¹ Tauda dummo gela mi ta ole umma kabani, ka ngak kiwu ta lai mu. Oro, inna ta jongada yidda daka ai ka dokuge Liyo, yidda dadiwe tailowe kanogo ole ummana lakma hatakkina, ² oro yidda hadda languwe mono magu hige kanogomi. ³ Inna dahha mu illa wali da kel kage ba lewu bali haddu, tujage wali hadidara hadudage wumu, waina amaha rara, waleka waina kalabe ka bikta hina. ⁴ Gabage, bana moda hewe inna dahhamu ka wali dage lari ta atemu, dahha aika malele, kawali ta waddi ka malujja atena mono kadanna. Inna nyiwe kamangu hina ta matanai Allah. ⁵ Oro, tauda dagela laewai katenguna nutu ulluge, kaha yodana mamannena yidda tai Allah, hadoyiwe tauda yidda; waige bada ka ngakka ta laida. ⁶ Tauda dagei Sara manuddu ta laina, Abraham, mono bana kamai kani 'mori'. Mi anai Sarami n yi mi bamu rayi kage kadahha waige aina kalubu gimi hada kama dauta kole bamu rayige. ⁷ Tauda dummo nage mi, ta kabani laida lawai, morha ole dangani laimu waige paha ngadamu oro yidda ata kalojayi. Hikiyi yidda ba ole ata midi ka dauge lohho hibawe ka nyurru morha daja lage sembayangumu ilna mapade kawe. Mayilla Oro Rayige Katena ⁸ Nyidawe, mi kana hawu dadila paha ngadami, hamanawara wikina, manawara ka ha ole baina, ate kama lujana, mono li bawa ate. ⁹ Ilam tau kage gabage japata ole japatadi, waleka hatola ole hatoladi. Ta nyiduwe, hamaringi wiki dana oro nyiwe gauge mi ba kamai kagimi, daja lage mi kamau dauge ka nyurru. ¹⁰ Oro Jurata bihha linawe, "Iyayi kabige morha, mono etayi lado morhana kadahha, nyi na karawa dahowe lammana wali kajapata, mono ro wina wali taha newe matipu mara jabbu. ¹¹ Nyi dummo naha marau wiki dahoge tauna wali kajapata mono na rayige kadahha. Na mayega dahoge kamoli, mono karuhhu dahowe rotiwe. ¹² Oro, matana Morimi naha mataradi ata katena, mono katiluNa na range dadi sembayangda yidda. Tabolo, mataNa na gabbadi ata karayige japata.” Mazmur 34:13-17 ¹³ Iya kaduyi kabokala waigu nyi yau bamu manuddu kaduwu rayige kadahha? ¹⁴ Tabolo, nyi bamu mayilla kawu tutu katena, nyiwe yau enga hama ringiwu.” Ilam madautawu mono ilam gedowu tabarada yidda kapa hada guge hama yilla dangamu.” ¹⁵ Ta nyiduwe, hatenguyila Kristus ba mori muni lari ta atemu! Ha inyaka hangatanala bamu yige baleha tabara iya hingkayi karaiwe matutra tutu mamanem kadana ta yau, ¹⁶ tabolo rayigela inna waige ate malujja mono hige, lohho dau kigela ate kamurha ka languna daja lage kole mi ba langu lirami, ata katola gimige hada morhami kadahha lari tai Kristus enga da makke. ¹⁷ Oro, rehi naha dahha dahoge mayilla oro rayige kadahha, nyi inna ba habu ate nagei Allah, wali ba mayilla oro ba rayige ka japata. ¹⁸ Oroi Kristus dummo na mayillabe oro jala, hadakkana tutu tangana ata, kamate orona ai katena, daja lage Nyi dadiwe ngidi da yitta tabarai Allah. Hamateyi ta tau atana, tabolo ha morhayi lari ta Waddi. ¹⁹ Lari ta Waddi, Nyi dummo kako mono rayige talarage tabarada waddi tagallu, ²⁰ halinawe yidda ulluge aika manono kolei Allah waige maloya remadi yidda tai Nuh, tamranai Nuh bana hadahhayi tenana. Waini tena nada, hodi hekki, loho podo pata ata hekida ka hoila wali ta we bannu. ²¹ Weyo bannu inna tada nage we ha riha inna batau ge kapa hoilami. Weha riha wali hamuraha dakama nage raiyi wali ta tauda, tabolo wudawe lima raino tabarai Allah tutu ate kamuraha ka langna ledege kaddenai Yesus Kristus, ²² inna Nyi batauge ka pannebe ta surga mono dani tabra kawanai Allah; kole tangada malaikat, kaha reha, mono tanga kadana kawahana ka ngakka tabraNa.