¹ Oroge inna, ba ole bai atada mono ka eta waige mata mayillanai Kristus, mono dumo ba ata dukuge ngalawe daumi lari ta manadana nimi paha dedala, nauwa ug dullami bai ata ka dana ta jongami: ² Jawaila bebbenai Allah ka dana tabrami! Illa oro karuhhu kawe, tabolo wali ate, katauna Allah hakabu atena; ilam rayi kage oro ba dayo ha utumu aika dahha, tabolo oro ha inyakage atemu. ³ Illa dajalaka harayimu ba waige kawahamu tabarada yidda paha tenawu pa tagumu baleha, tabolo dadi dawula tujja tubada yidda. ⁴ Waige bataudage, kole nimmila Kabanningge jawa ammini, mi enga hiba mige kataupa manadana aika ka malele. ⁵ Tauda jala nage dimmi mi, karehi bodi, ka ngak kadila tangada bai atami; mono mi kadadage li bawa ate, dihha-dihha oro: Allah na gabani ata ka baibo, tabolo Nyi na yini kanyurru tabarana ata kali bawa atena. Amsal 3:34 ⁶ Oroge inna, hali bawage taumi ta kabu limma nai Allah kabanuna kawaha. Nyiwe, Nyi enga hama dehta gimi miyo ta rahige. ⁷ Yi kahhawe gela gaggamu tabarai Allah oro Nyi karawami miyo. ⁸ Hamatarage mono ha inya wikimula! Mihhumu, kabalka, na kako ma-mai tujayi singa ka bura, mayegana ha yana kagu kaballoni balinna. ⁹ Gabbanila kabalka! Dede didarami taha tenami oro mi tadawe ta tangage panu tana, ole baimi taha tena da tagu jalage mayilla kalimi. ¹⁰ Mono, kole mi bamu mayilla ta mahiggo tuddu, Allah puge tangage kanyurru kamaika begimi dokuge ngalawe daumi lari tamanadaNa aika dukka lari tai Kristus enga naha tagahami, hakulhami, mono ha kaddemi miyo. ¹¹ Tubana Nyila, kawaha kahha ana murri. Amin! Maringi Hatoni Waiwe ¹² Nauwa ug tolha dubhage jurata tabarami ledeni Silwanus, ha tadagu ba ole bai taha tena ka mikku. Nauwa ug kabu atege yini hayarta mono takkiwe tabarami, oro inna ka nyurru kabanningna wali tai Allah. Dede didarami lari taka nyurru inna. ¹³ Kangote ka dana ta Babilonia, ba ana huhu ha pede jala nadi Allah, padikkige maringina tabarami. Markus, anagu lari tai Kristus, hadikki jala guge maringina tutumu. ¹⁴ Yiwe maringimu dihha-dihha waige hangakha manawara. Moli kama ringina tubana tangana kadana tai Kristus. Amin.