Maroba Yesus Jawaya Ka Doha ¹ Wenai Maroba Yesus, "Kahe pija-pijango,Yayo weneg labaramu,to ka tama dalo la golu bebe jaka li la binna, tabollo kawenaha pone li la lara heka, nana to kedu mono to karebo. ² Taidoya, to katama li la binna, iyo kajawa bebbe. ³ Tutna, ka jawa binna bugeran binna, mono bebbe-bebbe rongoya lina, mono na kawulodi bebbe-bebbe na tokdad ngarada, loho na haarodi lohongo. ⁴ Kole bana haloho kohayi bebbe na, na halako la aroda mono bebbe-bebbe na da dokuni iyo orongo he iyo bada tajanan na lina. ⁵ To ka abu nengo jada dokukmani, tabollo da palayo wali labarana oronngo bajada tajanan na lina ha to ka abu nengo." ⁶ Idoka na pahatuja wango pa tokinai Maroba Yesus labarada, tabollo jada tajakmaya ba apan abu hatokinai Maroba Yesus labarada. ⁷ Mowalka nana, Maroba Yesus wewalna labarada, "Neka hepijango, Yayo weneg labaramu, Yadoka yiyo binna da bebbe-bebbe hayo. ⁸ Tangada to kamayo bajag mahowa Yayo hayo to kedu mono to karebo, tabollo bebbe-bebbe jada rongokma he iyo. ⁹ Yadokala binna. Diha to-diha to bada tamaka li ho labarag Yayo, Pahatolekadi, monno da loho tama, loho da toboka maroda. ¹⁰ To kedu bada mayo kama kedu weneheda, pamate,mono pamayilla; Yayo gu mayo tonam kada kolengo morho, mono kolengo kadanga. ¹¹ Yadoka ka jawa ka tena; jawa ka tena woyana pola ton-Na la bara bebbe-bebbe. ¹² To kahewa,ja to kajawakmaya,jaka dagud bebbe-bebbe hayo, da itte ya na serigala kamayo, da jeddi ha bebbe-bebbe mono da palayo; nana serigala hawopa mono na hewayi ha bebbe. ¹³ Na palayo orongo iyo to pakahewa mono jana urhakmayi ha bebbe. ¹⁴ Yadokala ka jawa ka tena, Yayo tajayi bebbe-bebbe-Gu mono bebbe-bebbe-Gu tajawa Yayo ¹⁵ kahengoi Bapa ka tajawa Yayo mono Yayo tajayai Bapa; mono Yayo woyana pola tog-Gu hela bebbe-bebbe. ¹⁶ Ya jalla nengo bebbe-bebbe hekagu jaka wali la golu yiyo; Yayo ngodi jalla nehoyi, mono da rongoya na li-Gu; mono da haole donngani yina hawu kajawa. ¹⁷ Oronanka yiyo Bapa mana manawaraga Yayo, orongo Yayo woya na pola tog-Gu tonam Yayo kole habalidi. ¹⁸ Janekmango hawu toyo ka dekeya wali labara-Gu, taidoyaka Yadokala ka woya kdokuni habe dagu-Gu. Yayo nego kawahag ba woya na pola tog-Gu mono Ya wido nengo kawahag deke habaliya. Idoka yiyo pahawede pa hibbag Yayo wali lai Bapa-Gu." ¹⁹ Hadakkawali, neni na mahewa la jongada to Yahudi orongo patoki Maroba Yesus nana. ²⁰ Dangayi walilabarada kawengo, "Na tama daloni wad kabola mono dukngo bana ngade. Aba yommi mam rongoya Iyo?" ²¹ He hawadeka weneda, "Nana japa tokikmanani nana to pa tama daloda wad kabokala. Wad kabokala na dadkado bana bugeradi matada to kamoro?" Maroba Yesus mono Bapa nana hawuni ²² Athonana, lodo rame rahi hamuraha habalini padona Maroba Allah. Atnana rahi maringi, ²³ mono Maroba Yesus tongro halakonan la Padonai Maroba Allah, nala kabihhi padonai Salomo. ²⁴ Mowalka, he to Yahudi da makoha da kiloran Iyo mono wedda labara-Na "Pirra hehongo mojana Yoyo bam jegamadi wad ma yama bana oda ale? Yo bai Kristus kawu, toki lurho gamani yama." ²⁵ Maroba Yesus na balehayi he iyo, " Yayo wemowagka labaramu, tabollo yoyo jam hatenakma. Yi pahayil-pahayilli harayigu Yayo dalo la ngaranai Bapa-Gu, idoka yiyo pahadukki tutug Yayo. ²⁶ Taidoya, yomi jam hatenakma orongo yommi jam tamakma bebbe-bebbe-Gu. ²⁷ Bebbe-bebbe-Gu rongoya na li-Gu, Yayo tajayi he iyo mono he iyo da dokuga Yayo. ²⁸ Yayo wowwa morho jaka hadukka labarada he iyo, mono he iyo jadda hilu da matekma; mono janekmango hawu toyo kakarama gadi wali la lima-Gu. ²⁹ Bapa-Gu, ka wogadi he iyo labara-Gu, rehi bokola wali la ngara dukkada, mono janekmango hawu toyo da karamadi heiyo wali la limai Bapa. ³⁰ Yayo monoi Bapa nana hawuni." ³¹ Hadakka wali, he to Yahudi da deke watu kama wewyai Maroba Yesus bawedda. ³² Taidoyaka, Maroba Yesus wennena labarada, "Yayo patingo hadangagka hayilli kadohha wali lai Bapa, ginka pahayilli wal la ngaradukkada karayigu yoyo hawewu dongamuga Yayo waga watu?" ³³ He to Yahudi hayo da balehaya Iyo, "Ja oro pahayilli kadoha nekmaya mamma wewuw Yoyo wagu watu, Tabollo oro kawohoka; mono orongo Yoyo, ka hawungo to piyo ka habali wungo pola to-Mu lai Maroba Allah." ³⁴ Maroba Yesus na balehayi Heiyo, "Jana matulhakado dalo la Hurata hori Tauratmu, 'Yayo wemowag patokig, Yoyo nana Allah'? ³⁵ Nei Maroba Allah bawekanaddi he kahibbaya na lina 'allah', badokkani Hurata Hori jahil ha tahanekmaya, ³⁶ ahanyina ne Yomi wenem tutna Iyo pa hamurahanai Bapa mono hawede la ponu tana, 'Yoyom kawohoka', orongo Yayo baweg labaramu, 'Yayo anai Maroba Allah'? ³⁷ Ne Yayo bajagraiyi kani pa hayilna Bapa-Gu, abim hatenakawa Yayo. ³⁸ Taidoyaka, ne Yayo bag rayikad pahayil-pahilli na, loko jam hatenaduwu labara-Gu, hatenayala yit pahayill-pahayilli tonam kam tajaya mono pweni ba nei Bapa neni dalo la Yoyo, mono Yayo dalo lai Bapa." ³⁹ Hadakkawal, he iyo da kabango wopayai Maroba Yesus, taidoya Iyo na leba longa wali la heiyo. ⁴⁰ Mowalka, Maroba Yesus na halakowali palani na loko Yordan aro la padonnai Yohanes kawunga paihongo we maringi atna mono Maroba Yesus engango habali. ⁴¹ Danga toyo kamayo labara-Na mono weda, "Loko jahawudo tadko balango harainai Yohanes, tabollo ngara dukada patoki Yohanes tutda To ka tena." ⁴² Mono, danga toyo ka hatena newal-Ya habali.