MA KOLANO O DARIUS AWI BOBITA ¹ I teka wa ma kolani Darius wosi bobita mangale ya sari o lelefo i tdotdoma ya do di ahi o arata ma riho o Babel ka ² o Ahmeta o dadato provinsi Media ka ya make o surat ya lololo ka moi de ya make ma rabaka yo si lefo komanena : ³ Ma taong ma nonoma ka ma kolano Koresh wosi bobita mangale o Jou awi tahu o Yerusalem ka, tdoha ka la ya aka manga suba ya totola ma riho ya aka kali de ma sosotde ya aka da poputuru. Ma gaku we o hasta mori butanga (60) de ma ngoha o hasta mori butanga (60), ⁴ de o teto bi lalago o lape sa'ange (3) de o gota da momuane o lape moi (1) tdoha la ma biaya asa bobareta ya fangu. ⁵ De tdoha la o moi-moi o guraci de o salaka lo o Jou awi tahu no, kia ka ma Nebukatnezar wa a aho o Jou awi tahu da tetebi o Yerusalem no de ya aho o Babel no isi giliho de ya hado ma riho i tdotdoma o Yerusalem ka, ngini bilasu nia hado o Jou awi tahu marabaka. ⁶ Sababu de magena, o Tatnai ma bupati o ake ma sononga no, de o Setarbosnai de wi dodiao ena gena o doku ma sahe o provinsi o ake ma sononga no, ngini upa ni masi dogo ona ka. ⁷ Da loha o manara o Jou awi tahu magena, isi turusu de tdoha la o bi Gubernur Yehuda manyawa de o dodihimo Yahudi ka ya aka o Jou awi tahu manena ma riho ka. ⁸ De ngohi tini si bobita li bilasu ni aka mangale o dodihimo o Yahudi ka la ya aka ma Jou awi tahu manena ma bi sewa dangodu bilaso ya fang ona o bobareta no ena gena o leo o provinsi o daerah ake ma sononga no de i dadi wa ya tuda. ⁹ O kia bato ya paralu mote ma ena ma kurangi ka da loha o sapi ma goho o duba ma nau de mangopa mangale o suba ya tutupu ma Jou ka, eko la o gandum, o gasi, o anggur, de o gososo mote o Imam yo temo o Yerusalem ka da loha da ngodu magena ya hike ona ka wange i si geto upa i ma togu. ¹⁰ Mangale ona aku yo si suba de o suba ma Jou aku awi sininga i sanangi, de i si sumbayang ma kolano wi oho de wi ngopa-ngopa. ¹¹ Ngohi lo to si supu o bobita mangale o nyawa na go'ona la ya tagali o putusan manena, tdoha la o gota ya rapu o tahu no de wi sisuru de wi si tobo ye. ¹² Tanu o Jou wa aka wi ronga da loha kadoka wa sisa ma kolano nagu una bato nako wa tagali o atorang mane de ya turaba o Jou awi tahu o Yerusalem ka ngohi o Darius to si supu o bobita nia aka nio si dodiahi. MA JOU AWI TAHU DA BOLO DE YA TABIS ¹³ I tekawa, o Tatnai ma gubernur Efrat o ake ma soinonga no de o Syelarbosnai de manga dodi ao ya tai lako i si dodiahi mote de ma Kolano Darius wo susuloko. ¹⁴ O dodihimo o Yahudi ka yo si dofa o manara magena de, i tagi da loha, barang ma nabi Agai de o Zakaria o Ino mangopa i temo ka ona yo si bolo o manara magena koloko o Israel ka manga Jou wo temo ka de o bobita ma kolano-kolano Persia o Koresh, de Dariu, de o Artahsasta. ¹⁵ o tahu da tetebi manena ya bolo ka wange sa'ange o ngo'osa adar ma taongo ma iha ka ma orasi ma kolano Darius wo kuasa. ¹⁶ De Israel ka de o bi Imam de o Lewi ma bi nyawa de o nyawa-nyawa o gugumo no manga gutiku yo si rarame ma Jou awi tahi de manga more-more ka. ¹⁷ mangale ya tabis ma Jou awi tahu ona ya hike o sapi ma nau magoho ma ngai ratu moi o duba ma nau o ratu sinoto mangongopa o ratu iha de o kabi ma nau ngai mogiowo de sinoto mote o Israel ka manga asali magena mangale o suba ya tutupu. ¹⁸ Ona ya hadu o Imam ka mote manga oparati de o Lewi manyawa de manga bolu-bolu mangale wi puji ma Jou o Yerusalem ka koloko o Musa wasi lefo awi buku ka. ¹⁹ Ma gegeto mogi owu de iha ka ma ngo'osa ma nonoma ka o nyawa-nyawa yo liho o gugumo no o paskah ma wange yo si rarame. ²⁰ o bi Imam de o Lewi manyawa yo ma tebi ka de ona ya ngodu ya tebi ka i teka wa ona ya to oma o duba paskah ma wange o nyawa yo liliho o gumono de manga gia nongoru ena gena o bi Imam de mangale ona masirete. ²¹ De o Israel ka ya ngodu yo liliho o gugumo no yo otdo de ya masi dogo li o nyawa yo ma tetebi ka manga dorou no o doku magena ka, mangale wi sari o Israel ka manga Jou. ²² Ona yo si rarame mangale o roti ma ragi i hihiwa de manga more ka madeka o wange tumudingi sababu ma Jou wa aka i foloi yo sanangi de wo si giliho ma kolano Asyus ona ka mangale wa rio ona, yo si goko kali o Israel ka manga Jou awi tahu.