1
Pojaka ka nana, Maroba Yesus na palani na hoba Galilea, nana hoba Tiberias pawengo.
2
Dangai toyo kadokun Iyo orongo heiyo bada ite tadko balango ne parayi Na labarada to kalawara.
3
Pojaka, Maroba Yesus na pone laponu letena mono ngodo habali oledi hittu ana pahawede-Na.
4
I wido nana, yina lodo rame barahi mate to yahudi na dogeta.
5
Mo na hamataran nela bara-Na mono na ite to danga ka ma labara-Na, wenai Maroba Yesus labaranai Filipus, " Gi do kahda kababa tanam he toyo kada kole kohango muyo?"
6
Maroba Yesus na tokya nana kamanani Filipus orongo dokkani I dagu natajaya ba apakan harayina.
7
Filipus na baleha, " Kababa kawolngo do ngahu dinar jana tangakmango tutda heiyo, loko tangada ba mera-mera hokda."
8
Yina hawu to pahawedena, nai Andreas, olebenai Simon Petrus, wena lai Maroba Yesus,
9
" Hehena neni na hawu lakeda kanengo limma kababa mono do bu iya, tabollo ja nogalakmango to danga hena?"
10
Maroba Yesus wenena, "Hawedegad tangada toyo kada ngodo." Nola padoyo dangai ruba, maiyaka ha toyo da ngodo enga limma rata da kabani dangada.
11
Mowalka, Maroba Yesus nadekeyi he kababa-kababa hayo mono wawka bawena, ma Ia mana baweyi he kababa la barada he kangodo; hejalango harayi-Na he iya hejalango dangada pakamakda.
12
Kolebada boh tangada toyo, Maroba Yesus wenena labara ana pahawdena-Na, "Kohaila tangada karehi tonam abnengo kamawaro."
13
Orongo nana, he ana pahawedena da kohayi mono da paihidi he kawukata wala ka limma kadipkango roti jelai pa jedda karehi muyo.
14
Kolebada ite tadko balango he toyo parainai Maroba Yesus, weneda patokda, "Ne Iyo enga Nabi ya paharahi burla ponu tana."
15
Orongo hetodanga bada tajaya enga mana baweda mono ne Iyo dadi Be To nehinghowu la yama, Maroba Yesus na maleto wuwalna la letena kahawukingo tona.
Maroba Yesus Nahako Laponu Weyo
16
Kole yina lodo bana hudongo, he ana pahawedena dabur aro la hoba
17
mono kolebada pone laponu tena, da pala walin na hoba aro la Kapernaum. nNa lodo na kapogtongoka, nei Maroba Yesus jana ma jalakmaho tobokoi he iyo.
18
Hoba na lalo orongo rereha ka bokolo.
19
Mowalka, kole bada boheya na tena maronna enga dokabullu lima jedoka tolu kabullu maronna, he iyo daiteya Maroba Yesus kahalako la ponu hoba mono da dohekaya na tena mada kabohi.
20
Taidoyaka, Maroba Yesus wenena labarada," Ya doka Yiyo, abim kabohka!"
21
Pojaka nana, heiyo kamahaponeni Iyo laponu tena mono halegeyaka nena tena na dukki la padoyo pado aroda.
To Danga Mayegani Maroba Yesus
22
Delakango tana, to danga ka engahongo dede la habali hoba da ite janekmango tena nono, baja ika na hawu tena pa patamada daloka he ana pahawede. Taidoya, Maroba Yesus jana hadokukma tama dalo la tena oledi he ana pahawede-Na ka halako meha.
23
Hemedka tena heka wali la Tiberias la bara padoda hit to ka mu kababa, koleha Mori waw bawena.
24
Koleha he to danga bada iteya Maroba Yesus mono he ana pahawede-Na baja nedi nono, da pone la tena mono halako la Kapernaum bada mayegani Maroba Yesus. Moroba Yesus nana Kababa Morhaya
25
Koleha he to danga bada tobokoyai Maroba Yesus la habali hoba, da kanukka labara-Na, "Mori, pira Bam dukiw hena?"
26
Maroba Yesus nabalehai iyo mono wena, " Nebahena, Yayo weneg labaramu, yomi mayegaga Yayo ja oro ite nekmamun tadko balango, tabollo orongo bam badda muni yina kababa koha bam bohi.
27
Abum hayilka mayegango hamuyo kajadoha, tabollo mayegango hamuyo ka tah koha morha jakahadukka, he Ana To piyo da wo la yoyo orongo he Ana To piyo, Bapa, ikanai Maroba Allah, Na hadiddaraika."
28
Moka, he to danga da kanukkayai Maroba Yesus, " Aha nehon harayima tonam kama rayini yi pahayilli habennai Maroba Allah?"
29
Maroba Yesus na baleha mono wena labara he iyo, " Idoka yi pahayilli ha kamakna Maroba Allah: hatenaya Iyo pahawedena Maroba Allah."
30
Heiyo dakanukka labara-Na, "Bahekanaka, aha tadko balangya Yoyo harayim tonam kama ite mono hatena labara-Mu? Pahayilli ahani Yoyo harayim?
31
Obu waikama yama damuyo manna la maroda gilro, kahengo hatulho, Da wodi roti heiyo wali la pado kahoda madeta kamudi hawengo.'"
32
Maroba Yesus wenena labarada he iyo, "Nebahenaka, Yayo weneg labarami, jai Musa nekmaya kawog kababa kawali la pado kahoda madeta, taidoyakai Bapa-Gunla kawog kababa dohha kawali la pado kahoda madeta.
33
Orongo, Kababa kawali la Maroba Allah nana Iyo kaburru wali la padoyo kahoda madeta mono kawo morho la ponutana."
34
Heiyo weneda labara-Na, " Mori, wokigama yama kababa kadoha."
35
Wenai Maroba Yesus labarada, " Yadoka kababa morho; to kama labara-Gu jadahillu karebakma, mono to kahatena labara-Gu jada hillu madokma.
36
Taidoyaka, Yayo wemowagka labaramuloko yomi bag longahaitewa Yayo, engango bajam hatenawa.
37
Tangada hawonai Bapa labara-Gu da mayo labara-Gu, mono kamayo labara-Gu jag kal nekmawa bag wugayi.
38
Orongo, Yayog buru wali la padoyo kahoda madeta kag rayin habe dagu-Gu jawenekmagu, taidoka habenehona Iyo kahawedewa Yayo.
39
Mono, Idokayila pabenna Iyo kahawedewa Yayo: tonam tangada habodalongaha won-Na labara-Gu nana janekmango kabunga, tabollo Yayo gu hakode la hadukka tana.
40
Orongo, idokala habenna Bapa-Gu, he diha to - dihha to ka iteya Anana mono kahatena labara-Na na kolengo morho jakahadukka, mono yayo gu pakodeya iyo la padukka tana."
41
Orongo nana, kapirrango to Yahudi da tuha ate tutna Iyo orongo Iyo bawena, "Yadokala kababa ka burru wali la padoyo kahoda madeta nana."
42
Heiyo weneda, "Jaikado yi na Maroba Yesus, anai Yusuf, bapana mono inyana hatajada? Ahanyinekana Iyo bawengo, 'Yayo bag burwaka wali la padoyo kahoda madeta?"'
43
Maroba Yesus nabalehai heiyo mono weda, "Abum tuha ateka la jongam yomi.
44
Ja nekmango hawu toyo kama labara-Gu, bajai Bapa kahawedekawa Yayo katingwa, mono Yayo gu pakodeya la padukka tana.
45
Neni kamatulho dalo la hurata hori to nabi: 'Mono, heiyo tangada da hanuwadi Maroba Allah.' ngara dukkada to ka rongo mono kanuwa walai Bapa da mayo labar-Gu.
46
Nana ja inekmaya ba nengo to kabodalongaha iteya Bapa, baja Ika ka mayo wali la Maroba Allah; Idokala ka iteyai Bapa.
47
Yayo weneg labaramu, 'Taidoya, he to kahatena da kolengo morha jaka hadukka.'
48
Yadokala kababa morha.
49
Obu waikamu na muka manna la maoda gilro, tabollo heiyo da mate.
50
Idokala yina roti kaburru wali la padoyo kahoda madeta, tonam tangada to kamuni mono jada matekma.
51
Yadokala kababa morho ika kaburru wali la padoyo kahoda madeta. He to bada mukan yina kababa, da morha hangata; mono kababa ha wo Gu tangango morha ponu tana idoka nana pola to-Gu
52
He to Yahudi da pahibatango, heiyo weneda, "Ahanyikkana bana dadi yina Toyo bana woya na pola to-Na kamun ba wengo?"
53
Maroba Yesus wenena labarada, "Yayo weneg labaramu, bahekana ne yomi bajam mukan pola to Ana To Piyo mono inun na rutto-Na jam kolekmango morho dalo la pola tomi.
54
Tanvango to kamugan na kabi-Gu mono ka in gani rutto-Gu kolengo morho jaka hadukka, mono Yayo gu pakodeya iyo la padukka tana.
55
Orongo, kabi-Gu nana hamuyo dohaya mono rutto-Gu nana painnu dohaya.
56
Garakan kamugan na kabi-Gu mono ka in gan na rutto-Gu engango dalo la Yayo mono Yayo engagu dalo la Iyo.
57
Kahengoi Bapa ka morho kahawedewa Yayo, mono Yayo morho oronai Bapa, kahejalango iyo kamuga Yayo, iyo na morho orog Yayo.
58
Idokala yina kababa kaburru wali la padoyo kahoda madeta, ja kababa kahenekmango hamuda obu waikamu mono heiyo da mate, to ka muni yina kababa da morho hangatango."
59
Maroba Yesus napadukini ngaradukkana la Kapernaum bana hanuwango la sinagoge.
Dangai Kapadoku Kajenai Maroba Yesus
60
Kole bana dangai hit ana pahawedena karongoya tutna yiyo, heiyo weneda, "Yit pahanuwa alnani. Garan kan kadadi hibaya?"
61
Orongo batajaya hit kadoku-Ni bada tuha ate tutna yiyo, Maroba Yesus wenena labarada, "Yitu hatokigu gurayig hamoraha ate dongamu?
62
Nabahekanaka, ahanyina bam ite Ana To Piyo pone habali la padoyo wal-Na?
63
Wadyala ka wongo morho, tabollo kabiyo ja nehingmango gonna. Yina hanewe-hanewe patok-Gu wad mono morhoya.
64
Taidoyaka, neddi kapirrango la jongam yommi jaka hatena, "Orongo, wal kapungena, Maroba Yesus na tajai bagaran jakahatena mono bagaran kabuttuni ate Iyo.
65
Maroba Yesus wenena, "Iyaka nana Yayo maweg labaram orongo janekmango hawu toyo kamayo labara-Gu, baja ika nana pahakanyurna labarana Bapa."
66
Athonana, dangayi kadoku-Ni ka eru wungo mono kangahu dokuni Iyo.
67
Orongo nana, Maroba Yesus bawenna labarada ka kabul dungo ana pahawede-Na, "Yoyom bejalango halakop?"
68
Simon Petrus nabalehaya Iyo, "Mori, lagara barana nehona yama do halakoma?Ba Yonemo kadaguni tokya morho jakahadukka.
69
Yama mahatenaka mono matajaw Yoyo, orongo Yoyo kamaringngo wali la Maroba Allah."
70
Maroba Yesus nabalehayi, "Ja Yayo dagnekma ka pedew yommi, ka bul du ngo toyo? Loko bahengo, neni na hawuyo nela jongami nana moritana."
71
Ne I hawengo nai Yudas, anai Simon Iskariot, orongoi Yudas nana i na hawu toyo walngo ka bul dungo ana pahawede atu, tabollo na buttuni ate Maroba Yesus.