguge karaiyi? ⁹ Wadeka ata lidage, "Ngo, Nyikna kataguge karaiyi nada." Rada wadeka lidage, "walekma, nyi tuja nani natu kataguge karai nada." Tabolo, ata ina hona moro nada linage, "Nauwagana ge kataguge karai." ¹⁰ Loho, ata rada da kanuka tabarana, "Aga lina dawe matamu mana tagahayi?" ¹¹ Ata nada na balehawe, "Ata kangaranai Yesus nada naha kilage tana mono na oragage ta matagu. Bege. Nyi linaga tabaragu, 'Kakowu ta Siloam mono hamuraha ge ngihimu, 'nyiwe nauwa ug kakowa mono hamuraha ge ngihigu, mono nauwa dadiwe eta." ¹² Yida lidage tabrana, "Gini ata nada?" nyi na balehawe, "Nauwa wale gu tadak mayi. '' ¹³ Bege, yida dangidiyi ata ina hona kamoro tabra ata Farisi. ¹⁴ Nada lado kole Yesus hakilage tana mono mabugerayi matana ata nada lado rahi naghuyi. ¹⁵ Nyiwe, ata Farisi hadakka pige da kanukayi tabarana ata nada aga lina dawe bana dadi eta. Nyi linage tabrada yida, "Nyi kaora gadi tana hakila tamatagu, mono nauwa hamurahage taugu mono nauwa dadiwe eta hagga. '' ¹⁶ Oro bataudage inna, kapira ata Farisi rad da hanewe, "Ata nade wale kawalik mayi tai Allah oro nyi aina himoyi Lado ngahu." Wadeka lidage, "Ta nyiduwe, aga linak kawe ata doku dadiwe rayige tada kahaheka hadana katauna inne?" Yiwe, dadi nage bahawe tajongada yida. ¹⁷ Nyiwe, yida hagal dage kanukayi ata moro nada, "Aga linawe paha ngaduamu tubana Nyi oro Nyi kabugera begudi matamu?" Ata nada na balehawe, Nyi yikna wu Nabi." ¹⁸ Ata Yahudi rada engage aida hatena tabrana, nada ata inna na na moro takka tabolo batauge dadiwe bana eta, tomage yida bada kamaikani amana wali nada ata ka eta hagga, ¹⁹ mono dakanukayi tabarada yida, "Apa nade anamuni, ha takkimu moro wali dadina? Batau dage, aga lina dawe nyi batauge dadiwe bana eta hagga?" ²⁰ Amana balehayi yida mono linage, "Nami ma tadayi nyi ba ana mani nami mono bana moro wali bana dadi, ²¹ tabolo ba agalina dawe batauge nyi mana eta haga, nami wale ma tadak mawe; waleka ba iyayi kabugera nadi matana nami walema tadak mayi. Kanuka daukayi tabarana, nyi na matube; nyi naha newege tau dauna." ²² Ata tuna da tak tauda dage oro yida bad madauta tabarada ata Yahudi. Oro, ata Yahudi rada hawubena takki, rada ata ka mangakuni Yesus bai Kristus, enga laini wali ta Sinagoge. ²³ Nyi dawe oroge amana lidage, "Nyi na matube kanuka dau kayi tabrana." ²⁴ Nyiwe, hadu wuda wai ata Yahudi da kamai kani ata kamoroho nada, mono lidage tabrana, "Yikani manadana tubai Allah, kama tadawe ata nade bana doku." ²⁵ Nyi nabaleha, "Apa ata nada ata jalayi ba waleka, nauwa walegu tadak mawe:wu hewe ha tadagu, aig moro howa, tabolo batauge ug etabewa." ²⁶ Yida daha newe tabrana, "Agawe Nyi harayina tabaramu? Agalina dawe Nyi bana bugera guni matamu?" ²⁷ Nyi na balehay yida, "Nauwa ug tak bemige tabarami, tabolo mi walem auma rangewe; ahal ho mamu kabu atelge range walwe? Apa mi kabu atege dadi ana hakodoNa?" ²⁸ Nyiwe, yida daha hameloni nyi mono lidage, "Yau na ana hakodoNa ata nada, tabolo nami ana hakodo nagamai Musa. ²⁹ Ma tadawe nai Allah naha hanewe tabrai Musa, tabolo tutu ata nada, nami walma tadak mayi ba gi Nyi dau walina!" ³⁰ Ata nada baleha mono linage tabrada yida, "Tau taka nage nggedewe inna mi aim tadayi gi dau walina Nyi, doku dage Nyi nabugera begadi matagu. ³¹ Yita tadawe nai Allah wale narangek mayi ata jala, tabolo iya haing kayi kama madautani Allah mono rayi nage hakabu ateNa, Allah narangeyi nyi. ³² Wali uluge kaha batauge, wale kal rangek mawe nada wu ata bugera nadi mata ata kamoro walidadina. ³³ Nyi ata nada ai na wali ka tai Allah, Nyi wale lakma harayi ana." ³⁴ Ata Yahudi rada da baleha mono lidage tabarana, "Mi dadi waina kabanuna jala, mono mi bai bamu guruma nami?" Nyiwe, yida da wugayi ata nada. ³⁵ Yesus rangewe ata Yahudi da wugayi ata moro nada; kole Yesus hataboka dangani nyi, Yesus linage, "Apa Yau hatena tabarana anana kadadi ata?" ³⁶ Ata nada na balehawe, "Iyayi Nyi nada, Mori, dajalage nauwa kagu hatenawa tabaraNa?" ³⁷ Yesus linage tabarana, "Yau um eta beyi Nyi. Nyi nyikna kaha newe dangagu batauge." ³⁸ Ata nada na balehawe, "Mori, nauwag hatenayi!" Bege, nyi nakawojo ta aroNa. ³⁹ Yesus linage, "Tutu yige rakage Nauwag maiwa tapanu tana inne dajalage yida ai eta, dadiwe bada eta mono yida kaeta, kada dadi moro." ⁴⁰ Kapirana ata Farisi kadana tabaraNa rangewe ina hada, mono linage tabraNa, "Apa nami dumo moro?" ⁴¹ Yesus linage tabarada yida, "Nyi mi bamu moro kam, mi walem dau mage jala;tabolo oro mi balimige, "Nami maeta, 'jalam engage badage."