¹ Oronage inno, maida yitta ijakage kapuge hanuwa tutunai Kristus monno nyanga tabara matuyo, kaillada wunga-wungage inna puge hanuwa tutuge bajarra walta harayi kamate monno hatena tabaranai Allah; ² hanuwa tutu hamurrahanna monno pajolanna limma, hanuwa tutu kade ata mate monno hokuna aika hadukka. ³ Monno, enga nyiwelah inna yitta harayida, nai Allah banna yika'kada mahiggo. ⁴ Oroge, enga nyidawe aikahil dadi ba'ha jarra haggai rade ata inna ulluge kaba'da kole magakaha, kabadda paddage inna kanagga surgawi, kabadda kole taguna olen Ngahu Katengna, ⁵ kapaddabegge dahhage linai Allah, monno karahawe bibta hareha walta pannutana nim ka amna. ⁶ Inna yidda badda ijjakan laranai Kristus, enga nyitakka dahingwe aia dadi badda haberu haggawe inna jarrada yidda oronage yidda dakka dailo haggan Ana Allah haduyo wudda wai monno nadedo badda hamakkeiyi. ⁷ Oroge, inna tana kabuta kabihka we urra kamonu wal dete, lohho nangihiwe bahailanna hayayo kama manggauna tiba yidda kaullagge, enga hiba nage kanyurru waltai Allah. ⁸ Tanyiduwe, nyi inna tana banna hatumkanna tara monno tangnga ngara ruta, nyi inna tana walle lada'kma gauge monno dahenage bakatukkuge, monno lodoge batunwe. ⁹ Tabollo nyige, ngara dukkam olebagu hamanawaragu, langaba taudahingkamma inna nami bamma takkiwe, nami mamannedi tangnga ngara hada karehina hadahha tuttum miyo, radde hada-hada kahaduwu inne tahoila. ¹⁰ Oroge, Allah walle oro aima tiba da'kmanage. Nyi walle nadangngamadi tangad haulla monno manawaramu inna hatingngom miyo tubage ngara-Na waige bamhanukkuyi rade ata katengna kataudana kaengana miyo harayimi. ¹¹ Nami kama'kge miyo dihha-dihha bamhatingngoge inna mappaha kahamera tutge dauge mamanne inna kabannuna kahha babewe, ¹² tannam miyo kaillana dadiwe bam mayauwu, tabollo dokudadi tujja radde ata kabadda daudi ja'ji-kira nai Allah ledege hatena monnomikku. ¹³ Kolei Allah banna jajiwe tabarai Abraham, Nyi najajiwe tubage tapan tawu dawu-Naoronage walhillada'kma karehi madakka walta tabara-Na. ¹⁴ Allah hanewe, "Nauwa engag hanyurruwu," monno, "Nauwa engag hauwarraguddi wallawumu." ¹⁵ Monno, Abraham banna yanne waige maloya, nahibbawe inna jaji. ¹⁶ Kadadi ata banna hauraka tubana wuyomata karehina madakka walta tuba tawu dawuna, monno haurana nayiwe tutuge hadidarawe tubage kanna ngahuwe tangngage kamma kaura. ¹⁷ Nyidawe, nyi nai Allah banna kabkagge hatingngoge inne karehi mamanne tabara kadautakkage inna jaji-Na monno inna hangadan-Na aika mawungnga, Nyi nakatge waige banna rayige haura ¹⁸ tannam waidi rade duda katakku aika mawungnga, inna nyinai Allah engawallena dadi dahingmawe banna kawohhoka, yitta kamai mayeganna hadau mawo da kolege ha ru kamma dakka tubage banarro jurtana tamma manne inna hayibe tabada yitta. ¹⁹ Inna mamanne hakoleda yitta nyi'kwe watu tanaga tuba urrada yitta, kulha monno tetakkage, inna katama lebba langnga kahha dikki tabal tirai, ²⁰ tahadau beha tama bennai Yesus kabuggeranni lara tubada yitta tutuge dadi Rato Madakka kahha walmurri-walmurri, dokuge inna haunnana Melkisedek.