¹ Bewalge,i Mori linage tai Musa, ² "Palehikke gadi tubaGu tangadi ana bodi.Tangadi kadadi ullu wali ta ta leku ana Israel,wali kaddi ata waleka dumo wali ta ranga,yida padauGu." ³ Musa linage tabara ana huhuna,"Apewe lado nehe,lado kole mi huna wali ta Mesir,ta umma dau ha ta wikimi. Oro,waige kawahaGu kama dakka,Mori na ngidi bemi huna wali taha dau inne.Ilam yakami kababa aika kabba. ⁴ Lado nehe,ta wulla abib,mi um tanage Mesir. ⁵ Tabara weda waikami,Mori na yibewe jajina bana yigimi tana ata Kanaan,Het,Amori,Hewi,mono Yebus,haluguna tana kamajabola we huhu mono kanena.Nyi nimila mori bana ngidimi taha dau neda,mi um raya rame dahoni lado nade ta wulla Abib. ⁶ Kapitu ladona yami kababa ka kabba.Ta lado kapituna,enga rayige ha ulla madaka tubai Mori. ⁷ Ka pitu ladona yami kababa ka kabba.Ila daka kababa kamagallo ta jongami. Ila daka hamagalo waidi langka gihing kana ta hadaumu. ⁸ Ta lado inna,tak dage anamu,'Yita darayige raya rame innaoronai Mori kakodoga nauwa huna wali ta Mesir.' ⁹ Katujana tada ta limami mono ha ape ta kobu matami,tauda dage raya rame inna enga tulluna gimi apewe rada ukku pareha nai Mori dadi lar ta bamu. Oro,waige kawahaNa kama dakka Mori na kodo begimi huna wali ta Mesir. ¹⁰ Oro bataudage inna,apeyila lado madakka nada dokuge rahi paha didara bena. ¹¹ Mori enga kodo nagimi yaha dau pajaji beNa tutu hayinagimi tabarami.Ata kanaan ka engana neda bali batauge. Taboloi Allah na jaji bewe ta weda waikami inna Nyi enga yinage hadau inna tabarami.Kolei Allah bana yigimi ge hadau inna tabarami, ¹² mi hali hike hoge tubaNa tangadi ana bodi.Tangadi ana bodi manena wali ta ranga harawami yidakna hadaunai Mori. ¹³ Tangadi aana bodi keledai ha kahka wai dahoyi waini wu bebe.Nyi mi aim auka kahkayi,mi um kipdaho nani ri kokana ana bodi keledai nada.Ta nyiduwe,tangadi ana bodi ata wali ta jongami um kahka dahoyi. ¹⁴ Nimi lado murige la,nyi anami bada kanukawe, "Aha mada rayige inna? limige tabarada yida, 'Waige kawahaNa kama dakka,Morda na kodo beda yitta huna wali ta Mesir,wali ta umma hadau ha ta wikida,ta hadau inne. ¹⁵ Oro,inna honana Firaun katu katakna mono walna auma pahaigama nami kako.Nyiwe,Mori naha mateyi tangada ana bodi ta tangage Mesir,ba ana bodi kadadi atayi lohi dumo ranga.Oro bataudage inna,nauwa ug marakayi loho dumo tangadi ana bodi manena ranga tabarai Mori, tabolo nauwa ug kahkayi tangadi lakwa kabani ana bodigu wali ta Nyi.' ¹⁶ Hada inna wu dahowe tada ta limami mono tadka ta kobu matami.Oro,waige kawahaNa kama dakka,Mori na kodo beda yitta huna wali ta Mesir." LARA KAKO HUNA WALI TA MESIR ¹⁷ Kolei Fitaun bana pahaidi ata Israel tanage Mesir,i Allah wali na irruk mayi ata rada lida ta Filistin,loko hadau inna dahekawe.Oro,Allah linage,"Nyi yida kako balikani lara nada,yida dadiwe bana hajeluge paha ngadada mono hagga ta Mesir bada etawe hatuyo." ¹⁸ Nyiwe,Mori na irruyi yida ta lara heka,lara kalida ta marada gilra aroda ta bannu Malli.Ata Israel na tau kalabe hatau kole yida bada ija kage Mesir. YUSUF NA HAGGA ¹⁹ Musa na ngidi nadi rinai Yusuf.Oro aina matehoi Yusuf,nyi naka raimawe ta anana Israel bada jajiwe tutu rayige inna tubana. Yusuf linage, "Nyi Allah bana pahoilami,namuwela um ngidi maranga jala gadi rigu bamu huna wali ta Mesir." MORI NA IRRUYI ANA HUHUNA ²⁰ Ata Israel tanage Sukot mono da dau ta Etam,ka neda dana dahekawe marada gilra. ²¹ I mori naha tingoni lara tubada yida.Bana ladoge,Nyi na waidi hariyo karaba ban irruyi yida mono bana gakkage,Nyi naha tingodi lara waidi hariyo latti,Latti inna naha magakahadi yida dajalage yida dumo dadiwe bada kako ban gadige. ²² Hari karaba na ole dudumodi yida bana ladoge,mono hari latti bana gadige.