I Yesus Nadolra' si Tou Makati'mbonannu Agama ¹ Pa'lrusu'nu ene', i Yesus nabahi'ga' su toumata da'kelre' bo su tuma'-tu'hu' tuma'-tu'hu'Ne, kasaba': ² Si'de papandeinu Torat bo toumata-toumatanu Farisi kasaba' himo'mpong su kaderani Musa. ³ Tou ingenebo ene', mayanu apamai, su kanga'sa'nu pinabo'ka' nsi'de si kumu', kalri'mu'te ene' bo poso'te su imun kumu'. Yoka manen ingene', adi'e'i mapakalri'mu'nu kakalri'mu'an-kakalri'mu'a'nne yoka si'de galre' mapabahi'ga'ne su mo'hong tou pi'lrasa'ne si'de ta'yamai mapakalri'mu'ne. ⁴ Si'de napangi'ki'tenu papasanen-papasanen mabaha' bo ene' pino'so'te nsi'de su bambangnu toumata ba'lrine'. Yoka manen ingene, si'de ta'yamai mapame'ho'ne agenu lri'ma mbatangen. ⁵ Si'de mapakalri'mu' mayanu kakalri'mu'a'n nsi'de palretene' kabuanu toumata. Si'de kasaba' napalra'mpada'nu a'iki'an-a'i'ki'a'nnu o'mpu' nsi'de bo galre' napalra'mo'nu po'ndolro'nu tumati'nting-tumati'nting bua'nu kaya malrambing nsi'de. ⁶ Si'de kasaba' masibi'nu tampa kadayo'a'n su hu'a'ngnu pati'a'denan, humo'mpong su haho'mpongannu kadera kadunga'en su hu'a'ngnu sinagoga-sinagoga, ⁷ bo si'de masibi'nu bi'han silri' su tampa-tampanu kadakelra'n , bo masibi'nu poke'a'n si tou Rabi bua'nu toumata-toumata. ⁸ Tou manen ingene, kumu' adi'e'i papoke'a'nnu aden i tou rabi yoka galre' pai singkataunu Me'tehe' ngkumu', bo kumu' maya singkatu'hang. ⁹ Adi'e'i mapasaba' su kanga'sa'nu toumata kasaba' i yama ngkumu' su dunia iye' yoka galre' singkataunu nakabelren i Yama ngkumu', kasaba' i Sie'nu pai su dompakon. ¹⁰ Adi'e'i lragi kumu' kasaba' i tou makati'mbonan yoka galre' pai singkataunu Makati'mbonan si kumu', kasaba' a'denNe i Cristo. ¹¹ Manen ingene, i sainu ingkalra'mo' su salra' ngkumu', intabo i sie' mu'a'lri' mananu'su' ngkumu'. ¹² I sainu masibi'nu mapaki'a'ngnu a'o'ne, i sie' kasaba' dongka panga'lrung bo i sainu mapaa'lrungnu a'o'ne i sie' kasaba' dongka paki'a'ngen. ¹³ Nabodi'to'te kumu', kasaba' papandei-papandeinu Torat bo toumata-toumatanu Farisi, ko'mpolro'nu toumata-toumata kulre'hi' ! Kumu' nanu'lrubu' haha'mpede'nu Komalrigi'nu Dompakon su hongo'-hongo'annu toumata yoka kumu' lragi kasaba' ta'yamai sumu' su sene' bo ta'ya lragi mamihei kalru'a'senne si si'de sumu' su sene. ¹⁴ Nabodi'to'te kumu', kasaba' papandei-papandeinu Torat bo toumata-toumatanu Farisi, ko'mpolro'nu ttoumata-toumata kulre'hi' ! Kumu' naga'nsoko ho'ho'nu balrei a'pede'nu si'de nababa'lrute bo agenu o'mpu'-o'mpu' mananai ta'ya matanga'da' (mangkedo). Yoka ene'bo, kumu' dongka makade'a' hahe'po'a'n mangkabaha'. ¹⁵ Nabodi'to'te kumu' papandei-papandeinu Torat bo toumata-toumatanu Farisi, ko'mpolro'nu toumata-toumata kulre'hi' ! Kumu' nasasi'ka'te lra'odo bo ata'hennu tana' yoka manga'ha' toumata singkatau sumu' su agama ngkumu'. Bo, sadanu i sie' nu'a'lri'te ho'ho'nu agama ngkumu', kumu' napakalri'mu'nete kasaba' ana'nu Neraka, yoka kaba'ha'nu bodi'to'ne lrumembo kadau bua'nu kabaha'nu bodi'to'nu a'o' mbatangen. ¹⁶ Nabodi'to'te kumu' hanusu' si'de makati'mbonan buta, yoka napasaba'tenu bahi'ga: " I sainu nate'ba su sa'i'nu Sinagoganu Mabuduata, yoka apamainu ene' kasaba' ta'yamai sikatana'nne. Tou manen ingene, i sainu nate'ba su sa'i'nu bulra'o'nnu Sinagoganu Mabuduata, i sie' dongka ka'i'ki' agenu teba'ne ene'". ¹⁷ Kumu', kasaba' u'to' malru'mu' (bodok) bo kasaba' buta !. Apanu mangkalra'mo' su salra'nu bulra'on manga'se' Sinagoganu Mabuduata kasaba' napalro'a'danu bulra'o'n ene' ? ¹⁸ Bo, "I sainu nate'ba su sa'i'nu taingan (altar), te'bane ene' ta'ya si katana'nne. Tou manen ingene, i sainu nate'ba su sa'i'nu babi'hei su tainganne ene', i sie' kinai'ki' su te'bane ene'." ¹⁹ Ona...kumu' toumata-toumata buta ! Apanu mangkalra'mo' su salra'nu babi'hei manga'se' tainganne kasaba' napalro'a'danu babi'hei ene' ? ²⁰ Yoka ingenebo, i sainu nate'ba su sa'i'nu taingan, i sie' kasaba' nate'ba su taingan bo maya apanu naipo'so' su ti'mboune. ²¹ Bo, i sainu nate'ba su sa'i'nu Sinagoganu Mabuduata, i sie' nate'ba su sa'i'nu Sinagogagnu Mabuduata bo su sa'i'nu i Sie' kasaba' i tou pai su hu'a'ngne. ²² Bo, i sainu nate'ba su sa'i'nu dompakon, i sie' nate'ba su sa'i'nu Dompakonnu Mabuduata, bo su sa'i'ni Sie' kasaba' i Tou nakaho'mpong su ti'mboune. ²³ Nabodi'to'te kumu' ha'nusu' papandei-papandeinu Torat bo toumata-toumatanu Farisi, ko'mpolro'nu toumata-toumata kulre'hi' ! Kumu' kasaba' nami'hei simpulro' (sepersepuluh) bua'nu Selasi, Adas Mami'si', bo Jintan, tou kumu' kasaba' ta'ya namo'so' su imun su apamai-apamainu mangkaba'ha'nu hahe'po'a'n bua'nu Sa'nihi'nu Torat, kasaba': "Katulridanne, Gilridi' Nabaya, bo Parca'ya ngkumu'. Apamai-apamainu iye'nu bo'bodo'nete kinalri'mu'te ngkumu' agenu ta'ya mapaba'yanu apamai-apamainu ba'lrine'. ²⁴ Kumu' makati'mbonan-makati'mbonan buta, kasaba' mapata'pisi'nu tini' bo mapalre'ongnu kumakahoa (Unta) insau !. ²⁵ Nabodi'to'te kumu' ha'nusu' papandei-papandeinu Torat bi toumata-toumatanu Farisi, ko'mpolro'nu toumata-toumata kulre'hi' ! Yoka, kumu' galre' nangi'moko' lro'a'ngnu panganginuman bo panganga'nen kumu', tou hu'a'ngnu panganginuman bo panganga'n kumu' kasaba' nahe'me'nu apamai-apamainu niha'mpasa' bo panganga'ya'n. ²⁶ Kumu'nu toumata-toumatanu Farisi kasaba' Buta ! I'mokai po'na (u'hasa' po'na) hu'a'ngnu panganginuman bo hu'a'ng panganga'nen kumu', palretene' ti'mpalra'nu lro'a'ngne dongka mu'alri' lragi mai'moko'. ²⁷ Nabodi'to'te kumu' ha'nusu' papandei-papandeinu Torat bo toumata-toumatanu Farisi, ko'mpolro'nu toumata-toumata kulre'hi' ! Yoka, kumu' o'ngkamai mapada'-pada'nu palralribingan kasaba' lro'a'ngne binu'ha'nu ka'puhu' mabi'da bo kabua mapi'a' su lro'a'ngne, tou ti'mpalra'nu hu'a'ngne nahe'me' agenu du'hi'-du'hi' mabuhu'nu tou natei bo mayanu dada'lrai. ²⁸ Ingene lragi kumu' ha'nusu' toumata kulre'hi', kumu' galre' kabua su lro'a'ngnenu mapi'a' (banar) su matanu toumata. Tou manen ingene, su ti'mpalra'nu hu'a'ngnu a'o' ngkumu' kasaba' nahe'me' agenu kinakulre'hi'a'n bo kadadalra'i'a'n. ²⁹ Nabodi'to'te kumu' ha'nusu' papandei-papandeinu Torat bo toumata-toumatanu Farisi, ko'mpolro'nu toumata-toumata kulre'hi' ! Yoka, kumu' kasaba' namangonte lralribingan-lralribingan su si'de mababa'lro'-mababalro' bo napahu'aya'tenu babo'he'-babo'he'nu toumata toumata matulridi', agenu ³⁰ bahi'ga' kasaba': " Adabo kami' nabi'a'ken nadi'nga'-di'ngan agenu si'de gagudang kami' su papo'nane, kami' kasaba' ta'yate nanga'lra' ti'a'ha' agenu si'de namamu'no' su si'de mababa'lro'-mababa'lro' ene'." ³¹ Agenu ingene, kumu' dongka makasa'hidi' su a'o' mbatange'n tou kumu' kasaba' naisu'ken su ko'mpolro'nu ana'-ana' nsi'de ha'nusu' namamu'no' su si'de mababa'lro'-mababa'lro' ene'. ³² Senebo, pinato'mpodo'te u'kuhu'nu si'de gagudang papo'na ngkumu'. ³³ Kumu' ha'nusu' u'lre'-ulre' bo'lroso'nu ulre'-u'lre' kulre'hi', kakudanu kumu' dongka makapolro'so'nu a'o' ngkumu' bua'nu hahe'po'a'nnu neraka ? ³⁴ Yoka ingenebo, selreite, IYa' nangi'ngka'te mababa'lro'-mababa'lro'Ku, toumata-toumata matimumun, bo papandei-papandeinu Torat si kumu'. Manenpi'da bua' nsi'de dongka bu'no'n kumu' bo gantongan su salib, manenpi'da su salra' nsi'de dongka lrubagen kumu' su sinagoga-sinagoga ngkumu', bo kumu' dongka mapadadi'ha' si si'de bua'nu Banua insau maida'o' su Banua ba'lrine', ³⁵ Palretene' maya da'ha'nu toumata-toumata banar su dunia ene' kasaba' dongka sinai ngkumu, bua'nu da'ha'ni Habel, toumata banar ene', naida'o' su daha'ni Zakharia, ana'ni Berekya, kasaba' binu'no' ngkumu' su hu'a'ngnu salra'nu Sinagoganu Mabuduata bo taingan (Altar). ³⁶ Tanga'-tanga'da' Iya' mangu'lri' si kumu' tou mayanu apamai-apamainu iye' dongka kahumpagennu taha'na iye'." Hahe'po'a'nnu Yerusalem. ³⁷ " Oh...Yerusalem, Yerusalem, kasaba' namu'no'te si'de mababa'lro' bo napamalre'ngtenu batu su si'de kasaba' kinai'ngka' si sie'. Madi'ma'te Iya' masibi'nu mapaha'nsa'nu ana'-ana' ngkumu' madi'nga'-di'ngan, o'ngkamai i tou mangaha'nu manu mapaha'nsa'nu ana'-ana'ne su hu'a'ngnu kalripi'ne, tou kumu' kasaba' do'i'. ³⁸ Selreite, balrei ngkumu' tina'ndenan ngkumu' bo nua'lri'te malrindigi'. ³⁹ Yoka, Iya' mangu'lri' si kumu' tou bua'nu galre'-galre' i, kumu' ta'yate makabuaken si Sia' maida'o' su lrounu kumu' mabo'ka' "Kina'mpetemai i Sie'nu kasaba' sinao su adennu Mabu."