Su Kagagionu Kinabi'ahe'nni Yesus ¹ Su galre'-galre' i, pa'lrusu'nu Sabat, su mahimalro'uken, naitana' su lrou sa'humpu'nnu misa' ene, i Maria Magdalena bo i Maria ba'lrine' kasaba' na'ko timando' su palralribinganni Yesus. ² Bo, singkabua, pai di'nuhu' madapa' yoka i tou toumatanu kalrutuan kasaba' ni'ntuhu' bua'nu dompakon, sinai bo nalri'ngkei tatulrubu'nu lribing ene', bo himo'mpong su ti'mboune. ³ Duhu'ne o'ngkamai ki'lra' bo lra'ku'ne mabi'da o'ngkamai salju. ⁴ Yoka kinaboho'ka'ntenu ta'ku'ne, si'de mahaha'pa' ene' kasaba' nabulre' bo naisummpu'huku' su tana' o'ngkamai toumata-toumata natei. ⁵ Bo, i tou toumatanu kalrutuan ene' nabahi'ga' su si'de babinei-babi'nei ene' kasaba': " Adi'e'i tuma'ku'-ta'ku' yoka iya' mati'ho' tou kumu' mande'a si Yesus kasaba' gina'ntong natei su salib ene'. ⁶ Iya' ta'ya pai su sie' yoka i Sie' nabi'aha'te kasaba' nantu'hu' su o'ngkamai bahi'ga'Ne. Botebo selrei, tampa pinaba'teha'nnu A'oNe. ⁷ Ha'go'te pati'mbusu' bo pakitato'n su tuma'tu'hu' tuma'-tu'hu'Ne tou i Sie' nabi'aha'te kasau bua' salra'nu toumata natei, bo selrei, i Sie' kasaba' namo'nate si kumu' na'kunu Galilea. Su sene' kumu' dongka mahisabu' ageNe. Tahu'-tahu'numai, iya' nangu'lri'te kagagionu ene' si kamu'. ⁸ Bo, si'de nanahi'oko'tenu nani'ndenan palralribingan ene' agenu ta'ku' bo lri'aga'ne tumani; bo naha'hi' na'ko napa'ida'o su tuma'-tu'hu' tuma'-tu'hu'Ne. ⁹ Bo, selrei, i Yesus kasaba' nahisa'bu age nsi'de bo nabaha'gi' kasaba': "Silri' !." Senebo, si'de sinaini Yesus, nambelre'n ti'lro'Ne, bo nasu'ba su hiba'Ne. ¹⁰ Pa'lrusu'nu ene', i Yesus nabo'ka' si si'de kasaba': " Adi'e'i tuma'ku'-ta'ku'; a'kote bo paida'ote su taha'na'-taha'na'Ku kasaba' a'kotenu Galilea, bo su sene' si'de dangka makabua si Sia'." Si'de Mahaha'pa'nu Palralribingan Kasaba' Bini'ha'n Do'iti' su Sa'i'nu Manggau. ¹¹ Kahaga'sa'nu si'de nati'mbusu', manenpi'da mahaha'pa' na'konu Banua bo napai'da'o su mangangi'moho'-mangangi'moho' makati'mbonan kasaba' maya apamainu nu'alri'te. ¹² Bo, sadanu si'de pinaha'nsa'nu si'de gagudang-gagudangnu Yahudi, bo nabahi'-bahi'ga', si'de kasaba' nami'hei nga'sa' do'iti' su si'de mahaha'pa' ene', ¹³ agenu tu'hu'n kasaba': " Pangu'lri'te (su toumata), tou Tuma'-tu'hu' tuma'-tu'hu'ni Yesus su tolro'adanu hibi' sinaite bo nane'koso' bihu'aNe sangkungnu kumu' tiki'-tiki'ken." ¹⁴ Bo, adabo apamainu iye' kasaba' kadi'ngihi'ni Gubernur, kami' dongka mapatotogo'nu tu'hun mapi'a' bo mapakalri'mu' si kumu' su kagagionu ta'yamai si ta'ku'ne." ¹⁵ Senebo, si'de nakade'a do'iti' ene' bo nangalri'mu' su apanu o'ngkamai pinatu'ntu' si si'de; bo bahi'ga' ene' kasaba' nailrilring su salra'nu toumata-toumatanu Yahudi putu'nu lrou iye'. Parenta Malrangkasa'ni Yesus. ¹⁶ Pa'lrusu'nu ene', si'de mapulro'-sa' tuma'-tu'hu'Ne na'konu Galilea, naitotolro' su bu'kidi' su o'ngkamai tu'hunNe si si'de. ¹⁷ Sadanu si'de nahisabu'temai ageNe, si'de nasu'ba si Sie'. Tou manen ingene, manenpi'da su salra' nsi'de kasaba' kimata' (ta'ya namarca'ya). ¹⁸ Senebo, i Yesus lrima'pa' bo nabahi'ga' si si'de kasaba': " Maya kaha'mata' bini'heiteni YamaKu si Sia', bo ene' naha'mpei su dompakon manga'se' su tana' bo lrangi. ¹⁹ Ingenebo, kumu' a'kote bo kalri'mu'te maya bangsa mu'alri' tuma'-tu'hu'Ku, bo saha'ni'a'ite si'de su hu'a'ngnu adenni: Yama, nu Ana', bo ni Maindoto'Ne. ²⁰ Patu'ntu'aimai si si'de su kagagionu tumu'hu' su maya apanu pinarentaKute si kumu'; bo selereite, IYa' tumana' su mahaha'ge' age ngkumu', maida'o su po'ndolro'nu dunia." [[ayt.co/Mat]]