¹ "Ilam ngidi kawu liyo paleka.Ilam woro danagni ata bokala waige bamu dadi ata paleka tubana. ² Ilam doku kana rayige kajapata oro buta ata karayigela.Nyi mi bamu dadi ata dede danga nage lari ta wuma makaha,ilam doku kadi ata buta kaha balgukna hanewe katena, ³ mono ilam dau gabami ta pala karana ata milla. ⁴ Nyi mi bamu etayi wu hapi waleka keledai kajalora,pahaga kinani ta morna,langka nada morna ba muhkamuni. ⁵ Nyi mi bamu etayi wu keledai ai kadadi kako oro alpu biktadi ngidina,bana ngahu mono tulkini ranga nada haburu nadi ngidina.Tulluni ranga nada langka ranga nani ata kabutugu ate. ⁶ Ta umma tijana,ilam habali guk kadi katena loko nada ata ka ngidwe ta uma tijana inna kadadi ba ata milla duyi. ⁷ Hamatara kigela dajalage mi ilam hadau dalge hada kajala.Ilam pahai kadi ata ai kajala baha mate daliyi ba wuwe hokna ta tangage harayina.Oro,Nauwawaleg pahal lak mayi ata karayige hada inna. ⁸ Ilam hibawu hogop.Oro, hogop na dadiwe hamoro midi matana ata katijana mono dadiwe banna pahadayi ata kadaha bana paleka. ⁹ Ilam pija kayi ata lipalaka.Mi enga tada mige tada mige aga lina dawe hadage dadi ata li palaka oro ul hoge mi ata lipalakam ta Mesir." LADO MADAKKA PALI HIKKE ¹⁰ " Ka anni dauna mi um habarana winni mono um mangatti ngihidi. ¹¹ Tabolo,ta dau ha pitu wai,mi um nyama dahodi omami.Ilam tadona aga hingkayi ta omami.Nyi ba daka gandum ka tummu neda bali,pahaidi ata milla kana daudi.Nyi badaka karehi,pahaidi kana yadi ranga utta.Um rayi gela hada kaha tuja taoma anggurumu mono pu Zaitunumu. ¹² Um ula kina la ka anni ladona,tabolo lado kapituna,ngahu kimila! Nyiwe,atamu mono kaulla dangagu wadeka da ngahu jala.Hapi manemi mono keledaiyimi dajala mahigo bada ngahu. ¹³ Tada pahira kigela mi bamu dokudi tangadi ukku pareha rade.Ilam tak kayi ngara allah paleka.Loho dumo,ilam pahai kage barangewe wali ta bamu! ¹⁴ Lar kadiha dauna,mi um hadal wuda dahona raya rame tutuGu. ¹⁵ Raya rame kadihana yikna lado madaka kababa kabba.Inne katauna paha rehagugu tabaramu.Kapitu ladona miyom yada homi kababa ka kabba,dokuge rahi pa didara beda lar ta wulla Abib.Oro,ta wulla inna mi um huna wali ta Mesir.Tangada ata da ngidi daho maraka tabaraGu ta raya rame inna. ¹⁶ Lado madaka ha duda wai lado madaka mangatti.Lado madaka nada ba raya rameni ba dikige rahi mangati kawungana wali ta winni hatadomi ta omami.Lado madaka hatauda wai yikna lado lado madaka umma royo,ba dikige haduka dau ba kole miyo bamu kahayi karehi gandummu. ¹⁷ Nyiwe,hadal wudana diha dau tanagada kabani da mai daho ta aroi Mori,Allah. ¹⁸ Inna mi bammi ropo ranga mono maraka ge rana ba wuyi maraka,illa na diki kawe rayo maraka rada hakage waidi ai kamahna.Mono,inna mi bamu tunkai habana wali tamaraka tubaGu,ilam pahai kadi rada bana rehiyi kaha damage. ¹⁹ Ngidi ngihi paullam kawungamamu kaha hada daha ta umma Mori,Allahmu. Ilam hadede ka anaka kameme lar ta huhu inyana." ALLAH NA TULLUDI ISRAEL NGALA DADI TANADA ²⁰ "Nauwa ug hangidini malaikat ta aromu kana hamawo gimi talara mono kana hatutu gimi taha dau paha gana begumi tubami. ²¹ Hamatara kige taumu ta aro malaikat nada mono dokuni nyi.Ilam gabani oro nyi walena hawalik mamidi jalam mi harayi bemi.Oro,bikta parehaGu dage tabarana. ²² Myi mi bamu range takakwe hanewe mono rayidi tangadi hatak begu tabaramu,Nauwa ug dadi muhuwa tubada tangada muhumu.Nauwa enga gabagudi tangada ata kagaba gimi. ²³ "MalaikatuGu na kaodo gimi ta ata Amori,Het,Feris,Kanaan,Hewi,mono Yebus.Ta nyiduwe,Nauwa enga habakke gudi yida tangada. ²⁴ Ilam kawojodi marapuda yida.Ilam kal kawojo hingkadi marapuda rada.Ilam doku kadi hada morhada yida.Pudahadi marapuda yida mono ha mauhadadi watu dau barada yida. ²⁵ Hanukku dayi Mori,Allahmi.Nyiwe,Nyi enga naha maringi midi hayami mono ha enumi.Mono,Nyi enga naha marau nagaimi tanagami wali ta kapore tajongami. ²⁶ Enga wale lakma lawai la ta jongami ka woto.Wale lakma lakawa bila kamate kole bana dadi.Mono,Nauwa enga yigimi morha kamalau tabarami. ²⁷ Nyi mi bamu hatau kami gabadi muhumi,Nauwa enga hangidi gimiGe kawahaGu ullu gimi.Nauwa ug tullu gimi habakkeyi tangada muhumi.Ata kagaba gimi enga gibokadi katakkuda lar baha hatau mono da malai. ²⁸ Nauwa enga lewa gudi tawuyo ta aromi.Tawuyo rada enga karuhhu dadi muhu tana gimi.Ata Hewi,Kanaan,mono het enga tana dagimige hadaumi. ²⁹ Tabolo,Nauwa enga wale karuhhu mayi yida huna wali taha daumi ka diha dauna.Nyi bagu karuhhu kayi yida geha huna,hadu inna enga lakma ngihige mono ranga yadda enga matabadi.Ranag rada enga rehi ha oja dagimi. ³⁰ Nyiwe,Nauwa enga karuhhu gudi yida huna wali tahadu inna ho hodik,kaha miyo bamu kiki butami mono kalubuge hadau neda. ³¹ Nauwa enga hainya kaguge watte hadaumi wali ta banu Malli kaha laiwe Efrat,mono wali tamarada gilra Sinai kaha laiwe Efrat.Nauwa enga rayi gimige mi bamu habakkeyi ata kaengana neda bali mono karuhhuyi yida tangada kako. ³² Ilam rayi kana katukku ta iya hingkana wali ta yida waleka waidi marapuda yida. ³³ Ilam pahaikadi yida engana taha daumi.Nyi mi bamu pahai kadi engana neda bali,yida enga da dadi hirra tubami-yida enga darayi gimige mi bamu jala tabaraGu.Mono,mi enga kapumige kangak kadadi marapuda yida."