¹ Oroge inna, ba ole bai atada mono ka eta waige mata mayillanai Kristus, mono dumo ba ata dukuge ngalawe daumi lari ta manadana nimi paha dedala, nauwa ug dullami bai ata ka dana ta jongami: ² Jawaila bebbenai Allah ka dana tabrami! Illa oro karuhhu kawe, tabolo wali ate, katauna Allah hakabu atena; Ilam rayi kage oro ba dayo ha utumu aika dahha, tabolo oro ha inyakage atemu. ³ Oro bana tutuwe ma higgo ta lado morhamu ulluge kapiku rayige kadamma ata ai katadayi Allah; morha ta hada dadi ata, kalango enu, rayi ulla majobera, duka lawe enu, mono kangak kana hala hatau kabanuna akta. ⁴ Batauge, yidda hadda hangatara kole mi ba dikki gimi inna mige aim dokuge lari kama yarha uttana yidda harayida. ⁵ Oro bataudage, yidda da yidaho tagu baleha tabarana Nyi ka yige rakkage ata kamorha mono kamate. ⁶ Tutu kappe innela,lina ba talarage tabarada ata batauge kamatebe lokko yidda kole begge rakkage ta panu tana inne dukuge hada kadadi ata, tabolo yidda morha dokuni waddi dokuge hadai Allah. Waige Kanyurrumu Tutu Hanukkuwe ⁷ Kapodige tangage dageta nage. Oroge inna, yapugela mono jaga wikimila dajalage mi kam sembayangna. ⁸ Ta panuge tangage inna, hakitage hamanawara wikimi katau takkana oro buta layi jala hatonina. ⁹ Hatingoge ramemu diha-diha illa dakage lujamu. ¹⁰ Oro tangana ata kahibawe kanyurru,waige innala bamu hanukku wikkimi ba miyo kaha nukku kadahha ta tangadi kanyurru wali tai Allah: ¹¹ iyayi kaha newe, kana haneweda ba wuyi ata kaha dikkige linai Allah; mono iyayi kaha nukku, pahaini kana hanukku waige kulahana nyi wali tai Allah yiwe dajalage lari ta tangage hada, Allah kaha manadayi ledeni Yesus Kristus. Tubana Nyila manadana mono bikta pareha kaha ana murri. Amin. MAYILLA BA ATA KADOKUNI KRISTUS ¹² Bagu ole bai gimi hamana waragu, Ilam kadada kami waige latti kama kaba kamai kirra hami miyo, ba mera wuwe kaha yadda tabarami. ¹³ Tabolo, laga hara dami oro mi bamu dokuge lari tama yillanai Kristus dajalage mi dummo dadiwe lagahara mono ege ate ta mahiggo manadaNa hadelage. ¹⁴ Maringkana mila paha melo oro ngarai Kristus, Oro waddi manadana mono waddi Allah engana ta miyo. ¹⁵ Ta nyiduwe, illa daka ta jongami kama yilla ba ata kaha mateyi ata,ka kedu, karayina japata, waleka ba ata katagu ha nyongage urha ata wadeka. ¹⁶ Ta nyiduwe, iya dahingkayi kama yilla ba ata migguyi, ilna makkeka, ta nyiduwe ka enga dage nyi daikayi Allah oro taguge hada inna. ¹⁷ Eahi benagege yige rakage baha legewe wali ole bainai Allah. Mono, nyi hokunai Allah ba kapukage ta yitta, aga linawe hadada ata aika manuddu ta Linai Allah? ¹⁸ Nyi ata hatena dau ruruge ba haoilayi, aga lina dawe ata japata mono jala? Amsal 11 : 31 ¹⁹ Oroge inna, yammadi yidda ka mayilla oro hakabu atei Allah, yiyi urrana ta Kadauge hadadige ka mikku, ha gapege rayige ka dahha.