Bana Hanewe dongan Maroba Yesus yina Mawinne Samari ¹ Kole bana tajaya Maroba Yesus hit to kawohoka badarongo ba nengo gonna mono pahaiho atnehod dangada ana pahawedena walai Yohanes, ² (loko Maroba Yesus jana paiho dagdongo, tabollo Ana pahawedene-Nad), ³ Na jenna na Yudea mono na bali la Galilea. ⁴ Taidoya, Na palakaya yi pado Samaria. ⁵ Na dukki Maroba Yesus la Samaria, yila hawu harona ka ngarango Sikhar, kanengo la bara tana hawonai Yakub la bara ananai,Yusuf athona. ⁶ Matawe nai Yakub nen no habali. Mokka, Maroba Yesus na jolka halako, na ngodo la hingu matawe. Atnana, enga weker kanomo yaka. ⁷ Yina hawu mawinne Samaria na mayo hoke we. mawenai Maroba Yesus labarana,"Woga Kag inwa." ⁸ (Orongo, ana pahawede-Na da halako la harona lokah hamuyo.) ⁹ Yina mawinne Samaria na wenena lai Maroba Yesus, "Ahanyik kanna Yoyo, to Yahudi, bam karew we ha in labarag ne yayo ba mawinne Samaria mowa?" Orongo, To Yahudi baja hanewewu dongamodi hitu to Samaria). ¹⁰ Maroba Yesus nabaleha mono wena labarana,"Bam tajakaya tutna wemaring walla Maroba Allah mono ban tajaya bagaran kahanewe labaramu,'Woga Kagu inwa,' enga karekadim labara-Na, mono Iyo engawokaknagu we morha." ¹¹ Nana mawinne wena labara-Na, "Mori, Yoyo janekmango hahokewam mono yina mataweyo na kidkala, gidauwalna Yoyo bam koleni yina we morha? ¹² Yoyo rehnehow bokola walla waikama, Yakub, kawogaman yina mataweyo labarama mono ka bada inu dagu walla mataweyo mono tangada anana mono harangana?" ¹³ Maroba Yesus na baleha mono wenena labarana, "Tangango to ka inuni yina weyo da madowal, ¹⁴ tabolla to ka inuni yina weyo ha wo Gu labarana jada hil madokmaka; taidoyaka we hawo Gu labarada nana na dadi mata we neho dalo la pola todaka kana hakitango wotara koha dukngo morha jaka hadukka." ¹⁵ Mawinne nana wenena lai Maroba Yesus, " Mori, woga nat weyo tonam abug hil madowa mono abug hil mawa hena hoke weyo." ¹⁶ Maroba Yesus wena Labarana, " Halakowla, kamakon na layimu mono kam baliw hena." ¹⁷ Nana Mawinne na baleha,"Yayo janekmango layig." Wenai Maroba Yesus labarana, "Yoyom tenaw bawem,'Yayo janekmango layig'. ¹⁸ Orongo yoyo banemowad kalimango layim, mono kabani ka engango olegui nebahenna ja layikmamuni. La jongana yoyo tena bawem." ¹⁹ Patokna nana Mawinne la bara-Na, "Mori, yayo gu tajaya nebahenna yoyo ba to hoda teng nag. ²⁰ Na waikama na bara yila letena, tabolla na harona-Mu wenena ba yina Yerusalem padoyo bara dadi to." ²¹ Maroba Yesus wenena la barana, " Hatenahow labara-Gu, yi yoyo mawinne! kole bana dukka rahna bajahil yi laletena jedoka la Yerusalem to madaika masadi yai Bapa. ²² Yoyo mu daikaya yi jaha tajahingum, tabollo yama ma daikaya hatajama orongo na toleka walnena la parona Yahudi. ²³ Taidoya, dukinka na rahna, nebahenna, kamasadi kamadaika ka tena na daikayai Bapa dalo la wad mono katena; orongoi Bapa daikanehinghoya Iyo bawenna. ²⁴ Maroba Allah nana Wad Teng ya mono heka daikanehoya Iyo dalo wad wad kateng mono ka tena." ²⁵ Yina Mawinne wenna la bara-Na,"Yayo tajaya yitui Mesias bana mayo (Idokai Kristus pawengo). Kole Bana mayo, Na hadukkini ngaradukkana la yama." ²⁶ Balehai Maroba Yesus labarana, "Yayo, kahanewe labaram nana Idoka." ²⁷ Tongro hingngoka nana, hemed ana pahawede-Na mono he iyo da bangara bada iteyai Maroba Yesus tongrongo bana hanewe dongan yina mawinne. Taidoya, janekmango hawu toyo kanukka labara-Na, "Ahan hamayegam Yoyo?" jedoka " Aba mam hanewe dongani ne iyo?" ²⁸ Pojaheyaka, yina mawinne na jenni tarobo wenna mono na halako la harona ma wenadi hittu todanga habali, ²⁹ "Mayo, iteyala nen na hawu toyo ka wenna labaragu ngara dukkana habadda longaha rayigu. Iyo engai Mesias ya?" ³⁰ He iyo da halako la dihha nuhha mono da tobokayai Maroba Yesus. ³¹ Tongro hengoka nana, ana pahawede-Na duhhayai Maroba Yesus mo wedda, "Mori, mukiwula." ³² Taidoya, Maroba Yesus wenna labarada, "Yayo nenni hamugu jaha tajam." ³³ Moka, ana pahawede dahanukka wungo," Janehingmango toyo ka ngodi ahha-ahhango labara-Na kana muyo?" ³⁴ Maroba Yesus mawenna, "Hamu-Gu nana harayi habennan Iyo kahawedewa Yayo mono hatogolan pahayil-Na. ³⁵ Ne yoyo jawekaddimu, 'Pato wulla monaka ubbu dukini na wulla rahi pupya na wuna'? Iteyala, Yayo wenena patokigu labaramu, buggeradi matamu mono pahoran maroda luro na bunyngoka ka pupyaka na wuna. ³⁶ Nebahewiknaka, iyo kamangut na hibayaka na dagna mono kohayi wuda tonam kada kolengo morho jakahadukka tonam yina mangutti mono todong kamagebora doba. ³⁷ Dalo la jongana yi patoki na tena, 'Yina hawu to na todongo mono hawadeka da mangutti. ³⁸ Yayog hawedem kam mangutti hittu jahayillim; to hawadeka da hayilinka mono yoyo tamaw daloka." baahan pahayilda he iyo ³⁹ Dangai toyo Samaria kawal la harona nana da hatena labarana Maroba Yesus orongo patokna nana mawinne, ka padukin tutna, "Iyo wenaga yayo ngaradukkada ahan rayigu." ⁴⁰ Maiyaka, hittu to Samaria da dukki labarana Maroba yesus, da karei-Ya kana engango labarada mono Maroba Yesus engana habali ka du lodongo. ⁴¹ Mono, nenehodi to karehi danga kahatena orongo hatokna Maroba Yesus dagu. ⁴² He iyo wedda la barana nana mawinne, "Jaorohatoknekmamun mama hatena, taidoyaka orongo bama rongo dagya, mono yama ma tajaya ba Iyo yiyo lang ngo Kapatolekani naponu tana." Ana Hagawe Istana Patogahani ⁴³ Koleha du lodoka, Maroba yesus na jenna nana padoyo mono na aro Galilea. ⁴⁴ (Bajahehonana, Maroba Yesus dagu na padukkini ba nana hawu to nabi jahil haakakmaya la harona daguna.) ⁴⁵ Kole bana dukki Maroba Yesus la Galilea, hittu to Galilea da toboka-Ya orongo heiyo da iteya ngara dukkana harayinai Maroba Yesus ba rayini mono baharamen lodo rahi mate la Yerusalem orongo heiyo da halako jalla barayini yina rame rahi mate. ⁴⁶ Orongo nana, Maroba Yesus na mayo la Kana, Galilea, yila padoyo Iyo habada longaharaina weyo ka dadi anggur. La Kapernaum neni hawu to hagawe istana ka kalawara anakabanina. ⁴⁷ Kole bana rongo yina hagawe istana yina Maroba Yesus bana ma walla Yudea aro la Galilea, na halako tobokaya mono na kawojo labarana Maroba Yesus tonam kana ma mono patogahani na anana orongo na anana hoddimoka ubbu na mate. ⁴⁸ Mowalka, Maroba Yesus wenena labarana, "Bajam itekaw tadko mono balango, yoyo jam wawakmaw hatena." ⁴⁹ Hagawe istana nana wenena, "Mori, makiwka toma jana mate na anagu." ⁵⁰ Maroba Yesus wenena labarana, "Baliwka, anamu na morha!" Yina toyo na hatenaya patokna Maroba Yesus labarana mono na halako nana toyo. ⁵¹ Bala larahoya yina hagawe istana, hi atana da toboya mono padukkini ba yina ana kabanna na morho. ⁵² Na hagawe istana na kanukkayi ba aha wekera na anana bana halege morho habali. Mono, da baleha, "Wemalona enga wekera kapittu na maringna bana bunga." ⁵³ Bapana yina lakeda na tajaya, ba iyaka na Maroba Yesus bawenna labarana, "Anamu morhoka."Maiyaka, Hagawe istana nana mono tangada kahaolebengo da hatenaya Maroba Yesus. ⁵⁴ Idoka nana balango hadu wa harainai Maroba Yesus banna bali walla Yudea aro la Galilea