I Yesus su hiba'nu Gubernur adenne i Pilatus ¹ Putu'nu lrou i, sadanu madalrimai sumupu', maya mangangi'moho' makati'mbonan bo si'de gagudang-gagudangnu bangsa ene' napana'botenu pangatase'n tibatu su kagagioni Yesus kasaba' dongka hepo'a'nnu papateiNe. ² Bo, si'de nangi'ki' si Yesus, bo nidi'ngan na'ko ni'o'ngkoho' si Gubernur Pilatus. I Yudas Namu'no' A'o' Mbatangen. ³ Sadanu i Yudas nango'ngkoho'te si Yesus, bo nakabuate tou i Yesus kasaba' pinutu'su'tenu hepo'a'n papatei, i sie' kasaba' nanisilri'te bo napangu'lre'tenu tulru'-mpulro' (30) hensengnu bido su mangangi'moho'-mangangi'moho' makati'mbonan bo su si'de gagudang-gagudang agenu bahi'ga'ne ⁴ :" Iya' nabardosate yoka napaba'lru'te da'ha'ni Yesus kasaba' ta'yamai si sa'lra'ne." Tou manen ingene, si'de nangi'ndo' si sie' kasaba': " Apanu tahiabu ngkami agenu ene' ? Ene' kasaba' tahi'abunu !." ⁵ Bo, i Yudas napamalre'ngnu henseng-hensengnu bido ene' su hu'a'ngnu Sinagoganu Mabuadata bo i sie' nati'mbusu'. Senebo i sie' na'ko nanga'ntong a'o'ne su mpukayu. ⁶ Tou manen ingene, mangangi'moho'-mangangi'moho' makati'mbonan nanga'lra' henseng-hensengnu bido (doiti) ene' agenu bahi'ga' kasaba': "Ta'ya bo'bodo'ne do'iti' iye' de'so' si tou makabelren do'iti'nu Sinagoga yoka do'iti' iye' kasaba' lru'annu da'ha'." ⁷ Ingenebo si'de napahisabunu pangatase'n bahi'ga' tibatu kasaba' do'i'ti ene' pinalru'an tana'ni tou mananansalra' pisou yoka kalri'mu'an tampa palralribingannu toumata-toumata lrupu'. ⁸ Ingenebo tana' ene' pinanga'den Tana'nu Da'ha' putu'nu lrou iye. ⁹ Su pi'lrasa'ne, ene' napato'mpodo' su apanu pinaba'lro'teni Mababa'lro' Yeremia kasaba': " Pa'lrusu'ne, si'de dongka mangalra' tulru'-mpulro' (30) henseng-hensengnu bido (kupang) ene'. Ene'nu lru'a'nnu a'o'Ne kasaba' nihe'kentenu toumata-toumatanu Israel. ¹⁰ Si'de dongka mapama'ke'nu tulru'-mpulro' (30) hensengnu bido ene' palru'a'n tana'ni tou manana'nsalra' pisou (agenu auntapen), naipati su o'ngkamai parentanu Mabu pina'ida'o si sia' (i Yeremia)." I Yesus bo i Gubernur Pilatus. ¹¹ Su galre'-galre' i, i Yesus time'ngede'te su hiba'ni Gubernur bo i Gubernur naki'na' si Sie' kasaba': "Apabo i Kau i Dikanu Yahudi ?" I'ndo'ni Yesus kasaba': "Ode, o'ngkamai su pinaki'na'nu." ¹² Tou manen ingene, sadanu i Sie' pinanga'do'nu mangangi'moho'-mangangi'moho' makati'bonan bo si'de gagudang-gagudang, i Sie' kasaba' ta'yamai nami'ka' mo'hongNe (ta'ya nangi'ndo). ¹³ Pa'lrusu'nu ene', i Pilatus nabo'ka' si Sie' kasaba': " Apabo i Kau ta'ya nakadi'ngihi' su kanga'sa'nu a'a'donu toumata si Kau ? " ¹⁴ Manen ingene, i Yesus ta'yate nangi'ndo' su pinaki'na'ni Pilatus, mante a'ado insaumai ta'yamai pinapa'ha'Ne, ingenebo i Gubernur ene' kasaba' galre' nakakilringan tumani. I Pilatus Ta'ya Nakalrabe' A'ado' si Yesus. ¹⁵ Su galre'-galre' i, hunti'a'nu manantani'nu lrou lra'mo'nu bangsa Israel, i Gubenur galre'te mapamu'lre'nu hahepo'a'n singkatau su hiba'nu nga'sa' toumata, kasaba' mantu'hu' su apanu pinangkelre'a'nnu toumata da'kelre'. ¹⁶ Du'ngkulru'nu ene', si'de pai ha'he'po'an ba'lrine' singkatau masa'kata' adenne i Barabas. ¹⁷ Yo, sadanu toumata da'kelre' naha'nsa'mai, i Pilatus naki'na' si si'de kasaba': " I sainu kasibi' ngkumu' dongkaku bulre'n (polro'sa'n), apabo i Barabas manga'se' i Yesus, kasaba' i Cristo ?" ¹⁸ Yoka, kati'ho'anteni Pilatus tou su sa'i'nu lroho', si'de napango'ngkoho'teni Yesus su lri'mane. ¹⁹ Sadanu i Pilatus kahaga'sa'ken ho'mpong-ho'mpong su haho'mpongannu pagagoguta'n, i yangkungne nami'hei tu'hun si sie' kasaba': "Adi'e'i kalri'-kalri'mu'a'n su apamai si Tou TOumata Banar ene'. Yoka, su lrou iye' ateiku nadadi'hatenu o'ngouku naitana' su kagagioNe." ²⁰ Tou manen ingene, mangangi'moho'-mangangi'moho' makati'mbonan bo si'de gagudang-gagudangnu Yahudi napado'nsolro'te su toumata da'kelre' kasaba' mangkelrei si Barabasnu bu'lren bo mamu'no' si Yesus. ²¹ I Gubernur naki'na' si si'de kasaba': " I sainu su salra' si'dedua ene' kasibi' ngkumu' dongka bu'lre'nku su sa'i'nu ngkelre'an ngkumu' ? Bo, si'de nangi'ndo' kasaba': "i Barabas !." ²² I Pilatus nabahi'ga' si si'de kasaba': "Adabo ingene', apanu kalri'mu'a'nku si Yesus, kasaba' i Cristo ? Si'de mayane' nangi'ndo' kasaba': " Gantong i Sie su Salib." ²³ Bo, i Pilatus naki'na' (kasau) kasaba': "Nakudabo i Yesus ? Kadalra'i'an apanu kinalri'muNe ?" Tou manen ingene, si'de tumana' su mango'mbalra'-ngo'mbalra' mangkalre'a'ng kasaba': "Gantong i Sie' su Salib !." ²⁴ Sadanu i Pilatus nakabua tou i sie' ta'yate makapakuda (makato'mbotu), yoka bonsonu toumata da'kelre' mana'humpu'ntenu mamu'ngkaha', i sie' nangalra' ake bo nangu'hasa' lrima'ne su hiba' nsi'de agenu bahi'ga' kasaba': " Iya' ta'ya si sa'lra'ne naitana' su da'ha'ni tou Toumata iye'. Ene' dongka mualri' sa'i' (hu'tuku') ngkumu' (batangen) !." ²⁵ Bo, mayanu toumata ene' nangi'ndo' kasaba': "Daha'Ne dongka poso' si kami' bo su ana'-ana' ngkami'". ²⁶ Pa'lrusu'nu ene', i Pilatus kasaba' namu'lre' si Barabas su sa'i'nu si'de bo sadanu si'de nanya'mbok (namahe'-ma'hese') A'oni Yesus, i Pilatus nango'ngkoho' si Sie' a'ko gantongan su salib. Soldadoni Pilatus Nanado'lra' si Yesus. ²⁷ Pa'lrusu'nu ene', si'de soldadoni Pilatus nani'ngan si Yesus na'konu balreini tou Gubenrnur ene' bo i Pilatus napaha'nsa'nu maya soldadu babukuannu Romawi kasaba' nakati'ku' si Sie'. ²⁸ Si'de napamolro'so'nu lra'kuNe bo pinanu'he'nnu kaya malrambing bung su A'o'Ne. ²⁹ Bo, sadanu si'de nakasu'e'imai nangalri'mu' mahkota lra'dange'n, si'de napama'ke' su ti'mbonanni Yesus, bo napamo'so' lraginu dondohan su lrima ku'a'nenNe, bo si'de naisumpu'huku' su hiba'Ne agenu bahi'ga' te'lrese' kasaba': "Silri' si Dikanu Toumata Yahudi !." ³⁰ Si'de nangu'du' si Sie', nanga'lra' babangkuhu' ene' bo pinamangkuhu' su ti'mbonanNe. ³¹ Sadanu si'de nanelrese' si Sie', si'de napamolroso' kaya malrambing bung ene' bua'nu a'o'ni Yesus, bo napanu'he' kasau agenu lra'ku'Ne, yobo i Sie' nidi'ngan nsi'de na'ko panga'ntong su salib. I Yesus Ginantong su Salib. ³² Sadanu si'de soldado ene' lrimo'a'ngte, si'de nahitoto'nu toumata mahu'a'nei singkatau bua'nu Kirene adenne i Simon. Si'de nanesege' si Simon kasaba' mama'sa'n salibni Yesus. ³³ Bo, sadanu si'de naisupu'mai su tampa adenne Golgota, kasaba' "Tampanu Tengkorak", ³⁴ si'de nami'hei si Sie' anggur inuman pinahi'lra'u agenu pudu'nu tuma'-talra', bo sadanu i Sie' nangana'ngmai, i Sie' kasaba' ta'ya nangi'nung inuman ene'. ³⁵ Sadanu si'de napanga'ntongteni Yesus su salib, si'de kasaba' napata'ti'aha'nu lra'ku'Ne su salra' nsi'de agenu nalro'mbo dadu. ³⁶ Pa'lrusu'nu ene', si'de himo'mpong-ho'mpong naha'pa' si Sie' su sene'. ³⁷ Bo, su ti'mbounu ti'mbonanNe si'de namo'so' bo'basa' egenu bo'he'ne' kasaba': "IYE'TENU I YESUS I DIKANU TOUMATA YAHUDI." ³⁸ Singkako'a, pai lragi dua-ngkatau toumata dalrai kasaba' gantongan lragi su salib age'Ne. Singkatau su ku'a'ne'nNe bo singkatau su ku'ihi'Ne. ³⁹ Bo, toumata-toumata lrimi'mpa su sene' kasaba' nadado'lra' si Sie' agenu si'de napakakilri'ngmai ⁴⁰ bo naba'hi'ga' kasaba': "I Kaunu mapaha'ka'nu Sinagoganu Mabuduata bo mapabango'nne kasau su hu'a'ngnu tulru' lrou, intabo pasalra'mata'kennu A'o' mbatangen ! Adabo i Kau tanga'-tangada' Ana'nu Mabuduata, i'ntuhu'te bua'nu salib ene' !". ⁴¹ Ingene lragi si'de mangangi'moho'-mangangi'moho' makati'mbonan, agenu papandei-papandeinu Torat bo si'de gagudang-gagudangnu Yahudi kasaba' nane'lrese' si Yesus, agenu bahi'ga' nsi'de kasaba': ⁴² "I Sie' napasalra'mata'nu toumata ba'lrine', tou i Sie' ta'ya makasalra'matanu A'o mbatangen. Adabo i Sie' kasaba' i Dikanu Israel, intabo i'ntuhu'te bua'nu salib ene' su galre'-galre' i kaene'nu kite' dongka mamarca'ya si Sie'." ⁴³ I Sie' namarca'yate su Mabuduata, ingenebo pabaya'te yoka dongka Mabuduatanu mapasalra'mata' si Sie', adabo Mabuduatanu makako'a si Sie'. Yoka i Sie' su pasingkataumainu nangu'lri' tou i Sie' kasaba' "Ana'nu Mabuduata". ⁴⁴ Duangkatau toumata dalrai gina'ntong ageni Yesus lragi kasaba' nane'lrese' si Sie'. Kinapate'anni Yesus. ⁴⁵ Su galre'-galre' i, bua'nu pu'kulru' nung naida'o su pu'kulru' siou madalri, nakati'ku' su tampa ene' kasaba' lri'mi' kapasa'. ⁴⁶ Sadanu maida'omai su pu'kulru' siou, i Yesus nakaku'i age'nu pu'lrung malre'a'ng kasaba': " Eli, Eli, Lama Sabakhtani ?" kasaba' : " Mabuduata-Ku, MabuduataKu, nakudabo i Kau nani'ndenan si Sia ?" ⁴⁷ Bo, manenpi'da su salra' nsi'de tenge'-tengede' su sene' sadanu nakadi'ngihi' apanu pinaba'higa'Ne, si'de nangu'lri' " TOUmata iye' kahaga'sa'nu mamokei si Elia." ⁴⁸ Singkakoa, singkatau bua' nsi'de kasaba' simoha' bo nanga'lra' bungangnu buhi'asa', ene' nilrabu'nu anggur malrising, bo pinangi'ki su po'ndolro'nu saso'gelre' (dondohan), yobo pinangi'nung si Yesus. ⁴⁹ Tou manen ingene, toumata ba'lrine' su sene' nabo'ka' kasaba': " Botebo kite sumelrei apabo i Elia dongka nao mapasalra'mata' si Sie'." ⁵⁰ Bo, i Yesus nakakui ka'pasa'ken agenu pulru'ng malre'a'ng bo napamo'so'nu MaindotoNe. ⁵¹ Bo, selrei, lralra'benu lro'a'ng su hu'a'ngnu Sinagoganu Mabuduata kasaba' nagehe' nu'alri' dua mpalri', bua'nu ti'mboune naidao su a'lrungne, bo tana' bo lrangi kimo'koho', bo batu-batu nabaka'. ⁵² Palralribingan-palralribingan kasaba' nabi'ka', bo nga'sa' bi'hu'anu toumata-toumata lro'ada nateite nabi'aha' kasau. ⁵³ Bo, sadanu si'de lrimo'a'ng bua'nu lribing-lribing ene', pa'lrusu'nu kinabi'ahe'nni Yesus, si'de kasaba' simu' su Banua lro'ada' bo napakiselreinu a'o' nsi'de su nga'sa' toumata su Banua Lro'ada' ene'. ⁵⁴ Su galre'-galre' i, i tou makati'mbonannu soldado, bo si'de ha'nusu' mahaha'pa' agene kasaba' nagapa' bi'hu'anu Yesus, sadanu si'de nakabua dinuhu' madapa' bo apanu nua'lri' su ti'ku'ne, si'de kasaba' kinaboho'kantenu taku' tumani bo nabahi'ga' kasaba': "Tanga'-tangada' i Sie' kasaba' Ana'nu Mabuduata !". ⁵⁵ Su sene' pai lragi nga'sa' babi'nei kasaba' napakaselreimai bua'nu madau, si'de hanusu' tuma'-tu'hu'ni Yesus bua'nu Galilea yoka mananu'su' si Sie'. ⁵⁶ Su salra' nsi'de pai i Maria Magdalena, i Maria mamani Yakobus bo i Yusuf, yobo i mamanu ana'-ana'ni Zebedeus. I Yesus Nilribi'ng. ⁵⁷ Sadanu matanulrou dume'ke'tenu hibi', kasaba' naisupu' toumata singkatau maho'ko' bua'nu Arimatea adenne i Yusuf, kasaba' i sie' nua'lri'te lragi tuma'-tu'hu'ni Yesus. ⁵⁸ i sie' na'koni Pilatus bo nangkelrei bihu'a'ni Yesus. Senebo, i Pilatus nami'hei parenta palretene' a'o'ni Yesus (bihu'a'Ne) kasaba' bi'hei si Yusuf. ⁵⁹ Bo, i Yusuf nanga'lra' bihu'ani Yesus, tinu'kusu'Ne agenu heka linen mabida binokou, ⁶⁰ bo napaba'tede'Ne su hu'a'ngnu palralribingan buhu', a'pede' mbatangen (i Yusuf), kasaba' kinalri'mu'nete bua'nu nakalri' bu'kidi'nu batu su sene. Senebo, i Yusuf nalri'ngkei batu bagai insau pinanu'lrubu' su haha'mpede'nu palralribingan batu ene' bo nati'mbusu'. ⁶¹ Bo, su sene', kasaba' pai lragi i Maria Magdalena bo i Maria ba'lrine' kahaga'sa'nu ho'mpong-ho'mpong su kasaduanennu palralribingan ene'. Palralribi'nganni Yesus Kasaba' Nihapa'nnu Toumata. ⁶² Su lrou tahibi'mai, naitana' su lrou pa'lrusu'nu napanebeinu Sabat, mangangi'moho'-mangangi'moho' makatimbonan bo toumata-toumatanu Farisi kasaba' pinaha'nsa' ha su hiba'ni Pilatus. ⁶³ Si'de nabahi'ga' kasaba': " Gudangne, kami nakata'hundu'ng su apanu pinabahi'ga'teni tou magau ene' du'ngkulru'nu i Sie' bi'aha'ken, i Sie' nangu'lri' kasaba': "tou pa'lrusu'nu tulru' lroumai, IYa' dongka mabi'aha' kasau." ⁶⁴ Ingenebo, bihei parenta palretene' palralribingan ene' pai mahaha'pa'ne maida'o su lrou katulru'ne, adi'e'i bo si'de tuma'-tu'hu' tuma'-tu'hu'Ne dongka nai manekoso' bihu'a'Ne, bo si'de mapalrilring su nga'sa' toumata kasaba' : " I Sie' nabi'aha'te bua'nu salra'nu toumata natei." Bo, kulre'hi' su samudi'ne iye' dongka mualri' mangkada'lrai bua'nu kulre'hi' su po'nane'," ⁶⁵ I Pilatus nabo'ka' si si'de kasaba': "Kumu' pai mahaha'pa'. A'ko bo hapa'i su kagagionu kati'ho'an ngkumu'." ⁶⁶ Yo, si'de na'ko naha'pa' palralribingan ene' agenu singko'mpolro'nu (simbatalionnu) mahaha'pa', yobo nanegel batu tatulrubu'nu palralribingan ene'.