Babi'nei Dodionu U'to' Malrumu' Bo Matimumun 1 " Pa'lrusu'nu ene', Komalriginu Dompakon pinasi'ndigi' su o'ngkamai mapulro' babi'nei dodio kasaba' su pasingkataumai nani'ngan soga-soga nsi'de bo na'ko nahisabu' ageni tou brenegom mahu'a'nei. 2 Lri'ma ngkatau su salra' nsi'de kasaba' u'to' malrumu', bo lri'ma ngkatau ba'lrine' kasaba' matimumun. 3 Sadanu si'de ha'nusu' u'to' malrumu' ene' kahaga'sa'tenu pakou-pakou soga-soga nsi'de, si'de kasaba' ta'ya napabalru'n agenu lra'na magana'ng . 4 Manen ingene, si'de ha'nusu' babi'nei dodio matimumun kasaba' napaba'lru'nnu lra'na magana'ng su hu'a'ngnu bo'tolro' kokonia age nsi'de, naihampei agenu lra'na magana'ng su hu'a'ngnu soga-soga nsi'de su pasingkataunemai. 5 Su galre'-galre' i, sadanu i tou brenegom mahu'a'nei ene' napao'ndolro'nu lrou kaa'ko'nne, si'de mayane' kinabo'hoka'ntenu madandu'a'n (tampa-ti'ki) bo nati'ki'te. 6 Manen ingene, su tolro'a'damainu hibi' kasaba' pai pulrungnu toumata nagu'ang, nangu'lri': "I tou brenegomnu mahu'a'nei naisupu'te ! Lro'a'ngte kumu' maya mano'maha' si sie' ! 7 Pa'lrusu'nu ene', maya babi'nei dodio ene' nabangon bo napade'ke'nu soga-soga (so'lro'-so'lro') nsi'de. 8 Bo, ha'nusu' si'de u'to' malrumu' nabahi'ga' su si'de ha'nusu' matimumun kasaba': " Bi'heiken nai si kami' lrana' kodio yoka soga-soga ngkami' mana'humpu'ntenu mapada'." 9 Tou manen ingene', si'de ha'nusu' babi'nei dodio matimumum nangi'ndo' kasaba': "Do'i', yoka lrana' ngkami' ta'yate makatu'ku' si kami' bo si kumu'. Pi'a'ne, kumu' a'kotenu tampanu mababa'lru'nu lra'na bo palruan su sene' palretene' ene' dongka makatuku' su soga-soga ngkumu'. 10 Kahaga'sa'kennu si'de na'ko nalruan lra'na, i tou brenegom mahu'a'nei ene' naisupu'te, bo si'de ha'nusu' babinei dodio matimumun napata'kede'tenu a'o' nsi'de kasaba' simu' nahinsihe'a'n agene su hu'a'ngnu tampa pakabi'ngan bo haha'mpede'nu tampa pakabi'ngan ene' kasaba' tinu'lrubu'te ha. 11 Pa'lrusu'nu ene', si'de ha'nusu' u'to' malrumu' naisupu'te no nangkelrei kasaba': "gudangne, gudangne ! Bi'ka'ken haha'mpede' si kami". 12 Tou manen ingene, i sie' nangi'ndo' kasaba': " Tanga'-tangada' iya' mangu'lri' si kumu', tou iya' ta'ya makaki'lra'lra' si kumu." 13 Tou ingenebo, kumu' galre'te mana'kede' (mahingga'pa'en) yoka kumu' ta'ya mati'ho'nu lrou ka'a'ko'n naoni tou brenegom mahu'a'nei ene'." Si'ndigi' Kagagionu Mananusu' Tatulru'. 14 " Yoka, Komalrigi'nu Dompakon kasaba' o'ngkamai toumata singkatau na'ko simengko' su Banua ba'lrine', bo su po'nanu i sie' mani'ndenanmai, i sie' namokei su si'de a'i'ngka'-a'i'ngka'ne bo napatulrau'nu maya a'pede'ne si si'de. 15 Su singkatau, i sie' kasaba' nami'hei lri'ma (5) Talenta. Su ba'lrine' i sie' nami'hei dadua (2) Talenta, bo si tou singkatau ba'lrine' i sie' nami'hei sintalenta (1). Ti'a'nu apanu bini'heine ene' kasaba' mantu'hu' su kasukun nsi'de su pasingkataune. Senebo i sie' na'ko simengko su Banua ba'lrine'. 16 I tou nakade'a lri'ma (5) Talenta ene' galre' na'ko napalra'mpa'ngnu Talentane ene', bo i sie' kasaba' kinadu'hange'n agenu lri'ma (5) Talenta ba'lrine'. 17 Ingene lragi i tou nakade'a dadua (2) Talenta, i sie' kasaba' nakapangi'banu (kinadu'hangennu) dadua (2) Telenta ba'lrine'. 18 Tou manen ingene, i tou singkatau galre' nakade'a insau (1) Talenta ene', i sie' galre' naka'lri' po'mpong su tanah, bo tinu'mbu'nne (nide'sone) su sene'. 19 Manenpi'da lrou napa'lrusu'mai, i tou makatagu'a'n si si'de a'i'ngka'-a'i'ngka'ne ene' naisupu' bo nahi'hahe'ken age nsi'de. 20 I tou singkatau nakade'a lri'ma Talenta ene' sinai nahisabu' bo nahi'hahe'ken ageni tou makatagu'a'n kasaba' i sie' nani'ngante lri'ma (5) Talenta ba'lrine', agenu bahi'ga'ne kasaba': "Gudangne, i kau nami'hei si sia' lri'ma Talenta. Selreite, iya' nakapandu'hangtenu lri'ma (5) Talenta ba'lrine'. 21 I tou makatagu'a'n nabo'ka' si sie' kasaba': "Ene mapi'a' tumani, i kau kasaba' a'i'ngka'ku mapi'a' bo masusui. I kau kasaba' masusui su apamai-apamainu kokonio, ingenebo i kau dongka ki'a'ngenku mapaa'toho'nu nga'sa'nu apamai, su'te su hu'a'ngne agenu lri'agani tou makatagu'an si kau." 22 Bo, i tou singkatau nakade'a dadua Talenta kasaba' simadu' lragi agenu bahi'ga' kasaba': "Gudangne, i kau nami'hei si sia; dadua Talenta. Selreite, iya kinadu'hange'nte agenu dadua Talenta ba'lrine'." 23 I tou makatagu'anne nangi'ndo' kasaba': " Mapi'a' tumani, i kau kasaba' a'i'ngka' mapi'a' bo masusui. Yoka i kau masusui su apamai-apamainu kokonio, iya' dongka mangi'a'ng si kau mapato'ndo'nu apamainu da'kelre', su'te su hu'a'ngne agenu lri'a'gani tou makatagu'a'n si kau." 24 Pa'lrusu'nu ene', i tou singkatau nakade'a insau (1) Talenta simadu' lragi si tou makatagu'a'nne agenu bahi'ga' kasaba': "Gudangne, iya' mati'ho' tou i kau kasaba' toumata ta'ya si gilridi'ne, yoka i kau mama'ntasa' su tampa kasaba' ta'yamai pinasamboyannu agenu mbene. 25 Yoka enebo, iya' mataku', bo galre' na'ko napaka'lri'nu Talentanu su hu'a'ngnu tana'. Selreite, yoka i kau dongka makade'a bua'nu apamainu a'pede'nu." 26 Manen ingene, i tou makatagu'a'n si sie' nangi'ndo' si sie' kasaba': "I kau a'i'ngka' dalrai bo ta'ya makaha'ga' (malas) ! I kau mati'ho' tou iya' dongka mama'ntasa' su tampa-tampa kasaba' ta'yakumai pinasamboyannu mbene. 27 Yoka ingenebo, bo'bodo'ne i kau galre'te mande'so do'iti'ku su bank bo palretene' sadanu iya' nabeitemai, iya' dongka makadea kasau do'iti' a'pede'ku agenu dadu'hangne. 28 A'lra'te insau (1) Talenta ene' bua'ni sie' bo ene' dongka pandu'hang si tou singkatau kasaba' nakade'a'te mapulro' (10) Talenta ene'. 29 Yoka, hunti'a'nu toumata nakatagu'a'nte dongka duha'ngen, bo i sie' kasaba' dongka makade'a i'dopo' maheme'. Tou manen ingene, bua'ni tou singkatau ta'yamai nakatagu'a'n, apanu paite si sie' kasaba' dongka a'lra'e'n bo bi'hei su ba'lrine'. 30 Pamalrengte i tou a'i'ngka kasaba' ta'ya sikatana'nne ene' su hu'a'ngnu po'mpong malri' tumani (Hadesh). Su tampa ene' kasaba' dongka pai ka'ha' bo mapakahi'so'nu isi'." Pagagoguta'n Ana'nu Toumata. 31 "Sadanu Ana'nu TOUmata sinao agenu tinanumanNe bo agenu si'de toumata-toumatanu dompakonNe, i Sie' kasaba' dongka humo'mpong su Komalrigi'nu tinanumanNe. 32 Maya bangsa dongka pahahi'mung su hiba'Ne, bo i Sie' dongka mapaha'e' si si'de su pasingkataumai, o'ngkamai i tou mangangi'moho' mapaha'e'nu domba bua'nu be'mbe-bembe'. 33 Bo, I Sie' dongka mapamo'so'nu domba-domba su kuanenNe, bo bembe--bembe su ku'i'hi'Ne. 34 Senebo i Dika dongka mabahi'ga' si si'de ha'nusu' naiha'e su kuanenNe kasaba': "Botete, kumu' ha'nusu' kina'mpete'teni YamaKu, tagu'a'neite Komalrigi' kasaba' pinata'kede'te si kumu' bua'nu sa'humpu'nkennu dunia. 35 Yoka du'ngkulru'nu i IYa' mahu'tung, kumu' nami'hei kaka'nen si Sia'. Du'ngkulru'nu IYa' madou, kumu' nami'hei inuman si Sia'. Du'ngkulru'nu IYa' naisupu' su Banua' ngkumu', kumu' namihei patulra'u'an si Sia'. 36 Bo du'ngkulru'nu IYa' lrantoi, kumu' napagilra'ku'nu A'O'Ku, bo du'ngkulru'nu Iya' masaki', kumu' na'ko timando' si Sia'. Yobo du'ngkulru'nu IYa' su hahe'po'a'n, kumu' sinai simelrei si Sia'. " 37 Senebo, toumata-toumata banar ene' dongka mangi'ndo' si Sie' kasaba': "Mabu, nge'den kami' nakabua si Kau mahu'tung bo nami'hei si Kau kaka'nen, manga'se' i Kau madou bo bini'han kami'nu ake ? 38 Nge'den kami' nakabua si Kau nu'alri' lrupu' bo ta'ya napasu'si Kau su balrei, manga'se' nakabua si Kau lrantoi bo pinanu'he'n ngkami agenu lra'ku' ? 39 Nge'de'n kami' nakabua si Kau masaki' manga'se' simu'su hahe'po'a'n bo kami' kasaba' sinaini Kau ? 40 I Dika ene' dongka mangi'ndo' kasaba': " IYa mangu'lri'nu tutu'ne si kumu', kasaba' su o'ngkamai kumu' napakalri'mu'te su singkatau bua'nu sinage'-sinage'Ku ha'nusu' mangkakokonio iye', ene' kasaba' mapada'-pada' agenu apamainu pinakalri'mu'te ngkumu' si Sia'." 41 Pa'lrusu'nu ene', Iya' dongka mabahi'ga' lragi su si'de ha'nusu' nasisei su ku'a'nenKu kasaba': " Ta'lrangte kumu' bua'nu hongo'-hongo'a'nKu, yoka kumu' kasaba' kinabo'boho'te, bo dongka pamalre'ng su hu'angnu hembangnu putung ta'yamai si a'kaha'ne, yoka tampa ene' kasaba' pinata'kede'te si bihisi' bo si'de ha'nusu' toumata-toumata tuma'-tu'hu'ni bihisi'. 42 Yoka, du'ngkulru'nu Iya' mahu'tung kumu' ta'yamai nami'hei si Sia' kaka'nen, bo dungkulru'nu Iya' madou kumu' ta'yamai nami'hei si Sia' inuman. 43 Du'ngkulru'nu IYa' naisupu' su Banua ngkumu', kumu' ta'yamai nami'hei si Sia' patulra'u'a'n; bo du'ngkulru'nu IYa' lrimantoite kumu' ta'yamainu napalra'ku'nu A'o'Ku; du'ngkulru'nu IYa' masaki bo simu' su hahe'po'a'n, kumu' ta'yamai na'ko timando' si Sia'." 44 Pa'lrusu'nu ene', si'de lragi dongka mangi'ndo' kasaba': "Mabu, nge'den kami nakabua si Kau mahu'tung manga'se' mado'u, manga'se' o'ngkamai toumata ba'lrine', manga'se' masa'ki', manga'se' lrimantoite, manga'se' nihe'po' bo kami' kasaba' ta'ya nanusu' si Kau ?" 45 Senebo, i Sie' dongka mangi'ndo' si si'de kasaba': "Iya mangu'lri'nu tanga'-tangada' si kumu', kasaba' su o'ngkamainu kumu' ta'yamai nanga'lri'mu' su singkatau bua'nu salra' nsi'de toumata ingkakonio iye', ene' lragi kasaba' ta'yamai kinalri'mu' ngkumu' si Sia". 46 Bo, si'de iye' kasaba' dongka ma'konu hu'a'ngnu hahe'po'a'n ta'yamai si a'kaha'ne, yoka ha'nusu' toumata-toumatanu banar kasaba' dongka sumu' su tampa kabi'a'hen su ta'yamai si a'kaha'ne."