¹ Kolei Musa monoi Harun badadi ta Mesir,Mori naha newe tabarada yida,linaGe, ² "Wulla nade enga dadi wulla kawunga nani lat ta dawu pa lai mu. ³ Tak dage ta tangada ana huhuGu Israel:Ta lado kabulna wulla nade,tangada kabani da ngala dahho wu ana bebe tutu ole ta umana kadana ta umana. ⁴ Nyi inna ta batu umma tanga kahada ba hodi kaki tutu ba yani wu ana bebe,yida da kamai kadohana ole bara ummada kadaheka tutu kada yayo oler danga dani kahila ana bebe nada.Ana bebe nada baha baweni dokudi butada ata kayayo. ⁵ Ana bebemu mane dahona ka diha dauna dadina,mono ai ka otora takka daho.Rangada langka bebe bodi kayi waleka kameme bodi. ⁶ Miyo um hamatara dahoni dajalage ta lado ha kabulu pata wai wulla nade.Ta lado neda,tangada ata Israel da ropo daho ranga mamaliki. ⁷ Kahayi rayo ranga rada mono um obaradi kadudana bai bina mono ta bai bina kadau dete ta tangadi umma tas hadau da yida bada yayo kahilla rada. ⁸ "Ta gaddi inna la,tunuyi ana bebe mono yakahadi kahilana.Ya wai jalani ruba kapadu mono kababa ka kabba. ⁹ Ilam yakadi kahilana kamakata waleka hati yabla ta weyo.Tunuyi ana bebe nada ta panu latti.Ana bebe nada enga dahoge ai da kabungadi wali ta ka takkuna,leduna,mono tabara larna. ¹⁰ Ya kahadi kahila rada bana gadige.Nyi badakaho karehi wali ta kahila rada kaha kokoka,tunuyi rada. ¹¹ Nyi mi bamu yaka kahila,um taudahomi kalabe mono ha inyakami tutu bamu kako.Waina kopa ledu ta ledumi mono takko ta limami.Gehami yayo oro inna nyiwe Paskah nai Mori. ¹² "Gaddi inna,Nauwa enga li palakaGu ta tangage Mesir mono hamateyi tangada ana bodi kadadi ata mono ana bodi kadadi ranga ta Mesir.Waige hada katau dana,Naauwa enga hoku gudi tangada marapu ta Mesir mono bagu hatingoge inna Nauwa bai Moriwa. ¹³ Ta nyiduwe,rayo inna ta ummamu wuwe tada kahekana.Inna Nauwa bagu hokuge tana Mesir,Nauwa ug layi mige ummami mono walegu hokuk mami Bagu etawe rayo inna. ¹⁴ "Mi um ape dahowe gadi inna mono raya rame dahoni ba wuyi lado madaka tubanai Mori ana murri-ana murri. Mi um karawa dahowe inna loho padidara dahowe kaha ana Murri. ¹⁵ Ta lado madaka nada,mi um yada homi kababa kabba ka pitu ladona.Ta ladoa kawungana miyo um lai dahodi tangadia ha wudi dangadi kababa awali ta umamu. Oro,nyi badaka ata kayayo kadana ha yayo ha wudu dangadia kababa,ata rada daha watte dahona wali ta Israel wadeka. ¹⁶ Mi um rayi dahoge makaha tenguna ta lado kawungana mono ta lado hadukka wai ta lado madakka inna.Ilam ulana ta lado inna. weu hewe hada ka dadi parayimi pa iyaka ha yayo tubami. ¹⁷ Mi um namu dahoyi lado madakka kababa ka kabba oro lado inna Nauwa ug kodo ngidimi tangami huna wali ta Mesir.Oro bataudage inna,mi um ape dahoyi kaha ana murri,ba wuwe paha didara aika dukka. ¹⁸ Wali ba kabulu pata ladona kaha dikki ba duda kabulu dihha ladona wulla kawungana,mi um yada homi kababa aika mahna. ¹⁹ Ka pitu ladona illa daka hawudu dangadi kababa ta ummamu.Nyi wu ata yaka hayayo kamahna ta lado inna,ba ta israel luyi waleka ata li palaka kadau tudu ta jongami,nyi pahu nahoyi wali ta ma ubla ta Israel. ²⁰ Mi ilam yaka hayayo ka mahna.Yadami kababa aika mahna langka gika bamu engana." ²¹ Bewalge,Musa naka maikadi tangada bai ata Israel mono lidage tabarada yida,"Mayegana ana bebe tuba ole ta umamu mono kamu ropoyi ana bebe nada tuba Paskah. ²² Ngalawu duhka mono yaklani lari ta ta tabo kahita kangihina rayo.Orage rayo inna ta bai binami kadau dete mono kadudana hariyo binami.Illa dahingkana wu ak ata katanage umamana kaha kokoka. ²³ Oroi,Mori enga na li kahawe Mesir bana hokudi ata Mesir.Nyiwe Mori bana etawe rayo ta bai bina,Nyi enga nalelege umami inna mono walena pahai mani kahamate nada ban tama mige umami mono bana ham yillami. ²⁴ Mi um namu dahowe hada inna bah didara bewe tubami mono tubada ana huhumi kaha ana murri. ²⁵ Inna bamu tamage hadu ha yinagimi Mori tabarami,katauna pajajina Gimi,mi um ape dahowe ha ulla inna. ²⁶ Nimi anami bada kanukawe tabarami,'Aha yitta mada rayi hoge ha ulla inna?' ²⁷ limi dage,'Ha ulla inna wuwe maraka Paskah tubanai Mori.Oro kolei Mori bana hokudi ata Mesir,Nyi na layiyi umma ata Israel.Nyi naha mateyi ana bodida ata Mesir, tabolo yitta na yammada morha."' Loho,yida da kawojo mono manutayi mori. ²⁸ Bewalge,Ata Israel kako mono rayige tangage pareha rada,dokuge kataunai mori paha rehana tabarai Musa monoi Harun. ²⁹ Ba tillu gadi hewege,Mori nahamateyi tangadi ana bodi ta Mesir,wali ta ana bodi Firaun,kaha rehawe Mesir,kahha ana bodi ata pa pattu kadana lari ta gallu;gaudi ana bodi ranga dumo mateyi. ³⁰ Ta gadi inna,wuyo ata mate ta tangadi umma ta Mesir.Firaun,tangada ole ullana, mono tangada ata Mesir kapuge kalallu mono hoyo kama wangta. ISRAEL TANAGE MESIR ³¹ Ta gak mema inna dumo,Firaun naka maikani Musa monoi Harun.Nyi linage tabarada yida,"Kademi mono tana gadi ana kaha rehagu.Mi mono atami kam kakomi mono kawojom Mori katauna miyo hatakkimi. ³² Ngidi jalayi rangami katauna hakabu atemi.Kakom! Mono,hamaring jala kiwa dugu." ³³ Ata Mesir dumo karuhhuyi ata Israel tanadi yida.Yida linage,"Nyi mi aim kakomi,mi tangama enga matema!" ³⁴ Ata Israel wale lakma mahiggo bada tauyi ha wudu waidi kababa lari ta hapakilabe kababada yida. Yida dakaboro hege hakila beda rada waidi kaba mono da ngidyi tapanu baleda yida. ³⁵ Loho,Ata Israel dumu rayidi tangadi paharehada tai Musa.Yida da karai kalabe mono ngawu parayi wali ta amaha kaka mono amaha rara ta bara ata Mesir. ³⁶ Mono,Mori narayidi ata Mesir malewara ate tabara ata Israel.Tauda dage ata Israel bada kareboyi ata Mesir. ³⁷ Ata Israel da kako wali ta Rameses aro ta Sukot.Tangada yida bataudi katutu anni ngahu ratayi ata,wale yapu gau mahodi lakawa. ³⁸ Dadi katau kalana butana ata ai ka ata Israel ka kao oledi yida,buata jalayi bebe,hapi,mono ranga wadeka. ³⁹ Yida da darana kababa wali paha kilabe aiha magalo pangidida yida wali ta Mesir.Yida wale lakma mahiggo taudi hawudu dangadi kababa waleka paha inyakada hayayo tutu ta lara oro yida bana pahaherawe tutu geha tanage Mesir. ⁴⁰ Ata Israel ka engabena ta Mesir ka pata ngahu tallu kabulu dauna. ⁴¹ Kole pata ngahu tallu kabulu dau,ta lado neda,tangada tentara nai Mori tanage Mesir. ⁴² Gaddi neda nyiwe gadi majawanai Mori tutu kododi yida huna wali ta Mesir.Nyidawe ta gadi inna nahiyi dau,Ata Israel enga raya dage tutu apeweagawe harayi benai Mori ana murri-ana murri. ⁴³ Mori linage tai Musa mono Harun, "Inne nyiwe nautage tutu Paskah: Ata li palaka wale na dadik mawe yayo Paskah. ⁴⁴ Tangada ata pahalewa pa hiyo wai amaha nadadiwe yayo Paskah kole yida baka kabunyiyi. ⁴⁵ Ata lipalaka waleka ata pahewa wale na dadik mawe ya Paskah. ⁴⁶ Kahila Maraka rada um yadahodi ta wuyo umma.Mi ilam ngidi kami kahila rada ta tabali umma. Dumo,ilam pata dadi tangadi rida. ⁴⁷ Tangada ta Israel da rayi dahoge ha ulla inna. ⁴⁸ Nyi ata li palakayi ka engana ta jongami kabu atege dokuge Paskah Mori,nyi ha kabunyi dahoyi.Ub na dadiwe dokuna lari taha Kulla katujana ata Israel wadeka.Ta nyiduwe,wu ata aiha kabunyi ilna yaka kahila Paskah. ⁴⁹ Nauta kaha mera na dadi jalawe tuba tangana ata.Langka yida ata kada memana wale dumoka ata li palaka ka engana ta jongami." ⁵⁰ Tangada ata Israel da dokuge pareha inna ha yinai Mori ledeni Musa mono Harun. ⁵¹ Ta lado neda dumo,Mori na kododi ata Israel wali ta Mesir.Yida da kako kalibona dokuge kabihu diha-diha.