¹ Batongro nene, koleha nedi Riwu rata kama koha mono he iyo daha deke wungo, Maroba Yesus nawalingo bana ha newe labarada heyo anaha kodona karehi ulungo lara, ''La ate-ate kimila la aro ragi tangada toyo Farisi, moneyo kaja doha. Kaja Tijada kapaladi Yahudi ² Tabolo, tanga kohana kama todi engada bugerani mono tanga kohana kabunyi enganaha dedoni . ³ Oronani nene, ahani yomi ha tokimi nola kapogto engada rongoya nola kama gaha mono yomi kapaka mamhamu nola koro engada talarani no deta la tangana na uma dalo. Kabohini Na Maroba Allah ⁴ Yayo gutokiya labaramu, Ta, tangada ole ate-gu abimu kabohi kawula labarada he iyo ka koleha paha mate napola tona,tabolo koleha na poja nene jana kolekmango harayini karehi diko royo wali. ⁵ Ta idoya, yayo enga guha ape guni tutu gara nehoni yomi haka bohimi ; kabohinila labarana Iyo, ha kole paha mateda, naka kawaha jala na betu gimi yomi nola neraka (api jaka boda). Ngo, Inehola ha yomi paka bohimi. ⁶ Bajedoka lima kawurngo burung pipit dama lajadi engada wolungo duyo bola wali? ta idoya, jaha wukma widikma walila tangada kawurngo nene ha bula la arona Maroba Allah(kama wolu kama rayi). ⁷ Lopo widi, yapudi loge laka tokumu ha yapuyi. Abimuka bohi kawu, yomi diko royo wali kamangu wolina Wali bada danga burung pipit.'' Paha apeda tutu bada kabalini Maroba Yesus ⁸ ''Yayo guha newewa labaramu, diha wuyo toyo kama ngakuga yayo la arona toyo heka, jala engada akujalani kadadi toyo la aro tangada malaikat Maroba Allah. ⁹ Tabolo enga, diha toyo kakabaliga yayo la aro toyo heka jala enga daka bali la aroda tangada malaikat Maroba Allah. ¹⁰ Mono, garani katokiya nena diha wuyo ka gobani naka dadi toyo kole daha walini, tabolo garani ka podaya nawadi katengngo enga jada hawalikmani. ¹¹ Kolehe he iyo bada ngodiwu la Sinagoge mono la aroda heyo kapalani mono kawahani, abimmu gelagoga kawu tutu ba anyina yomi bami hapera wumu bajedokaya ahanehoni yomi hatoki, ¹² Tabolo neho nejala nawadi katengngo engadaha nuwagu tutu aha nehoni yomi ha tokimi.'' Liyo wuyo hatuja tutu diha wuyo toyo kapote ¹³ Diha wuyo toyo walila jongada toyo danga nene daha newe labarana Maroba Yesus, ''Guru, hawede gadila ole begu tutu bada baweyi warisan hadagugu.'' ¹⁴ Tabolo enga, Maroba Yesus naha newe labarana, ''Ole beyo, bagara kakeketawa yayo kadadi hakim bajedoka laha duna gimi nola yomi?'' ¹⁵ Mowalka, Maroba Yesus naha newe labarada he iyo, ''Jaga-jagawula mono hamatarangola tanga ngara hada butu ate oro morha didiha toyo kaja habemu nebada dangayi hapoteda neha iyo hadaguda.'' ¹⁶ Moka, Maroba Yesus natokiya diha wuyo liha tuja labarada he iyo, ''Neni natana hadaguna diha wuyo toyo ka hoda pote kadadi kadanga hija kadadi rahi pone hamuyo. ¹⁷ Moka, nena toyo naha ngadani la atena, 'Aha nehoni harayigu oronani yayo janekmango ha doyo wali tutu hadoyo bojoloyi heyo kadadi pone hamuyo?' ¹⁸ Mono, iyo naha newe, 'Idokala enga iyo harayigu. Yayo enga guhegaradi tangadi lepetagu mono guha kodewa karehi bokolo. la nono, yayo engagu bojoloyi tangada gandum mono tangada hawagu. ¹⁹ Moka, yayo guha newewa labara lolongahugu, 'Ta, lolongahugu yoyo nengo kadanga hawayo hadoyo bojolo tutu kapira dongo; kamu ngahuwula, hamuyo, ha inu, mono kamu ege atewula!' ²⁰ Ta, idoya, Maroba Allah naha newe labarada nena toyo, 'Ta, toyo kabonga! Hudo yiyo jala, Nalolo ngahumu engada dekeguni walila labaramu. moka, bagaraka engaka dagudi tangada ngawu habojolo nene?' ²¹ Henakala ka enga kadadi nela toyo kabojolo hapotena tutu dagu hadaguna, tabolo jana potekma la arona Maroba Allah.'' Abimu tala Ateka ²² Maroba Yesus naha newe labarada anaha kodo halole-na, ''Tabolo nene, yayo guha nenewa labaramu,abimu tala ateka tutu morhamu, tutu ahani neyomi hamumi.bajedoka tala ate tutu pola tomu, tutu ahani neyomi ha tamu. ²³ Tabolo,morha narehi neho walila hamuyo mono napola toyo narehi neho walila kalebe. ²⁴ Pahoradila tangada kawurngo gako.he iyo jada todokmango bajedoka manguti,he iyo jala janekmango koro bajedoka lepeto, tabolo Maroba Allah nawodi he iyo hamuyo. Yomi dikoroyo rehi hawoli walila tangada kawurngo. ²⁵ Bagaranila la jongami yomi ka oro tala ateya kakolengo mataba sehasta kado nena doyo morhana? ²⁶ Neba yomi kaja kole rayini tangana kadadi neka moraho yiyo, aba yomi mami tala atekaya tangana kadadi hawadeko? ²⁷ Hamataranila nabunga bakung ba anyida he iyo bada buklo. tangada kawola nene jada hayili butokma bajedoka mapote, tabolo yayo gutokiya labaramu, lopoi Salomo nola hadeka widu jamangu kalebek mana kadoha diha wuyo walila tangada wolanene. ²⁸ Neba Maroba Allah kaha madiyi ruba lamaroda, mohena lodo nabuklo mono na delakango da betunila api,jedoka Iyo enga naha madiwu karehi walila ruba nene? Ta, yomi kahodikingo hatenana! ²⁹ Moka, abimu yomi mayegaka ahani yomi hamumi bajedoka ahani yomi ha inum, mono abim gela goga kami. ³⁰ Tabolo, tangana toyo laponu tana dama yegani nene tangana, tabolo Bapamu natajaya ba yomi hakabu atena. ³¹ Kadoha, Mayega uluni hadona Maroba Allah, moka tanga kohana yiyo jala da taba guni labaramu.'' Kohayi hapote la Surga ³² ''Abim kabohika, ta, ha oleda kamaraha, oronani Bapamu bana wonango nawoguni labaramu naha doyo kawonango nene. ³³ Malajadila tangada yomi hadagumi mono woyala naha wadeka.Rayingola kaleku omaha kaja majiraka, monene hapote la Surga mokaja bunga, moka kaja hapikuda dekeyi toyo kedu bajedo pahirada kabaketa. ³⁴ Tabolo, laha doyo hapotemu banedi nono jala atemu baneni.'' Ata kama nudu manono bana rayini paha yilina ³⁵ ''Halegeyala nabogemu engango bamu pingoni mono tangada api wemu engango bana derko. ³⁶ Kana dadila kahengo tangada toyo karemani na morina kabali walila pesta pernikahan tanam he iyo nadadi bana malewaro bana bugerango bina tutuna, kolehe na morina nene nabali mono naka kaladingo bina. ³⁷ Daha maringi kayila tangana Ata, ha koleda morina bana ha inyaka hagona, tabolo iyo namayo. yayo gu tokiya labaramu, kaheyo hijango, iyo engana pingoni nabogena tutu bana keteni mono daha lokodi tangada kaha yili tutu ngodo muyo. Iyo engada mayo mono daha yili he iyo. ³⁸ Nebai mori nene da mayo neba taloro hudo bajedokaya yina lodo mono nadukidi he iyo tongroda bana dadiyi kahengo, daha maringi kayila he iyo! ³⁹ Ta,idoya kamu tajayala, neba diha wuyo kadaguni na uma Kamu tajayala jam pira kakedu engana mayogimi la umana,iyo nadadi jana enga jekmani na umana bada kaboliya. ⁴⁰ Moba oronani nene, yomi jala neho kaha gona harema oronani kadadi toyo engana mayo nejaha yomi japaha wo-woda.'' ⁴¹ Mowalka, Petrus naka patango labarana, ''Mori, ebekani yoyo natokiguni naliyo wuyo hatuja yiyo ihe labara yama bajedoka labara tangana toyo jala?'' ⁴² Nabalehai Mori, ''Garani kapalani naha yili kaha doku mono hakabu ate hapaha tenada morina tutu bada hamataradi heyo atada hawadeka, tutu bada wodi he iyo hamuda nela rahi kama lewara? ⁴³ Daha maringi kango nena Ata, kakoleha morina banemeni,moda dukini iyo batongroda rayini hataguda. ⁴⁴ Yayo guha newewa labaramu, kaheyo hija-hijanani, mori nene engada pedeya tutu bada hamataradi tangada hadaguda. ⁴⁵ Tabolo enga , moba nena Atana naha newe la ate dalona, 'morigu jana enga dedo mayokma , 'mono wali bana paluya na atana kabanina mono Ata mawine hawadeka, mowalka damuyo mono da inu koha bana wonayi, ⁴⁶ Koleha morina banemeni nela rahi japaha wo-woda mono jada tajakmaya heyo Ata nene, monena morina enga naha mateya nena Ata mono da tayo ha oleni mono tangada toyo kaja manudu manono. ⁴⁷ Diha toyo Ata katajaya habena morina, tabolo jana hagona wukmango bajedokaya rayini badokuni habena namorina engana kole hadangango palu. ⁴⁸ Ta, idoya, na ata kaja tajaya apni habena namorina mono narayini tangana kadadi kahengo mona kolengo palu, iyo engana kolengo palu karehi hodingo. Diha toyo kawoyo hadangango, da hoda hadangani. Mono, he iyo paha tenada narehi danga engada hodaya karehi danga wali. Maroba Yesus narayingo paha wate ⁴⁹ Yayo nemega tutu betunina api naponu tana, Yayo gu moneni na api nene bana derkobe! ⁵⁰ Tabolo enga, nedi paha iho mono yayo paha lakogu, mono yayo gu podani hahoda hanokoda koha bana duki nekadadi nene bana hatutngo. ⁵¹ Ahakani yomi hatami katutu bayayo kanemengo tutu ngodiya namoli nola ponu tana?Jedokma, yayo gutokiya labaramu, mohekam bana bera! ⁵² Wali neba hena, lima toyo nolaha wuyo kaha ole bengo enga daha watedi. tolu toyo engada gobadi duyo toyo mono duyo toyo engadagobadi tolu toyo. ⁵³ He iyo engada hawatengo; Bapana engana nagobadi tangada ana kabanina, mono ana kabanina engana nagobani na Bapana. inyana engana gobani ana mawinena, mono ana mawinena engana gobani na inyana Inya yanona engana gobani namayina mawinena, mono mayiyo mawinena engana gobani inya yanona ,'' Batani katutu na Zaman ⁵⁴ Moka, Maroba Yesus naha newe labarada toyo danga, ''Kolehe yomi bami iteya naka roba kama koha latabara barat, yomi malewaro hanewe, 'Ura engana buru,'ura katena-tena buru. ⁵⁵ Kolehe yomi bami podani naparingi bana karorko walila Selatan, yomi hanewemi, 'Lodo yiyo engana banaha kawiko ,' mono neka dadi nene natena-tena Kadadi. ⁵⁶ Yomi toyo kaja doha! yomi nadadi bamu tani katutu hadana langto mono ponutana, tabolo aba yomi jana dadikma bami tanikatutu neka nemengo yiyo?'' ⁵⁷ ''Aba yomi dagu jana dadi bami pohotoya apani katena? ⁵⁸ Kolehe yomi bami halako oledi muhumu tutu aro la kaha reha, gunenehoya tutu kapojaya kaha oromu mono noba tongrongo halako tanam iyo abuna werakagu labara Hakim mono Hakim engana wowu labara paha ulu, mono paha ulu nene engana paha lakowula la gulu. ⁵⁹ Yayo guha newewa labaramu, yomi jemu enga lohongo wali noha bali bajamu yomi habayaradi wutamu koha peser kamuri.''