LRILRINGNI YESUS SU KAGAGIONU PO'NDOLRO'NU DUNIA Kasaba' Sinagoganu Mabuduata Dongka Gogahe'n ¹ I Yesus lri'mo'a'ngmai bua'nu Sinagoganu Mabuduata bo nati'mbusu' sadanu si'de tuma'-tu'huNe' sinaitenu napakiselrei kagagionu babangonan-babangonannu Sinagoganu Mabuduata si Sie'. ² Bo, i Sie' naki'na' si si'de kasaba': "Apabo kumu' ta'ya nakapa'tese' mayanu apamainu iye ?' IYa' mapai'da'o'nu tu'tu'ne si kumu' kasaba' ta'yamai si insaunu batu-batu iye' nahilralru'sudu'ken su pasii'nsaumai, kasaba' ta'yamai kago'gaha'." Sa'humpu'nnu Kadadi'ha'n. ³ Bo, sadanu i Yesus ho'mpong-ho'mpong su ti'mbounu Bu'kidi'nu Zaitun, tuma'-tu'hu' tuma'-tu'hu'Ne sinaini Sie' su pasingkataune agenu bahi'ga' kasaba': "Pabahi'ga'te si kami, ngeden apamai-apamainu ene' dongka mu'a'lri' bo apanu bo'basa'nenu dongka mu'alri' su lrou kaa'konNu kasau su po'ndolro'nu dunia iye' ?" ⁴ I Yesus nangi'ndo' si si'de kasaba': "Pakatarukira palretene' adi'e'i pai toumata mapalre'ngko si kumu'. ⁵ Yoka, nga'sa'nu toumata dongka lrumotou mapanga'ku'nu adenKu bo mabo'ka'nu kasaba': " Iya' i Cristo", bo si'de dongka mapalre'ngkonu nga'sa' toumata. ⁶ Kumu' dongka makadi'ngihi' pahibabuku'a'nen bo lrilring-lrilringnu babukuan. Patesai pakapi'a' ene' palretene' kumu' ta'yamai kaboho'kannu ta'ku' yoka apamai-apamainu iye' galre'te mua'lri', tou iye' kasaba' ta'yaken si ka'a'kahe'nne. ⁷ Yoka, bangka dongka lrumotou mabu'ku'a'n agenu bangsa ba'lrine', bo komalrigi' dongka hinti'mpalren agenu komalrigi' balrine', bo su manenpi'da tampa dongka pai kata'yannu kaka'nen bo kasampuhannu di'nuhu'. ⁸ Mayane' iye' kasaba' buhu sa'humpu'nnu kadadi'hannu o'ngkamai babi'nei masaki'nu mapaba'ntehe'nu ana'. ⁹ Pa'lrusu'nu ene', si'de dongka mapami'hei si kumu' su lrubagen madadi'ha, bo dongka mamu'no' si kumu, bo kumu' dongka nidi'ntingannu maya bangsa yoka su sa'i'nu adenKu. ¹⁰ Du'ngkulru'nu ene', nga'sa'nu dongka maitada', bo dongka hi'nto'ngkoha'nnu a'o' mbatangen, bo dongka hindi'ntingan su pasingkataumai. ¹¹ Nga'sa'nu mababa'lro' mangkedo dongka lrumotou bo mapalre'ngko'nu nga'sa' toumata. ¹² Yoka, kasa'lran ngkite kasaba' dongka mangi'ba-ngi'ba, bo gi'lridi' lrobo'-lrobo'nu toumata dongka mu'alri' dalri'nding. ¹³ Tou manen ingene', i sainu toumata kasaba' nakahada'n naida'o su a'kaha'ne dongka pasalra'mata'. ¹⁴ Bo, Injilnu Komalrigi' iye' dongka palrilring maida'o' su po'ndolro'nu dunia yoka su sa'i'nu mapasa'hidi' su maya bangsa, bo pa'lrusu'nu ene' dongka kadunga'ennu a'kaha'ne. Lrounu Kadadi'ha'n Lra'mo' bo Kasupu'a'nnu Cristo-Cristo Mangkedo. ¹⁵ " Yo, adabo kumu' nakabuate si tou mamamu'no' bengis, o'ngkamai apanu pinabahi'ga'teni Mababa'lro' i Daniel, kasaba' time'ngede'te su tampa lro'a'da, intabo kumu' nakabaca'te bahi'ga' iye' galre'te manilrigi'ne, ¹⁶ bo si'de ha'nusu' nakabanuate su Yehuda galre'te mahah'hi' (manyi'ngkir) ma'konu bulrudu'. ¹⁷ Bo i sainu pai su kokabo'nnu balrei, adi'e'ite mi'ntuhu' ma'ko manga'lra' apamai su hu'a'ngnu balreine. ¹⁸ I sainu pai su sangkoi, adi'e'ite mabei ma'ko manga'lra' kaya' malra'mbingne. ¹⁹ Manen ingene, nabodi'to'te si'de ha'nusu' babinei mahu'ngku' bo si'de ha'nusu' mapasusukennu ana'ne kasaba' naitana'ken su lrou-lrou masu'kada' ene'. ²⁰ Pango'mpu'te palretene' lrou su pahahi'a'n ngkumu' ta'ya maitana' su o'lrasa'nu madalri'nding manga'se' maitana' su lrounu Sabat. ²¹ Yoka pa'lrusu'nu ene' dongka maitana' su o'lrasa'nu kadadi'ha'n mabaha', o'ngkamai ta'yaken nu'a'lri' bua'nu sa'humpu'nnu dunia maida'o su putu'nu lrou iye', bo ta'yakenmainu mu'a'lri' kasau. ²² Bo, adabo lrou-lrou ene' kasaba' ta'ya pine'deke', ta'yamai si insaunumai toumata masalra'mata'. Manen ingene', su sa'i'nu si'de ha'nusu' kinapi'lre', lrou-lrou ene' dongka pinape'deke'. ²³ Pa'lrusu'nu ene', adabo pai singkatau mangu'lri' si kumu' kasaba': "Selrei, i Cristo pai su su sie'", manga'se' " i Sie' pai su sene' ", adi'e'i mamarca'ya si sie'. ²⁴ Yoka, dongka lrumotou nga'sa' cristo-cristo mangkedo bo mababa'lro'-mababa'lro' mangkedo yobo si'de dongka mapakiselreinu bo'basa'-bo'basa'nu kaha'mata'-kaha'mata' palretene' mapalre'ngkonu toumata, bo bo'bodo'ne ene' maiha'mpei su si'de ha'nusu' kinapi'lre'tenu Mabu. ²⁵ Pakatarukira, yoka IYa' napangu'lri'te si kumu' bua'nu po'naken. ²⁶ Yo, adabo si'de mangu'lri' si kumu' kasaba': "Selrei, IYa' pai su ata'hennu lrabanen", adi'e'i ma'ko-ma'konu ene', manga'se' "Selrei, IYa' pai su hu'a'ngnu kamar ene' " , adi'e'i mamarca'ya su bahi'ga' nsi'de. ²⁷ Yoka, o'ngkamai ki'lra' kumeda' bua'nu Ti'muhu' (Sabangennu Matalrou) bo suma'hansa'ng maida'o' su Sadaen, ingene lragi ka'a'ko'n naonu Ana'nu Toumata kasaba' dongka mu'a'lri' su kasaduanen. ²⁸ Su apanu tampa pai kinapate'an su sene' kasaba' Tumatalra'nu Nasar dongka maha'nsa'." Kaa'ko'n Na'o Ana'nu Toumata. ²⁹ "Su galre'-galre' i, napa'lrusu'mainu kadadi'ha'n ene' kasaba' "Matanulrou dongka lrumi', bo bulran ta'tete mapalrotounu sa'hansa'ngne, malrampitei-malrampitei dongka makekelre' bua'nu lrangi, bo kaha'mata'-kaha'mata' su lrangi dongka kumo'koho'." Bukni Yesaya 13: 10; 34: 4. ³⁰ Yo, bo'basa'ni tou Ana'nu TOUmata dongka lrumotou su lrangi bo Taha'na'-Taha'na'nu tana' bo lrangi dongka kuma'-kaha' si Sie'. Si'de dongka makabua si tou Ana'nu TOUmata kasaba' sinaonu binaba'-binaba' bua'nu lrangi' agenu kaha'mata' bo tinanuman kalra'mo'. ³¹ Bo, i Sie' dongka mangi'ngka toumata-toumatanu kalrutu'anNe agenu pu'lrungnu trompet malre'a'ng, bo si'de dongka mapaha'nsa'nu Eklezia pini'lre'Nete bua'nu mpa'nu matanu pi'pihi'nu Globe, kasaba' bua'nu po'ndolro'nu lrangi insau maida'o su po'ndolro'nu lrangi ba'lrine'. ³² Su galre'-galre' i, kumu' patu'ntu'te su si'ndigi'nu mpu-kayunu Ara sadanu mayanu hanga'-hanga'ne lrimomeite bo daung-daungne napalrotoutenu hosou, kumu' mati'ho' tou o'lrasa'nu hume'ge'ne kasaba' malrapa'te. ³³ Ingene lragi sadanu kumu' nakabuate mayane' iye', kumu' nati'ho'te tou i Sie' kasaba' malrapa'te, paite su kasaduanennu haha'mpede'. ³⁴ Tanga'-tangada', IYa' mangu'lri' si kumu' tou kitingnu taha'na' iye' kasaba' ta'ya mati'mbusu' maida'o' su maya apamainu iye' mua'lri'. ³⁵ Lrangi bo Bumi dongka mata'ya, tou kaolro-kaolro'Ku kasaba' ta'yamai mata'ya." Lrounu Kaa'ko'n Ana'nu TOUmata. ³⁶ "Tou manen ingene, kagagionu lrou bo ko'ti'nu kaa'ko'nNe nao su binaba', kasaba' ta'ya si insaunemainu mati'ho', naiha'mpei su si'de toumata-toumatanu kalrutuan su dompakon lragi kasaba' ta'yamainu mati'ho', i Tou Ana' kasaba' ta'ya lragi mati'ho', tou diming galre' i YamaKunu Mati'ho'. ³⁷ Mapada'-pada'nu o'ngkamai apanu nu'alri' su o'lrasa'ni Bababa'lro'ni NUh, ingene lraginu mu'a'lri' su lrou ka'a'ko'n naonu Ana'nu Toumata. ³⁸ Yoka, o'ngkamai su po'nanu lrou-lrou kinasa'mpelra'nnu dalrukun lra'mo', toumata kasaba' galre' kimaka'n bo mangangi'nung, maha'me' bo niha'me'an, mai'da'o' su lrou i Nuh simu' su hu'a'ngnu palrahe'n lramo' (Ba'terah). ³⁹ Bo, si'de kasaba' ta'yamai makasilrigi'ne nai'da'o' su kinasampelrantenu dalrukun lra'mo' bo napapo'go'nu mayane'; ingene lraginu dongka mu'a'lri' su lrou kaa'ko'n naoni Tou Ana'nu TOUmata. ⁴⁰ Pa'lrusu'nu ene', dongka pai dua-ngkatau su sangkoi; singkatau kasaba' dongka alra'en bo singkatau ba'lrine' kasaba' dongka matulrau. ⁴¹ Babi'nei dua-ngkatau kahaga'sa'nu manggiling bokan su batu kilangan, singkatau kasaba' dongka alra'e'n bo singkatau ba'lrine' dongka matulrau. ⁴² Yoka ene'bo, kumu' tumana'su mana'kede' yoka kumu' ta'ya mati'ho'nu lrou nge'den i Mabu ngkumu' dongka nao. ⁴³ Manen ingene, bo'bodo'ne kati'ho'a'n ngkumu' kasaba' adabo i tou makatagu'an balrei mati'ho'tenu hibi'ne nge'den kasupu'a'nnu manane'koso', i sie' kasaba' mapata'kede'te bo ta'yamai mapaba'yanu balreine gogahe'n. ⁴⁴ Tou manen ingene, kumu' lragi kasaba' galre'te manebei yoka Ana'nu TOUmata dongka nao naitana' su lrounu ta'yamai kinapi'kihi' ngkumu'. I Tou A'i'ngka' Masusui Bo i Tou A'i'ngka' Dalrai. ⁴⁵ "Yo, i sainu kasaba' i tou a'i'ngka' masusui bo matimumun, kini'a'ngni tou makatagu'a'n mangimoho' maya ho'ho'nu balreine kasaba' mapakika'n si si'de naitana' su o'lrasa'ne ? ⁴⁶ Kina'mpeta'nmai i tou a'i'ngka' ene', yoka sadanu kinasupu'a'nni tou makatagu'a'n, kinadapa'ten i sie' nambelre' mansulrung su a'toho'ne. ⁴⁷ Tanga'-tangada', IYa' mangu'lri' si kumu' kasaba' i Tou makatagu'a'n balrei ene' dongka mangi'a'ng si tou a'i'ngka'ne ene' mapanga'toho'nu maya a'pede'ne. ⁴⁸ Manen ingene, adabo i tou a'i'ngka' dalrai ene' nabahi'ga' su hu'a'ngnu ateine kasaba': " I tou makatagu'a'nku ta'yakan mabei," ⁴⁹ Senebo i sie' kasaba' nalralru'baga' si si'de a'i'ngka'-a'i'ngka' ba'lrine', bo si'de galre' kimaka'n bo nanginu'-ngi'nung natinte'belre' ; ⁵⁰ Bo i tou makatagu'an si si'de singkakoa naisupu' su ta'yamai su pi'kihi' bo su ta'yamai su kati'ho'a'n nsi'de, ⁵¹ bo dongka mapako'toho'nu ti'mbonan nsi'de bo mapamo'so' nsi'de agenu ko'mpolro'nu toumata-toumata kulre'hi'. Kasaba' tampa ene' dongka pai ka'ha' bo mahingkahi'so'nnu isi.