¹ Kagena, de o bi Nabi, ena gena o Nabi Hagai de o Zakharia, o Ido ma ngopa, de o Israel ma nyawa manga JOU Awi ronga ode ona watotiaoka, o beseso ma JOUno wosingangasu o Yahudi ma nyawaka ode o Yehuda de o Yerusalemka yogoge. ² Kagena de o Zerubabel, o Sealtiel ma ngopa de o Yesua, o Yozadak ma ngopa yomasidailako ma ngale yosisolanokali yaaka ma JOU Awi tahu o Yerusalemka. Ma JOU Awi bi nabi imakangaho de de ona ma ngale yoriwo. ³ Ma orasi ma gena, onaka yahika, o Tatnai, o daera o selera ma sonongaka manga roriri, o Syetar-Boznai, manga bi dodiao, de manga dodiao, de yotemo, "Nagoona o sulo yahike nginika ma ngale nisigoko kali ma Gikimoi Awi tahu manena sidago nisibolo?" ⁴ Ona lo onaka yasano, so manga ronga nagoona o nyawa ode o tahu manena yosigoko?" ⁵ Duma ma Gikimoi Awi lako wosimeta o Yahudi ma nyawa manga dodihimoka so ona lo idadiwa yomomanaraka yasitogu sidutu o Darius o singangasu magena wamake de awi surati ma fanggali wamake. ⁶ Manena ena gena o Tatnai, o daera o selera ma sonongaka manga roriri awi surati ma raba, Syetar-Bosnai de awi bi dodiao, o bi doku o daera o selera ma sonongaka, ode yosidingo ma kolano Dariuska. ⁷ Ona o singangasu yodingo unaka ma lefo komanena, "Kolano Darius Tabea. ⁸ Tdoha la ma kolano wanako nako ngomi gena o Yehuda ma daeraka mitagika, ma Gikimoi Wilalamo Awi tahuka, ode yosigoko de o teto duruhe bi lalago de ma baton o gota yosilape. O manara manena ma dodagi gena itogu-toguwa to ona manga gia. ⁹ Ngomi o bi dodihimoka misano de mitemo, 'Nagoona nisulo so ma Gikimoi Awi tahu manena nisigoko kali de maena nisibolo?' ¹⁰ Ngomi lo manga bi ronga misano ma ngale ngonaka misingangasu nako ngomi kaidadi o nyawa onaka yasiroriri manga bi ronga mia lefo. ¹¹ Komanena ona manga sosango ngomika: 'Ngomi ena gena ma Gikimo Awi bi leleani o dipano de o duniano. Ngomi misigoko kali ma Gikimoi Awi tahu ode isigogokoka o taongu muruonaga ipapasaka, ode o Israel ma nyawa manga roriri womomilia moi wosigoko sidago wosibolo. ¹² Duma sababu mia ete de mia topora ma Gikimoi wokukuruye, Una wasisaraha ona o Nebukadnezarka, o Babel manga kolano, o kasdim ma nyawa, una dabolo ma Gikimoi Awi tahu manena waturba de o Israel ma nyawa wangaho o Babelka. ¹³ Duma ma taongu ma nonoma o Kores, o Babel manga kolano wopareta. Ma kolano Kores o sulo wosisupu ma ngale ma Gikimoi Awi tahu manena isigoko kali. ¹⁴ De lo o pakakasi guraci de o salaka ma Gikimoi Awi tahuno manena, ode o Nebukadnesar wadedehe ma Gikimoi Awi tahuno o Yerusalemka de waaho o kuilka o Babelka, ma kolano Koresh wadehe kali de o Sesbazarka wahike, ode wititideka wodadi gubernur." ¹⁵ De unaka wotemo, 'O moi-moi manena natdehe. Notagi de nahado o puji ma tahuka o Yerusalemka. Tdoha la ma Gikimoi Awi tahu isigokokali maena ma rihoka,' ¹⁶ Kagena de o Sesbazar wobola de wahado ma Gikimoi Awi tahu ma sosotde o Yerusalemka. Kagena de isikahika sidutu manenanaga, o puji ma tahu magena tatapu isigoko, duma dabolowaasi. ¹⁷ Sababu magena, nako ma kolano nosimote daloha, tdoha la yatailako ma kolano awi pipi ma jojoho kanaga o Babelka, igogou ma kolano Koresh o sulo wahike ma ngale isigokokali ma Gikimoi Awi tahu o Yerusalemka. kagena de, tdoha la ma kolano o butusangi wosidingo ngomika ma ngale o hali magena.